Pakto na Sinaí

Komo pueblo, Israel a ser hundí den paganismo egipsio durante hopi siglo largu i difísil, un eksperensia ku, sin duda, a skuresé nan konosementu di Dios, Su boluntat, i Su bondat.

Kon Dios por a gana nan bèk pa Su mes?

Na promé lugá, E lo a demonstrá e outentisidat di Su amor pa Israel, i El a hasi esaki a traves di Su aktonan poderoso di liberashon. E lo a kuminsá sedusí e nashon den un kontesta amoroso riba Su proposishon di pakto. Primeramente Dios a rekordá e nashon di Su aktonan di grasia na nan fabor na Sinaí.

Ki dos ilustrashonnan ta deskribí e manera den kua Señor a trese Israel for di Egipto na Sinaí?

Eks. 19:4, Deut. 32:10-12

Deut. 1:29-31, Ose. 11:1

Kiko e ilustrashonnan akí lo a siña Israel (i nos) tokante e naturalesa di e aktitut di Dios pa ku Su pueblo?

E ilustrashonnan akí ta indiká ku nos Dios ta masha hopi konsiente di nos inkapasidat. Lesa Salmo 103:13, 14. Den tantu e figuranan di e águila komo e mayor kargando su yu nos ta sinti e preokupashon di Dios pa nos bienestar. Tierno, solidario, protektor, prometedor, Su deseo ta pa hiba nos na madures total.

"E águila tabata konosí pa su deboshonnan inusual pa su yunan. E tambe tabata biba riba e tòpnan di seru. Ora e tabata siña su yunan pa bula e tabata karga nan riba su lomba hiba na e gran alturanan ku tabatin bista riba e vayenan di Sinaí, despues e tabata laga nan kai den e profundidatnan. Si e baby ainda tabata muchu chikí i muchu deskonsertá pa bula, tata-águila lo a bin bula bou di dje, fangu e riba su lomba, i bula bai ariba bèk kuné na e nèshi riba e barankanan ariba. I esei, e bos divino ta bisa, ta 'kon mi a saka boso for di Egipto hiba trese serka Mi mes.’ ” — George A. F. Knight, Theology of Narration (Grand Rapids, MI: William B. Eerdmans Publsihing Company, 1976), p. 128.

Kompará e interes di Dios den nos ku e interes ku nos tin un den otro. Kon e preokupashon di Dios pa nos ta afektá nos preokupashon pa otronan?

"P’esei, bisa e yunan di Israel: 'Ami ta SEÑOR, i Ami lo saka boso for di bou di e karganan di e egipsionan, i lo Mi libra boso for di nan sklabitut, i lo Mi redimí boso ku un brasa ekstendé i ku gran aktonan di huisio, i lo Mi tuma boso komo Mi pueblo, i lo Mi ta boso Dios; i boso lo sa ku Ami ta SEÑOR boso Dios, Kende a saka boso for di bou di e karganan di e egipsionan' " (Eksodo 6:6, 7, RSV).

Wak e versíkulonan aki riba: Ki prinsipio nos ta mira den nan, manera anteriormente, enkuanto di e ròl di Dios pa ku humanidat den e relashon di pakto (enfoká riba kuantu biaha e palabra Mi ta aparesé den e versíkulonan akí)?

E liberashon di Israel for di sklabitut egipsio i e liberashon di Noe i su famia for di e Diluvio ta e dos eventonan di salbashon prominente den e eskritonan di Moises. Tur dos ta proveé informashon den e siensia di salbashon. Pero ta e evento di e Eksodo en partikular ta proveé e patronchi básiko.

Ora Dios bisa Israel (a traves di Moises) "Lo Mi redimí bo" (Eksodo 6:6, énfasis añadí), literalmente E ta bisa "lo Mi aktua komo e pariente-redentor” òf go'el.

"E palabra redimí den versíkulo 6 [di Eksodo 6] ta referí na un miembro di un famia ku ta kumprando bèk òf reskatando un otro miembro di e famia, spesialmente ora e miembro ei tabata den sklabitut pa debe òf e tabata na punto di bai den sklabitut. Aparentemente Israel no tabatin niun pariente terenal pa redimié, pero Dios tabata awor e pariente di Israel, su pariente redentor.” — Bernard L. Ramm, His Way Out (Glendale, CA: Regal Books Division, G/L Publications, 1974), p. 50.

