Deseo di Nashonnan

Den Isaias 58:3 e pueblo a puntra Dios: "Pakiko nos ta yuna, pero Bo no ta mira? Pakiko a humiá nos mes, pero Bo no ta ripará?" (NRSV). Kontrali na esei, Isaias 59:1 ta impliká un otro pregunta, algu manera: "Pakiko nos ta yama riba e man di Señor pa salba nos, pero E no ta hasié? Dikon nos ta sklama na djE, pero E no ta tende?" Isaias ta kontestá ku Dios ta kapas pa salba i tende (Isaias 59:1). Su fayo pa hasi niun, sinembargo, ta enteramente un otro asuntu.

Lesa Isaias 59:2. Ki mensahe ta ser duná aki ku ta kontestá e pregunta den Isaias 59:1?

ta skohe pa "ignorá" Su pueblo, no pasobra esei ta Su deseo, sino pasobra "boso inikidatnan tabata bareranan entre boso i boso Dios" (Isa. 59:2, NRSV). Aki tin un di e deklarashonnan di mas kla den Beibel enkuanto di e efekto di piká riba e relashon divino-humano. lsaias ta pasa e restu di kapítulo 59 elaborando riba e punto akí, ku ta ser mirá den henter historia humano: Piká por destruí nos relashon ku Señor i por lo tantu hiba na nos ruina eterno, no pasobra piká ta alehá Dios for di nos sino pasobra e ta alehá nos for di Dios.

Lesa Génesis 3:8. Kon e ehèmpel aki ta revelá e prinsipio ekspresá den e paragraf aki riba?

Piká ta prinsipalmente un rechaso di Dios, un alehamentu for di djE. E akto di peka realmente ta alimentá riba su mes pasobra no solamente e akto di bira bai for di Dios, sino e resultado di e akto ta pone e pekador bira bai ainda mas for di Señor. Piká ta separá nos for di Dios, no pasobra Dios lo no a aserká e pekador (en realidat, henter e Beibel ta kasi nada otro sino e relato di Dios ku ta tratando na alkansá pa salba pekadornan) pero pasobra piká ta pone nos rechasá Su proposishon divino na nos. Ta p’esei ta asina importante pa nos no tolerá niun piká den nos bida.

Isaias 59 ta presentá un kuadro alarmante di e problema di piká. Afortunadamente, Beibel ta presentá tambe e speransa di Redenshon. Pa kuminsá, e promé pregunta ta: Kuantu di nos a peka? Beibel no ta kiboká su mes: Nos tur a peka. Redenshon, por lo tantu, no por ser basá riba falta di piká; e mester ser basá riba pordon (Jer. 31:34). Pablo ta bai di akuerdo. Tur a peka (Rom. 3:9-20,23); pues, no por tin distinshon riba e base ei (Rom. 3:22). Esnan ku ser hustifiká por ser husgá komo hustu, solamente pasobra nan ta risibí pa medio di fe e don di e hustisia di Dios pa medio di e sakrifisio di Kristu.

Lesa Romanonan 3:21-24. Kiko e versíkulonan akí ta bisando nos tokante di kon nos ta ser salbá? Ki speransa nan mester duna nos den e huisio?

Mayoria hende ta pensa ku e pregunta den e huisio ta: Ken a peka? Pero esei no ta un pregunta ku mester ser hasí, pasobra tur hende a peka. En kambio, e pregunta ta: Ken ta pordoná? Dios ta hustu ora ku E hustifiká "esun ku tin fe den Hesus" (Rom. 3:26, NRSV). E faktor desisivo den e huisio ta: Ken a risibí i ta sigui risibí pordon pasobra e tin fe den Hesus? Awor, ta bèrdat ku nos ta ser husgá pa obra, pero no den sentido ku obranan ta salba nos. Si ta asina, e ora ei fe ta ser hasí nulo (Rom. 4:14). Na lugá di esei, nos obranan ta revelá si realmente nos a ser salbá (Santiago 2:18).

Dikon obra no por salba nos, sea awor òf den e huisio? Lesa Rom. 3:20,23.

