“Tur Futuro Generashon”

E opinion divino na final di e kreashon di Dios tabata ku tur “kos tabata masha bon” (Gen. 1:31). Despues piká a drenta, i e paradigma a kambia. Kosnan no tabata “masha bon” mas. E kreashon ordená di Dios tabata desfigurá pa piká i tur su resultadonan repugnante. Rebelion a alkansá proporshonnan teribel den e dianan di Noe; maldat a konsumí e rasa. Aunke Beibel no ta duna nos hopi detaye (wak Ellen G. White, Patriarchs and Prophets, p. 90-92 pa mas), e transgreshonnan i rebelion tabata klaramente algu ku ni sikiera un Dios amoroso, ku pasenshi i pordonadó no por a tolerá.

Kon kosnan por a bira asina malu asina rápido? E kontesta, kisas, no ta asina difísil pa haña. Kuantu hende, awendia, ora nan wak nan propio pikánan, no a puntra e mesun kos: Kon kosnan a bira asina malu asina rápido?

Buska e tekstonan numerá aki bou. Skirbi e kuestion ku nan ta plantia. Nota e progreso konstante di piká:

1. Gen. 3:6



2. Gen. 3:11-13



3. Gen. 4:5



4. Gen. 4:8



5. Gen. 4:19



6. Gen. 4:23



7. Gen. 6:2



8. Gen. 6:5,11

Génesis 6:5 i 11 no a surgi den un bashí. Tabatin un historia promé ku nan. E resultado teribel akí tabatin un kousa. Piká a bira pió progresivamente. E tin tendensia di hasi esei. Piká no ta manera un kòrtá òf un herida, ku algun proseso outomátiko inkorporá ku ta trese kurashon. Al kontrario, piká, si e no ser kontrolá, ta multipliká, nunka satisfecho te ora e hiba na ruina i morto. No ta nesesario pa imaginá bida promé ku e Diluvio pa mira e prinsipio akí operando. E ta eksistí tur rònt di nos asta awor.

No ta straño ku Dios ta odia piká; no ta straño, tardi òf trempan, piká lo ser eradiká. Un Dios hustu i amoroso no por a hasi nada mas kuné.

E bon notisia, naturalmente, ta ku, aunke E ke deshasí di piká, E ke salba pekadornan. Ta di esei e pakto ta trata.

Meimei di tur e tekstonan tokante e maldat di e mundu antidiluviano (pre-Diluvio) e hòmber Noe ta destaká den kontraste ku esnan rònt di dje. Wak e teksto aki riba, e tres puntonan partikular ku Beibel ta menshoná tokante e. Di e mihó manera ku bo por, skirbi loke bo ta kere ku kada un di e puntonan akí ta nifiká:

1. E tabata “un hòmber hustu”



2. E tabata “intachabel”



3. El “a kana ku Dios”

No tin duda, Noe tabata un hende ku tabatin un relashon di salbashon ku Señor. E tabata un hende ku ken Dios por a traha, un hende ku lo a skuch’E, obedes’E, i konfia den djE. Ta p’esei Dios tabata kapas pa usa Noe pa kumpli ku Su propósitonan i dikon Pedro, den Tèstamènt Nobo, a yam’é “un predikadó di hustisia” (2 Pe. 2:5).

Lesa Génesis 6:8. Kon e teksto akí ta yuda nos komprondé e relashon entre Noe i Señor?

E palabra grasia ta aparesé aki pa promé bia den Skritura i klaramente tin e mesun nifikashon ku e referensianan den Tèstamènt Nobo, kaminda e fabor miserikòrdioso i inmeresí di Dios, ehersé pa ku pekadornan ku no meresé esaki, ta ser deskribí. Por lo tantu, nos mester komprondé ku, maske kon “intachabel” i “hustu” Noe tabata, ainda e tabata un pekador ku tabatin mester di e fabor inmeresí di su Dios. Den e sentido ei, Noe no ta diferente for di kualke di nos ku ta buska seriamente pa sigui Señor.

“Pero lo Mi establesé mi pakto ku bo; i lo bo drenta den e arka, abo, bo yunan hòmber, bo esposa, i esposa di bo yunan hòmber huntu ku bo” (Gen. 6:18, RSV)

Den esun versíkulo akí nos tin e fundeshinan básiko di e pakto bíbliko ku Dios ta hasi ku humanidat: Dios i humanidat ta drenta den un akuerdo. Masha simpel.

Sí, tin mas elemento ku ta mira na promé bista. Pa kuminsá, tin e elemento di obediensia di parti di humanidat. Dios ta bia Noe ku e i su famia lo drenta den e arka. Nan tin nan parti pa hasi, i si nan no hasié, e pakto ta ser kibrá. Si e pakto ser kibrá, nan ta e pèrdèdónan final, pasobra al final nan ta e benefisiarionan di e pakto. Despues di tur kos, si Noe lo a bisa Dios Nò i no ker a mantené su mes na e pakto, òf a bisa Sí pero despues a kambia su mente, kiko lo tabata e resultadonan pa e i su famia?

Dios ta bisa ku ta “Mi pakto”. Kiko esei ta bisa nos tokante e naturalesa básiko di e pakto? Ki diferensia lo tabatin den nos konsepto di e pakto si Señor lo a yam’é “nos pakto”?

