Edukashon i Redenshon

Lesa Génesis 1:26, 27 i Génesis 5:1, 3. Kiko e tekstonan akí ta siña nos tokante kon Dios originalmente a krea humanidat i despues kiko a sosodé ku humanidat despues di piká?

E frase "e imágen di Dios" a koutivá intérpretenan di Beibel pa siglonan. Kiko ta e imágen akí den kua e promé sernan humano a ser kreá? Por ehèmpel, esaki ta nifiká ku Dios a wak den un spil i a forma Su kreashon nobo pa parse E mes? Of e ta nifiká ku sernan humano ta mas manera Dios ku tur otro formanan di bida ta? Of e ta referí na un similaridat i kompatibilidat spiritual i intelektual entre e Kreador i Su kreashon humano? E Skrituranan no ta duna ningun splikashon presis di e ekspreshon akí aunke eruditonan a derivá for di Skritura hopi interpretashonnan di kiko e por tabata nifiká. Sinembargo, nos por mira ku, despues di piká, e imágen akí a ser kambiá, pa kua motibu Ellen G. White a skibi ku e meta di edukashon ta pa restourá den hende e imágen di su Kreador (Education, p. 14-16).

Kon edukashon por logra un meta remarkabel asina?

Na promé lugá, nos mester kòrda ku Dios a traha nos pa nos tin un relashon kunE , algu manera mayornan tin ku nan yunan. El a traha nos den Su imágen , di mes manera ku mayornan humano tin yunan den nan imágen (Gen. 5:1), pa asina E por lanta nos pa ta Su yunan, ku ta pertenesé na Su famia; E por komuniká ku nos i forma un relashon duradero ku nos. E imágen di Dios, por lo tantu, ta mas un "imágen mental" ku ta kapasitá dos ser, un divino i e otro humano, pa tin un enkuentro di mente. Esaki ta presisamente loke ta sosodé den edukashon, promé na kas entre mayornan i yunan, i mas despues na skol ora maestronan asumí e trabou di edukashon. Evidentemente e proseso di edukashon akí ku nos konosé asina bon tabata e intenshon di Dios ora, distinguiendo nos for di hopi otro forma di bida, El a traha nos den Su propio imágen, El a hasi esei pa asina E por siña nos i nos por siña for di djE, te ora ku Su imágen (Su mente) ser reflehá den esun di nos.

E historia di redenshon ta un historia di edukashon for di kreashon te na enkarnashon, i for di enkarnashon te na re-kreashon. Dios ta un maestro, i shelu ta un skol pa tur tempu (lesa Ellen G. White, Education, p. 301). Kiko ta e implikashonnan di e pensamentu akí pa nos kompromiso ku edukashon kristian na kas, den iglesia, na skol, na universidat i a lo largu di bida?

Beibel ta usa hopi ekspreshon pa deskribí Hesus. E ta e Yu di Dios, e Mesias, e Yu di hende, e Salbador, e Redentor, Señor, e Lamchi di Dios, djis pa menshoná un par. Pero pa e hendenan ku a konos'E mihó durante Su tres aña i algu di ministerio públiko na Hudea i Galilea, E tabata un maestro. Nan a yam'E "Maestro" òf "Rabi". Tur dos ta nifiká mesun kos, esta, "Maestro".

P'esei, e profeshon di maestro i e trabou di siña òf instruí mester tabata un forma partikularmente adekuá pa Hesus ehersé Su ministerio públiko. Di algun manera Su obra di redenshon ta similar na e trabou di siñamentu. Mas ainda, el a ser pronostiká pa e profeta di e evangelio.

Lesa Isaias 11:1-9. Kiko e ta revelá tokante e ròl di siña di Hesus?

Un di e profesianan mesiániko di mas sorprendente den e Skrituranan ta ser hañá den Isaias 11. Versíkulonan 1—3 ta deskribí e Mesias ku ta biniendo den términonan edukashonal, un hende ku ta trese konosementu, konseho, sabiduria, i komprondementu. Henter e pasashi ta konkluí ku e promesa remarkabel akí: "Tera lo ta yen di e konosementu di Señor, manera e awanan ta kubri laman" (Isa. 11:9). Kisas tabata siñansanan di Skritura asina ku a inspirá Ellen G. White den su buki riba edukashon pa nota ku e trabou di edukashon i e obra redenshon ta unu (lesa Education, p. 30).

