Un Pakto Eterno

“Anto El a bis'é: "Ami ta SEÑOR, Kende a saka bo for di Ur di e kaldeonan, pa duna bo e tera aki pa bo hered'é” (Gen. 15:7).

Nòmbernan tin biaha por ta manera un marka komersial. Nan ta djaserka asosiá den nos mente ku sierto karakterístika ku ora nos tende e nòmber inmediatamente nos ta kòrda e karakterístikanan akí. Ki karakterístikanan ta bin na mente, por ehèmpel, ora bo pensa riba e nòmbernan aki: Albert Einstein, Martin Luther King Jr., Gandhi, òf Dorkas? Kada un ta asosiá ku sierto karakterístika i ideal.

Den tempunan di Beibel, hendenan di Oriente Serkano tabata duna gran importansia na e nifikashon di nòmbernan. "E hebreonan semper tabata pensa di un nòmber komo indikando sea e karakterístikanan personal di esun nombrá, òf e pensamentunan i emoshonnan di esun ku ta duna e nòmber, òf sirkunstansianan èkstra na momentu ku e nòmber tabata ser duná.” — The SDA Bible Commentary, tomo 1, p. 523.

Ora Dios a drenta pa promé bia den un relashon di pakto ku Abram, El a hasi Su Mes konosí na e patriarka bou di e nòmber YHWH (pronunsiá Yahweh, i tradusí komo SEÑOR ku lèter kapital den King James Version [Gen. 15:7]). Pues, Génesis 15:7 ta bisa literalmente: "Ami ta YHWH kende a saka bo for di … ."

E nòmber YHWH, aunke e ta aparesé 6.828 biaha den Tèstamènt Bieu, den sierto sentido e ta kubrí den misterio. E ta parse di ta un forma di e verbo hayah, 'ta', den kua kaso lo a nifiká "Esun Eterno", "Esun Eksistente", "Esun ku ta Eksistí di Su Mes", "Esun ku ta sostené Su mes", òf "Esun ku ta biba Eternamente". E atributonan divino ku ta parse di ta ser enfatisá pa e título aki ta esnan di outo-eksistensia i fieldat. Nan ta mustra na Señor komo e Dios bibu, e Fuente di bida, den kontraste ku e diosnan di e paganonan, ku no tabatin eksistensia apart for di e imaginashonnan di nan adoradónan.

Dios Mes ta splika e nifikashon di Yahweh den Eksodo 3:14, "AMl TA ESUN KU MI TA”(RSV, NASB). E nifikashon akí ta ekspresá e realidat di e eksistensia inkondishonal di Dios, miéntras e ta sugirí tambe Su gobièrnu riba pasado, presente, i futuro.

Yahweh ta tambe e nòmber personal di Dios. E identifikashon di Yahweh komo Esun ku a saka Abram for di Ur ta referí na e anunsio di en pakto di Dios kuné den Genesis 12:1-3. Dios ke pa Abram sa Su nòmber, pasobra e nòmber ei ta revelá aspektonan di Su identidat, naturalesa personal, i karakter, i for di e konosementu akí nos por siña konfia den Su promesanan (Salmo 9:10, Salmo 91:14).

"I ora Abram tabatin nobentinuebe aña, SEÑOR a paresé na Abram, i a bis'é: "Mi ta e Dios Todopoderoso; kana Mi dilanti, i sea perfekto" (Gen. 17:1).

Yahweh a paresé na Abram na vários okashon promé (Gen. 12:1,7; Gen. 13:14; Gen. 15:1,7,18). Awor, den e teksto aki riba, Yahweh ta bolbe paresé na Abram ("SEÑOR a paresé na Abram"), presentando Su Mes komo "Dios Todopoderoso", un nòmber ku ta ser usá ku dos eksepshon solamente den e buki di Génesis i Job. E nòmber "Dios Todopoderoso" ta konsistí primeramente di 'El, e nòmber básiko pa Dios usá entre e semitanan. Aunke e nifikashon eksakto di Shaddai no ta kompletamente sigur, e tradukshon "Todopoderoso" ta parse di ta esun di mas eksakto. (Kompará Isa. 13:6 i Joel 1:15.) E idea krusial den e uso di e nòmber akí ta parse di ta esun di kompará e dominio i poder di Dios ku e debilidat i fragilidat di humanidat.

