Iglesia i Edukashon

Historia ta ser kontá di un rabi ku tabata wak den e wowonan yen di soño di e hóben ku tabata sintá den su klas, i a puntra: "Studiantenan, ki ora un hende sa ki ora nochi a kaba i dia a kuminsá?”

Vários di e studiantenan yen di koutela a hisa nan mannan. "Rabi," un a puntra, "ta ora bo por bisa e diferensia entre un palu di figo i un palu di oleifi?"

"Nò".

Un otro studiante a hisa su man: "Rabi, ta ora bo por bisa e diferensia entre un karné i un kabritu?"

Despues di a skucha un gran kantidat di kontesta, e rabi a anunsiá: "Studiantenan, un hende sa ku nochi a kaba i dia a kuminsá ora bo por wak un kara ku bo no a mira nunka promé i rekonosé e strañero komo un ruman hòmber òf muhé. Te na e momentu ei, no importá kon kla e dia ta, ainda ta anochi".

Lesa Lukas 10:30—37. Kiko tabata e punto ku Hesus tabata enfatisando ku e historia akí? I kiko esaki mester siña nos tokante loke mester ta parti di kualke edukashon kristian berdadero?

Komo Atventistanan di e di Shete Dia, nos a ser bendishoná ku un abundansia di lus i bèrdat doktrinal (e estado di e mortonan, e Sabat, 1844 i e huisio, e gran kontroversia, pa menshoná un par di siñansa) ku asta mayoria di e mundu kristian ainda no ta komprondé. I tòg, aunke kon krusial e bèrdatnan akí ta, ki bon nan ta hasi nos si nos no ta kariñoso ku hende, si nos ta desplegá prehuisio kontra otronan, i si nos ta permití e prehuisionan kultural i sosial di nos ambiente pone nos trata otronan komo inferior?

Edukashon kristian berdadero, a lo ménos, mester pone nos lanta riba e debilidatnan i maldatnan humano akí, i mira otronan manera Kristu ta mira nan, sernan pa ken El a muri, sernan ken nan pikánan El a karga riba e krus, sernan pa ken El a paga un preis infinito. Si nos halsa e krus, manera nos mester hasi, e ora ei nos lo mira e balor i dignidat di kada ser humano i, idealmente, trata nan manera nan meresé berdaderamente, teniendo kuenta ku e balor ku Dios a pone riba nan. Edukashon kristian mester inkluí e siñansa akí, sino e no ta digno di e nòmber "Kristian".

Tur kaminda ku nos wak, ta parse komo si fuera nos planeta ta birando kontra su mes, kambiando lus pa skuridat. Sinembargo, nos ta topa tambe skuridat mas serka di kas ora nos konsiderá nos propio eksperensia den e mundu difísil i desafiante aki. Pasobra nos tambe ta komprondé e horornan ku e bida aki ta trese pa nos miéntras nos ta lucha ku malesa, segun ku nos ta dil ku pèrdida di sernan kerí, miéntras nos ta wak famianan sukumbí pa separashon i divorsio, miéntras nos ta lucha pa duna sentido na hopi di e kosnan malu den nos sosiedat i kultura.

Sinembargo, meimei di e paisahe akí di bankrut moral i skuridat spiritual, meimei di tur e zonido eksterno i interno akí, nos ta tende e palabranan di Hesus na kada un di nos:

“Boso ta e lus di mundu. Un stat trahá riba un seru no por keda skondí. Tampoko hende no ta sende un lampi i pon'é bou di un kòmchi. En kambio, nan ta pon’é riba su kándela, i e ta duna lus na tur hende den kas. Di mes manera, laga boso lus bria dilanti di otronan, pa nan por mira boso bon obranan i glorifiká boso Tata den shelu" (Mat. 5:14—16, NIV). Kiko e versíkulonan aki ta siña nos tokante kon nos mester biba i kon, komo Kristiannan, loke nos ta hasi ta impaktá kon otronan ta mira Dios?

Sintando kantu di Laman di Galilea e dia ei bou di e solo kayente, kon e oudiensia di Hesus lo a komprondé Su palabranan? Esnan ku a tende Su palabranan tabata sa tur kos tokante lus i skuridat. Seguramente nan tabatin hopi skuridat pa teme. Nan tabata biba bou di dominio romano, den un sosiedat kombertí pa uso militar ku, apesar di nan falta di telefòn i kòmpiuter i internèt, den hopi formanan tabata mes efisiente ku di nos mes, i den algun maneranan asta mas espantoso.

