Krísis di Liderazgo

Isaias 6:1 ta papia tokante e morto di Rei Uzias. Lesa 2 Krónikanan 26 i despues kontestá e pregunta akí: Kiko ta importansia di e morto di Rei Uzias?

Diferente perspektiva por ser duná enkuanto di e morto di e rei akí.

1. Aunke e reinado di Uzias tabata largu i próspero, “ora el a bira fuerte el a bira orguyoso, te na su destrukshon” (2 Kron. 26:16, NRSV) i a trata na ofresé sensia den e tèmpel. Ora e saserdotenan korektamente a stòp e pasobra e no tabata outorisá komo un desendiente saserdotal di Aaron (2 Kron. 26:18), e rei a rabia. Na e momentu akí, ora e rei a rechasá reprendementu, Señor inmediatamente a dal e ku lepra, kua e tabatin “te na e dia di su morto, i siendo leproso a biba den un kas separá, pasobra el a ser ekskluí for di e kas di Señor” (2 Kron. 26:21, NRSV). Ki iróniko ku Isaias a mira un vishon di e Rei puru, inmortal i divino den Su kas/tèmpel den e mesun aña ku e rei humano impuru a muri!
2. Tin un kontraste sorprendente entre Uzias i Isaias. Uzias tabata buska santidat di forma presuntuoso, pa e rason robes (orguyo), i en kambio a bira ritualmente impuru, asina ku el a ser kòrtá kitá for di santidat. Isaias, na otro banda, a permití e santidat di Dios alkans’é. Humildemente el a atmití su debilidat i a anhelá pa puresa moral, kua el a risibí (Isa. 6:5-7, NRSV). Meskos ku e kobradó di impuesto den e parabel di Hesus, el a bai hustifiká: “pasobra tur ku halsa nan mes lo ser humiá, pero tur ku humiá nan mes lo ser halsá” (Lukas 18:14, NRSV).
3. Tin un similaridat sorprendente entre e kurpa leproso di Uzias i e kondishon moral di su pueblo: “ … no tin nada sano den dje, sino leshon- i yaga- i heridanan ku ta sangra” (Isa. 1:6, NRSV).
4. E morto di Uzias den masoménos 740 P.K. ta marka un krísis serio den e liderazgo di e pueblo di Dios. E morto di kualke gobernante apsoluto ta hasi su pais vulnerabel durante un transishon di poder. Pero Huda tabata den peliger spesial, pasobra Tiglath-Pileser III a subi trono di Asiria un par di aña anterior, den 745 P.K., i a bai inmediatamente riba e kaminda di guera ku a hasi su nashon un superpoder invensibel ku a menasá e eksistensia independiente di tur nashon den Serkano Oriente. Den e tempu di krísis akí Dios a animá Isaias dor di mustra e profeta ku ainda E tabata den kontròl.

Lesa kuidadosamente 2 Krónikanan 26:16. Den ki formanan kada un di nos ta enfrentá e potensial ei pa e mesun kos? Kon meditá riba e Krus por protehá nos for di e trampa ei?

Nota loke tabata sosodiendo aki den e promé kuater versíkulo di Isaias 6. E rei ta muri durante gran agitashon polítiko (e Asirionan ta riba kaminda di guera). Pa Isaias, e por tabata un momentu teribel ora e no tabatin sigur ken tabata den kontròl.

I e ora ei, kiko ta sosodé? Miéntras el a ser hibá den vishon, Isaias a kontemplá e gloria di Dios riba Su trono, a tende e antifonia di serafinnan briante (“esnan ku ta kima”) sklamando e palabranan “santu, santu, santu”; a sinti e temblamentu sísmiko resultante riba e flur bou di dje, i a mira dor di e huma ku tabata drai segun ku e tabata yena e tèmpel. E mester tabata un eksperensia maravioso pa e profeta. Pa sigur, Isaias tabata sa awor ken tabata den kontròl, apesar di eventonan eksterno.

Unda Señor ta den e vishon akí? (Lesa Isa. 6:1.) Dikon Señor lo a hasi un aparishon na Isaias aki, kontrali na kualke otro kaminda? Lesa Eks. 25:8; Eks. 40:34-38.

Ezekiel, Daniel i Juan tabata den eksilio ora nan a risibí nan vishonnan den Ezekiel 1, Daniel 7:9,10 i Revelashon 4,5. Meskos ku Isaias, nan tabatin mester di konsuelo spesial i enkurashamentu ku Dios ainda tabata den kontròl, aunke nan mundu tabata kayendo den otro. (Daniel i Ezekiel tabata koutivo den un nashon pagano ku a destruí esun di nan mes, i Juan a ser eksiliá na un isla solitario dor di un poder polítiko hostil.) Sin duda, e vishonnan akí a yuda duna nan loke nan tabatin mester pa keda fiel, asta durante un situashon di krísis.