Lesa Juan 3:1—3. Nikodemo a dirigí su mes na Hesus komo un rabi, i mas despues el a identifiká e donnan di siña di Hesus komo biniendo di Dios pa motibu di e señalnan ku Hesus tabata ehekutá, esta, Su milagernan i persepshonnan den e nifikashon di bida. Hesus a aseptá, si no ta e título duná na djE, e ora ei seguramente ta e orígen di Su donnan di siña ora El a respondé Nikodemo ku e mester nase di nobo pa mira (komprondé, komo tambe drenta) e reino di Dios. Esaki ta nifiká ku e outoridat di siña otronan, asta den kaso di Hesus, ta bin di Dios.

Seguramente siñamentu ta un don di Dios. El a ser enkargá pa Dios, el a ser adoptá pa Hesus, i e ta ser rekonosé pa esnan ku ta ser siñá di tin outoridat divino.

Lesa 2 Timoteo 3:14—17. Kiko e tekstonan akí ta siña nos tokante e ròl di Skritura den edukashon kristian?

E palabra pa e promé parti di Beibel, e Torah, tin biaha ta ser tradusí komo "e Lei", parsialmente pasobra tin hopi lei den e bukinan akí. Pero Torah realmente ta nifiká "siñansa" òf "instrukshon". E komprondementu akí ta hopi diferente for di loke hopi ta pensa e "lei" den Beibel ta trata di dje, esta, regla- i regulashonnan ku nos mester sigui pa permanesé den e bon grasianan di Dios. No ta asina; e lei ta intenshoná komo material di siñansa ku ta trata ku kon pa biba bida di forma eksitoso i seif den e relashon di pakto ku tabata e intenshon di Dios ora El a krea nos na promé lugá.

E siguiente dos sekshonnan di e Beibel hebreo, e profetanan, ta reportá riba kon bon e pueblo di Dios tabata dominá e material edukashonal akí i tabata biba di akuerdo kuné (e profetanan anterior, òf bukinan históriko), i loke nan mester a siña for di e material edukashonal akí (e profetanan posterior). E sobrá parti di e Tèstamènt Bieu (yamá e "eskritonan" na hebreo) ta yen di ehèmpelnan di maestronan i studiantenan eksitoso i ménos eksitoso huntu ku nan eksperensianan edukashonal. Ehèmpelnan di éksito edukashonal den e bukinan akí lo tabata Esther, Ruth, Daniel i Job. Entre e frakasonan lo tabatin e kuater amigunan di Job. Naturalmente, e buki di Salmonan ta un buki di himno, pero asta e tin por lo ménos tres salmo edukashonal: Salmo 1, Salmo 37 i Salmo 73.

E Evangelionan ta abundá ku materialnan intenshoná pa propósitonan edukashonal, spesialmente den e parábolanan di Hesus. Hopi di e kartanan di Pablo ta kuminsá ku un proklamashon fuerte di e evangelio, pero ta terminá ku material edukashonal, lèsnan práktiko tokante bida diario pa Kristiannan. E buki di Revelashon ta yen di materialnan edukashonal. Por ehèmpel, henter e revelashon, òf divulgashon di e futuro di e iglesia di Kristu, ta ser revelá den un buki ku solamente e Lamchi di Dios, Hesus, e Gran Maestro, por habri (Rev. 5:1—5).

E palabranan pa skol, estudio, i edukashon ta ta ser komprondé di forma kla den nos tempu, pero nan no ta komun den Beibel. Tin un palabra, sabiduria/sabí, ku ta muchu mas komun. Por ehèmpel, Tèstamènt Bieu ta hasi menshon di hòmber- i muhénan sabí (2 Sam. 14:2, Prov. 16:23).

Lesa 1 Reinan 4:29-34. Kiko e teksto akí ta siña nos tokante di e importansia di sabiduria?

Rei Salomon ta ser destaká komo un hòmber hopi sabí ku a papia tokante bida di animal i mata i a pronunsiá proverbionan ku gran sabiduria, ku ta nifiká komo un hòmber di edukashon (1 Reinan 4:29—34 ). E bukinan di Proverbionan i Eklesiastés ta kontené hopi siñansa sabí riba numeroso temanan, atribuí na Salomon komo tambe na otro maestronan sabí di e tempunan antiguo (Prov. 1:1, Prov. 25:1, Prov. 30:1, Prov. 31:1).