E Romanonan tabata tur kaminda, rekordando e masanan riba e seru ku esnan ku insistí riba hasi problema, rápidamente lo a haña nan kaminda pa e torturadónan, i na un morto sunú riba un krus romano.

I tòg, ata Hesus aki, yamando nan pa biba komo lus. Pa ta miserikòrdioso. Pa ta puru di kurason. Pa ta hasidónan di pas. Edukashon kristian mester, anto, inkluí siña nos studiantenan pa ta lusnan den mundu, pa ta kapas pa hasi eskohonan i tuma desishonnan ku lo revelá e realidat i bondat di Dios na otronan.

Si iglesia ta serio tokante ta un potensia pa edukashon kristian, ta imperativo pa nos kuminsá ku Hesus. Hesus a yama disipelnan. El a train nan pa hasi mishon dor di kana huntu ku nan. Hesus a proveé oportunidat pa nan ta envolví den bidanan di hende ku nan mester a kuida i stima. I diariamente Hesus tabata desafiá nan pa medio di Su vishon di loke e mundu akí por tabata ora hende kuminsá trata otro komo rumannan hòmber i muhé.

Lesa Lukas 4:18—23. Kiko ta e mensahe di Kristu na nos tur, komo Su siguidónan?

Pa tres aña e disipelnan a wak miéntras Hesus, nan Maestro, tabata biba e idealnan di e reino, idealnan anunsiá den Su promé sermon den snoa na Názarèt. Pordon, grasia, i amor tabata kana man den man ku soledat, kompromiso, i difikultat. Si tabatin un lès pa ser siñá, tabata e lès ku disipulado no ta algu ku hende ta tuma liviano. Bo ta un disipel pa bida, no solamente pa un dia.

"E enkargo ku e Salbador a duna Su disipelnan ... ta inkluí tur kreyente te na fin di tempu... . Na tur esnan ku e inspirashon di shelu a yega a ser konfiá ku e evangelio. Tur ku risibí e bida di Kristu ta ser ordená pa traha pa e salbashon di nan próhimo. Pa e trabou aki e iglesia a ser establesé, i tur ku tuma riba nan mes votonan sagrado, di e manera akí, ta ser komprometé pa ta kompañeronan di trabou ku Kristu.” — Ellen G. White, The Desire of Ages, p. 822.

Komo disipelnan di Hesus, nos awe mester sigurá nos mes ku Hesus ta semper e sentro di tantu nos kompañerismo komo nos adorashon. Ta bon pa kòrda ku tabata Hesus ta esun ken a inventá disipulado. Aunke e rabinan di Su tempu tabata atraé siguidónan, tabata Hesus ken a yama hòmber- i muhénan pa siguiE. E rabinan nunka por a imaginá nan mes un yamada asina radikal, sugeriendo ku ta huntu ku Hesus tabata mas importante ku tur nan mandamentunan.

I komo disipelnan di Hesus, no solamente nos tin rèspèt pa tur hende, pero lo traha pa proveé e tipo di lugá kaminda tur hende por krese i desaroyá.

Por lo tantu, tur edukashon kristian mester inkluí e sentido akí di mishon, di propósito, no solamente pa gana un bibá sino hasi den nos propio esfera loke Hesus ta yama nos pa hasi: pa sigui den Su stapnan, pa ministrá na esnan den nesesidat, i pa kompartí ku nan e bon notisia di e evangelio.

Albert Einstein, hopi biaha konsiderá komo e tata di físika moderno, a skibi: "E kos importante ta pa no stòp di kuestioná. Kuriosidat tin su propio rason pa eksistensia. Hende no por hasi nada otro ku keda atmirá ora e kontemplá e misterionan di eternidat, di bida, di e struktura maravioso di realidat. Ta sufisiente si un hende trata meramente na komprondé un tiki di e misterio akí tur dia. Nunka pèrdè un kuriosidat sagrado".

Nos ta biba enbèrdat den un mundu di misterio, no ta bèrdat? Siensia moderno a mustra nos un komplehidat inkreibel ku ta eksistí na kasi tur nivel di eksistensia. I si ta asina pa djis e kosnan físiko, kuantu mas e ta asina pa e kosnan spiritual?

Kiko e siguiente tekstonan akí ta siña tokante e búskeda pa bèrdat, pa kontestanan? ? Jer. 29:13; Mat. 7:7; Echonan 17:26, 27; Salmo 25:5; Juan 16:13; Juan 17:17.

