Yunan di e Promesa

"Despues di e kosnan akí palabra di SEÑOR a yega na Abram den un vishon, bisando: No tene miedu, Abram, Ami ta bo eskudo; i bo rekompensa ekstremadamente grandi" (Gen. 15:1).

Lesa Génesis 15:1-3. Pensa riba e konteksto den kua e mensahe a ser duná. Dikon e promé kos ku Señor ta bisa Abram lo tabata "No tene miedu"? Kiko Abram lo tabatin ku teme?

Loke ta partikularmente interesante aki ta ku Señor ta bisa Abram: ''Ami ta bo eskudo”. E uso di e pronòmbernan personal ta mustra e naturalesa personal di e relashon. Dios lo relashoná kuné direktamente, e forma ku E ke ku nos tur.

E indikashon di Dios komo un "Eskudo" ta aparesé aki pa promé biaha den Beibel i ta e úniko biaha ku Dios ta us'é pa revelá Su mes, asta si otro pasashinan di Beibel ta usa e terminologia pa papia tokante Dios. (Deut. 33:29, Salmo 18:30, Salmo 84:11, Salmo 144:2).

Ora Dios yama Su mes eskudo di un hende, kiko esei ta nifiká? E tabata nifiká algu pa Abram ku kisas e no ta nifiká pa nos awor aki? Nos por reklamá e promesa ei pa nos mes? E ta nifiká ku ningun daño físiko lo bin? Den ki formanan Dios ta un eskudo? Kon bo ta komprondé e imágen ei?

"Kristu no tin un interes kasual den nos sino un interes mas fuerte ku un mama pa su yu ... . Nos Salbador a kumpra nos pa medio di sufrimentu i tristesa humano, pa medio di insulto, reproche, abuzu, bofon, rechaso i morto. E ta kuida pa bo, yu temblando di Dios. E lo hasi bo sigur bou di Su protekshon ... . Nos debilidat den naturalesa humano lo no blòkia nos akseso na e Tata selestial, pasobra E [Kristu] a muri pa hasi interseshon pa nos.” — Ellen G. White, Sons and Daughters of God, p. 77.

"Den bo i den bo desendientenan tur e famianan di mundu lo ta bendishoná" (Gen. 28:14). "I si boso ta pertenesé na Kristu, e ora ei boso ta desendiente di Abraham, i erederonan segun promesa." (Gal. 3:29).

Mas ku un bia Dios a bisa Abraham ku den su simia, su desendiente, tur e nashonnan di mundu lo a ser bendishoná (lesa tambe Gen. 12:3, Gen. 18:18, Gen. 22:18). E promesa di pakto maravioso akí ta ser ripití, pasobra di tur e promesanan, esaki ta esun di mas importante, esun di mas duradero, esun ku ta hasi tur e otronan balioso. Den un sentido, esaki tabata un promesa di e surgimentu di e nashon hudiu, pa medio di ken Señor tabata ker a siña "tur e famianan di tera" tokante e Dios berdadero i Su plan di salbashon. Sinembargo, e promesa ta alkansá kumplimentu kompleto solamente den Hesu-Kristu, kende a bin for di e simia di Abraham, Esun ku na e Krus lo a paga pa e pikánan di "tur e famianan di tera".

Pensa riba e promesa di pakto hasí despues di e Diluvio (den kua Señor a primintí di no destruí e mundu ku awa atrobe). Ki benefisio final esaki lo tabata sin e promesa di redenshon ku ta ser hañá den Hesus? Ki benefisio final kualke di e promesanan di Dios lo tabata sin e promesa di bida eterno ku ta ser hañá den Kristu?

Kon bo ta komprondé e konsepto ku den Abraham, a traves di Hesus,"tur e famianan di tera" lo a ser bendishoná? Kiko esei ta nifiká?

