E Pakto Nobo

Lesa Jeremias 31:31-34 i kontestá e siguiente preguntanan:

1. Ken ta inisiá e pakto?



2. Tokante ken su lei ta ser papiá aki? Ki lei esaki ta?



3. Ki versíkulonan ta enfatisá e aspekto relashonal ku Dios ke ku Su pueblo?



4. Ki akto di Dios na fabor di Su pueblo ta forma e base di e relashon di pakto ei?

Ta evidente: E pakto nobo no ta algu hopi diferente for di e pakto bieu hasí ku Israel riba Seru Sinaí. De echo, e problema ku e pakto di Sinaí no tabata ku e tabata bieu òf antikuá. E problema, en kambio, tabata ku el a ser kibrá (lesa Jer. 31:32).

E kontestanan riba e preguntanan aki riba, tur ku ta ser hañá den e kuater versíkulonan ei, ta proba ku hopi faseta di e "pakto bieu" ta permanesé den esun nobo. E "pakto nobo" ta, den un sentido, un "pakto renobá". Ta e kulminashon, òf kumplimentu, di esun promé.

Focus riba e último parti di Jeremias 31:34, den kua Señor ta bisa ku E lo pordoná nan inikidat i e piká di Su pueblo. Aunke Señor ta bisa ku E lo skirbi e lei riba nos kurasonnan i pon’é denter di nos, ainda E ta enfatisá ku E lo pordoná nos piká i inikidat, ku ta violá e lei skirbí den nos kurason. Bo ta mira kualke kontradikshon òf tenshon entre e dos ideanan akí? Si no ta asina, dikon no? Kiko ta nifiká, manera Romanonan 2:15 ta pon’é, pa tin e lei skirbí den nos kurason? (Mat. 5:17-28).

Na momentu ku e reino di sur di Juda tabata serka di yega na un fin i e pueblo a ser hibá den koutiverio na Babilonia, Dios a anunsiá, a traves di Su profeta, Jeremias e "pakto nobo". Esaki ta e promé biaha ku e noshon akí ta ser ekspresá den Beibel. Sinembargo, ora e reino di nort di Israel, e 10 tribunan, tabata na punto di ser destruí (algun 150 aña promé ku e tempu di Jeremias), e idea di un otro pakto a ser menshoná atrobe, e biaha akí dor di Oseas (Ose. 2:18-20).

Lesa Oseas 2:18-20. Nota e paralelo entre loke Señor ta bisa Su pueblo einan ku loke El a bisa den Jeremias 31:31-34. Ki imágennan komun ta ser usá, i, atrobe, kiko e ta bisa tokante e nifikashon básiko i naturalesa di e pakto?

Na momentonan den historia ora e plannan di Dios pa Su pueblo di pakto tabata ser strobá dor di nan rebeldia i inkredulidat, El a manda profetanan pa proklamá ku e historia di e pakto ku Su fielnan no a yega na un fin. No importá kon infiel e pueblo lo por tabata, no importá e apostasia, rebeldia, i desobedensia meimei di nan, ainda Señor ta proklamá Su disponibilidat pa drenta den un relashon di pakto ku tur ku ta dispuesto pa repentí, obedesé, i reklamá Su promesanan.

Buska e siguiente tekstonan. Aunke nan no ta menshoná spesífikamente un pakto nobo, ki elementonan ta ser hañá den nan ku ta reflehá e prinsipionan tras di e pakto nobo?

Eze. 11:19

Eze. 18:31

Eze. 36:26

Señor lo proveé “un kurason pa konosé ku Ami ta SEÑOR” (Jer. 24:7, RSV). E lo "saka e kurason di piedra for di nan karni i duna nan un kurason di karni” (Eze. 11:19, RSV), i lo duna “un kurason nobo” i “un spiritu nobo” (Eze. 36:26, RSV). Tambe E ta bisa: “Lo Mi pone Mi Spiritu denter di boso” (Eze. 36:27). E obra akí di Dios ta e base di e pakto nobo.

