E Wowonan di Señor: E Perspektiva Bíbliko

Un profesor di universidat di Oxford a spekulá ku nos, e mundu, i tur kos rònt di nos, nada di esei ta real. En kambio, nos ta e kreashonnan digital di un rasa di ekstraterestre ku kòmpiuternan super poderoso.

Miéntras esei ta un teoria interesante, e ta lanta un pregunta krusial: Kiko ta e naturalesa di realidat?

Tin dos posibel kontesta hopi amplio, asta si solamente unu ta rashonal. E promé ta ku e universo, i tur loke tin den dje, inkluyendo nos, djis tei. Nada no a kre’é, nada no a form’é. E ta djis tei. E ta simplemente un echo brutu. No tin niun dios, no tin niun diosnan, no tin nada divino.Realidat ta puramente material, puramente natural. Manera un hende a bisa 2.500 aña pasá (esaki no ta un idea nobo), tin solamente “atomnan i e bashí”.

E otro perspektiva ta ku algun ser (òf sernan) divino a krea e universo. Esei, en realidat, ta parse mas lógiko, mas rashonal, mas sensibel, ku e idea ku e universo djis tei, sin niun splikashon p’e. E posishon akí ta abarká e mundu natural, e mundu di “atomnan i e bashí”, pero e no ta limitá na dje. E ta mustra na un realidat ku ta muchu mas amplio, mas profundo, i mas multifasétiko ku e perspektiva ateista-materialista ku ta ser tendé awendia.

Kiko e siguiente tekstonan tin di bisa tokante e ideanan lantá den e lès di awe? Salmo 53:1, Prov. 15:3, Juan 3:16, Isa. 45:21, Lukas 1:26-35.

________________________________________

Sentral na kualke edukashon kristian ta e realidat no djis di Dios, sino di e tipo di Dios ku E ta, un Dios personal kende ta stima nos i kende ta interaktuá ku nos. E ta un Dios di milagernan kende, aunke E ta usa leinan natural, no ta restringí pa e leinan ei i kende por trasendé e leinan ei ora E ke (manera den e konsepshon bírgen di Hesus). E siñansa di e perspektiva akí ta spesialmente pèrtinènt den nos tempu pasobra asina tantu di e mundu intelektual, deklarando (eróneamente) ku siensia ta sosten’é, abiertamente i sin diskulpa ta siña e perspektiva ateista i naturalista.

Hopi aña pasá un pensadó i eskritor aleman yamá Gottfried Wilhelm Leibniz a hasi loke ta probablemente e pregunta di mas básiko i fundamental posibel: “Dikon tin algun na lugá di nada?”

Kon e siguiente tekstonan ta kontestá e pregunta di Leibniz? Gen. 1:1; Juan 1:1-4; Eks. 20:8-11; Rev. 14:6, 7; Job 12:7-10.

Ta fasinante kon den Beibel e eksistensia di Dios ta ser djis asumí. Génesis 1:1 no ta kuminsá ku un kantidat di argumentonan lógiko (aunke hopi ta eksistí) pa e eksistensia di Dios. E ta solamente asumí Su eksistensia (lesa tambe Eks. 3:13, 14), i for di e punto di salida ei, Dios komo Kreador, e Beibel, i tur e bèrdat revelá den su páginanan ta desaroyá.

E doktrina di kreashon ta fundamental tambe na kualke edukashon kristian. Tur kos ku nos ta kere komo Kristiannan, tur kos, ta basa riba e doktrina di e kreashon di seis dia.

Beibel no a kuminsá ku un deklarashon tokante ekspiashon, òf tokante e lei, òf tokante e krus, òf tokante e resurekshon, òf tokante e Segundo Binida. Nò, el a kuminsá ku un deklarashon tokante Dios komo Kreador, pasobra niun di e otro siñansanan akí tin algun sentido apart for di e realidat di Dios komo nos Kreador.

