Señal di Pakto

Kuantu biaha nos ta tende e frase: e "Sabat hudiu antiguo". Sinembargo, Skritura ta asina kla ku e Sabat tabata eksistí hopi promé ku tabatin niun pueblo Hudiu. Su orígen ta ser hañá den e siman di Kreashon mes.

Buska Génesis 2:2-3 i Eksodo 20:11. Unda nan ta pone, klaramente i sin laga duda, e orígen di e Sabat?

Aunke Génesis 2:2,3 no ta identifiká e "di shete dia" komo e Sabat (e identifikashon akí ta aparesé pa promé biaha den Eksodo 16:26,29), e ta ser sugerí klaramente den e frase "El a sosegá riba e di shete dia" (Gen. 2:2). E palabra sosegá (hebreo, shabbat) ta relashoná ku e sustantivo Sabbath (hebreo shabbat). "E palabra 'shabbat' no ta ser usá [den Gen. 2:2,3], pero ta sigur ku e outor ker a afirmá ku Dios a bendishoná i a santifiká e di shete dia komo e Sabat.” — G. F. Watennan, The Zondervan Pictorial Encyclopedia of the Bible (Grand Rapids, MI: Zondervan Publishing House, 1975), tomo 5, p. 183. Evidentemente, Génesis 2:2,3 ta siña e orígen divino i institushon di e Sabat komo un dia di bendishon pa henter humanidat.

Lesa Marko 2:27. Hesus ta bisa ku e Sabat a ser trahá pa, literalmente, "hende", ku ta nifiká humanidat komo un totalidat, kontrali na e Hudiunan so. Dikon Dios Mes lo a sosegá riba e di shete dia? E tabatin mester di dje? Ki otro propósito Su sosegamentu lo a sirbi?

Aunke algun komentarista a sugerí ku Dios tabatin mester di sosiegu físiko despues di Kreashon, e propósito berdadero pa e sosiegu di Dios tabata pa proveé un Ehèmpel divino pa humanidat. Humanidat tambe mester traha seis dia i despues sosegá riba e Sabat di e di shete dia. Teólogo Karl Barth a sugerí ku e sosegamentu di Dios na final di Kreashon tabata un parti di e "pakto di grasia", den kua humanidat a ser invitá "pa sosegá huntu kunE ... pa partisipá den e sosiegu [di Dios].” —Church Dogmatics, tomo 3, parti 1 (Edinburgh, Scotland: T&T Clark Ltd., 1958), p. 98.

Dios, den Su amor, a yama hòmber i muhé riba e dia despues di nan kreashon na kompañerismo den sosiegu, pa establesé komunion íntimo kunE, den ken Su imágen nan a ser kreá. E kompañerismo i komunion ei mester a dura pa semper. For di e kaida di humanidat, el a ofresé un punto kulminante semanal di un hende su bida ku e Salbador.

"El a bisa nan: "Esaki ta loke SEÑOR tabata ke men: Mañan ta dia di warda sabat, un sabat santu na SEÑOR. Hòrna loke boso kier hòrna awe i herebé loke boso ke herebé, i tur loke sobra, pone esei un banda pa ward'é te su manisé" (Eks. 16:23). Pasa dor di Eksodo 16, e historia di e mana proveé pa Israel, den desierto, promé ku Sinaí. Nota kiko e registro akí ta revelá:

1. Solamente un porshon regular di mana por a ser usá kada dia, pero riba e di seis dia un dòbel porshon mester a ser rekohé.
2. Niun mana no tabata ser duná riba Sabat.
3. E porshon èkstra nesesario pa e Sabat tabata ser preservá sin daña riba e di seis dia, miéntras e mana lo no a keda bon riba niun otro dia.

Kiko e storia akí ta revelá tokante e santidat di e Sabat promé ku e dunamentu di e lei na Sinaí? (Lesa Eksodo 16:23-28.)?