Kon bo ta komprondé e idea di ku Dios "lo reskatá," òf kumpra bèk, Su pueblo for di sklabitut? Kiko tabata e preis ku mester a ser pagá? Kiko esaki ta bisa nos tokante nos balor? (Lesa Marko 10:45, 1 Tim. 2:6, Rev. 5:9.)

Den Eksodo 3:8 Dios ta bisa ku El a "bin abou" pa reskatá Israel. Esaki ta un verbo hebreo komun pa e interakshon di Dios ku humanidat. Dios ta den shelu, i nos ta riba tera, i solamente ora Dios "bin abou" na tera E por redimí nos. Den e sentido di mas real di e idea, únikamente ora Hesus a bin abou, a biba, a sufrí, i a muri, i a ser resusitá pa nos, nos por ser redimí. "I e Palabra a bira karni i a biba meimei di nos" (Juan 1:14) ta un otro manera di bisa ku Dios a bin abou pa asina salba nos.

E buki di Eksodo ta hala atenshon di e lesadó na tres evento importante. Meskos ku tres seru, e Eksodo mes, e establesimentu di e pakto, i e konstrukshon di e tabernakel-santuario ta alsa nan mes ariba di e serunan chikitu di eventonan menor. E establesimentu di e pakto, registrá den Eksodo 19 te ku 24, tabata e Mount Everest di nan tres. Un resúmen kòrtiku di Eksodo 19 te ku 24 ta mustra e sekuensia i e relashon di eventonan.

Asta si bo no tin tempu pa buska tur e versíkulonan numerá aki bou, focus riba e sekuensia di eventonan:

1. E yegada i kampamentu di Israel na Sinaí despues di a ser liberá dor di Señor (Eks. 19:1,2).
2. E proposishon di Dios di un pakto ku Israel (Eks. 19:3-6).
3. E kontesta di Israel den aseptashon di e pakto (Eks. 19:7,8).
4. Preparashonnan pa risibí e pakto formalmente (Eks. 19:9-25).
5. Proklamashon di e Dies Mandamentunan (Eks. 20:1-17).
6. Moises komo mediadó di e pakto (Eks. 20:18-21).
7. Prinsipionan di e pakto klaramente spliká (Eks. 20:22 pa Eks. 23:22).
8. Ratifikashon di e pakto (Eks. 24:1-18).

E pakto akí ta hunga un ròl vital den e plan di salbashon. Ta e di kuater pakto menshoná den Beibel (presedé pa esnan ku Adam, Noe, i Abraham), i den dje Dios ta revelá Su mes mas plenamente ku promé, partikularmente ora henter e ritual di santuario ser establesé. Por lo tantu, e santuario ta bira e medio dor di kua Dios ta mustra e pueblo e plan di salbashon ku nan mester a revelá na e mundu.

Aunke Señor a redimí Israel for di e sklabitut na Egipto, E tabata ke pa nan komprendé ku redenshon tabatin un nifikashon mas grandi, mas signifikante ku simplemente libertat for di sklabitut físiko. E ker a redimí nan for di piká, e sklabitut prinsipal, i esaki por a sosodé solamente a traves di e sakrifisio di e Mesias, manera ta ser siñá den e tiponan i símbolonan di e servisio di e santuario. No ta nada straño, anto, ku no muchu despues ku nan a ser redimí for di sklabitut, i e lei a ser duná na nan, e israelitanan a ser instruí pa konstruí e santuario i establesé su servisionan, pasobra den e kosnan akí Dios a revelá na nan e plan di redenshon, kua ta e berdadero nifikashon i propósito di e pakto. Pasobra e pakto no ta nada sino un pakto di salbashon, ku Señor ta ofresé na humanidat kaí. Esei ta loke e tabata den Eden, i esei ta loke e tabata na Sinaí.

"Awor anto, si di bèrdat boso kier obedesé Mi bos i warda Mi aliansa, e ora ei boso lo ta un tesoro pekuliar pa Mi riba tur pueblo, pasobra henter tera ta di Mi; i boso lo ta pa Mi un reino di saserdotenan i un nashon santu. Esakinan ta e palabranan ku bo mester papia ku e yunan di Israel" (Eks. 19:5,6).