Por lo tantu, atrobe, un perspektiva bíbliko mester enfatisá e importansia di e doktrina di kreashon. E énfasis akí tambe ta bira hopi importante, pasobra e siñansa a konfrontá un asalto direkto den nòmber di siensia. Evolushon, bion di aña di bida evolushonando sporádikamente, tur pa kasualidat, a kasi destruí fe den Beibel pa miónes inkalkulabel. Ta difísil pa imaginá un siñansa mas kontrali na e Beibel i na e fe kristian en general ku evolushon. Ta p’esei e idea ku evolushon por, di un òf otro manera, ser hasí pa harmonisá ku e doktrina bíbliko di kreashon ta ainda mas pió ku evolushon ateista. E por ser hasí, no sin hasi chèrchi di e Beibel i di e fe kristian komo un totalidat.

Manera bisá den e introdukshon, niun di nos ta mira e mundu for di un posishon neutral. Por ehèmpel, un ateista ta wak un regenbog den laira i ta mira nada sino un fenómeno natural. E no tin niun nifikashon otro ku for di e loke hende disidí di dun’é. Den kontraste, un hende ku ta mirando e for di un perspektiva bíbliko no ta mira djis e fenómeno natural, e awa i lus interaktuando, sino tambe un reafirmashon di e promesa di Dios pa no destruí e mundu atrobe pa medio di awa (Gen. 9:13-16). “Kon grandi e superioridat di Dios i Su kompashon ta pa Su kriaturanan ku ta faya ora E ta pone e bunita regenbog den e nubianan komo un muestra di Su pakto ku hende ... . Tabata e propósito di Dios ku ora e yunan di generashonnan despues mester puntra e nifikashon di e glorioso bog ku ta travesá e shelunan, nan mayornan mester ripití e historia di e Diluvio, i bisa nan ku e Haltísimo a dobla e bog i a pon’é den e nubianan komo un siguransa ku e awanan nunka mas lo desbordá e tera.” — Ellen G. White, Patriarchs and Prophets, p. 106.

Pa Atventistanan di e di Shete dia e Beibel ta keda e teksto fundamental di nos fe. E ta siña e perspektiva, e “filter”, pa medio di kua nos mester mira i komprondé e mundu, kua por ta un lugá hopi alarmante i kompliká. Skritura ta krea e malchi pa yuda nos komprondé mihó e realidat ku nos ta haña nos mes aden, kua nos ta parti di dje, i hopi bia ta ser konfundí i desorientá dor di dje.

Ki bèrdatnan ta ser hañá den e siguiente tekstonan ku por yuda nos komprondé e realidat ku nos ta eksistí aden mihó? Efe. 6:12; Marko 13:7; Rom. 5:8; Rom. 8:28; Ekl. 9:5; Rev. 20:5, 6.

Komo Atventistanan di e di Shete dia nos mester pega firmemente na e siñansanan di e Beibel, pasobra esaki ta e bèrdat revelá di Dios na hende, splikando pa nos hopi kos tokante e mundu ku, di otro forma, nos lo no a konosé òf komprondé. Por lo tantu, tur edukashon kristian mester ta implantá den e Palabra di Dios, i kualke siñansa kontrali na dje mester ser rechasá.

Mes krusial ku e doktrina di kreashon ta pa nos fe, e doktrina no ta paresé su so, spesialmente den Tèstamènt Nobo. E ta bin hopi biaha akoplá ku, asta totalmente mará na, e doktrina di redenshon. I esei ta pasobra, frankamente, den un mundu di piká kaí i morto, kreashon so no ta sufisiente. Nos ta biba, nos ta lucha, nos ta sufri (nos tur ta hasi esei), i despues, kiko? Nos ta muri, finalmente resultando no diferente for di kadavernan di animal lagá na kantu di kaminda.

Kon grandi esei ta?

Por lo tantu, nos tin, komo krusial pa nos espektativa, e doktrina di redenshon tambe, i esei ta nifiká ku nos tin Hesukristu i E krusifiká i resusitá den sentro di tur loke nos ta kere.

Lesa Juan 1:1-14. Kiko e tekstonan akí ta bisando nos tokante ken Hesus tabata i loke El a hasi pa nos?

