EKSPERENSIANDO I BIBANDO E KARAKTER DI DIOS

Bo a yega di puntra bo mes dikon Dios a skohe pa duna nos dos relato harmonioso di Kreashon den e promé dos kapítulonan di Génesis? Génesis 1 ta relatá e siman di Kreashon i e milager kresiente di e mundu segun e tabata haña forma i bida, kulminando den kreashon di hòmber i muhé riba e di seis dia. Génesis 2 ta trata e mesun relato pero for di un perspektiva diferente, ku un enfoke spesial riba e di seis dia. Adam ta e sentro di e kuadro awor, i tur kos ta ser deskribí komo eksistente pa e i e muhé: e hòfi, e riunan, e bestianan.

Kreashon ta demasiado profundo pa solamente un relato. Promé, nos ta siña di e Kreador poderoso i artístiko Kende tin wowo pa bunitesa perfekto. Despues nos ta topa ku e Dios di relashonnan, ku ta deseá pa humanidat stima i kuida pa otro i pa sobrá di kreashon.

Lesa Génesis 1 i 2. i despues reflehá riba kon e promé Sabat (Gén 2:1-3) ta konektá bèk na e promé relato di Kreashon i padilanti na e di dos relato di Kreashon. Kon bo konklushonnan ta yuda bo komprondé kiko Dios bendishonando e Sabat i santifikando esaki por ta nifiká?

Imaginá bo mes na lugá di Adam ku Eva riba e promé Sabat. Ta bo promé dia di bida, bo promé dia ku bo esposo, i bo promé dia ku Dios. Esta un dia edukativo! Bo ta kuminsá siña di e Dios ku por a krea asina tantu kos bunita. Bo ta maraviá segun bo ta mira un olefante un momento i despues un sapu, kada unu ta úniko. Bo ta smail segun bo ta mira e komportashon chistoso di e zjiraf òf e búfalo. Den silensio bo ta keda atmirá di e kantidat grandi di koló i formanan, miéntras bo ta ser deleitá dor di e sinfonia di zonidonan; bo ta disfrutá di diferente deleite den sabor i holó i ta disfrutá den eksplorá e diferente tekstura. Mas ku tur kos, bo ta kuminsá siña tokante relashonnan: responsabilidat, kuido i amor. Bo ta eksperensiá esakinan ku bo Kreador; bo ta kuminsá praktiká esaki ku sobra di kreashon.

E promé Sabat no por tabata un eksperensia pasivo pa Adam i Eva. Tabata un oportunidat kreá dor di Dios pa nan por enfoká riba nan Kreador i e kreashon. Tabata un tempu pa nan ta sorprendí.

Ora Moises ta ser pidí pa guia e Israelitanan for di Egipto, ta opvio ku e masa a pèrdè nan perspektiva komo yunan di Dios. Nan mester a deskubrí di nobo ken e Dios ta ku ta pidi nan adorashon i ta duna nan asina tantu promesa di un futuro maravioso. E Sabat ta un eksperensia di siñansa krusial den nan jornada pa deskubrí di nobo. Tambe e ta bira un señal kla pa otro nashonnan di e relashon spesial entre Dios i e nashon aki. E eksperensia di e mana ta un ehèmpel perfekto di e forma di Dios di eduká e Israelitanan.

Den Éksodo 16:14-29, kua ta e lèsnan pa e Israelitanan siña?

Dios ta proveé e milager di e mana pa e Israelitanan, dunando nan nèt sufisiente kuminda pa kada dia. Si E lo a duna nan mas ku e kantidat ei, nan lo por a lubidá ken ta nan proveedó. P'esei kada dia E tabata hasi un milager pa nan, i nan a mira e kuido di Dios. Sin embargo riba Sabat, e situashon tabata diferente, meskos ku e dia tabata intenshoná pa ta spesial. Awor dos milager tabata tuma lugá: dòbel kuminda riba djabièrnè, i e kuminda no tabata daña anochi. Esaki tabata permití e Israelitanan atmirá e Dios ku tabata nan libertadó i pa deskubrí di nobo kiko ta nifiká pa ta e pueblo di Dios.

