Hasiendo lo Inkonsebibel

Si Isaias tabatin intenshon di transmití solamente informashon, e lo a eksponé tur e detayenan enkuanto di e Mesias mesora. Pero pa a siña, persuadí, i duna su oudiensia un enkuentro ku e Sirbidó di Señor, e ta desaroyá un struktura riku di temanan rekurente den forma sinfóniko. E ta desplegá e mensahe di Dios den pasonan pa asina kada aspekto por ser kaptá den relashon ku e restu di e kuadro. Isaias ta un artista ken su lienso ta e alma di su skuchadó.

Lesa Isaias 50:4-10. Resumí loke e versíkulonan akí ta bisando. Kon bo ta mira Hesus den e pasashi akí?

Den Isaias 49:7 nos a mira ku e sirbidó di Dios ta ser despresiá, aboresé , i e esklabo di gobernantenan (NRSV) pero ku "Reinan lo mira i lanta para, prensnan, i nan lo bùig te na suela" (NRSV). Aki den Isaias 50 nos ta mira ku e vaye ta mas profundo pa e maestro tierno ken su palabranan ta sostené esun kansá (Isa. 50:4). E kaminda na vindikashon ta kondusí su mes a traves di abuzu físiko (Isa. 50:6).

E abuzu akí ta zona malu pa esnan di nos den kulturanan oksidental moderno. Pero den un kultura antiguo di Serkano Oriente, honor tabata un asuntu di bida i morto pa un persona i su grupo. Si bo a insultá i maltratá un persona asin'aki, mihó bo tabata bon protehá; si nan a haña e mínimo oportunidat, e víktima i/òf su grupo siguramente lo a tuma vengansa.

Rei David a ataká i a konkistá e pais di Amon (2 Samuel 10:1-12) pasobra su rei simplemente a "apoderá di e sirbidónan di David, a feita mitar di e barba di kada un, a kòrta nan bistínan na mitar te na nan hep, i a manda nan bai" (2 Sam. 10:4, NRSV). Pero den Isaias 50 e pueblo ta dal e sirbidó, di forma doloroso ta ranka kabeinan di su barba, i ta skupi riba dje. Loke ta hasi e aktonan akí un insidente internashonal interkósmiko ta ku e víktima ta esun mandá di e divino Rei di reinan. De echo, komparando Isaias 9:6, 7 i Isaias 11:1-16 ku otro pasashinan di "sirbidó", nos ta deskubrí ku e sirbidó ta e Rei, e poderoso Libertador! Pero ku tur e poder i honor akí, pa algun motibu inkonsebibel, E no ta salba Su mes! Esaki ta asina straño ku hende no a kere esei. Na Hesus e krus, lidernan a hasi bofon di dje:

"El a salba otronan; lag'E salba Su mes si E ta e Mesias di Dios, Su Skohí!" (Lukas 23:35, NRSV);

"Lag'E baha for di e krus awor, i nos lo kere den djE"(Mat. 27:42, NRSV)

Isaias 52:13-53:12, konosí komo e "E Poema di e Sirbidó ku ta Sufri," ta konfirmá e reputashon di Isaias komo "e profeta evangéliko". Den harmonia ku e ekselensia di e evangelio, e poema ta destaká riba otro literatura. Aunke e ta inkreiblemente kòrtiku, kada frase ta yen di nifikashon profundo ku ta revelá e esensia di e búskeda inkonsebibel di Dios pa salba un rasa hundí i pèrdí den piká.

Esaki no ta e "lechi" di e palabra di Isaias. El a prepará su oudiensia ora el a desaroyá e tema mesiániko for di e promé parti di su buki. Siguiendo e kurso general di e bida di e Mesias riba tera, e profeta a kuminsá ku Su konsepshon i nasementu (Isa. 7:14), a introdusí Su identidat komo un rei davídiko divino (Isa. 9:6, 7), a elaborá riba Su obra di restourashon pa Israel (Isa. 11:1-16) i ministerio silensioso di liberashon for di inhustisia i sufrimentu (Isa. 42:1-7). Despues Isaias a revelá ku e e gran drama di e Mesias ta inkluí e kontraste di tragedia promé ku elevashon (Isa. 49:1-12; Isa. 50:6-10). Awor e Poema di e Sirbidó ku ta Sufri ta sondia e profundidatnan di e tragedia.