Ta muchu lat pa bon obranan, òf obediensia na e lei, pa redimí kualke hende. E propósito di e lei den un mundu pekaminoso no ta pa salba sino pa señalá piká. En kambio, "fe ku ta obra pa amor" (Gal. 5:6, NRSV), amor ku ta ser bashá den e kurason pa medio di e Spiritu di Dios (Rom. 5:5), ta demostrá ku un persona tin fe bibu den Hesus (lesa tambe Santiago 2:26). Obra ta un ekspreshon eksterno, e manifestashon humano di un fe ku ta salba. P'esei, un berdadero eksperensia kristian ta unu den kua fe ta ser ekspresá den un kompromiso diario na Señor ku ta ser revelá pa medio di obediensia na e lei. Den e huisio Dios ta usa obranan komo evidensia pa Su kriaturanan, ku no por lesa pensamentunan di fe manera E por hasi. Pero pa e persona kombertí, solamente obranan ku ta sigui despues di kombershon, ora e bida ser empoderá pa Kristu i Spiritu Santu, ta relevante den e huisio. E bida di piká promé ku kombershon ya a ser labá pa e sanger di e Lamchi (lesa Romanonan 6).

Kiko Isaias 60:1,2 ta papiando di dje? Ki prinsipio bo ta mira obrando ei ku ta ser mirá den henter Beibel? Ki speransa e ta ofresé?

Den Isaias 60:1,2 ta duna nos un kuadro di e liberashon di Dios di Su pueblo, despues di e eksilio, ekspresá ku e deskripshon di Dios kreando lus for di skuridat i mustrando na un kumplimentu final den salbashon pa medio di Kristu.

Den Isaias 60:3, na e lus di ken nashonnan i reinan ta bini?

Den hebreo e persona akí ta singular femenino (lesa tambe Isa. 60:1,2). E mester ta "Sion," personifiká komo un muhé, ku ta ser menshoná kasi na final di e kapítulo anterior (Isa. 59:20). Pues, e pueblonan di tera, ku ta kubrí den skuridat, lo bini na Sion. Nan lo ser halá pa e lus di e gloria di Dios ku a surgi riba dje (Isa. 60:2). "Sion ta ser konvoká pa drenta den e lus ku ta di dje i despues pa opservá i reakshoná riba e nashonnan miéntras nan ta reuní na e mesun lus." - J. Alee Motyer, The Phrophecy of Isaiah: An lntroduction and Commentary, p. 494. Nota ku aunke Sion ta Herúsalèm, e énfasis ta mas riba e pueblo ku riba e lokalidat físiko di e siudat.

E restu di Isaias 60 ta desaroyá e tema introdusí den versíkulonan 1-3: E hendenan di mundu ta ser halá na Herúsalèm, kua ta bendishoná pa motibu di e presensia glorioso di Dios einan.

Kon e profesia akí ta kompará ku e promesa di pakto di Dios na Abraham? Gen. 12:2,3. Nan no ta bisando e mesun kos?

Dios tabatin un propósito universal ora El a skohe Abraham i su desendientenan: A traves di Abraham tur famia di tera lo a ser bendishoná (Gen. 12:3, Gen. 18:18, Gen. 22:18). Asina, e pakto di Dios ku Abraham tabata finalmente intenshoná pa ta un pakto ku henter humanidat a traves di Abraham. E i su desendientenan lo tabata e kanal di revelashon di Dios na e mundu.

Isaias a trata na trese su pueblo bèk na nan destino antiguo i universal. Komo e representantenan di e berdadero Dios, nan tabata responsabel no solamente pa nan mes sino pa e mundu. Nan mester a akohé strañeronan ku ta buska Dios (lesa tambe Isa. 56:3-8), pasobra Su tèmpel "lo ser yamá kas di orashon pa tur e pueblonan" (Isa. 56:7, NRSV).

Ken ta papiando den Isaias 61:1?

E Spiritu di Dios ta riba e persona ungí akí, ku ta nifiká ku e ta un mesias òf e Mesias. E mester "hiba bon nobo na esnan oprimí, verbant esnan di kurason kibrá, proklamá libertat na e koutivonan, i liberashon na e prezunan" (Isa. 61:1, NRSV). Manera Ken esei ta zona? Kompará Isaias 42:1-7, kaminda e Sirbidó di Dios ta ser deskribí den términonan masha similar.

Isaias 61:2 ta papia tokante e "aña aseptabel di Señor". E Mesias, kende a ser ungí komo e Rei i Libertador davídiko, ta proklamá un aña spesial di fabor divino na e momentu ku E ta proklamá libertat. Kompará Levítiko 25:10, kaminda Dios ta ordená e israelitanan pa proklamá libertat den e di sinkuenta aña santu: "E lo ta un hubileo pa boso: boso lo bolbe, kada un di boso, na boso propiedat i kada un di boso serka boso famia" (NRSV). Esaki ta nifiká ku personanan ku a ser fòrsá pa bende nan tera di nan antepasadonan òf pa bira sirbidónan pa asina sobrebibí tempunan difísil (Lev. 25:25-55) lo a reklamá nan tera i libertat. Pasobra e aña di hubileo tabata kuminsá ku suplamentu di un trompèt riba e Dia di Ekspiashon (Lev. 25:9), nos a menshoná e pasashi akí anteriormente den konekshon ku Isaias 58.

