Shelu, Edukashon, i Siñamentu Eterno

Den siglo 17 un eskritor Franses yamá Blaise Pascal tabata reflekshonando riba e estado di humanidat. Pa e, un punto tabata hopi kla: no importá kon largu un ser humano a biba, (i e tempu ei no ta tur tabata biba dje largu ei), i no importá kon bon e bida di un hende tabata, (i bida no tabata dje ekstraordinario ei tampoko e tempu ei), tardi òf tempran e hende ei tabata bai muri.

Ademas, loke sea tabata bini despues di morto tabata bai ta mas largu, infinitamente largu, ku e periodo kòrtiku ku tabata presedé morto. Por lo tantu, pa Pascal, e kos di mas lógiko ku un hende por òf mester a averiguá ta ki destino ta spera e mortonan, i e tabata sorprendí di mira hende bira nè pa kosnan manera “pèrdida di trabou, òf pa algun insulto imaginario na su honor", sinembargo nan no a paga atenshon na e pregunta di kiko ta sosodé despues ku nan mester a muri.

Pascal tabatin rason. I esei ta sin duda dikon Beibel ta dediká un gran kantidat di tempu papiando tokante e promesa ku ta sperando esnan ku haña salbashon den Hesus, e promesa di loke lo spera nan den futuro.

Lesa e siguiente tekstonan. Ki speransa ta ser ofrrsé na nos ei? Juan 6:54, Juan 3:16, 1 Juan 5:13, 1 Tim. 1:16, Juan 4:14, Juan 6:40, Hudas 1:21, Tito 3:7.

Bida eterno tin asina mas sentido den lus di e krus; den lus di e krus, nada otro tin sentido sino bida eterno. Ku e Kreador di universo, esun ku "a traha e mundunan" (Hebr. 1:2), esun den ken "nos ta biba, i ta move, i ta eksistí" (Echonan 17:28), ku E, Dios, mester a enkarná den karni humano i muri den e karni ei ... pa kiko? Pa finalmente nos putri, manera bestia mortoriba kaya?

Ta p'esei Tèstamènt Nobo ta bin yen di promesanan di bida eterno, pasobrasolamente loke ta eterno ta garantisá restitushon. Un mión di aña, esta un bión di aña, kisas no ta poseé sufisiente bon momentunan pa kompensá esnan malu. Eternidat so por balansá tur kos, pasobra loke ta infinito ta mas ku loke ta finito i semper infinitamente lo ta asina.

Pascal tabatin rason: nos tempu aki ta asina limitá den kontraste ku loke ta biniendo. Ki bobo ta pa no ta prepará pa e eternidat ku ta spera nos.

"I Dios lo seka tur lágrima kita for di nan wowo; i lo no tin morto mas; ni sufrimentu, ni yoramentu, ni lo no tin mas doló; pasobra e promé kosnan a pasa" (Rev. 21:4). Kiko esaki ta bisa nos tokante kon diferente for di e mundu akí nos eksistensia nobo lo ta, un eksistensia den kua morto, tristesa i doló a bai?

Un Kristian tabata papiando ku un amigu tokante e speransa di e evangelio, e promesa di bida eterno den Hesukristu. E persona a reakshoná negativamente riba henter e idea. "Bida eterno?" el a bisa ku miedu. "Ki un pensamentu horibel! Nos 70-80 aña aki ta sufisiente malu. Ken lo ke alargá esaki pa semper? Esei lo ta fièrnu."

E persona aki lo tabatin rason, eksepto e no a komprondé ku e promesa di bida eterno no ta djis kontinuashon di e bida akinan. Por fabor, ken lo a deseá esei? En kambio, manera e teksto akiriba ta bisa, e kosnan bieu a pasa bai, i tur kos a bira nobo.

Kiko e siguiente tekstonan ta bisa nos tokante e eksistensia nobo ku ta biniendo?

2 Pe. 3:10-13

Rev. 21:1-6

"Shelu ta un skol; su kampo di estudio, e universo; su maestro: Esun Infinito. Un filial di e skol akí a ser establesé den Eden; i, ora e plan di redenshon ser kumplí, edukashon lo reanudá den Skol di Eden."-Ellen G. White, Education, p. 301.

Si bo ta manera mayoria hende, bo tin un kantidat di pregunta; preguntanan tokante piká, sufrimentu, malesa, morto, tokante dikon esaki a sosodé, dikon esaya a sosodé, dikon e otro kosnan a sosodé.

Nos tin preguntanan tokante e mundu natural tambe, i tur su misterionan. Pasobra tur e progresonan inkreibel ku siensia a hasi pa yuda nos komprondé mas tokante e mundu i universo den su totalidat, ainda tin asina tantu mas ayá di nos alkanse.

For di e formanan di bida di mas simpel te na e shelu riba nos kabes, for di e moveshon di partíkulanan supatómiko te na e galaksianan den moveshon ku ta plamá den e kósmos, nos ta ser konfrontá ku un realidat ku ta asina mas grandi i pròfundo ku nos mente por kapta awor, spesialmente ku e tiki tempu ku nos tin aki i awor pa studia e kosnan akí pa nos mes.

Na otro banda, ora bo tin un eternidat pa studia, e ora ei no tin duda ku un kantidat di misterio lo ser resolvé pa nos.

Kiko e siguiente tekstonan ta bisa nos tokante kiko nos lo siña unabes henter e episodio tristu akí di piká i sufrimentu i morto terminá finalmente?

