Derota di e Asirionan

Kiko a sosodé ku Huda? 2 Reinan 18:13, 2 Kron. 32:1, Isa. 36:1.

Ora ku Akas indigno a muri i su yu hòmber fiel Hezekias a siguié, Hezekias a heredá un reino ku a pèrdè independensia kompletu. Despues di a kumpra yudansa di Asiria kontra e aliansa di Siria i Israel norteño, Huda a ser fòrsá pa sigui paga "plaka di protekshon" den forma di tributo na Asiria (lesa 2 Kron. 28:16-21). Ora e rei di Asiria ku yama Sargon II a muri riba un kampo di bataya lehano i a ser siguí pa Senakerib na aña 705 P.K., Asiria tabata parse vulnerabel. Evidensia for di tekstonan asirio i bíbliko ta revelá ku Hezekias a probechá di e oportunidat akí pa rebeldiá (lesa 2 Reinan 18:7), tumando akshon agresivo komo e konspiradó di un revolushon anti-asirio entre e nashonnan chikitu den su region.

Desafortunadamente p’e, Hezekias a supestimá e fleksibilidat di e forsa di Asiria. Na aña 701 P.K., ora Senakerib a someté otro partinan di su imperio, el a ataká Siria-Palestina ku forsa devastador i a plùnder Huda.

Kon Hezekias a prepará pa un konfrontashon ku Asiria? 2 Kron. 32:1-8.

Ora Hezekias a mira ku Senakerib a purba kapturá Herusalèm, e siudat kapital, el a hasi preparashonnan ekstensivo pa un konfrontashon ku Asiria. El a fortalesé su fortifikashonnan, sigui ekipá i organisá su ehérsito, i a oumentá e seguridat di e suministro di awa di Herusalèm (lesa 2 Reinan 20:20; 2 Kron. 32:30 tambe). E tùnel di awa notabel di Siloam, konmemorá pa un inskripshon bisando kon el a ser konstruí, kasi sigur ta data na e preparashon di Hezekias pa un potensial asalto, dèmpel e salida di awa di e parti ariba na Gihon i a kondusié na e parti pabou di e stat di David.

Mes importante ku liderazgo militar i organisativo, Hezekias a proveé liderazgo spiritual miéntras e tabata trata na stimulá e moral di su pueblo den e tempu spantoso akí. "Pero e rei di Huda a determiná pa hasi su parti preparando pa resistí e enemigu; i ora el a logra tur loke sabiduria i energia humano por a logra, el a reuní su forsanan i a urgi nan pa tene kurashi." - EllenG. White, Prophets and Kings, p. 351.

E gobernantenan di Asiria no tabata solamente kruel, nan tabata inteligente. Nan meta tabata rikesa i poder, no simplemente destrukshon (kompará Isa. 10:13,14). Pakiko usa rekursonan pa kapturá un siudat pa medio di forsa si bo por persuadí su abitantenan pa entregá nan mes? Pues, miéntras e tabata envolví ku e okupashon di Lakish, Senakerib a manda su rabshakeh, un tipo di ofisial haltu, pa kaptura Herusalèm pa medio di propaganda.

Ki argumentonan e Rabshakeh a usa pa intimidá Huda? Isa. 36:2-20, lesa tambe 2 Reinan 18:17-35, 2 Kron. 32:9-19.

E rabshakeh a trese algun argumento mas bien poderoso. Boso no por konfia Egipto pa yuda boso pasobra e ta débil i inkonfiabel. Boso no por dependé riba Señor pa yuda boso pasobra Hezekias a ofendé Señor dor di kita Su lugánan haltu i altarnan den henter Huda, bisando e hendenan pa adorá na un altar den Herusalèm. De echo, Señor ta na banda di Asiria i a bisa Senakerib pa destruí Huda. Boso no tin ni sikiera sufisiente hòmber entrená pa atendé ku 2.000 kabai.

Pa evitá un asalto den kua boso no tin nada pa kome i bebe, entregá awor i boso lo ser tratá bon. Hezekias no por salba boso, i pasobra e diosnan di tur e otro paisnan konkistá pa Asiria no a salba nan, boso por ta sigur ku boso Dios lo no salba boso tampoko.

E rabshakeh tabata bisando e bèrdat?