Miéntras "e aña di fabor di Señor" (NRSV) den Isaias 61:2 ta un tipo di aña di hubileo, e no ta simplemente un opservansia di Levítiko 25. E aña aki ta ser anunsiá pa e Mesias, e Rei, ora E revelá Su mes pa medio di un ministerio di liberashon i restourashon. Esaki ta similar na algun rei antiguo di Mesopotamia ku a promové benevolensia sosial proklamando liberashon for di debenan durante e promé añanan di nan reinadonan. E ministerio di e Mesias ta bai muchu mas ayá di e lei di Levítiko 25. No solamente E ta "proklamá libertat na e koutivonan", tambe E ta verbant esnan di kurason kibrá, konsolá esnan ku ta yora, i ta trese nan restourashon (Isa. 61:1-11). Mas aleu, ademas di "e aña di fabor di Señor", e ta proklamá "e dia di vengansa di nos Dios" (Isa. 61:2, NRSV).

Ki ora e profesia di Isaias a ser kumplí? Lukas 4:16-21. Kon e ministerio di Hesus a kumpli ku esaki? Tambe, hasi bo mes e pregunta importante akí: Nos, naturalmente, no ta Hesus. Pero nos mester represent’E na e mundu. Kiko ta e kosnan ku e Mesias ta hasi, manera ta ser ekspresá den Isaias 61:1-3, ku nos, den nos kapasidatnan limitá, tambe mester ta hasiendo? I kiko ta algun di e maneranan práktiko den kua nos por hasi e kosnan akí?

Meimei di tur e bon notisianan, dikon e Mesias, manera ta ser deskribí den Isaias 61, ta proklamá e vengansa di Dios? Ki ora e profesia akí ta ser kumpli?

Ora E tabata na Názarèt, Hesus, e Mesias, a lesa Isaias 61 te na "pa proklamá e aña di fabor di Señor" (Isa. 62:2, NRSV; Lukas 4:19, NRSV). Despues El a stòp i a bisa: "Awe e Skritura akí a ser kumplí den boso oido" (Lukas 4:21, NRSV). Asina, deliberadamente i spesífikamente El a evitá di lesa e siguiente palabranan den e mesun versíkulo: "e dia di vengansa di nos Dios" (Isa. 61:2, NRSV). Miéntras Su ministerio di bon notisia, libertat i konsuelo tabata kuminsando na laga koutivonan bira liber for di e tirania di Satanas, e dia di vengansa no tabata pa yega ainda. Den Mateo 24 (kompará Marko 13, Lukas 21), El a predesí na Su disipelnan ku huisionan divino lo a bini den futuro.

Den Isaias 61 e dia di vengansa di Dios ta e "dia grandi i teribel di Señor" (Joel 2:31, NRSV; Mal. 4:5), ku mester ser kumplí ora Kristu bini atrobe pa libra Planeta Tera for di inhustisia derotando Su enemigunan i dunando libertat na e remanente di Su pueblo oprimí (Revelashon 19; kompará Dan. 2:44,45). Por lo tantu, aunke Kristu a anunsiá e komienso di "e aña di fabor di Señor", su kulminashon ta na Su segundo binida.

Kon bo ta rekonsiliá e noshon di un Dios amoroso ku un Dios ku tambe ta primintí vengansa? E ideanan akí ta inkompatibel? Of bo ta komprondé vengansa komo un manifestashon di e amor ei? Si ta asina, kon asina? Splika bo kontesta.

Aunke Hesus a bisa nos pa bira e otro banda di kara (Mat. 5:39), otro kaminda E tabata bon kla ku hustisia i kastigu lo ser imponé (Mat. 8:12). Aunke Pablo ta bisa pa no "paga malu ku malu" (1 Tes. 5:15), e ta bisa tambe ku ora Señor ser revelá for di shelu, ku kandela tur na flam E lo tuma "vengansa riba esnan ku no konosé Dios" (2 Tes. 1:8).

E diferensia, naturalmente, ta ku Señor den Su infinito sabiduria i miserikòrdia so por trese tantu hustisia komo vengansa den un manera kompletamente hustu. Hustisia humano, vengansa humano, ta bin ku tur e faltanan, debilidatnan i inkonsistensianan di humanidat. E hustisia di Dios, naturalmente, lo bini ku niun di e limitashonnan ei.