Repasá e sekshonnan menshoná den e paragraf aki riba. Revisá kiko nan ta bisa nos tokante e Mesias, Hesus. Kon nan ta yuda prepará nos pa loke ta biniendo den Isaias 52 i 53? Of simplemente nan ta hasi loke ta sosodé den Isaias 52 i 53 mas sorprendente?

Isaias 52:13-53:1 ta introdusí e poema ku un avanse konteniendo un kontraste sorprendente: E Sirbidó lo prosperá i lo ser eksaltá, pero Su aparensia lo ta desfigurá mas ayá di rekenosementu. Ken por kere esei?

Isaias 53:2, 3 ta kuminsá ku un bahada doloroso for di e orígen i aparensia ordinario di e Sirbidó te na Su aflikshon i rechaso. Isaias 53:4-6 ta tuma un pousa pa splika ku Su sufrimentu ta realmente nos kastigu, kua E ta karga pa sana nos. Isaias 53:7-9 ta sigui ku e bahada di e Sirbidó inosente te na e graf.

Den Isaias 53:10-12, e Sirbidó ta subi te na e rekompensa eksaltá ku a ser premirá na komienso di e poema kuminsando den Isaias 52:13, ku e idea añadí di ku Su sakrifisio pa salba otronan ta e boluntat di Dios.

Kompará e poema akí ku e forma di "vaye" di Filipensenan 2:5-11, kaminda Hesus ta kuminsá den forma di Dios pero ta baha hasiendo Su mes bashí pa tuma e sklabitut di forma humano, humiliando Su mes te na morto, i e morto di mas abou di tur: morto riba un krus. P'esei, Dios ta hals’E altamente pa asina tur hende por rekonos’E komo Señor (kompará Isa. 49:7).

Den Isaias 52:13 e Sirbidó di Dios ta ser altamente eksaltá, pero sin atvertensia, e siguiente versíkulo ta deskribí Su aparensia komo asina desfigurá ku E no por ser rekonosé komo un di e "yunan di hende". Tèstamènt Nobo ta deskribí e faktornan ku a desfigurá e aparensia di Hesus, inkluyendo tortura, un korona di sumpiña, krusifikashon, pero, riba tur kos, kar¬gando e pikánan di e rasa humano. Piká nunka tabata e intenshon pa ta natural pa sernan humano; kargando esakinan a hasi e "Yu di Hende" parse inhumano.

Kompará esaki ku e storia di Job, kende di ripiente a kai for di un posishon di gran rikesa, honor, i poder na un infelis miserabel sintá meimei di shinishi riba suela i raspando su heridanan doloroso ku un pida di wea di klei kibrá (Job 1, 2). E kontraste tabata asina grandi ku ni e amigunan di Job a rekonos'é na prinsipio (Job 2:12). E pregunta ta: Dikon Job ta sufri? Dikon e Mesias di Dios mester sufri? Niun di dos no meresé esaki. Tur dos ta inosente. Dikon, anto, e sufrimentu?

Lesa e versíkulonan pa awe i skirbi e lugánan kaminda e tema di e sufridó inosente pa esnan kulpabel ta aparesé. Kiko ta e mensahe esensial ei pa nos?

Wak e preguntanan den Isaias 53:1. E preguntanan akí ta enfatisá e desafio di kere lo inkreibel (kompará ku Juan 12:37-41) i ta atvertí nos pa sinta abou pa e restu di e storia. Pero e preguntanan tambe ta impliká un apelashon. Den e konteksto akí, e paralelo entre e dos preguntanan ta impliká ku e brasa/poder di salbashon di Señor (kompará ku Isa. 52:10) ta ser revelá na esnan ku ta kere e relato. Bo ke eksperensiá e poder salbador di Dios? E ora ei kere e informe.

Wak Isaias 53:6 kuidadosamente. Kiko ta e mensahe spesífiko einan? Kiko e teksto ei ta bisando bo, personalmente, ku mester duna bo speransa apesar di bo pikánan i frakasonan di pasado?

Meskos ku un mata vulnerabel, aparentemente di niun balor spesial, i despresiá (Isa. 53:2, 3), esei ta e deskripshon ku nos ta haña aki di e Sirbidó ku ta Sufri. Isaias a pasa nos rápidamente dor di hubentut inosente te na e rant di e abismo. Asta ku e trasfondo proveé anteriormente, nos no ta prepará den e sentido ku nos ta resigná na e destino di e Sirbidó. Al kontrali! Isaias a siña nos pa apresiá e Yu nasí pa nos, e supremo Prens di Pas. Otronan ta despresi’E, pero nos sa ken E ta realmente.