Pasobra tabatin hopi bèrdat den loke e tabata bisando, su argumentonan tabata persuasivo. Sosteniendo e, tabatin dos argumento ku no a ser ekspresá. Di promé, el a kaba di yega for di Lakish, solamente 30 mia leu, kaminda e asirionan tabata mustrando loke a sosodé ku un siudat fuertemente fortifiká ku a tribi na resistí nan. Di dos, e tabatin un kontingente poderoso di e ehérsito asirio huntu kuné (Isa. 36:2). Konosiendo e destino di ehérsitonan i siudatnan otro kaminda (inkluyendo Samaria, e kapital di Israel norteño: 2 Reinan 18:9,10) ku a sukumbí na Asiria, niun Hudaita lo tabatin motibu pa duda ku for di un punto di bista humano Herusalèm tabata kondená (kompará Isa. 10:8-11). Erabshakeh tabatin rason tambe ora el a bisa ku Hezekias a destruí vários lugá di sakrifisio pa asina sentralisá adorashon na e tèmpel den Herusalèm (2 Reinan 18:4; 2 Kron. 31:1). Pero e reforma aki a ofendé Señor, kende tabata e úniko speransa ku Su pueblo a sobra? E lo a, i E por a, salba nan? Tabata na Dios pa kontestá e pregunta akí!

Kon e oratorio sabí di e rabshakeh a afektá Hezekias i su ofisialnan? 2 Reinan 18:37-19:4, Isa. 36:21-37:4.

Ekstremadamente sakudí i lamentando den angustia, Hezekias a bira na Dios, buskando humildemente e interseshon di Isaias, e mesun profeta kende su konseho su tata a ignorá.

Kon Dios a enkurashá Hezekias? Isa. 37:5-7.

E mensahe tabata kòrtiku, pero e tabata sufisiente. Dios tabata na banda di Su pueblo. Isaias a predesí ku Senakerib lo a tende un rumor ku lo a distraé for di su atake riba Huda. Esaki a ser kumplí inmediatamente.

Temporalmente frustrá, pero sin ningun intenshon di entregá pa largu tempu, Senakerib a manda Hezekias un mensahe menasante: “No laga bo Dios, riba Kende bo ta dependé, gaña bo dor di bisa ku Herusalèm lo no ser entregá den man di e rei di Asiria. … E diosnan di e nashonnan … a libra nan?” (Isa. 37:10,12, NRSV; wak tambe 2 Kron. 32:17).

E biaha aki Hezekias a bai stret na e tèmpel i a plama e mensahe dilanti di e Señor di ehérsitonan, "entronisá ariba di e kerubinnan” (Isa. 37:14-16, NRSV).

Kon e orashon di Hezekias a identifiká loke tabata den wega den e krísis di Herusalèm? Isa. 37:15-20.

Senakerib a ataká e defensa di mas fuerte di Hezekias deliberadamente: fe den su Dios. Na lugá di sede, Hezekias a apelá na Dios pa demonstrá ken E ta, "pa asina tur e reinonan di tera por sa ku Abo so ta Señor" (Isa. 37:20, NRSV).

Lesa ku orashon e orashon di Hezekias (Isa. 37:15-20). Ki aspektonan tokante Dios e ta enfoká riba dje? Ki prinsipio nos ta mira den e orashon akí ku por duna nos enkurashamentu i forsa pa keda fiel den nos propio krísisnan personal?

Di akuerdo ku Senakerib, manera a ser reportá den su registronan, el a tuma kuarentiseis siudat fortifiká, a rondoná Herusalèm, i a hasi Hezekias e hudiu "un prizonero na Herusalèm, su residensia real, manera un para den un kouchi". - James B. Pritchard, editor, Ancient Near Eastern Texts Relating to the Old Testament (Princeton, New Jersey: Princeton University Press, 1969), p. 288. Pero apesar di su inklinashon pa propaganda komo un ekstenshon di su ego monumental, ni den teksto ni den kuadronan e no ta afirmá di a kapturá Herusalèm. For di un perspektiva humano, e omishon akí ta asombroso, mirando e poder intransigente di Senakerib i e echo ku Hezekias a dirigí un revolushon kontra dje. Rebeldenan kontra Asiria tabatin espektativanan di bida kòrtiku i mortonan horibel.