E Israelitanan mester a kome e mana aki 40 aña (Eksodo 16:35). Tambe Dios ta instruí Moises pa warda un omer di mana pa rekordá e Israelitanan kon El a alimentá nan den desierto. (Éksodo 16:32, 33). Tambe esaki lo tabata un rekordatorio di e eksperensia spesial di e dia di Sabat.

Tabatin mas okashon den kual Dios ta hasi kla na e Israelitanan ku Sabat ta spesial.

Sabat tabata un forma ku Dios a usa pa yuda e Israelitanan deskubrí di nobo nan identidat i nan Dios. Nan a ser pidí pa obedesé i warda e Sabat santu, pero esaki tabata den e konteksto di desaroyá un komprondementu mas profundo di e karakter di nan Kreador i tokante forma un relashon duradero di promesa.

E subi baha den e eksperensia di Israel ku Dios tabata relatá hopi djaserka na e Sabat. Dios a mira nan falta di disposishon pa respetá e Sabat komo un indikashon ku nan no tabata konsider'É relevante den nan bida (Jer. 17:19-27). Un kompromiso renobá na e Sabat tambe tabata parti di restorashon, un señal ku prioridatnan tabata korekto. lsaias 58 ta deskribí un kontraste interesante.

Lesa lsaias 58:1-14. Kiko Dios ta bisa Su pueblo aki ku ta relevante pa nos awe?

E Israelitanan ta presentá nan mes komo siguidónan di Dios, den nan adorashon, den nan ayuno, pero e manera ku nan ta biba nan bida despues ku nan kaba adorá ta mustra ku nan ta djis hasi komportashon korekto pa numa; no tin un kompromiso sinsero di kurashon na e lei di Dios. lsaias ta sigui den kapítulo 58 pa identifiká kiko Dios ta spera di Su pueblo.

Esaki no ta tur kos. Lesa Isaias 58:13, 14. Dikon Dios ta enfoká riba Sabat na final di e kapítulo aki? E profeta ta usa frasenan akí similar na esnan den sobrá di e kapítulo: warda bo mes "di hasi bo mes gana"; bandoná "bo mes kamindanan"; no "buska bo mes plaser i no papia bo mes palabra" (NIV), e profeta ta atvertí. Ku otro palabra, Sabat no ta e momento pa hasi e adorashon konforme rutina, pensando bo propio pensamentunan i bibando un bida irelevante pa ku adorashon. Sabat mester ta un "delisia" i "onorabel". Den e konteksto di e sobrá di e kapítulo, Sabat tin di aber ku deleitá den siña di e karakter i propósito di Dios, i despues biba e karakter i propósitonan ei den nos relashon ku otronan. Djis sa kon pa warda e Sabat i adorá no ta sufisiente. Siñansa mester impaktá bida. Sabat ta e tempu pa siña i biba prioridatnan.

Hesus a respetá i a kumpli ku e lei di Dios (Mateo 5:17, 18). Tòg Hesus a reta e lidernan religioso tambe riba nan interpretashon di e lei. Ningun di Su retonan tabata mas menasante pa loke tabata eksistí kaba, ku Su eskohonan ku El a hasi relashoná ku wardamentu di Sabat. E snoa Riba Sabat no tabata faya pa hasi sabat un oportunidat pa edukashon, e Torah tabata ser lesá i interpretá sin fayo. E eskríba- i Fariseonan tabata sa kada lèter di e lei. Sinembargo, Hesus a bai hopi mas leu den Su dia-di-Sabat edukashon di Su siguidónan.

Lesa Mateo 12:1-13 i Lukas 13:10-17. Kiko Hesus tabata siñando e hendenan den Su tempu, i nos awe, ku e aktonan akí?

E kontroversianan ku tabata rondoná e kurashon di Hesus riba Sabat ta hiba na debatenan spiritual importante tokante e naturalesa di piká, e propósito di e Sabat, e relashon entre Hesus i e Tata, i e naturalesa di e outoridat di Hesus.