Manera un hende a bisa: "Nos a topa ku e enemigu i nan ta nos". E sirbidó no ta e promé ku a ser despresiá, rechasá, òf un hòmber di sufrimentu. Rei David tabata tur eseinan ora el a hui for di su yu Absalon (2 Sam. 15:30). Pero e sufrimentu kargá pa e Sirbidó akí no ta di djE mes i no ta resultá di Su propio piká. Ni tampoko E ta karg'é simplemente pa un otro individuo; "Señor a pone riba djE e inikidat di nos tur" (Isa. 53:6, NRSV).

E kontesta riba e pregunta "Dikon?" ta e bèrdat di prueba di Isaias: Pa motibu di e amor di Dios, Su Mesias lo a skohe pa sufri. Pero dikon? Isaias ta dirigí e “broche di oro” pa kompletá e bèrdat inkonsebibel: E lo a skohe pa sufri pa asina alkansá esnan inalkansabel, i esnan inalkansabel ta nos!

Esnan ku no ta komprondé ta konsiderá e Sirbidó komo "gòlpiá pa Dios" (Isa. 53:4, NRSV). Meskos ku e amigunan a pensa ku su piká mester a kousa su sufrimentu, i meskos ku e disipelnan di Hesus a puntr'E "ta ken a peka, e hòmber aki òf su mayornan, ku el a nase siegu?" (Juan 9:2, NRSV), esnan ku a mira Hesus riba e krus a asumí lo pió. Moises no a bisa ku "kualke hende ku ser kologá riba un krus ta bou di maldishon di Dios" (Deut. 21:23, NRSV; kompará Num. 25:4)?

Sinembargo, tur esaki tabata boluntat di Dios (Isa. 53:10). Dikon? Pasobra "Kristu a redimí nos for di e maldishon di e lei, birando un maldishon pa nos" (Gal. 3:13, NRSV). Pasobra Dios "a hasi Esun, Kende no tabata konosé piká, bira piká pa nos, pa asina den djE nos lo por bira e hustisia di Dios" (2 Kor. 5:21).

"Ki un preis a ser pagá pa nos! Kontemplá e krus, i e Víktima halsá riba dje. Wak e mannan ei, borá ku e klabunan kruel. Wak Su pianan, wantá ku klabunan grandi na e palu. Kristu a karga nos pikánan den Su propio kurpa. E sufrimentu ei, e agonia ei, ta e preis di bo redenshon." – Ellen G. White, God's Amazing Grace, p. 172.

Kiko ta nifiká ku bida di e Sirbidó ta "un ofrenda pa piká" (Isa. 53:10, NRSV)?

E palabra hebreo ta referí na un "ofrenda di kulpa/restitushon" (Lev. 5: 14-6:7; Lev. 7:1-7), ku por a ekspiá pa erornan intenshonal kontra di otro hende (Lev. 6:2, 3). Pikánan asina a ser señalá pa Isaias (Isaias 1-3; Isa. 10:1, 2; Isaias 58). Tambe, e pekador mester restourá na e persona ku el a hasi daño e lokual a ser kitá, plùs un multa, promé ku ofresé e sakrifisio pa risibí pordon di Dios (Lev. 6:4-7; kompará Mat. 5:23, 24). Den kaso di mal uso aksidental di algu ku ta pertenesé na Dios, e restitushon ta bai na djE (Lev. 5:16).

Awor nos por komprondé Isaias 40:2, kaminda Dios ta konsolá Su pueblo eksiliá bisando nan ku nan a paga sufisiente restitushon pa nan pikánan.

Pero despues di e reparashon, mester tin un sakrifisio. Até aki den Isaias 53: e Sirbidó di Dios, na lugá di un chubatu, ta ser hibá manera un karné na e matadero (Isa. 53:7) na fabor di hende ku a dual (Isa. 53:6).

Aunke "kòrtá kitá for di e tera di e bibunan" (Isa. 53:8, NRSV; kompará Dan. 9:26), kompletamente konsumí den e sakrifisio ku ta sende e flam di speransa pa nos, e Sirbidó ta lanta for di morto, e tera sin regreso, pa risibí eksaltashon, mira Su "desendientenan", i prolongá Su dianan (Isa. 53:10-12).

Buska kada un di e siguiente versíkulonan. Kon kada unu ta reflehá e mesun mensahe básiko manera Isaias 53?

Salmo 32:1, 2

Rom. 5:8

Gal. 2:16

Fil. 3:9

Hebr. 2:9

1 Pe. 2:24