1 Kor. 13:12

1 Kor. 4:5

Nos ta ser primintí ku nos lo ser duná un komprondementu di kosnan ku, pa awor, ta keda skondí pa nos. Ki un speransa maravioso tambe, ku unabes nos mira i komprondé kosnan ku awor ta parse asina difísil, nos lo no tin nada sino alabansa pa Dios! E klave pa nos awor ta pa mantené nos fe, konfia den e promesanan di Dios, biba di akuerdo ku e lus ku nos tin, i perseverá te na final. I e bon notisia ta ku nos "por hasi tur kos pa medio di Kristu Kende ta fortalesé" nos (Fil. 4:13, NKJV).

“Pasobra nos aflikshon leve, ku ta solamente pa un momentu, ta obra pa nos un peso di gloria muchu mas ekselente i eterno; miéntras nos no ta wak e kosnan ku ta ser mirá, ma e kosnan ku no ta ser mirá: pasobra e kosnan ku ta ser mirá ta temporal; ma e kosnan ku no ta ser mirá ta eterno" (2 Kor. 4:17-19). Ki speransa e tekstonan akí ta ofresé nos? Kiko kisas ta algun di e kosnan eterno invisibel ku nos ta sperando riba dje, ku a ser primintí na nos a traves di Hesus? Wak tambe Rev. 21:1, 2; Rev. 2:7; Rev. 7:14-17.

Maske kon real e promesanan òfresé na nos den Hesus ta, maske nos tin hopi bon motibunan pa kere den nan, e echo ta keda ku Beibel ta duna nos djis pistanan, impreshonnan di loke ta spera nos. Un kos nos por ta sigur di dje, sinembargo, ta ku e ta bai ta tremendo, pasobra djis pensa kon magnífiko bida lo ta den un eksistensia sin e sikatrísnan di piká!

Tur nos doló, tur nos sufrimentu, tur e kosnan ku nos ta lucha kuné aki ta bini di piká i e konsekuensianan di piká. Kristu a bini pa deshasí di tur esei, i E lo restourá e tera na loke originalmente Dios a intenshon'é pa ta promé ku piká a drenta. De echo, e lo ta mihó, pasobra meimei di tur e glorianan akí nos lo ta kapas pa semper pa kontemplá e sikatrisnan di e mannan i pianan di Hesus, e kosto di nos redenshon.

"Aya, ora e velo ku ta hasi nos bista skur lo ser kitá, i nos wowonan lo kontemplá e mundu di bunitesa ei di kual awor aki nos ta kapta impreshonnan a traves di e mikroskop; ora nos wak e glorianan di e shelunan, awor studiá pa medio di teleskop; ora, ku e manchanan di pika kitá, henter teralo aparesé den 'e bunitesa di Señor nos Dios', ki un kampo lo ser habrí pa nos estudio! Aya e studiante di siensia por lesa e informenan di kreashon sin diserní ningun rekordatorio di e leí di maldat. E por skucha e músika di e bosnan di naturalesa i no detektá ningun nota di yoramentu òf konotashon di tristesa. Den tur e kosnan kreá e por deskubrí un skritura, den e enorme universo e lo kontemplá ‘e nòmber di Dios skirbí ku lèter grandi,’ i ni riba tera òf den laman òf shelu lo no a keda ni un señal di maldat". - Ellen G. White, Education, p. 303.

Manera nos a mira durante henter e trimèster akí, un aspekto sentral di e ministerio di Kristu aki riba tera tabata esun di un maestro. For di komienso di Su ministerio, sea a traves di akto- òf echonan, konstantemente Hesus tabata siña Su siguidónan bèrdatnan tokante E mes, tokante e Tata, tokante salbashon, i tokante e speransa ku ta spera nos (lesa Mateo 5:2, , Marko 4:2, , Lukas 19:47, Juan 6:59).

En realidat, tur loke bo mester hasi ta pasa dor di un evangelio, kualke evangelio, i tur kaminda lo bo topa di Hesus siñando. I aunke, te ainda, a traves di Su palabra, Señor ta sigui siñando nos, den e mundu nobo e siñansa akí lo sigui tambe. Pero imaginá bo kon diferente e lo ta den un eksistensia liber di piká i tur e limitashonnan ku esakinan ku e ta pone riba nos.

“I un lo bis’é: Kiko e heridanan akí den Bo mannan ta? E ora ei E lo kontestá: Ku esakinan mi a ser heridá den kas di mi amigunan" (Zak. 13:6). Di kiko bo ta kere e teksto aki ta papiando?

"E añanan di eternidat, segun nan ta transkurí, lo trese revelashonnan mas riku i ainda mas glorioso di Dios i di Kristu. Meskos ku konosementu ta progresivo, asina tambe amor, reverensia i felisidat lo oumentá. Mas hende siña di Dios, mas grandi nan atmirashon di Su karakter lo ta. Segun ku Hesus ta habri nan dilanti e rikesanan di redenshon i e logronan impreshonante den e gran kontroversia ku Satanas, kurason di esnan redimí lo tembla ku deboshon mas ferviente, i ku goso mas eufóriko nan ta toka e arpanan di oro; i e ora ei dies mil bia dies mil i míles di míles di bos ta uni pa engrandesé e poderoso koro di alabansa ... .

E gran kontroversia a terminá. Piká i pekadornan no ta eksistí mas. Henter universo ta limpi. Un pulso di harmonia i goso ta batí a traves di e kreashon inmenso. For di Esun ku a krea tur kos, ta brota bida i lus i goso, a traves di e esferanan di espasio ilimitá. For di e atom di mas chikitu te na e mundu di mas grandi, tur kos, anima I no animá, den nan bunitesa sinmancha i goso perfekto, ta deklará ku Dios ta amor." - Ellen G. White, The Great Controversy, p. 678.