Miéntras Isaias tabata kontemplá e revelashon akí di e gloria i mahestat di su Señor, el a ser impreshoná ku un sentido di e puresa i santidat di Dios. Kon skèrpi e kontraste tabata entre e perfekshon inkomparabel di su Kreador i e kondukta pekaminoso di esnan ku, huntu ku e mes, hopi tempu a ser kontá entre e pueblo skohí di Israel i Huda!” — Ellen G. White, Prophets and Kings, p. 307.

E santidat trasendente di Dios, enfatisá den e vishon di Isaias, ta un aspekto básiko di su mensahe. Dios ta un Dios santu, i E ta demandá santidat di Su pueblo, un santidat ku E lo duna nan si solamente nan lo arepentí, bira for di nan mal kamindanan, i someté na djE den fe i obediensia.

Den e santuario/tèmpel, solamente e sumosaserdote por a aserká e presensia di Dios den e Lugá Santísimo riba e Dia di Ekspiashon, i ku un kortina di huma protektor di sensia, òf e lo a muri (Lev. 16:2,12,13). Isaias a mira Señor, aunke e no tabata e sumosaserdote, i e no tabata kimando sensia! E tèmpel a yena ku huma (Isa. 6:4), rekordando nos di e nubia den kua e gloria di Dios tabata aparesé riba e Dia di Ekspiashon (Lev. 16:2). Yená ku sintimentunan di temor i pensando ku su fin a yega (kompará Eks. 33:20; Huesnan 6:22,23), Isaias a grita ku un rekonosementu di su piká i e piká di su pueblo (Isa. 6:5), rekordativo di e konfeshon di e sumosaserdote riba e Dia di Ekspiashon (Lev. 16:21).

Pará, komo si fuera, den pleno lus di e presensia divino denter di e santuario interior, el a realisá ku si e ser lagá na su propio imperfekshon i defisiensia, e lo tabata totalmente inkapas pa kumpli ku e mishon na kua el a ser yamá.” — Ellen G. White, Prophets and Kings, p. 308.

Dikon e serafin a usa un karbon bibu, òf kimando, for di e altar pa purifiká e lepnan di Isaias? Isa 6:6,7.

E serafin a splika ku dor di toka e lepnan di e profeta su kulpa i piká a ser kitá (Isa. 6:7). E piká no ta ser spesifiká, pero e no mester ser limitá na papiamentu robes, pasobra lepnan no ta nifiká solamente papiamentu sino tambe henter e persona ku ta ekspres’é. Despues di a risibí purifikashon moral, Isaias awor tabata kapas pa ofresé alabansa puru na Dios.

Kandela ta un agente di purifikashon, pasobra e ta kima impuresa (lesa Num. 31:23). Pero e serafin a usa un karbon for di e kandela spesial i santu di e altar, ku Dios Mes a sende i ku a ser tené kimando eternamente ei (Lev. 6:12). Pues, e serafin a hasi Isaias santu, i tambe puru. Tin mas. Den adorashon den e santuario, òf tèmpel, e rason prinsipal pa kue un karbon for di e altar tabata pa sende sensia. Kompará Levítiko 16:12,13, kaminda e sumosaserdote mester kue un insensario yen di karbon for di e altar i us’é pa sende sensia. Pero den Isaias 6 e serafin ta apliká e karbon na Isaias mas bien ku na sensia. Kaminda Uzias ke a ofresé sensia, Isaias tabata bira manera sensia! Meskos ku kandela santu ta sende sensia pa yena e kas di Dios ku fragansia santu, e ta iluminá e profeta pa plama un mensahe santu. No ta kasualidat ku den e siguiente versíkulonan di Isaias 6 (Isa. 6:8 i siguiente) Dios ta manda Isaias bai serka Su pueblo.

“Tambe mi a tende e bos di Señor, bisando: Ken lo Mi manda, i ken lo bai pa nos? E ora ei mi a bisa: Ata mi aki, manda mi” (Isa. 6:8).

Despues di a ser purifiká, Isaias a respondé inmediatamente riba e yamada di Dios pa un representante ku E por a manda bai den Su nòmber. Den términonan di Tèstamènt Nobo, Isaias lo a ser yamá un apòstel; es desir, “un ku ta ser mandá”.