Lesa Génesis 17:1-6, ku ta yuda pone tur kos den e konteksto mas grandi. Dikon Señor, na e momentu akí, lo ker a enfatisá na Abram Su dominio i poder? Kiko Dios tabata bisando ku lo a rekerí Abram pa konfia den e dominio i poder ei? Wak partikularmente versíkulo seis.

Un tradukshon literal di Génesis 17:1-6 lo tabata: "Jehovah a paresé na Abram, i a bisa: 'Ami ta 'El-Shaddai; kana Mi dilanti i sea perfekto; i lo Mi sera un pakto entre Ami i abo, i lo multipliká bo grandemente... . I lo bo ta tata di un multitut di nashonnan, ... i lo Mi hasi bo ekstremadamente fruktífero.' " E mesun nòmber akí ta paresé tambe den Génesis 28:3, kaminda Isaak ta bisa ku 'El-Shaddai lo bendishoná Jakob, hasié fruktifero i multiplik'é.

Un promesa similar di 'El-Shaddai ta ser hañá den Génesis 35:11, Génesis 43:14, i Génesis 49:25, pasashinan ku ta sugirí e abundansia ku ta ser ehersé pa Dios: 'El, e Dios di poder i outoridat, i Shaddai, e Dios di ríkesanan inagotabel, rikesanan ku E ta dispuesto pa drama riba esnan ku ta busk'É den fe i obediensia.

Apesar ku e nòmbernan di Dios ta bin ku nifikashon teológiko i spiritual, nan no ta terminá simplemente ku Dios. Nòmbernan di hendenan den e antiguo Oriente Serkano no tabata djis maneranan sin sentido di identifikashon manera hopi biaha nan ta pa nos. Pa yama un mucha muhé Maria òf Susy no ta hasi masha diferensia awendia. Pa e semitanan antiguo, sinembargo, nòmbernan humano tabata bin kargá ku nifikashon spiritual. Tur nòmber semítiko di hende tin nifikashon i normalmente ta konsistí di un frase òf frase kortiku ku tabata konsistí di un deseo òf un ekspreshon di gratitut di parti di e mayor. Por ehèmpel, Daniel ta nifiká "Dios ta mi hues"; Joel ta nifiká "Yahweh ta Dios"; òf Nathan ta nifiká "Regalo di Dios".

Pa motibu di e nifikashon mará na nòmbernan, nòmbernan ta ser kambiá hopi biaha pa reflehá un kambio radikal den bida i sirkunstansianan di un hende.

Buska e siguiente tekstonan. Ki situashonnan nan ta papiando di dje, i dikon e nòmbernan a ser kambiá den e situashonnan akí?

1. Gen. 32:28



2. Gen. 41:45



3. Dan. 1:7

Den un sentido, sinembargo, no ta dje difísil ei, asta pa mentenan moderno, pa komprondé e nifikashon di loke un hende ta ser yamá. Tin efektonan sutil i, tin biaha, no sutil. Si un hende konstantemente ta ser yamá "kèns" òf "mahos”, i si eseinan ta e nòmbernan usá pa nan tur ora dor di hopi hende, tardi òf tempran e nòmbernan ei lo por tin un impakto riba e manera kon e persona ei ta mira su mes. Di mes manera, dor di duna hende sierto nòmbernan, òf kambia nan nòmbernan, ta parse posibel pa influensiá kon nan lo mira nan mes i asina influensiá kon nan lo aktua.

Ku esaki den mente, no ta asina difísil pa komprondé dikon Dios lo tabata ker a kambia Abram pa Abraham. Abram ta nifiká "Tata ta ser eksaltá"; Dios a kambi'é pa Abraham, ku ta nifiká "Tata di un multitut". Ora bo wak e promesa di e pakto den kua Dios ta bisa "I lo Mi hasi bo ekstremadamente fruktífero; i lo Mi traha nashonnan for di bo, i reinan lo sali for di bo " (Gen. 17:6, RSV), e kambio di nòmber ta haña mas sentido. Kisas tabata Dios Su manera di yuda Abraham pa konfia den e promesa di pakto, ku a ser hasí na un hòmber di 99 aña kasá ku un muhé di edat avansá ku te na e momentonan ei tabata steril. En breve, Dios a hasié pa yuda oumentá Abraham su fe den e promesanan di Dios na dje.