Aunke kon úniko e situashon partikular akí ta, nos ta mira aki e dinámika básiko divino-humano ku ta ser hañá den e pakto. Ora El a establesé “Mi pakto” ku Noe, Dios aki atrobe ta desplegá Su grasia. E ta demostrá ku E ta dispuesto pa tuma e inisiativa pa asina salba sernan humano di e resultadonan di nan pikánan. En breve, e pakto akí no mester ser mirá komo algun sorto di union di igualnan den kua kada “partner” den e pakto ta dependiente riba e otro. Nos lo por bisa ku Dios ta “benefisiá” di e pakto, pero solamente den un sentido radikalmente diferente for di kua sernan humano ta hasi. E ta benefisiá den e echo ku esnan ku E ta stima lo ser duná bida eterno, un satisfakshon no chikitu pa Señor (Isa. 53:11). Pero esei no ke men ku E ta benefisiá den e mesun forma ku nos, na e ekstremo reseptor di e mesun pakto, ta benefisiá.

Purba e analogia akí: un hòmber a kai for di un barku meimei di un tormenta. Un hende riba dèk ta bisa ku e lo tira un salbabida pa hal’é aden. Esun den awa, sinembargo, mester bai di akuerdo ku su parti di e “trato”, i esei ta, gara i tene na loke a ser proveé p’e. Esei, den hopi forma ta loke e pakto entre Dios i humanidat ta trata di dje.

“I Dios a bisa: ‘Esaki ta e señal di e pakto ku mi ta sera entre Ami i boso i tur kriatura bibu ku ta huntu ku boso, pa tur futuro generashon: Mi ta pone mi regenbog den e nubia, i e lo ta un señal di e pakto entre Ami i tera” (Gen. 9:12-13, RSV).

Poko fenómeno natural ta mas bunita ku e regenbog. Ken no ta kòrda, komo mucha, su promé fasinashon i asombro ora e baranan maravioso di lus tabata dobla a traves di e firmamento manera algun sorto di portal místiko ku ta invitá shelu (òf kisas meramente e faha di un payaso)? Asta komo adulto, nos rosea por ser kitá pa e bista di e kolónan ekstrabagante ei den e nubianan. Nada straño ku asta awendia e regenbog ta ser usá komo símbolo pa asina tantu kos: for di organisashonnan polítiko te na kultonan te na bandanan di ròk te na agensianan di biahe (buska e palabra “rainbow” [regenbog] riba Internèt i lo bo mira). Opviamente, e renchinan bunita di koló ainda ta toka akòrtnan den nos kurason i mente.

Naturalmente, esei tabata henter e ophetivo di Dios.

Dikon Señor a bisa ku e regenbog lo tabata un señal? Gen. 9:12-17.

Señor a bisa ku E lo a usa e regenbog komo un señal di “Mi pakto” (Gen. 9:15). Ki interesante ku E lo a usa e palabra pakto aki, pasobra, den e kaso akí, e pakto ta diferensiá di kon e ta ser usá otro kaminda. Den kontraste ku e pakto ku Abraham òf e pakto di Sinai, no tin un obligashon spesífiko ekspresá di parti di esnan ku lo a benefisiá di e pakto (asta Noe). E palabranan di Dios aki ta na tur hende, na “tur generashon futuro” (Gen. 9:15, RSV). E palabranan di Dios ta universal, ku ta abarká tur kos, independiente di sea un hende skohe pa obedesé Señor òf nò. Den e sentido akí e konsepto di pakto no ta ser usá manera e ta ser usá otro kaminda den Beibel ora ta papia tokante e relashon entre Dios i sernan humano.

Den ki sentido e pakto akí ta revelá tambe e grasia di Dios? Ken a inisiá e pakto akí? Ken ta e máksimo benefaktor?

“El a destruí tur kos bibu ku tabatin riba kara di tera, hende i animalnan i kosnan ku ta lastra bou i paranan di shelu; nan a ser destruí for di tera. Solamente Noe a keda, i esnan ku tabata huntu kun’é den e arka” (Gen. 7:23, RSV).

Den e teksto akí bo ta haña e promé menshon di e konsepto di “e remanente” den e Skrituranan. E palabra tradusí “a keda” ta bin di un otro palabra ku su formanan di rais ta ser usá hopi bia den Tèstamènt Bieu kaminda e idea di un remanente ta ser transmití.

“I Dios a manda mi boso dilanti pa preservá un remanente riba tera, i pa tene na bida pa boso hopi sobrebibiente” (Gen. 45:7, RSV; énfasis añadí).

“I esun ku a keda den Sion i ta keda na Herusalèm lo ser yamá santu, kada un ku a ser registrá pa bida den Herusalèm” (Isa. 4:3, RSV; énfasis añadí).

“I den e dia ei Señor lo ekstendé Su man pa un di dos bia pa rekobrá e remanente ku a keda di Su pueblo” (Isa. 11:11, RSV; énfasis añadí).

Den tur e kasonan akí, e palabranan skùin ta konektá na e palabranan similar “a keda” ku ta ser hañá den Génesis 7:23, (RSV).

Wak Génesis 7:23 i e otro ehèmpelnan. Kon bo ta komprondé e konsepto di un remanente aki? Kiko ta e kondishonnan rondó di dje ku a hiba na un remanente? Kon e pakto ta pas ku e idea di un remanente?

Na momentu di e Diluvio, e Kreador di mundu a bira e Hues di mundu. E huisio mundial ku tabata aserkando a plantia e kuestion di si tur bida riba tera, asta bida humano, lo a ser destruí. Si no ta asina, ken lo tabata e sobrebibientenan? Ken lo tabata e remanente?

Den e kaso akí, tabata Noe i su famia. Sinembargo, e salbashon di Noe tabata vinkulá ku e pakto di Dios kuné (Gen. 6:18), un pakto ku a originá i a ser ehekutá pa un Dios di miserikòrdia i grasia. Nan a sobrebibí solamente pa motibu di loke Dios a hasi pa nan, maske kon importante nan koperashon tabata. Loke sea e obligashonnan di e pakto di Noe tabata, i no importá kon fielmente el a ehekutá nan, su úniko speransa tabata den e miserikòrdia di Dios.