Wak tambe e mensahe di e promé angel: “Despues mi a mira un otro angel bulando meimei di shelu, teniendo e evangelio eterno pa prediká na esnan ku ta biba riba tera, na tur nashon, tribu, lenga, i pueblo, bisando ku un bos haltu: ‘Teme Dios i duna gloria na djE, pasobra e ora di Su huisio a yega; i adorá E kende a traha shelu i tera, laman i fuentenan di awa’” (Rev. 14:6, 7, NKJV). Nota ku e “evangelio eterno” ta konektá direktamente na Dios komo e Kreador. I ora nos realisá ku e Dios kende a krea nos ta e mesun Dios kende, den karni humano, a karga e kastigu pa nos piká riba Su mes, no ta straño ku nos ta ser yamá pa ador’E. Ki otro kontesta mester tin for di nos ora nos realisá kon nos Dios ta realmente?

Pa e motibu akí, Kristu i E krusifiká mester permanesé den un posishon hopi importante den tur loke nos ta siña, un siñansa ku, de echo, mester inkluí e Segundo Binida tambe, pasobra e promé binida di Kristu no ta hasi nos realmente un gran kantidat di bon sin esun di dos, bèrdat? Hende por argumentá, for di Skritura, ku e promé i segundo binida di Kristu ta dos parti di un evento, e plan di salbashon.

Añanan pasá, na Fransia, e nashon tabata debatiendo e kuestion di kastigu kapital: e mester ser abolí? Abogadonan pa su abolishon a kontaktá un famoso eskritor i filósofo franses yamá Michel Foucault i a pidié pa skibi un editorial na nan fabor. Loke el a hasi, sinembargo, tabata boga, no pa abolí solamente e kastigu di morto, sino pa abolí henter e sistema di prizòn kompletamente i laga tur e prizoneronan bai liber.

Dikon? Pasobra pa Michel Foucault tur sistema di moralidat tabata meramente adaptashonnan, ideanan humano poné na lugá dor di esnan na poder pa asina kontrolá e masanan. Por lo tantu, e kódigonan moral no tabatin legitimidat real.

Aunke kon ekstremo su posishon tabata, loke nos ta mira aki ta un konsekuensia lógiko di un problema ku realmente no ta asina nobo. Moises a dil kuné den Israel antiguo míles di aña pasá. “Boso lo no hasi ètòl manera nos ta hasiendo aki awe, tur hende hasiendo loke sea ta korekto den su propio bista” (Deut. 12:8, NKJV; lesa tambe Huesnan 17:6, Prov. 12:15).

Sinembargo, si nos no mester hasi loke ta korekto den simplemente nos propio bista, es desir, nos mes no ta hustu, santu, i ophetivo sufisiente pa sa kiko ta moralmente korekto, e ora ei kon nos sa kiko hasi? E kontesta, naturalmente, ta ku e Señor kende a krea nos a duna nos tambe un kódigo moral pa biba a traves di dje. Kisas nos bista no por hañ’é korekto, pero Señor semper ta hañ’é.

Kiko e tekstonan akí ta siña nos tokante kondukta moral? Deut. 6:5, Marko 12:29-31, Rev. 14:12.

Si nos ta bai hasi redenshon sentral na nos perspektiva kristian, e ora ei (manera nos a mira siman pasá) e lei di Dios, e Dies Mandamentunan, mester ta sentral tambe. Despues di tur kos, for di kiko nos a ser redimí si no ta piká, kua ta kibramentu di lei (Rom. 3:20)? E evangelio realmente no tin sentido sin e lei di Dios, kua ta un rason ku nos sa ku e lei ainda ta obligatorio pa nos, apesar di su desabilidat pa salba nos. (Ta p’esei nos tin mester di e evangelio.)

Pa e motibu ei, tur edukashon atventista di e di shete dia mester enfatisá loke Ellen G. White a yama “e eternidat di e lei” (The Great Controversy, p. 63), kua ta inkluí e Sabat. Si edukashon mester yuda restourá e imágen di Dios den nos mes tantu posibel den e bida akí, e ora ei asta na e nivel di mas básiko e lei di Dios mester ser sostené, den lus di e ehèmpel di Kristu, komo e kódigo moral ku ta mustra nos kiko berdaderamente ta korekto den bista di Dios.