Den e dos versíkulonan ei e promé fase di e promesa di pakto di Dios na Abram (tin tres) ta ser revelá. Dios a aserká Abram, a dun'é un mandato, i despues a hasié un promesa. E aserkamentu ta ekspresá Dios su eskoho miserikòrdioso di Abram pa ta e promé figura prinsipal di Su pakto di grasia spesial. E mandato ta envolví e prueba di konfiansa total den Dios (Hebr. 11:8). E promesa (Gen.12:1-3,7), aunke hasí spesífikamente na desendientenan di Abram, finlmente ta inkluí un promesa na henter e rasa humano. (Gen. 12:3, Gal. 3:6-9).

E di dos etapa di e pakto di Dios ku Abram ta paresé den Génesis 15:7-18. Den ki versíkulonan nos ta haña algun pasonan similar ku a paresé den e promé fase?

E aserkamentu di Dios na hende? Versíkulonan?

E yamada na obediensia humano? Versíkulonan?

E promesa divino? Versíkulonan?

Den e ritual solèm di fase dos, Señor a paresé na Abram i a pasa meimei di e pidanan di animalnan prepará kuidadosamente. Kada un di e tres animalnan a ser matá i partí i e dos mitar poné un kontra otro, ku un espasio entre nan. E paranan a ser matá pero no partí. Esnan ku tabata bai drenta e pakto mester a kana meimei di e pidanan partí, hurando simbólikamente obediensia perpetuo na e provishonnan ku a ser akordá di forma solèm.

Deskribí loke a tuma lugá durante e di tres i fase final di e pakto divino hasí ku Abram. (Lesa Gen. 17:1-14.)

E nifikashon di e nòmber Abraham ta enfatisá e deseo i diseño di Dios pa salba tur hende. E "hopi nashonnan" lo a inkluí tantu hudiunan komo paganonan. Tèstamènt Nobo ta hasié abundantemente kla ku e berdadero desendientenan di Abraham ta esnan ku tin e fe di Abraham i ku ta konfia den e méritonan di e Mesias primintí (Lesa Gal. 3:7, 29.) Por lo tantu, for di tempu di Abraham, e intenshon di Dios tabata pa salba mas tantu hende ku E tabata por, di kualke nashon ku nan tabata biba den. No tin duda, e no ta diferente awe.

"Pasobra Mi a konosé, ku lo e ordená su yunan i e hendenan di su kas despues di dje, i nan lo warda e kaminda di SEÑOR, pa hasi hustisia i huisio, pa SEÑOR por trese riba Abraham loke El a papia tokante di dje" (Gen. 18:19).

Manera nos a mira te asina leu, e pakto semper ta un pakto di grasia, di Dios hasiendo pa nos loke nunka nos por a hasi pa nos mes. No tin un eksepshon den e pakto ku Abraham.

Den Su grasia, Dios a skohe Abraham komo Su instrumento pa asistí den proklamá e plan di salbashon na e mundu. Sinembargo, E kumplimentu di Dios di Su promesanan di pakto tabata, sinembargo, konektá na e disponibilidat di Abraham pa aktua ku rektitut i pa obedes’E pa medio di fe. Sin e obedensia ei di parti di Abraham, Dios lo no por a us'é.

Genesis 18:19 ta demonstrá kon grasia i lei ta relashoná ku otro. E ta kuminsá ku grasia ("Mi konos’é") i ta ser siguí pa e echo ku Abraham ta un hende ku lo obedesé Señor i ta pone su famia pa obedesé tambe. Fe i obra, anto, ta paresé aki den un union será, manera nan mester ta. (Lesa Santiago 2:17.)

Nota, sinembargo, e palabranan di Génesis 18:19, partikularmente e último klóusula. Kiko e ta bisando aki tokante e obediensia di Abraham? Maske obediensia no ta e medio di salbashon, ki importansia e ta ser duná aki? Di akuerdo ku e teksto akí, e pakto por a ser kumplí sin dje? Splika bo kontesta.

E bendishonnan di e aliansa no por a ser disfrutá di dje òf mantené a ménos ku sierto kondishonnan a ser kumplí dor di e benefisiarionan. Aunke e kondishonnan no tabata nesesario pa establesé e aliansa, nan mester tabata e reakshonnan di amor, fe, i obediensia. Nan mester tabata e manifestashon di un relashon entre humanidat i Dios. Obediensia tabata e medio a traves di kua Dios por a kumpli ku Su promesanan di pakto na e pueblo.

Kibramentu di pakto, pa medio di desobedensia, ta infidelidat na un relashon establesé. Ora e aliansa ser kibrá, loke ta ser kibrá no ta e kondishon di duna, sino e kondishon di kumplimentu.