Ta interesante ku e buki di Isaias no ta kuminsá, manera algun otro buki profétiko ta hasi, ku e profeta deskribiendo su yamada profétiko (kompará Jer. 1:4-10, Ezekiel 1-3). Ku otro palabra, e mester a ser yamá kaba pa ta un profeta, asta promé ku e eventonan di kapítulo 6. Beibel ta mustra ku un enkuentro divino por animá un profeta asta despues ku e ministerio a kuminsá (Moises: Eksodo 34; Elias: 1 Reinan 19). Kontrali na otro ehèmpelnan tambe, kaminda Dios ta bisa hende ku nan mester ta profeta, den Isaias 6 e profeta ta ofresé su mes komo boluntario pa un mishon spesial. Ta parse ku kapítulonan 1-5 di Isaias ta representá kondishonnan na un momentu ora Isaias a ser yamá pa promé biaha, despues di kua Dios a inisiá su ministerio dor di enkurash’é na e tèmpel i rekonfirmá su enkargo komo portabos profétiko di Dios.

Dios a enkurashá Isaias na Su tèmpel. Tin evidensia otro kaminda den Beibel ku e santuario di Dios ta un lugá di enkurashamentu? Salmo 73 (lesa Salmo 73:17), Hebr. 4:14-16, Hebr. 10:19-23, Revelashon 5. Kiko e tekstonan akí ta bisa nos?

No solamente e santuario di Dios ta bati ku poder asombroso; e ta un lugá kaminda hendenan débil i imperfekto manera nos por haña refugio. Nos por ser sigurá dor di sa ku Dios ta obrando pa reskatá nos a traves di Kristu, nos Sumosaserdote.

Juan tambe a mira Kristu representá komo un lamchi di sakrifisio ku a kaba di ser matá, su garganta kòrtá (Rev. 5:6). Esaki no tabata un bista bunita. E deskripshon ta enfatisá ku, aunke Kristu a ser lantá for di morto i a subi na shelu, kontinuamente e ta karga e evento di Krus huntu kunE. Ainda E ta ser halsá pa asina hala tur hende na Su mes na Su altar.

Ora Dios a bolbe duna Isaias enkargo, dikon El a duna e profeta un mensahe straño asina pa hiba pa Su pueblo (Isa. 6:9,10)?

Pa nos no mester pensa ku Isaias a tende robes òf ku e mensahe akí no ta importante, Hesus a sita e pasashi akí pa splika dikon E tabata siña den parabelnan (Mat. 13:13-15).

Dios no ke pa niun hende peresé (2 Pe. 3:9), kua ta splika dikon El a manda Isaias serka e pueblo di Huda, i Hesus na e mundu. Deseo di Dios no ta pa destruí sino pa salba eternamente. Pero miéntras algun hende ta respondé positivamente riba Su apelashonnan, otronan ta bira mas firme den nan resistensia. No opstante, Dios ta sigui apelando na nan pa asina duna nan mas i mas oportunidat pa arepentí. Sinembargo, mas nan resistí, mas duru nan ta bira. Pues, den e sentido ei, loke Dios ta hasi ku nan ta resultá den hasimentu duru di nan kurason, apesar ku E lo ke mas bien pa e akshonnan akí hasi nan sensibel. E amor di Dios pa ku nos ta inkambiabel; nos kontesta individual riba Su amor ta e variabel krusial.

E ròl di un pastor, manera Moises, Isaias, Jeremias, Ezekiel, òf asta Kristu, ta pa sigui apelando, asta si hende rechasá e mensahe. Dios a bisa Ezekiel: “Sea nan tende òf rechasá di tende (pasobra nan ta un kas rebelde), nan lo sa ku tabatin un profeta meimei di nan” (Ezek. 2:5, NRSV). E ròl di Dios i di Su sirbidónan ta pa duna hende un eskoho hustu, pa asina nan lo tin un spièrtamentu adekuá (kompará Ezek. 3:16-21), asta si nan terminá skohiendo destrukshon i eksilio (Isa. 6:11-13).

Ku e ideanan akí den mente, kon nos ta komprondé e ròl di Dios den hasimentu di e kurason di Fárao duru?

Den Eksodo 4:21 Dios ta bisa: “pero lo Mi hasi su kurason duru” (NRSV). Esaki ta e promé di nuebe biaha ku Dios a bisa ku E lo a hasi kurason di Fárao duru. Pero tabatin tambe nuebe biaha ku Fárao a hasi su propio kurason duru (por ehèmpel, lesa Eks. 8:15,32; Eks. 9:34). Klaramente Fárao tabata poseé algun tipo di boluntat liber, sino e lo no tabata kapas pa hasi su propio kurason duru. Pero e echo ku Dios tambe a hasi kurason di Fárao duru ta indiká ku Dios a inisiá e sirkunstansianan riba kua Fárao a reakshoná ora el a hasi su eskohonan, eskohonan pa rechasá e señalnan ku Dios a dun’é. Si Fárao a habri su kurason pa e señalnan ei, su kurason lo a ser hasí moli, no hasí duru, dor di nan.