E KRISTIAN I TRABOU

"I sa ku no tin nada mihó pa hende, ku regosihá i hasi bon den su bida, Ku kada un di nan por kome i bebe i mira e bon ku tin den tur nan trabou; esaki ta e regalo di Dios" (Ekles. 3:12, 13 NIV).

"Trabou"--esei ta un palabra sólido na Papiamentu sin ningun luho. Un solo palabra, tòg e tin hopi pusibel nifikashonnan. Dor di nesesidat, nos ta traha pa pone kuminda riba mesa, paga debenan, i spar un tiki pa tempunan difísil. Pèrdè un trabou hopi biaha ta pió ku soportá un situashon laboral defisiente.

Trabou por duna un hende sentido di balor. Trabou ta un manera komun pa kontestá e pregunta "Kiko bo ta hasi?" òf asta "Kiko bo ta?" Hopi penshonado ta sigui traha komo part-time mas tantu ku ta posibel, sea kontra pago òf komo boluntario. Un trabou ta ofresé un rason pa lanta mainta. Duna un hóben un trabou, i tin un kandidato ménos pa delinkuensia.

Lesa Génesis 3:19. Kiko ta e konteksto aki, i kiko e ta bisa nos tokante un otro aspekto di trabou, a lo ménos pa algun hende?

Dirpiente e trabou duná promé ku e Kaida ta kambia despues di e Kaida. Aki tin un referensia na un otro aspekto di trabou. Pa algun, trabou ta nifiká e trabou pisá di tur dia, ku lo terminá ku morto. Nan ta laborá den trabou ku nan ta despresiá, sperando pa retirá miéntras nan tin nan salú ainda. Pa otronan, trabou por asta tuma nan bida over, birando e sentro di nan eksistensia, asta bira e fuente kual ta abarká henter nan identidat. Separá for di nan trabou e hendenan aki lo sinti depreshon òf desorientá, insigur di kiko hasi òf unda bai. Den nan penshun, nan lo por kai den otro físikamente i sikológikamente, i asta muri prematuro.

Kristiannan mester siña kon pa traha segun Dios Su manera. Trabou ta mas ku un nesesidat ekonómiko. Hende ta mas ku djis un empleado. Komprendé korektamente, un hende su bida di trabou ta un avenida pa ministerio, un ekspreshon di su relashon ku Señor. Parti di e trabou di un maestro ta pa yuda e studiante enkontrá e trabou kaminda su abilidatnan i interes ku ta duná di Dios ta krusa ku e nesesidat di e mundu.

Vokashon òf trabou tin di aber ku e "kos di hasi" di bida. Asta esnan ku e trabounan ku ta dependé pa gran parti riba funshonamentu di e serebro, al final ta resultá hasiendo algun trabou físiko, asta si e ta nifiká simplemente primi e teklanan di un kòmpiuter.

Kiko e siguiente tekstonan ta siña nos tokante trabou usando "mannan" komo un símbolo?

Deut. 16:15

Ekles. 9:10

Prov. 21:25

Jer. 1:16

Dios a duna nos e "trabou di nos mannan" pa asina nos por haña satisfakshon i goso (lesa Prov. 10:4, 12:14). Den sikologia, "auto-efikasia" ta deskribí e kreensia ku tur hende tin e abilidat pa logra algu signifikante den bida. "Auto-efikasia" no ta oumentá dor di keda ripití, "Mi ta kere mi por! Mi ta kere mi por!" Ta solamente dor di hasi algu, e auto-efikasia ta oumentá.

Miéntras e "trabou di nos mannan" ta e bendishon di Dios pa nos (lesa Sal. 90:17) i ta permití nos di tin un bida ku sentido, e plan final di Dios ta ku e "trabou di nos mannan" lo a bendishoná otronan. Pablo ta skirbi ku nos mester traha, hasiendo algu útil ku nos mannan, pa nos por tin algu pa kompartí ku otronan. Pablo seguramente a biba segun e prinsipio ei:

"Boso mes sa ku e mannan akí di mi a traha pa mi mes nesesidatnan i pa e nesesidatnan di e hòmbernan ku tabata huntu ku mi. Den tur kos ku mi a hasi, mi a mustra boso ku dor di e tipo di trabou duru akí nos mester yuda e debilnan i kòrda e palabranan di Señor Hesus mes ku a bisa: ‘Ta mas bendishoná pa duna ku pa risibí’ " (Echonan 20:34,35, NIV).

