Mas Lès For di e Gran Maestro

Lesa Génesis 3:1-11. Dikon Dios lo a puntra Adam: “Unda bo ta?”

Historianan típiko di e Diluvio ta deskribí e fruta komo un apel. Pero esei no ta loke e teksto ta bisa. E tabata simplemente e “fruta di e palu” (Gen. 3:3). E tipo di fruta no ta importá. Kome for di e palu akí tabata prohibí pasobra e palu tabata para pa algu. E tabata para pa e tentashon pa pusha Dios un banda i pa deklará: “Mi por ta e midí di mi propio bida. Mi por ta Dios pa mi mes. Mi tin outoridat riba e Palabra di Dios”.

I, bastante sigur, ora e kolebra, òf “slan”, a logra pa Adam i Evan kome e fruta di e palu, nan bida a slep naturalmente. I despues, ora nan a sinti Dios serka, nan a purba skonde “entre e palunan di e hòfi” (Gen. 3:8, NKJV).

Kon straño ku Dios lo a puntra Adam: “Unda bo ta?”Dios siguramente tabata sa unda e ta. Kisas Señor a hasi e pregunta pa yuda Adam i Eva realisá presis loke nan tabata hasiendo, skondiendo, komo un resultado di loke nan a hasi. Es desir, E tabata yudando nan mira e resultadonan tristu di nan akshonnan.

Lesa Romanonan 5:11-19, kaminda Pablo, hopi biaha, direktamente ta konektá loke Adam a hasi den Eden ku loke Hesus a hasi riba e krus. Kiko esaki mester bisa nos tokante kon Hesus a bin pa deshasí loke Adam a hasi?

Hende por argumentá ku e plan di salbashon ta e reakshon di Dios riba e kontesta di Adam i Eva. Nan tabata skondiendo for di Dios den e bèrgwensa i e kulpabilidat di nan piká, i Dios a bin pa reskatá nan. Den nos propio maneranan, nos tambe a hasi mesun kos, i Hesus a bin pa reskatá nos. Por lo tantu e pregunta :Unda bo ta?” por a ser puntrá di nos tambe. Es desir, unda bo ta, den bo piká i kulpa, den relashoná ku Hesus i loke El a hasi pa reskatá bo for di dje?

Lesa Génesis 28:10-17. Kiko ta e konteksto di e historia akí, i kiko e ta siña nos tokante e grasia di Dios pa esnan ku, den un sentido, ta na kareda for di nan pikánan?

Den su trato ku restu di e famia, Jacob, ku yudansa di su mama, a kai den engañonan kruel, i awor e ta pagando p’e. Su ruman hòmber ta respirando menasanan violento kontra dje, i e ta bira un fugitivo, a bai den direkshon di e kas di su tio na Haran. Tur kos ta instabil i spantoso.

Un dia Jacob ta kana den skuridat di atardi, i despues e skuridat. E ta leu for di tur kos, ku solamente shelu pa dak. Hañando un pieda pa kusinchi, el a pega soño. Pero inkonsiensia blanko di soño ta ser interumpí pronto. E soño famoso ta bin, i e trapi, ku e ta mira ta sosegá riba tera i ta ekstendé te na shelu. Angelnan ta subiendo i bahando riba dje.

Despues el a tende un bos bisa: “Ami ta Señor, e Dios di Abraham”. E bos ta sigui pa ripití promesanan ku Jacob ta konosí kuné for di e tradishon familiar. Bo desendientenan lo bira grandi. Nan lo ta un bendishon pa tur e famianan di tera. “Sa ku Mi ta ku bo”, e bos ta kontinuá, “i lo warda bo unda ku bo bai, ... pasobra lo Mi no laga bo te ora ku Mi a hasi loke Mi a primintí bo” (Gen. 28:15, NRSV).

Ellen G. White a skibi di kon Pablo, hopi mas despues, “ta mira e trapi di e vishon di Jacob, representando Kristu, kende a konektá tera ku shelu, i hende finito ku e Dios infinito. Su fe ta ser fortalesé miéntras e ta yama na mente kon patriarkanan i profetanan a dependé riba Esun kende ta su sosten i konsolashon, i pa ken e ta dunando su bida.” — The Acts of the Apostles, p. 512.