E aktitut di Hesus pa ku e Sabat ta ser resumí bon den nos versíkulo di memoria di e siman aki: "I El a bisa nan: 'Sabat a ser kreá pa hende, i no hende pa Sabat. P’esei e Yu di Hende ta Señor di Sabat tambe' " (Marko 2:27, 28, NKJV). E kier a enfatisá ku e Sabat no mester tabata un karga. El a ser "trahá" (kreá) komo un oportunidat úniko pa hende siña di e karakter di Dios kende a krea e Sabat i pa siña pa eksperensia dor di balorá Su kreashon.

Dor di lanta preguntanan ku Su akshonnan, Hesus ta pusha Su disipelnan, e lidernan Hudiu, i e multitut pa pensa mas profundo riba Skritura i riba, en todo kaso, kiko nan fe i nan Dios ta nifiká. Ta asina fásil pa kualke un di nos keda pegá den regla- i leinan ku kisas no ta malu riba nan mes, sino ku ta resultá den un fin riba nan mes, na lugá di ta un medio pa yega na e fin; i e fin ei mester ta konosementu di e karakter di e Dios ku nos ta sirbi. I esaki, na su turno, ta resultá den nos obedensia fiel na dj'E basá riba nos konfiansa den e méritonan di hustisia di Kristu pa nos.

Hesus a modelá pa Su disipelnan e práktika di bishitá snoa tur siman. Despues di Su resurekshon nan a kontinuá ku e patronchi aki, meskos tambe otro siguidónan di Hesus. Snoa a bira un di e lugánan prinsipal pa e apòstelnan hasi pregunta tokante e Resurekshon, i e Sabat tabata proveé un oportunidat klave pa e komunidat kongregá i siña. Despues di tur kos, Hesus tabata e Mesias Hebreo, e Mesias profetisá den Tèstamènt Bieu, kual tabata ser lesá tur Sabat den snoa. Kua lugá mihó,anto, e kreyentenan por tabatin pa promové Hesus ku den snoa, espesialmente ora nan tabata testifiká na e Hudiunan i otronan "ku ta teme Dios" (Echonan 13:16, 26, NKJV)?

Lesa e siguiente tèkstnan. Kiko nan ta konta nos tokante e manera ku Hesus Su siguidónan tabata testifiká den áreanan públiko? Segun bo ta lesa e tèkstnan aki, pensa riba unda nan tabata papia, ku ken nan tabata papia, kiko tabata ser bisá, i kiko e resultadonan tabata: Echonan 13:14-45; Echonan 16:13, 14; Echonan 17:1-5; Echonan 18:4.

E testimonio di e apòstelnan tabata basá riba tantu eksperensia personal komo riba e Skritura. Pablo a elaborá riba e historia di Israel, kuminsando ku "nos tatanan” (Echonan 13:17) na Egipto, i a sigui nan historia for di nan establesimentu te na e huesnan, e reinan, te David, for di ken e tabatin un transishon perfekto na Hesus .

Pablo i otronan a mustra tambe kon nan eksperensia personal i komprondementu a haña sentido den konteksto di e Skrituranan. Nan a presentá informashon, i nan tabata debatí i diskutí. E kombinashon di testimonio personal i Skritura kompartí a traves di predikashi, siñansa i diskushonnan tabata hopi poderoso. Manera e pasashinan Bíbliko ta mustra, algun di e lidernan religioso tabata yalurs riba e outoridat di e apòstelnan i e poder ku a resultá ku nan tabatin riba e hendenan, tantu hudiu komo pagano.

Iglesia Atventista di e di Shete Dia tin un historia fuerte, tambe, di testimonio ku ta enkurashá i un eksposishon di Skritura a traves di tantu predikashi komo siñansa/testifikashon. E kombinashon di Sabat Skol ku e sirbishi di Kulto Divino (predikashi) i otro programashon di Sabat (por ehèmpel Hubentut Atventista) ta duna un base edukashonal fuerte na e adorashon Atventista di e di Shete Dia. Miéntras esakinan mester ser komplementá ku otro eksperensianan edukativo, e ta esensial pa e eksperensia edukashonal di e Sabat.