Beibel ta yená di historianan di hendenan kurioso bastante meskos ku kada un di nos, hòmber- i muhénan ku tin pregunta-, temor-, speransa-, i gosonan, hendenan ku, den nan propio forma, ta buskando bèrdat, buskando kontestanan riba e preguntanan di bida di mas difísil.

"El a traha tur kos bunita den su tempu. Tambe El a pone eternidat den nan kurason, eksepto ku niun hende por haña sa e trabou ku Dios ta hasi for di prinsipio te na fin" (Ekl. 3:11, NKJV). Kiko Salomon ke men aki? Algun hende ta tradusí e palabra hebreo ‘olam komo "eternidat" i otronan komo un "sentido di pasado i futuro". asina anto, di akuerdo ku versíkulo akí, Dios a pone den kurason i mente humano un sentido di pasado i futuro, eternidat mes. Es desir, komo sernan humano, nos ta kapas pa pensa riba loke a ser yamá “e preguntanan grandi" tokante bida i nos eksistensia en general.

I, naturalmente, aki ta kaminda Skritura ta hunga e ròl sentral. Ken nos ta? Dikon nos ta aki? Kon nos mester biba? Kiko ta pasa ora nos muri? Dikon tin maldat i sufrimentu? Esakinan ta e preguntanan ku buskadónan di bèrdat a bin ta puntra for di prinsipio di historia registrá. Ki privilegio, i ki responsabilidat, pa ta kapas pa yuda mustra e buskadónan akí algun kontesta awor. Kiko edukashon kristian ta si no ta mustra hende e kontestanan akí, manera ta ser hañá nan den e Palabra di Dios?

Lesa 1 Tesalonisensenan 2:6—8. Kiko Pablo ta bisando aki ku nos lo por i mester reflehá den nos skol- i iglesianan?

Konfrontá pa e desintegrashon di komunidat den sosiedat, nos ta biba den un époka den kua e komprondementu bíbliko di iglesia hamas tabata mas signifikativo. Manera Mateo 18:20 ta kòrda nos: "Pasobra kaminda dos òf tres ta reuní den Mi nòmber, ei Mi ta meimei di nan". E vishon di Tèstamènt Nobo di loke iglesia i komunidat ta a tuma forma primeramente den e hogarnan di kreyentenan. Tabata aki ku e komunidat tabata reuní den gruponan chikí, hasiendo orashon, kantando, selebrando e Sena di Señor, siñando i kompartiendo e palabranan di Hesus ku otro.

E gruponan di adorashon akí tambe a bira e promé skolnan di iglesia, komo ku esaki tabata e lugá den kua e miembronan nobo a ser introdusí na e Beibel i na e bida nobo akí ku tabata ser hañá den Hesus. E eskritonan di Pablo, manera Romanonan 12:2, "No konformá na e patronchi di e mundu akí, pero sea transformá pa medio di renobashon di boso mente" (NIV), ta sugerí ku e iglesia a tuma e trabou di edukashon akí hopi na serio.

E promé kreyentenan masha lihé a deskubrí ku ta den komunidat ku e evangelio por ser bibá mas mihó. Den komunidat, nos tin rason pa kanta mas duru, pa hasi orashon di forma mas ferviente, i pa ta mas amabel i miserikòrdioso. Ora nos tende otronan papia di e bondat di Dios, nos ta sinti kon bon E tabata ku nos; ora nos tende di e luchanan i dolónan di otro, nos ta sinti e kurashon di Dios den nos bidanan, i nos ta eksperensiá un deseo renobá pa ta instrumentonan di Su grasia i kurashon.

Den e pasashi di awe, Pablo ta asertá ku e evangelio di Dios ta tur kos: e poder di e krus, e resurekshon di Señor, e promesa di Su regreso. Simplemente no tabatin niun mihó notisia den henter mundu, i Pablo ta pasa su bida bandoná den e desafio di, mas ku kualke otro kos, kompartiendo e historia di Hesus ku e mayor integridat i kompromiso.

Sinembargo, aki Pablo ta sugerí ku e mensahe di e evangelio por ser komprondé mihó, por ser eksperensiá mihó, a traves di e akto di kompartí bida huntu. Nunka nos no mester lubidá ku hende ta wak nos djaserka pa mira si nos bidanan ta ilustrá e mensahe di grasia ku ta ser hañá den Beibel.