Lei di Pakto

Tradishon hudiu a siña ku Dios a hasi un pakto ku Israel solamente pasobra otro nashonnan a rechas’é promé. Aunke no tin niun evidensia bíbliko pa e posishon ei, e ta, sinembargo, yuda nos komprondé e punto ku pa kualke rasonnan Señor a skohe e nashon hebreo, no tabata pasobra nan tabata meresé e gran honor i privilegio ku Dios a otorgá na nan. Nan no tabatin niun mérito di nan mes ku lo a hasi nan digno di e amor di Dios i di Su eskoho di nan komo Su pueblo. Nan tabata tiki na kantidat, un grupo di tribunan sklabisá, i polítikamente i militarmente suak. Ademas, den términonan di kultura i religion, nan tabata mesklá, suave i sin muchu influensia. E kousa básiko, anto, pa e elekshon di Israel ta sintá den e misterio di e amor i grasia di Dios.

Na mes momento, sinembargo, nos mester ta kuidadoso ora nos konsiderá e idea akí di elekshon, pasobra e ta pèstá ku e potensial pa mal komprondementu teológiko. Pa kiko Dios a skohe Israel? Tabata pa nan ser redimí, miéntras tur otro hende a ser skohé pa ser rechasá i pèrdí? Òf nan a ser skohé pa ta vehíkulonan ku lo a ofresé e mundu loke a ser ofresé na nan? Kon e siguiente versíkulonan ta yuda nos komprondé e kontestanan riba e preguntanan akí?

Eks. 19:6

Isa. 56:7

Hebr. 2:9

Komo Atventistanan di e di shete dia, nos gusta di wak nos mes komo e oponente moderno di Israel, yamá pa Señor, no ta pa ta e únikonan redimí, sino pa proklamá e mensahe di redenshon, den konteksto di e mensahenan di e tres angelnan, na e mundu. En resúmen, nos ta kere ku nos tin algu di bisa ku ningun hende mas ta bisando. Esaki ta, básikamente, e situashon ku Israel antiguo tambe. E propósito di e elekshon di Israel no tabata pa kambia e nashon hebreo den un klup eksklusivo, montonando e promesa di salbashon i redenshon pa nan mes. Al kontrario, si nos ta kere ku Kristu a muri pa henter humanidat (Hebr. 2:9), e ora ei e redenshon ku Señor a ofresé na Israel a ser ofresé na henter mundu tambe. Israel tabata ser suponé di tabata e vehíkulo pa medio di kua e redenshon akí mester a ser hasí konosí. Nos iglesia a ser yamá pa hasi e mesun kos.

"Asina El a anunsiá na boso Su pakto ku El a ordená boso pa kumpli kuné, esta, e dies mandamentunan; i El a skirbi nan riba dos tabla di piedra" (Deut. 4:13). Maske kuantu nos a bin ta enfatisá ku e pakto ta semper un pakto di grasia, ku e ta solamente resultado di e fabor inmeresí di Dios ku ta otorgando riba esnan ku drenta den un relashon di salbashon kunE, grasia no ta un lisensia pa desobedesé. Al kontrario, pakto i lei ta pertenesé huntu; nan ta, de echo, inseparabel.

Wak e teksto aki riba. Kon estrecho e ta konektá e pakto i e lei? Kon e ta mustra kon básiko e lei ta na e pakto?

Ora bo pensa riba loke un pakto ta, e konsepto di lei komo un parti integral tin sentido. Si nos komprondé e pakto komo, entre otro, un relashon, e ora ei algun tipo di regla- i límitenan mester ser halá. Kon largu un matrimonio òf un amistat òf un sosio komersial lo a dura si no tabatin límite- òf reglanan, sea spesífikamente ekspresá òf outomátikamente komprendé? E esposo ta disidí di tuma un amiga òf e amigu ta disidí di yuda su mes ku pòtmòni di e otro, òf un sosio ta invitá un otro persona pa uni ku e empresa sin bisa e otro. E aktonan akí lo tabata un violashon di reglanan, leinan, i prinsipionan. Kon largu e relashonnan akí lo a dura bou di sirkunstansianan liberal asina? Ta p'esei mester tin límitenan, liñanan halá, i reglanan establesé. Solamente pa medio di esakinan e relashon por ser mantené.