Jacob ta spièrta, i e ta bisa su mes: “Siguramente Señor ta den e lugá akí, i mi no tabata sa esei” (Gen. 28:16, NKJV). E lo no lubidá e e lugá nunka, i e ta dun’é un nòmber. Despues e ta hura lealtat di bida largu na Dios.

Di tur e komiensonan di kapítulo den Tèstamènt Nobo, ningun ta mas famoso ku esaki: “Den prinsipio tabata e Palabra, i e Palabra tabata ku Dios, o e Palabra tabata Dios” (Juan 1:1). I Juan 1 pronto ta hiba bo na e frase inolvidabel: “I e palabra a bira karni i a biba meimei di nos, i nos a mira Su gloria, e gloria manera di e úniko yu di un tata, yen di grasia i bèrdat” (Juan 1:14, NRSV).

Lesa Juan 1:1-14. Kiko e tekstonan akí ta bisando tokante ken Hesus tabata i loke E tabata hasiendo aki? Kiko esaki mester bisa nos tokante Hesus komo e gran ehèmpel di un maestro?

E mesun Dios kende a papia ku Adam i Eva den e hòfi, i ku Jacob for di aleu, awor ta aparesé komo un persona. Dios, Tèstamènt Nobo ta bisa, tabata personifiká den Hesus. A traves di Hesus nos por siña tokante e boluntat di Dios i e kaminda di Dios, pasobra Hesus tabata Dios.

E kapítulo ta sigui bisa kon Juan Boutista tabata un predikadó asina iresistibel ku asta lidernan religioso for di Herusalèm tabata sospechá ku kisas e por tabata un hende spesial. Pero e tabata preparando e kaminda pa un hende mas grandi ku e mes. Un hende asombrosamente spesial tabata na punto di aparesé, i e, Juan Boutista, lo tabata indigno di “lòs e feter di su sandalia” (Juan 1:27, NRSV).

E siguiente dia el a mira Hesus i a deklará ku E tabata e “Yu di Dios”. E dia ei, i tambe un dia despues, el a yama Hesus “e lamchi di Dios”.

Tambe, dos di e siguidónan di Juan Boutista a disidí di sigui Hesus nan mes. I ora Hesus puntra kiko nan tabata buskando, nan a yam’E “‘Rabi’ (kua tradusí ta nifiká Maestro)” (Juan 1:38, NRSV).

Hesus, anto, ta un rabi, un maestro, pero nunka tabatin un maestro humano manera E, pasobra, atrobe, E ta Dios. Den otro palabra, Dios a baha bin na humanidat den forma di un ser humano, i den e forma ei El a funshoná komo un rabi, un maestro. Nada straño ku Ellen White a yama Hesus “e maestro di mas grandi ku mundu hamas a mira.” — Signs of the Times, 10 di yüni 1886. Despues di tur kos, e Maestro akí tabata Dios.

Hesus ta e Gran Maestro. E berdadero karakter di Dios ta bria den Su siñansa, i tambe den Su bida. Pues, un historia di Evangelio ta ainda mas remarkabel pa mustra ku ora un hende papia bèk ku Hesus, ainda E ta skucha.

Lesa e historia di e enkuentro di Hesus ku un muhé pagano (òf “Kanaanita”) for di e region di Tiro i Sidon (Mat. 15:21-28, Marko 7:24-30). Nota ku e hòmbernan den e sírkulo di Hesus ta sin pasenshi kuné, i asta Hesus ta parse di ta rechas’é. Kiko bo ta pensa di e kurashi di e muhé? Kiko e historia akí ta siña nos tokante kon Hesus Mes a siña otronan?

Hesus tabata serka di Tiro i Sidon. El a krusa bai den un lugá kaminda strañeronan tabata abundá i tenshon étniko tabata grandi. E habitantenan di e siudat ku tabata papia griego tabata despresiá kunukeronan hudiu den e kampo, i e kunukeronan hudiu tabata despresiá nan bèk.