Den e versíkulonan akí Señor ta proponiendo Su pakto ku e yunan di Israel. Aunke den un sentido Señor a yama nan, e yamada ei no outomátikamente ta ser otorgá na nan sin nan eskoho. Nan mester a koperá. Asta nan liberashon for di Egipto tabata enbolbí nan koperashon: Si nan no a hasi loke Señor a bisa (manera pone e sanger riba e kozeinnan di porta), nan lo no a ser liberá. Tabata asina simpel.

Aki tambe, Señor no ta bisa nan: "Sea bo ta gusta òf no ta gusta, lo bo ta un tesoro pekuliar pa Mi i un nashon di saserdotenan." No ta asina e ta funshoná, i esei no ta loke e teksto ta bisa.

Lesa Eksodo 19:5-6, sitá aki riba. Kon bo ta komprondé loke Señor ta bisando den konteksto di salbashon pa fe? E mandato inkluí einan pa obedesé Señor ta anulá di un òf otro manera e konsepto di salbashon pa medio di grasia? Kon e siguiente tekstonan ta yuda bo komprondé e kontesta? Rom. 3:19-24; Rom. 6:1,2; Rom. 7:7; Rev. 14:12.

"Nos no ta gana salbashon pa medio di nos obediensia; pasobra salbashon ta e don grátis di Dios, pa ser risibí pa medio di fe. Pero obediensia ta e fruta di fe.” — Ellen G. White, Steps to Christ, p. 61.

Pensa riba loke Señor tabata dispuesto pa hasi pa e nashon di Israel: no solamente El a libra nan milagrosamente for di sklabitut egipsio, sino E ker a hasi nan Su propio poseshon balioso, un nashon di saserdotenan. Basando nan relashon kunE riba Su salbashon (tantu temporal, di sklabitut egipsio, komo eterno), Señor a buska pa elevá nan na un nivel spiritual, intelektual i moral ku lo a hasi nan e maravia di e mundu antiguo. Tur esaki pa e propósito di usa nan pa prediká e evangelio na e nashonnan. Tur loke nan mester a hasi, komo kontesta, tabata obedesé.

Na promé bista, tur kos ta parse bon. Señor ta liberá Su pueblo, ta ofresé nan e promesanan di pakto, i nan ta bai di akuerdo: nan lo hasi tur loke Señor pidi nan pa hasi. Ta un dil "trahá den shelu", bèrdat?

Lesa e siguiente tekstonan. Ki persepshon nan ta duna nos enkuanto di e kontesta di Israel na e pakto?

Rom. 9:31-32

Rom. 10:3

Hebr. 4:1-2

Loke sea Dios pidi nos pa hasi, nos relashon kunE mester ta fundá riba fe. Fe ta proveé e base riba kua obra ta sigui. Obranan, den i di nan mes, no importá kon puru e motivashon ta, no importá kon sinsero, no importá kon numeroso, no por hasi nos aseptabel den bista di un Dios santu. Nan no tabata por den tempu di Israel, i nan no por den nos tempu tampoko.

Si, sinembargo, Beibel bes tras bes ta enfatisá obranan, dikon obranan no por hasi nos aseptabel den bista di Dios? (Lesa Isa. 53:6; Isa. 64:6; Rom. 3:23.)

Lamentablemente, e pueblo hebreo a kere ku nan obediensia a bira e medio di nan salbashon, no e resultado di salbashon. Nan tabata buska hustisia den nan obediensia na e lei, no e hustisia di Dios, ku ta bin pa medio di fe. E pakto di Sinaí, aunke ta bini ku un sèt di instrukshonnan i lei muchu mas detayá, tabata diseñá komo un pakto di grasia meskos ku tur e paktonan anterior tambe. E grasia akí, duná gratuitamente, ta produsí un kambio di kurason ku ta hiba na obediensia. E problema, naturalmente, no tabata nan intento pa obedesé (e pakto tabata eksigí pa nan obedesé); e problema tabata e tipo di "obediensia" ku nan tabata ofresé, ku no tabata realmente obediensia ètòl, manera e historia posterior di e nashon a demonstrá.