"I e strañeronan ku uni nan mes ku SEÑOR, pa ministrá na djE, pa stima e nòmber di SEÑOR, i pa ta Su sirbidónan, kada un ku ta warda e Sabat, i no ta profan’é, i ta tene firme na Mi pakto, esakinan lo Mi hiba na Mi seru santu, i hasi nan kontentu den Mi kas di orashon; nan ofrendanan kimá i nan sakrifisionan lo ser aseptá riba Mi altar, pasobra Mi kas lo ser yamá un kas di orashon pa tur e pueblonan" (Isa. 56:6, 7, RSV).

Jeremias ta deklará ku e pakto nobo mester ser hasí ku "e kas di Israel" (Jer. 31:33). Esaki ta nifiká, anto, ku ta solamente e simia literal di Abraham, hudiunan di sanger i nasementu, mester risibí e promesanan di e pakto?

Nò! De echo, esei no tabata ni sikiera bèrdat den e tempunan di Tèstamènt Bieu. Ku e nashon hebreo, komo un totalidat, a ser duná e promesanan di e pakto ta, naturalmente korekto. Sinembargo, e no a ser hasí ku eksklushon di niun otro hende. Al kontrario, tur, hudiu òf pagano, a ser invitá pa partisipá di e promesanan, pero nan mester a bai di akuerdo pa drenta den e pakto ei. Siguramente e no ta diferente awe.

Lesa e tekstonan den Isaias aki riba. Ki kondishonnan nan ta pone riba esnan ku ke sirbi Señor? Tin realmente algun diferensia den loke Dios a pidi nan i loke E ta pidi di nos awe? Splika bo kontesta.

Apesar ku e pakto nobo ta ser yamá "mihó" (wak e estudio di djárason), realmente no tin diferensia den e elementonan básiko ku ta forma tantu e pakto bieu komo nobo. Ta e mesun Dios, kende ta ofresé salbashon na e mesun manera, pa medio di grasia (Eks. 34:6, Rom. 3:24); ta e mesun Dios kende ta buska un pueblo ku pa fe lo reklamá Su promesanan di pordon (Jer. 31:34, Hebr.8:12); ta e mesun Dios ku ta buska pa skirbi e lei den kurasonnan di esnan ku lo siguiE den un relashon di fe (Jer. 31:33, Hebr. 8:10), sea hudiu òf pagano.

Den Tèstamènt Nobo, e hudiunan, respondiendo na e elekshon di grasia, a risibí Hesus i Su evangelio. Pa un tempu nan tabata e kurason di e iglesia, e "remanente, skohí pa grasia" (Rom. 11:5, RSV) den kontraste ku esnan ku a ser "hasí duru" (Rom. 11:7, RSV). Na mes momentu, e paganonan, ku anteriormente no tabata kere, a aseptá e evangelio i a ser di ènter den e pueblo berdadero di Dios, formá pa kreyentenan, no importá na kua pueblo òf rasa nan tabata pertenesé (Rom. 11:13-24). Asina e paganonan “e tempu ei separá for di Kristu, ekskluí for di e siudadania di Israel, i strañeronan pa ku e paktonan di promesa" (Efe. 2:12, RSV) a ser atraé den e sanger di Kristu. Kristu ta intersediendo e "pakto nobo" (Hebr. 9:15, RSV) pa tur kreyente, independientemente di nashonalidat òf rasa.

Ayera nos a mira ku, enkuanto di e elementonan básiko, e paktonan bieu i nobo tabata meskos. Loke ta fundamental ta salbashon pa medio di fe den un Dios kende lo pordoná nos pikánan, no pa motibu di nada digno den nos sino solamente pa motibu di Su grasia. Komo resultado di e pordon akí, nos ta drenta den un relashon kunE den kual nos ta someté na djE den fe i obediensia.

No opstante, e buki di Hebreonan ta yama e pakto nobo "un mihó pakto". Kon nos ta komprondé kiko esei ta nifiká? Kon un pakto ta mihó ku e otro?

Unda e fayo tabata sinta ku e " frakaso" di e pakto bieu? (Hebr. 8:7, 8).