De echo, vários ekspreshonnan manera lei (Salmo 78:10)statutonan (Salmo 50:16), testimonionan (Salmo 25:10), mandamentunan (Salmo 103:18), i palabra di Señor (Deut. 33:9) ta ser hañá paralelo na òf den den asosashon estrecho ku (si no ta kasi semper tin e mesun nifikashon ku) e palabra pakto. Evidentemente "e palabranan di e pakto aki"(Jer. 11:3, 6,8) ta e palabranan di e lei di Dios, statutonan, testimonionan, i mandamentunan.

E pakto di Dios ku Su pueblo Israel tabata kontené vários rekerimentu ku lo tabata krusial pa mantené e relashon spesial ku El a buska ku Su pueblo. E ta diferente awe?

Kiko ta bo promé pensamentunan ora bo pensa riba lei? Agentenan di polis, butnan di tráfiko, huesnan, i prizòn? Of bo ta pensa riba restrikshonnan, reglanan, mayornan outoritario, i kastigu? Of, kisas, bo ta pensa riba òrdu, harmonia, stabilidat? Of kisas asta... amor?

E palabra hebreo torah, tradusí "lei" den nos Beibelnan, ta nifiká "siñansa" òf "instrukshon". E término por ser usá pa referí na tur e instrukshonnan di Dios, sea moral, sivil, sosial, òf religioso. E ta impliká tur e konsehonan sabí ku Dios a duna Su pueblo pa grasia, pa asina nan por eksperensiá un bida abundante tantu físikamente komo spiritualmente. No ta straño ku e salmista por a yama e hòmber bendishoná kende su "delisia ta den e lei di Señor, i den Su lei e ta meditá di dia i anochi" (Salmo 1:2).

Ora nos ta lesa e lei òf Torah, e instrukshonnan i siñansanan registrá den e bukinan di Moises ku a bira parti di e pakto di Israel, nos ta ser impreshoná ku e alkanse amplio di instrukshon. E lei ta toka kada parti di e estilo di bida di Israel: agrikultura, gobièrnu sivil, relashonnan sosial, i adorashon.

Dikon bo ta suponé Dios a proveé asina tantu instrukshon pa Israel? (Lesa Deut. 10:13.) Den ki formanan e instrukshonnan akí tabata pa nan "bon"?

E trabou di e "lei"denter di e pakto tabata pa proveé poutanan pa e bida nobo di e partisipante humano di e pakto. E lei ta introdusí e miembro di e pakto na e boluntat di Dios, kende bo ta yega na konosé den e sentido mas pleno a traves di obediensia pa medio di fe na Su mandamentunan i otro ekspreshonnan di Su boluntat.

E parti desempeñá dor di e lei denter di e realidat bibu di e relashon di pakto tabata mustra ku Israel no por a sigui e kamindanan di otro nashonnan. Nan no por a biba di akuerdo ku lei natural, nesesidatnan humano, deseonan, òf asta nesesidatnan sosial, polítiko i ekonómiko so. Nan por a sigui komo e nashon santu di Dios, reino saserdotal, i tesoro spesial únikamente pa medio di obediensia inkondishonal na e boluntat revelá di e Dios ku a traha e pakto den tur área di bida.

Ki bèrdat tokante Dios e presensia di e lei di Dios den e relashon di pakto ta siña nos tokante Su naturalesa esensial? Mal. 3:6, Santiago 1:17.