"De echo, e komparashon di e Sabat ku e di shete dia, e deklarashon ku Señor a duna e israelitanan e Sabat, i e registro ku e pueblo, riba mandato di Dios, a sosegá riba e di shete dia, tur ta mustra indudablemente na e institushon original [na Kreashon] e Sabat.” — G. F. Waterman, The Zondervan Pictorial Encyclopedia of the Bible, tomo 5, p. 184.

1. Kua ta e dia di preparashon pa e Sabat?
2. Kua dia di siman ta e Sabat?
3. Di unda e Sabat a bin?
4. Ki tipo di dia e Sabat mester ta?
5. E Sabat ta un dia di ayuno?
6. E sabat ta un prueba di lealtat na Dios?

“E israelitanan mester warda e Sabat, selebrando e pa e generashonnan benidero komo un aliansa perpetuo. E lo ta un señal entre Ami i e israelitanan pa semper, pasobra den seis dia SEÑOR a traha e shelunan i tera, i riba e di shete dia El a sosegá i a keda refreská” (Eksodo 31:16,17, NIV).

Kuater biaha den Skritura e Sabat ta ser indiká komo un "señal" (Eks. 31:13, 17; Ezek. 20:12,20). Un "señal"no ta un "símbolo" den sentido di un kos ku ta tipifiká, representá, òf rekordá otro kos naturalmente, pasobra tur dos ta kompartí kualidatnan similar (por ehèmpel, un símbolo di un moketa hopi biaha ta indiká "forsa" òf "poder"). Den Beibel, e Sabat komo un "señal" tabata funshoná komo un marka òf opheto òf kondishon eksterno pa transmití un mensahe distintivo. Nada den e señal mes tabata vinkul'é ku e pakto. E Sabat tabata un señal di pakto "entre Ami i boso a lo largu di boso generashonnan" (Eks. 31:13, RSV) solamente pasobra Dios a bisa ku tabata asina.

Dikon Señor lo a usa e Sabat komo un señal di pakto? Kiko tin tokante e Sabat ku lo a hasié un símbolo asina apropiá di e relashon di salbashon ku Dios? Kòrdando ku un aspekto krusial di e pakto ta ku nos ta salbá pa grasia, ku obranan no por salba nos, kiko tin tokante e Sabat mes ku ta hasié un símbolo asina bon di e relashon ei? (Lesa Gen. 2:3, Hebr. 4:1-4.)

Loke ta fasinante tokante e Sabat komo un señal di e pakto di grasia ta ku pa siglonan e hudiunan a komprondé ku e Sabat ta e señal di e redenshon Mesiániko. Nan tabata mira den e Sabat un prueba antisipá di salbashon den e Mesias. Debí ku nos ta komprondé redenshon komo algu ku ta bin solamente di grasia, i pasobra nos ta komprondé ku e pakto ta un pakto di grasia, e relashon entre e Sabat, Redenshon, i e pakto ta ser hasí evidente (lesa Deut. 5:13-15). Por lo tantu, kontrario na opinion komun, e Sabat ta un señal di e grasia salbadó di Dios; e no ta un señal di salbashon pa medio di obranan.

“Boso lo warda Mi sabatnan, pasobra esaki ta un señal entre Ami i boso a lo largu di boso generashonnan, pa boso por sa ku Ami, SEÑOR, ta santifiká boso”(Eks. 31:13, RSV).

Un pasashi di Sabat ku ta eksepshonalmente riku ta Eksodo 31:12-17, ku ta bini despues di e instrukshonnan di Señor pa konstrukshon di e santuario i establesimentu di su servisionan (Eks. 25:1 te Eks. 31:11).

E konsepto di e Sabat komo un "señal", un señal visibel, eksterno i eterno entre Dios i Su pueblo, ta ser ekspresá aki den e forma aki pa promé biaha. E teksto mes ta kontené algun konsepto fasinante digno di nos estudio. Dos idea nobo ta uni den e teksto akí:

1. E Sabat komo un señal di konosementu
2. E Sabat komo un señal di santifikashon

Konsiderá e aspekto di señal relashoná ku konosementu. E komprondementu hebreo di konosementu ta inkluí, aspektonan intelektual, relashonal, i emoshonal. "Konosé" no simplemente tabata nifiká sa di un echo, partikularmente ora un persona tabata envolví. E tabata nifiká tambe tin un relashon signifikante ku esun ku bo konosé. Pues konosé Señor tabata nifiká pa ta den e relashon korekto kunE, "sirbiE" (1 Kron. 28:9), "temE" (Isa. 11:2), "ker’E" (Isa. 43:10), "konfi’E" i "busk’E" (Salmo 9:10), i "yama riba" Su nòmber (Jer. 10:25).