E problema ku e pakto bieu no tabata e pakto mes sino ku e fayo di e pueblo pa gar’é den fe (Hebr. 4:2). E superioridat di e nobo riba e bieu ta sintá den e echo ku Hesus, na lugá di ser revelá solamente a traves di sakrifisionan di animal (manera den e pakto bieu), awor ta aparesé den e realidat di Su morto i ministerio sumosaserdotal. Ku otro palabra, e salbashon ofresé den e pakto bieu ta e mesun ku ta ser ofresé den esun nobo. Den esun nobo, sin embargo, un revelashon mas grandi i mas kompletu di e Dios di e pakto i e amor ku E tin pa humanidat kaí a ser revelá. E ta mihó den sentido ku tur kos ku a ser siñá a traves di símbolo- i tiponan den Tèstamènt Bieu a haña nan kumplimentu den Hesus, kende Su bida sin piká, Su morto, i ministerio sumosaserdotal a ser simbolisá pa e servisio di santuario terenal (Hebr. 9:8-14).

Awor, sinembargo, na lugá di símbolo-, tipo- i ehèmpelnan, nos tin Hesus Mes, no solamente komo e Lamchi matá kende a drama Su sanger pa nos piká (Hebr. 9:12) sino ku ta para komo nos Sumosaserdote den shelu ministrando na nos fabor(Hebr. 7:25). Aunke e salbashon ku E ta ofresé ta mesun kos, e revelashon mas kompleto akí di Su mes i e salbashon ku ta ser hañá den djE, manera revelá den e pakto nobo, ta hasié superior na esun bieu.

Lesa Hebreonan 8:5 i Hebreonan 10:1. Ki palabra e outor ta usa pa deskribí e servisionan di santuario di e pakto bieu? Kon e uzo di e palabra ei ta yuda nos komprondé e superioridat di e pakto nobo?

E buki di Hebreonan ta pone un énfasis pisá riba Hesus komo nos Sumosaserdote den e santuario selestial. De echo, e eksposishon di mas kla di e pakto nobo ku ta ser hañá den Tèstamènt Nobo ta aparesé den e buki di Hebreonan ku su énfasis riba Kristu komo Sumosaserdote. Esaki no ta koinsidensia. E ministerio selestial di Kristu ta íntimamente ligá na promesanan di e pakto nobo.

E servisionan di santuario di Tèstamènt Bieu tabata e medio pa kua e bèrdatnan di e pakto tabata ser siñá. E tabata sentrá rònt di sakrifisio i mediashon. Animalnan tabata ser matá, i e saserdotenan tabata media ku nan sanger. Esakinan, naturalmente, tur tabata símbolonan di e salbashon ku ta ser hañá solamente den Hesus. Ningun salbashon tabata ser hañá den nan, den i di nan mes.

Lesa Hebreonan 10:4. Dikon salbashon no por ser hañá den e morto di e animalnan akí? Dikon e morto di un animal no ta sufisiente pa trese salbashon?

Tur e sakrifisionan akí i e mediashon saserdotal ku tabata kompañá nan, a haña nan kumplimentu den Kristu. Hesus a bira e Sakrifisio riba kua e sanger di e pakto nobo ta basá. E sanger di Hesus a ratifiká e pakto nobo, hasiendo e pakto di Sinaí i su sakrifisionan "bieu" òf inbálido. E sakrifisio berdadero a ser hasí, un biaha i pa semper (Hebr. 9:26). Unabes Kristu a muri, no tabatin nesesidat mas pa ningun animal ser matá. E servisionan di e santuario terenal a kumpli nan funshon.

Lesa Mateo 27:51, kua ta konta kon e kortina den e santuario terenal a ser di sker ora Hesus a muri. Kon e evento ei ta yuda nos komprondé dikon e santuario terenal a ser remplasá?

Vinkulá, naturalmente, na e sakrifisionan di animal akí tabatin e ministerio saserdotal, e Levitanan ei ku tabata ofresé i media e sakrifisionan den e santuario terenal na fabor di e pueblo. Unabes e sakrifisionan a terminá, e nesesidat pa nan ministerio tambe a terminá. Tur kos a ser kumplí den Hesus, kende awor ta ministrá Su propio sanger den e santuario den shelu (lesa Hebr. 8:1-5). Hebreonan ta enfatisá Kristu komo e Sumosaserdote den shelu, kende a drenta ora El a drama di Su propio sanger (Hebr. 9:12), intersediendo na nos fabor. Esaki ta e fundeshi i promesa ku nos tin den e pakto nobo.