E orashon simpel di Nehemias mester ta esun di nos: "Ma awor, O Dios, fortalesé mi mannan" (Neh. 6:9, NKJV).

Repasá Éksodo 25:10-30:38. Kon partikular Dios tabata ora El a pidi Moises pa traha un tabernakel pa adorashon? Kiko esaki ta bisa nos di e karakter di Dios?

Ora Dios a bisa Moises pa traha un tabernakel "pa E," Moises por a bisa, "Ningun problema, Señor! For di dia ku mi a hui for di Egipto 40 aña pasá m'a bin ta lanta tènt…djis duna mi un minüt!" Pa kualke hòmber ku ta biba den e kultura di tempu ei di Madian ku ta semi-nomádiko, lanta un tènt tabata algu masha simpel. E por a hasié wowo será, solamente ku su refleksnan, ku su mente kompletamente riba otro kos mas importante. Loke Moises lo no a spera ta un patronchi detayá (pa un struktura di arkitektura basta simpel) huntu kuné "un lista di kon pa hasié" largu, enkuanto kada parti di e muebelnan ku mester a bai aden, tambe tokante e pañanan saserdotal, kasi 150 instrukshon punto pa punto. Pa traha un mesa simpel, Moises mester a sigui un prosedura di armamentu di shete stap (Éksodo 25:23-30).

E atenshon pa detaye ku Dios a demonstrá den e trahamentu di Su tabernakel (tambe despues pa e instrukshonnan pa e ritonan di sakrifisio) ta demonstrá un spiritu predominante di ekselensia, un deseo pa produsí nada ménos ku un obra maestro. E materialnan tabata di e kalidat di mas haltu, e diseño tabata impekabel, e trabou mester tabata eksepshonal, e mensahe tabata kla: "ku Dios, trabou mediokre no ta aseptabel!"

Sinembargo, aunke e standart tabata parse haltu, tabata Dios mes ku tabata Esun ku a proveé no solamente e forsa i energía sino tambe e rekursonan humano pa alkansá esaki. Nos ta lesa den Éksodo 31:1-6, 35:30-36:1 ku Dios mes a duna e hendenan e abilidatnan nesesario. E hòmbernan aki tabata "yená ku e Spiritu" dunando nan abilidat i konosementu den tur tipo di trabou di obra di man, pa asina e konstrukshon di e tabernakel i su muebelnan por sosodé manera "Señor a ordená" (Éksodo 36:1, NRSV). Ademas di esei, e mesun dos diseñadónan maestro tambe a ser dotá ku e "abilidat di siña otronan" (Éksodo 35:34, NKJV) pa asina nan konosementu i abilidat por sigui eksistí den e komunidat Israelita. Maske e dos individuonan aki a ser señalá den e storia komo e lidernan skohé dor di Dios, otro hendenan a risibí donnan similar i a uni den e trabou (Éksodo 36:2).

Pues, ta hendenan pekadó i kaí no ta un esküs bálido pa trata kualke trabou ku nada ménos ku dedikashon total. Dios ta spera pa nos hasi nos bèst semper, poniendo nos talentonan, abilidatnan, tempu, i edukashon na bon uso pa kousanan grandi.

"Si nos ta biba segun e Spiritu, laga nos kana tambe segun e Spiritu" (Gal. 5:25, NKJV). Un hende su trabou i spiritualidat ta inseparabel. Kristianismo no ta un bachi ku por bisti òf kita segun nos beis ta kambia òf ora nos ta pasando dor di diferente etapanan di bida. Na lugá di esei, Kristianismo ta krea un ser nobo ku ta manifestá su mes den tur dimenshon di bida, inkluso trabou.