No tin duda, e promesa di pakto di e Salbador di mundu ta esun di mas grandi di tur e promesanan di Dios. E Redentor Mes ta bira e medio dor di kua e obligashonnan di e areglo di pakto ta ser kumplí i tur su otro promesanan ta ser realisá. Tur, tantu hudiu komo pagano ku drenta den union kunE ta ser kontá komo e famia berdadero di Abraham i erederonan di e promesa (Gal. 3:8, 9, 27-29), es desir, e promesa di bida eterno den un ambiente sin piká kaminda maldat, doló, i sufrimentu lo no lanta kabes nunka mas. Bo por pensa di un mihó promesa ku esei?

“Pa disfrutá berdadero felisidat nos mester biaha den un pais hopi leu, i asta pafó di nos mes.” — Thomas Browne.

Wak e sita aki riba, skirbí den siglo 17. Bo ta di akuerdo òf bo ta den desakuerdo? Les'é den konteksto di 1 Tesalonisensenan 4:16-18 i Revelashon 3:12.

Augustine a skirbi di e kondishon humano: "E bida akí di nos, si un bida asina yen di problemanan asina grandi por ser yamá korektamente bida, ta testifiká na e echo ku, for di su komienso, e rasa di hende mortal tabata un rasa kondená. Pensa, na promé lugá, riba e abismo spantoso di ignoransia for di kua tur eror ta sali i asina ta guli e yunan di Adam den un awa yen di lodo skur ku niun hende por skapa sin e kosto di trabounan duru i lágrimanan i temornan. Despues, tuma nos amor mes pa tur e kosnan ku ta proba di ta asina bano i venenoso i ku ta produsí asina tantu doló di kurason, problemanan, fèrdrit, i miedu; tantu goso loko den diskordia, lucha, i guera; ... tantu froude i robo; tantu traishon i orguyo, envidia i ambishon, homisidio i asesinato, krueldat i ferosidat, desòrdu i pashon; tur e pashonnan bergonsoso di esnan impuru, fornikashon i adulterio, insesto i pikánan innatural, violashon i numeroso otro impuresanan demasiado askeroso pa ser menshoná; e pikánan kontra religion, sakrilegio i herehia, blasfemia i perhurio; e inikidatnan kontra nos próhimonan, kalumnia i engaño, mentiranan i testimonio falsu, violensia na personanan i propiedat; e inhustisianan di e kortenan i e numeroso otro miserianan i malesanan ku ta yena mundu, tòg ta skapa atenshon.” — Augustine of Hippo, The City of God, Gerald G. Walsh, S. J. trans. (New York: Doubleday & Co., 1958), buki 22, kap. 22, p. 519.

E sita di Augustine lo por ser apliká na mayoria siudat moderno awe; sinembargo, el a skirbi esaki mas di mil sinkushen aña pasá. Tiki kos tokante di humanidat a kambia, kua ta pa kiko hende ke un eskape.

Afortunadamente, maske kon tòf nos situashon aktual ta, e futuro ta briante, pero solamente pa motibu di loke Dios a hasi pa nos a traves di e bida, morto, resurekshon, i ministerio saserdotal di Hesu-Kristu, e kumplimentu final di e promesa di pakto hasí na Abraham ku, den su simia, tur e famianan di tera lo ta bendishoná.

Dios no solamente a primintí Abraham ku den dje tur e famianan di tera lo tabata bendishoná; Señor a bisa ku E lo a hasi di dje un "nashon grandi i poderoso" (Gen. 18:18; lesa tambe Gen. 12:2, Gen. 46:3), un promesa basta grandi hasí na un hòmber kasá ku un muhé ku a pasa e edat di haña yu. Asina, ora Abraham tabata sin desendiente, muchu ménos un yu hòmber, Dios a primintié tur dos.

Sinembargo, e promesa akí no a ser kumplí kompletamente miéntras Abraham tabata na bida. Tampoko Isaak ni Jakòb a mir'e sosodé. Dios a ripitié na Jakòb, ku e informashon adishonal ku e promesa lo a ser kumplí na Egipto (Gen. 46:3), aunke Jakòb tampoko a mir’é. Finalmente, naturalmente, e promesa ei a ser kumplí.