Di akuerdo ku Beibel, sabiduria ta hopi similar na nos edukashon awe. E ta algu ku un hende ta siña for di mayornan i maestronan, spesialmente miéntras e ta yòn (Ekl. 12:1), pero en realidat un persona ta akumulá sabiduria a lo largu di bida. Na di dos lugá, sabiduria generalmente tin un banda práktiko na dje; por ehèmpel, siña for di e vruminganan ku ta spar den zomer pa asina tin sufisiente pa wenter (Prov. 6:6—8).

Sinembargo, sabiduria no ta solamente práktiko; e tin un banda teorétiko tambe na dje, pasobra e ta kuminsá ku fe den Dios i ta sigui sierto prinsipionan fundamental (Prov. 1:7). Sabiduria ta yuda nos biba di forma responsabel i pa benefisio di otronan, i tambe e ta yuda protehá nos for di desgrasia. Finalmente, meskos ku edukashon awe, sabiduria no ta kontestá tur e preguntanan ku nos por tin, pero e ta kapasitá nos pa ta satisfecho ku loke nos sa miéntras nos ta sigui buska loke ainda ta deskonosí, i esei ta un bon posishon for di kua nos por siña konosé Dios i konfia den Su grasia. Di akuerdo ku Jeremias 18:18, e ròl di e maestro sabí ta ser konsiderá igual ku e ròlnan di e saserdote i profeta. Tur tres ta kompartí mensahenan di Dios na Su pueblo, den forma di instrukshon den e lei, konseho edukashonal, i mensahenan spesial di Dios.

Un di e prinsipionan di edukashon remarkabel den Skritura ta surgí ora Hesus, e Gran Maestro, ta prepará pa bandoná Su studiantenan òf disipelnan. Nan tabata huntu kunE durante di tres aña i mei, aproksimadamente e kantidat di tempu ku nos ta pasa den un edukashon sekundario òf universitario. Na final di kada periodo, dependé di e persona, studiantenan hopi biaha ta ser konsiderá kla pa manehá riba nan mes.

Pero Hesus tabata sa mihó, i asina El a proveé Su siguidónan ku edukashon konstante i kontinuo bou di tutela di Spiritu Santu. Den otro partí ku maestro òf guia ta ser identifiká komo Konsoladó òf Abogado (na griego, paracletos), ku lo ser duná na e siguidónan di Hesus permanentemente (Juan 14:16,17). E ta ser identifiká komo e Spiritu di Bèrdat. Miéntras Spiritu Santu no ta ser identifiká komo un edukadó, e obra di e Spiritu siguramente ta edukashonal, partikularmente ora e ta relashoná ku buska i haña e bèrdat.

Lesa 1 Korintionan 2:1-16. Kiko Pablo ta bisando ku ta asina importante den e konteksto di edukashon?

Pablo ta kuminsá kòrdando e iglesia na Korinto ku e promé biaha ku el a bin serka nan el a papia di nada sino Hesu-Kristu i Su krusifikashon (1 Kor. 2:2), ningun sabiduria inteligente, solamente proklamashon di e evangelio. Pero esei no tabata e final di dje (1 Kor. 2:6), pasobra unabes e Kristiannan nobo akí a madurá, e apòstel lo a bin bèk pa siña nan sabiduria, e kosnan ku Dios a skonde promé ku e mundu a kuminsá (1 Kor. 2:7), asta e kosnan profundo di Dios (1 Kor. 2:10). Tur lo ser studiá bou di e guiansa di e Spiritu di Dios segun ku E ta uni ku e spiritu di esun ku ta siña.

Kon profundo e estudio ei lo ta, i kuantu siñansa lo ta habrí pa esnan ku ta ser guiá pa e Spiritu? E kapítulo ta konkluí ku un sita di profeta Isaias: "Ken a dirigí e Spiritu di Señor, òf komo Su konsehero a siñ’E?" (Isa . 40:13, NKJV). E profeta, papiando ku hendenan komun di su tempu lo a bisa ku ningun hende por hasi esei. Pero Pablo a koregí e persepshon ei konkluyendo: "Nos tin e mente di Kristu," ku ta nifiká ku Kristiannan yená ku e Spiritu tin akseso asta na e mente di Dios, i pues na kualkier kantidat di siñamentu i komprondementu (1 Kor. 2:10—13) ku lo ta nesesario pa konosé e kaminda di hustisia.