Buska kada un di e tekstonan den e párafo aki riba. Den ki formanan e tekstonan akí ta yuda nos komprondé loke ta nifiká "konosé" Señor?

Ademas, e Sabat tin nifikashon komo un señal di santifikashon. E ta nifiká ku Señor ta "santifiká" Su pueblo (kompará Lev. 20:8) dor di hasi nan "santu" (Deut. 7:6).

E proseso di santifikashon ta mes tantu e obra di e amor redentor di Dios ku e obra di Dios di salba i redimí. Hustifikashon i santifikashon tur dos ta aktividatnan di Dios: "Ami... SEÑOR... ta santifiká bo" (Lev. 20:8, RSV). Pues, e Sabat ta un señal ku ta impartí konosementu di Dios komo Santifikadó. "E Sabat duná na e mundu komo un señal di Dios komo e Kreador ta tambe e señal di dje komo e Santifikadó.” — EllenG. White, Testimonies for the Church, tomo 6, p. 350.

"Kòrda dia di Sabat pa santifiké" (Eks. 20:8).

E Sabat tabata i ta un señal pa hende "kòrda". E uso di e palabra kòrda por sirbi vários funshon. Promé, kòrda algu ta impliká wak atras, wak pasado. Den e kaso akí, e Sabat ta mustra nos na e mandato Kreashon, ku a kulminá den institushon di e Sabat komo un dia semanal di sosiegu i komunion spesial ku Dios.

E mandato pa kòrda tin implikashonnan tambe pa presente. Nos no solamente mester "rekordá" e Sabat (Eks. 20:8); nos mester "opserv'é" i "ward'é" (lesa Deut. 5:12, RSV). Pues, e Sabat tin implikashonnan importante pa nos awe, den presente.

Finalmente, rekordando e Sabat tambe ta mustra nos padilanti. E persona ku ta kòrda e wardamentu di Sabat tin un futuro prometedor, riku i signifikativo ku e Señor di Sabat. E ta permanesé den e relashon di pakto, pasobra e ta permanesé den Señor. Atrobe, ora nos komprondé ku e pakto ta un relashon entre Dios i humanidat, e Sabat, ku por yuda fortalesé e relashon ei den gran manera, ta haña un importansia spesífiko.

Enbèrdat, ora e rekordá Kreashon i su Kreador, e pueblo di Dios ta rekordá tambe e aktonan di grasia di salbashon di Dios (lesa Deuteronomio 5:14, kaminda e Sabat ta ser mirá, den e konteksto akí, komo un señal di liberashon di Egipto, un simbolo di e salbashon final ku ta ser hañá den Dios). Kreashon i re-kreashon ta pertenesé huntu. E promé ta hasi e último posibel. E sabat ta un señal ku ta komuniká ku Dios ta e Kreador di mundu i e Kreador di nos salbashon.

"Dor di warda Su Sabat santu nos mester demostrá ku nos ta Su pueblo. Su palabra ta deklará ku e Sabat ta un señal a traves di kua ta distinguí e pueblo ku ta warda e mandamentunan. … Esnan ku ta warda e lei di Dios lo ta unu kunE den e gran kontroversia ku a kuminsá den shelu entre Satanas i Dios.” — Ellen G.White, Selected Messages, buki 2, p.160.

Wak e deklarashon akí di e sirbidó di Señor. Kiko tin tokante e Sabat ku ta hasié algu ku por distinguí nos komo "e pueblo ku ta warda e mandamentunan" mas ku, kisas, kualke di e otro mandamentunan?