Dikon Señor kier a traha un nashon spesial for di e simia di Abraham? Señor tabata ke simplemente un otro nashon di sierto orígen étniko? Ki propósitonan e nashon akí mester a kumpli kuné? Lesa Eksodo 19:5, 6; Isaias 60:1-3; i Deuteronomio 4:6-8; i riba e liñanan aki bou, skirbi bo kontesta.

Ta parse evidente for di Skritura ku Dios a proponé pa atraé e nashonnan di e mundu na Su mes pa medio di e testimonio di Israel, ku lo tabata, bou di Su bendishon, un pueblo kontentu, saludabel i santu. Un nashon asina lo a demostrá e bendishon ku ta kompañá obediensia na boluntat di e Kreador. E multitutnan di tera lo a ser halá pa adorá e Dios berdadero (Isa. 56:7). Pues, e atenshon di humanidat lo a ser halá den direkshon di Israel, nan Dios, i e Mesias, ku mester a aparesé meimei di nan, e Salbador di mundu.

"E yunan di Israel mester a okupá henter e teritorio ku Dios a apuntá na nan. E nashonnan ei ku a rechasá e adorashon i e servisio di e Dios berdadero mester a ser ekspropiá. Pero tabata propósito di Dios ku, pa medio di revelashon di Su karakter a traves di Israel, hende mester a ser halá na djE. Na henter mundu e invitashon di e evangelio mester a ser duná. A traves di e siñansa di e servisio di sakrifisio, Kristu mester a ser alsá dilanti di e nashonnan, i tur ku lo a wak na djE lo a biba.” —EllenG. White, Christ 's Object Lessons, p. 290.

"I lo Mi hasibo un nashon grandi, i lo Mi bendishonábo, i hasi bo nòmber grandi; i lo bo ta un bendishon" (Gen. 12:2).

Den Génesis 12:2, Dios ta primintí pa hasi e nòmber di Abram grandi, es desir, pa hasié famoso. Dikon Dios lo ke a hasi esei pa kualke pekador, no importá kon obediente i fiel e ta? Ken ta meresé un "gran" nòmber? (Lesa Rom. 4:1-5, Santiago 2:21-24.) Dios a otorgá grandesa na Abram pa su propio benefisio personal, òf e tabata representá algu mas? Splika.

Kompará Génesis 11:4 ku Génesis 12:2. Kiko ta e gran diferensia entre nan dos? Den ki formanan un ta representá "salbashon pa medio di obranan" i e otro "salbashon pa medio di fe"?

Maske kuantu e plan di salbashon ta basá únikamente riba e obra di Kristu na nos fabor, nos, komo resipientenan di e grasia di Dios ta, sinembargo, ainda envolví. Nos tin un ròl pa hunga; nos eskoho liber ta bira notabel. E drama di siglonan, e bataya entre Kristu i Satanas, ainda ta ser bringá den i a traves di nos. Tantu humanidat komo angelnan ta vigilando kiko ta pasando ku nos den e konflikto (1 Kor. 4:9). Por lo tantu, ken nos ta, loke nos ta bisa, loke nos ta hasi, leu for di no tin importansia mas ayá di nos propio esfera inmediato, tin implikashonnan ku por, den un sentido, resoná dor di universo. Pa medio di nos palabranan, nos akshonnan, asta nos aktitutnan, nos por yuda trese gloria na Señor, ku a hasi asina tantu pa nos, òf nos por trese bèrgwensa riba djE i Su nòmber. Pues, ora Señor a bisa Abraham ku E lo a hasi su nòmber grandi, seguramente E no tabata papia tokante esaki na e mesun manera ku e mundu ta papia tokante un hende ku tin un gran nòmber. Loke ta hasi un nòmber grandi den bista di Dios ta karakter, fe, obediensia, humildat, i amor pa otronan, karakterístikanan ku miéntras hopi biaha nan por ta ser respetá den e mundu, generalmente no ta e faktornan ku mundu ta konsiderá komo kosnan ku ta hasi un hende su nòmber grandi.