E lei di Dios ta un ekspreshon oral òf skirbí di Su boluntat (kompará Salmo 40:8). Debí ku e ta un transkripshon di Su karakter, su presensia den e pakto ta sigurá nos di e permanensia i konfiabilidat di Dios. Aunke kisas no semper nos ta kapas pa diserní e obranan di Su providensia, nos sa ku E ta digno di konfiansa. Su universo ta bou di leinan moral i físiko invariabel. Ta e echo aki ku ta duna nos berdadero libertat i seguridat.

E "siguransa ku Dios ta konfiabel ta sinta den e bèrdat ku E ta un Dios di lei. Su boluntat i Su lei ta un. Dios ta bisa ku loke ta bon ta bon pasobra e ta deskribí e mihó relashonnan posibel. P' esei e lei di Dios nunka ta arbitrario òf suheto na kapricho i fantasia. E ta e kos di mas stabil den e universo.” — Walter R. Beach, Dimensions in Salvation (Washington, D.C.: Review and Herald Publishing Association, 1963), p. 143.

Si e lei di Dios no por salba un hende for di piká, di kon El a hasié un parti di e pakto (Tep: lesa Amos 3:3.)

relashon ta rekerí akuerdo i harmonia. Pasobra Dios no ta solamente Kreador di e mundu sino tambe su Gobernante moral, lei ta esensial pa e felisidat di Su sernan kreá i inteligente pa biba den harmonia kunE. Su lei, e ekspreshon di Su boluntat, ta pues e konstitushon di Su gobièrnu. E ta naturalmente e norma òf obligashon di e areglo i relashon di e pakto. Su propósito no ta pa salba, sino pa definí nos deber pa ku Dios (mandamentunan 1—4 ) i nos deber pa ku nos próhimo (mandamentunan 5—10). Den otro palabra, e ta establesé e estilo di bida ku Dios ta deseá pa Su yunan di e pakto biba, pa nan propio felisidat i bienestar. El a prevení Israel di sustituí otro filosofia komo un estilo di bida. E tabata i ta e propósito di e relashon di pakto pa trese e kreyente pa medio di e grasia transformadó di Dios den harmonia ku Su boluntat i karakter.

Buska e siguiente versíkulonan. Kiko ta esun punto ku nan tin en komun, i kiko e ta siña tokante e naturalesa di e pakto?

Gen. 18:19

Gen. 26:4-5

Eks. 19:5

Lev. 26:3

Dios ta rekonosé abiertamente e obediensia fiel di Abraham na "Mi mandamentunan, Mi statutonan i Mi leinan" (Gen. 26:5). Ta ser impliká ku Dios tabata spera un estilo di bida asina di Su sosio humano den e pakto. E deklarashon kompletu di e pakto bíbliko na Sinaí ta hasi abundantemente evidente ku kondishonnan di obediensia ta un di e aspektonan básiko di e pakto.

Eksodo 19:5 ta aklará: "si boso lo obedesé ...". E aspekto kondishonal di e pakto ta innegabel; aunke duná pa grasia, aunke inmeresí, aunke e tabata un regalo pa nan, e promesanan di e pakto no tabata inkondishonal. E pueblo por a rechasá e regalo, ninga e grasia, i bira lomba pa e promesanan. E pakto, meskos ku salbashon, nunka ta ninga boluntat liber. Señor no ta fòrsa hende pa drenta den un relashon di salbashon kunE; E no ta imponé un pakto riba nan. E ta ofres'é gratuitamente na tur hende; tur hende ta ser invitá pa asept’é. Ora nan hasi esaki, obligashonnan ta sigui, no komo un medio pa gana e bendishon di e pakto sino komo un manifestashon eksterno di a risibí e bendishonnan di e pakto. Israel mester a obedesé, no pa gana e promesanan sino pa e promesanan por a ser kumplí den dje. Su obediensia tabata un ekspreshon di loke ta nifiká ser bendishoná dor di Señor. Obediensia no ta generá e bendishonnan, den sentido ku Dios ta obligá pa hasi nan; obediensia, en kambio, ta krea un ambiente kaminda e bendishon di fe por ser manifestá.