No hopi tempu promé Herodes, e gobernador marioneta di Galilea, e teritorio di orígen di Hesus, a ehekutá Juan Boutista. Pero Juan tabata un hòmber ken su vishon Hesus a kompartí pa gran parti, i e ehekushon tabata parse menasante. Hesus a bin kara kara ku e peliger di Su mishon.

Sintiendo e tenshon, Hesus a drenta e kas, sperando, asina Marko ta bisa den su relato, ku niun hende lo a sa ku E tabata ei (Marko 7:24). Pero e muhé a hañ’E.

Den e kultura di e tempu i lugá ei, un muhé no tabatin derecho di afirmá su mes. Ademas, e muhé akí tabata pertenesé na un kultura i grupo étniko ku Hudiunan tabatin tiki tempu p’e, i esaki a pon’é na un desbentaha adishonal.

Pero e yu muhé di e muhé tabata malu. E tabata ke yudansa, i el a persistí den pidi p’e.

Hesus a deskart’é. “No ta hustu pa tuma e kuminda di e yunan i tir’é pa e kachónan”, El a bisa (Mat. 15:26, NRSV). E remarke por a heridá su sintimentunan.

I despues algu remarkabel a sosodé. E ora ei el a respondé. E tabata konosí ku kachó, diferente for di e Hudiunan, ku lo no tabatin nan komo bestianan di kas, i el a bisa: “Sí, Señor, sinembargo, asta e kachónan ta kome e wiriwirinan ku ta kai for di e mesa di nan shon” (Mat. 15:27, NRSV).

Su remarke a hasi un diferensia. E tabata parse iresistibel. I Hesus ta kura su yu.

Hesus i Su siguidónan a bira direkshon pa Herusalèm. Meskos ku Herodes tabata preokupá tokante Juan Boutista, e outoridatnan, inkluyendo Herodes, awor tabata preokupá tokante Hesus. Su siguidónan tabata inkluí e pobernan i otro hendenan vulnerabel sperando desesperadamente pa kambio.

Hesus tabata ke riba tur kos pa trese speransa na e mundu. Pero E tabata sigur, p awor, ku esnan ku mas poder i privilegio tabata bai hasi loke nan tabata por pa invalidá e mishon ei. Nan no tabata ke pa e logra.

Pa loke ta trata e sírkulo interno di e studiantenan di Hesus, e diesdos disipelnan, nan tabata parse ansioso pa ta na banda di Hesus. Pero na mes momentu nan tabata parse konfundí, òf siegu. Por ehèmpel, den Marko 8:31-33, e Gran Maestro ta desafiando Su studiantenan pa mira kosnan ku ta difísil pa nan mira. Es desir, den hopi forma nan tabata ainda spiritualmente siegu na loke realmente tabata importá (lesa Marko 8:37).

Tur esaki ta senario pa e enkuentro di Hesus ku un hende ku ta mira.

Lesa e historia di Hesus i e kurashon di Bartimeo, un pididó di limosna siegu. (Lesa Marko 10:46-52.) Nota e gran miserikòrdia ku Hesus ta demostrá. Awor, konsiderá kon e deseo di e hòmber siegu ta hiba na su desishon pa sigui Hesus riba kaminda pa Herusalèm. Bo ta kere ku Marko por ta pintando un kontraste entre Bartimeo i e otro disipelnan? Kon e historia akí ta tira lus riba loke ta nifiká pa bo pa ta reseptivo na e Gran Maestro?

Bartimeo tabata ke a mira e krùl den kabei di un beibi i e koló di trigo na kosecha. Pero mira ta inkluí mas ku djis loke ta físiko solamente. E historia akí, den otro palabra, ta tokante mira spiritualmente. E ta tokante komprondé, tokante realisá ken e Gran Maestro ta realmente. Bista físiko ta un kos. E ta un kos importante, i Hesus sa esei. Pero Hesus sa tambe ku e deseo di mas profundo di un persona ta pa un bida nobo i mihó.

Lesa Hebreonan 5:12-14. Kiko esaki ta siñando nos tokante edukashon berdadero?