Eruditonan ta rekonosé ku asta si nos no tabatin e registro bíbliko, nos lo tabata obligá pa atmití ku un milager lo mester a tuma lugá. E echo ku Senakerib a kubri e murayanan di su "Palasio Sin Rival" ku relievenan (pinturanan grabá) ku di un forma hopi bibu ta representá su eksitoso rondonamentu di Lakish ta parse di ta debí na su nesesidat pa un strategia pa salba su kara. Pero pa grasia di Dios, e imágennan akí lo a mustra Herusalèm en kambio! Senakerib no a konta e restu di e storia, pero Beibel sí ta hasi esaki.

Kiko ta e restu di e storia? Isa. 37:21-37.

Komo kontesta riba e orashon di fe total di Hezekias, Dios a mand'é un mensahe di siguransa total pa Huda ku ta brota ku rabia dirtí kontra e orguyoso rei asirio ku a tribi di dal e divino Rei di reinan den Su kara (Isa. 37:23). E ora ei Dios a kumpli rápidamente ku Su promesa pa defendé Herusalèm (2 Reinan 19:35-37; 2 Kron. 32:21 ,22; Isa. 37:36-38).

Un gran krísis ta pidi pa un gran milager, i e tabata grandi tambe. E kantidat di morto tabata haltu: 185.000. Asina, Senakerib no tabatin eskoho sino di bai kas, kaminda el a topa ku su propio morto (kompará e predikshon di Isaías den Isa. 37:7-38).

"E Dios di e hebreonan a prevalesé riba e asirio orguyoso. E honor di Yehova a ser vindiká den bista di e nashonnan den bisindario. Na Herusalèm e kurasonnan di e pueblo tabata yená ku goso santu." - Ellen G. White, Prophets and Kings, p. 361. Tambe, si Senakerib a konkistá Herusalèm, e lo a deportá e poblashon di tal manera ku Huda lo a pèrdè su identidat, meskos ku Israel nort. For di un perspektiva, e ora ei, lo no tabatin niun pueblo hudiu for di kua e Mesias lo por a nase. Nan storia lo a terminá einan mes. Pero Dios a mantené speransa na bida.

E eventonan di Isaias 38 i 39 (2 Reinan 20) a tuma lugá hopi serka di e tempu ku Dios a libra Hezekias for di Senakerib, aunke e liberashon, manera deskribí den Isaias 37 (lesa tambe 2 Reinan 19) no a tuma lugá ainda. En realidat, Isaias 38:5,6 i 2 Reinan 20:6 ta mustra ku ainda nan tabata enfrentá e menasa asirio.

"Satanas tabata determiná pa logra tantu e morto di Hezekias komo e kaida di Herusalèm, rasonando sin duda ku si Hezekias lo a disparsé, su esfuersonan pa logra reforma lo a stòp i e kaida di Herusalèm por a ser lográ mas fásil."- The SDA Bible Commentary, tomo 4, p. 240.

Kiko e sita akiriba ta bisa nos tokante kon importante bon liderazgo ta pa e pueblo di Dios?

Ki señal Señor ta duna Hezekias pa konfirmá su fe? 2 Reinan 20:8-11; Isa. 38:6-8.

Ora el a rechasá e señalnan ofresé pa Dios (Isaias 7), Akas a kuminsá e kurso di eventonan ku a hiba na problema ku Asiria. Pero awor Hezekias a pidi un señal (2 Reinan 20:8); asina, Dios a fortales'é pa enfrentá e krísis ku su tata a trese riba Huda. De echo, pa hala e sombra bèk riba e oloshi di solo di Akaz tabata posibel solamente pa medio di un milager.

E babilonionan tabata studia moveshonnan di kurpanan selestial i tabata registrá nan ku presishon. Por lo tantu, nan lo a nota e komportashon straño di e solo i a puntra nan mes kiko e tabata nifiká. E echo di ku Rei Merodak-Baladan a manda mensaheronan na e momentu akí no tabata kasualidat. E babilonionan a haña sa di e konekshon entre e rekuperashon di Hezekias i e señal milagroso.

Awor nos sa dikon Dios a skohe e señal partikular akí. Meskos ku mas despues El a usa e strea di Bètlehèm pa trese sabionan for di Oriente, El a usa un kambio solar pa trese mensaheronan for di Babilonia. Esaki tabata un oportunidat úniko pa nan siña tokante e Dios berdadero. Merodak-Baladan a pasa henter su karera purbando na gana independensia duradero di Asiria. E tabatin mester di aliadonan poderoso, kua ta splika su motivashon pa tuma kontakto ku Hezekias. Si e solo mes a move riba petishon di Hezekias, kiko e por a hasi ku Asirio?