Lesa Galationan 5:22-26. Kua di e frutanan ku Pablo ta menshoná ta deskribí abo i bo trabou?

E Dikshonario Ekspositivo di Palabranan di Tèstamènt Nobo ta deskribí e hende "spiritual" komo un hende ku ta "manifestá e frutanan di e Spiritu den su propio manera." For di esaki, nos por konkluí ku dor di e konekshon ku Kristu, nos komo hende lo funshoná komo un kreyente den tur aspektonan di nos bida.

Un pashènt tabata drumí muriendo na Hospital di Florida miéntras su mihó amigu tabata vigilá banda di su kama. Zùsternan tabata drenta i sali for di e kamber, kuidando pa e nesesidatnan di e pashènt. Purbando na hiba un kombersashon, e amigu a puntra e zùsternan unda nan a haña nan training. Hopi a bisa ku nan a ser eduká na e Kolegio di e Hospital di Florida.

Esaki a hasi un gran impreshon riba e amigu. Despues di esaki el a bishitá Florida Hospital College na vários okashon pa e por a mira kon esaki tabata. Dikon? Pasobra el a bisa otro hendenan ku e zùsternan di train na e skol akí ta parse di ta konstantemente dunando mas kuido yen di amor na su amigu ku ta muriendo ku e zùsternan ku a ser di train otro kaminda. Esta, e tabata kapas pa mira un diferensia grandi entre nan i otronan pa loke ta trata nan aktitut pa su amigu ku tabata muriendo.

Asina, el a hasi hopi pregunta tokante e kolegio i su mishon, eventualmente el a laga un donashon di $100.000 pa eduká mas zùster manera esnan ku el a mira den akshon. Sí! Spiritualidat ta un estilo di bida.

"Loke sea bo man haña pa hasi, hasié ku tur bo forsa" (Ekles. 9:10, NKJV). E hòmber di mas sabí a usa e palabranan akí di konseho tokante mayordomía den kada aspekto di bida.

Ora nan ser puntrá pa komentá tokante mayordomía Kristian, hopi ta limitá nan pensamentu na e responsabilidat fiskal di Kristianismo. Aunke plaka ta seguramente un aspekto importante di mayordomía, pa limitá esaki na plaka so ta muchu limitá. Den teoria di organisashon, mayordomía ta referí na e responsabilidat di e maneho pa desaroyá i usa tur rekurso ku tin na alkanse di forma apropiá.

Den iglesia, kua ta e rekursonan ku Dios a bendishoná nos kuné? Klaramente Pedro ta deklará ku kada persona tin donnan duná dor di e Kreador; i e ta referí na Kristiannan ku a risibí donnan komo "saserdosio santu" (1 Pedro 2:5) ku responsabilidat na Dios pa nan mayordomía di tur e donnan di Dios: plaka, tempu, energia, talento, i otronan.

Lesa Eklesiastés 9:10 i 1 Korintionan 10:31. Kiko ta e mensahe na nos den e versíkulonan aki tokante kon nos mester traha i kon nos mester eduká hende pa traha?

Un di e trampanan mas komun di bida di awe ta e tendensia di dividí den sekshon e diferente aspektonan di bida. Tin e bida di trabou, e bida di famia, e bida spiritual, i asta e bida di tempu liber. E tendensia di separá e áreanan akí di bida ya ku asina ningun no ta krusa otro ta deseabel den sierto kaso. Por ehèmpel, no ta bon pa trese kas bo trabou asina ku e ta interferí ku bo responsabilidatnan familiar. Tampoko e búskeda pa tempu liber mester redusí e tempu ku nos ta pasa ku Dios.

Sinembargo, nos no mester apliká restrikshonnan asina pa e ròl ku nos bida spiritual mester hunga den tur nos eksistensia. E trabou di e Kristian ta surgi for di e komunion i e trabou ku Dios. Trabou ta un manera pa medio di kua nos por praktiká e presensia di Dios. Pa dividí den sekshon nos bida religioso, pa limitá Dios na un dia, un ora, òf asta un área di nos bida, ta pa rechasá e presensia mes di Dios den e otro áreanan akí.