Santuario di e Pakto Nobo

"I lo Mi pone Mi tabernakel meimei di boso, i Mi alma lo no aboresé boso. I lo Mi kana meimei di boso i lo ta boso Dios, i boso lo ta Mi pueblo". (Lev. 26:11, 12).

Un punto mester ta kla na e momento akí: sea den e pakto bieu, òf den e pakto nobo, Señor ta buska un relashon djaserka, amoroso ku Su pueblo. De echo, e paktonan básikamente ta yuda forma (pa falta di un mihó palabra) e "reglanan" pa e relashon ei.

Relashon ta krusial den e pakto, den kualke momento òf konteksto. Sinembargo, pa e relashon eksistí, mester tin interakshon, komunikashon, i kontakto, partikularmente pa sernan humano pekadó, falibel, ku ta duda. Señor, naturalmente, sabiendo esaki, a tuma inisiativa pa ta sigur ku E lo a manifestá Su mes na nos den formanan ku nos, denter di e límitenan di humanidat kaí, por a relashoná kunE den un forma signifikante.

Lesa Eksodo 25:8, e mandato di Señor na Israel pa traha un santuario. Ki rasonnan Señor ta duna pa deseá pa nan hasi esaki?

E kontesta riba e pregunta aki, naturalmente, ta lanta un otro pregunta, anto esei ta Dikon? Dikon Señor ke biba meimei di Su pueblo?

E bèrdat, kisas, lo por ser hañá den e dos versíkulonan pa awe, menshoná aki riba. Tuma nota ku Señor lo "tabernakel" (òf "biba") meimei di nan; despues E ta bisa ku E lo no "aboresé" nan. Despues E ta bisa ku E lo "kana" meimei di nan i lo ta nan Dios, i nan lo ta Su pueblo (Lev. 26:11, 12). Wak e elementonan hañá den e tekstonan akí. Atrobe, e aspekto relashonal ta bin dilanti di forma hopi kla.

Tuma algun minüt: analisá Levítiko 26:11-12 i Eksodo 25:8. Skirbi kon e vários elementonan tur ta pas ku e noshon ku Señor ta buska un relashon ku Su pueblo.

E forma divinamente señalá pa e pekador di Tèstamènt Bieu pa libra su mes di piká i kulpa tabata a traves di sakrifisio di animal. E òfrendanan di sakrifisio israelita ta ser detayá den Levítiko 1 te 7. Atenshon kuidadoso tabata ser poné na e uso i disposishon di e sanger di e vários tiponan di sakrifisio. En realidat, e ròl di sanger den ritualnan di sakrifisio ta un di e karakterístikanan unifikador den e sakrifisionan israelita.

E persona ku a peka, i asina a kibra e relashon di pakto i e lei ku tabata regul'é, por a ser restourá na un kompañerismo pleno ku Dios i humanidat dor di trese un sakrifisio di animal komo sustituto. Sakrifisionan, ku nan ritonan, tabata e medionan designá pa Dios pa logra purifikashon di piká i kulpa. Nan a ser instituí pa limpia e pekador, transfiriendo piká i kulpa individual na e santuario dor di sprengu sanger i restablesé komunion i kompañerismo di pakto total di e penitente ku e Dios personal ku ta e Señor ku ta salba.

Kon e konseptonan akí, ekspresá aki riba, ta yuda nos komprondé e preguntanan na final di e estudio di ayera?

Ki nifikashon profétiko tabatin den e sakrifisio di animal? (Isa. 53:4-12, Hebr. 10:4).

E sakrifisionan di animal di Tèstamènt Bieu tabata e medio ordená pa Dios pa libra e pekador di piká i kulpa. Nan tabata kambia e status di e pekador di esun di kulpabel i digno di morto pa esun di pordoná i restablesé den e relashon di pakto entre Dios i e ser humano. Pero tabatin un sentido den kua e sakrifisionan di animal tabata di naturalesa profétiko. Niun animal, despues di tur kos, tabata un sustituto adekuá pa ekspiá pa piká i kulpa di humanidat. Pablo ta deklará esaki den su propio lenguahe: "Ta imposibel ku e sanger di toro i kabritu mester kita piká" (Hebr. 10:4, RSV). Por lo tantu, un sakrifisio di animal tabata intenshoná pa ta un wakmentu padilanti na e binida di Sirbidó di Dios divino-humano, ku lo a muri un morto sustituto pa e pikánan di e mundu. Ta pa medio di e proseso akí ku e pekadó ta ser pordoná i aseptá pa Señor, i e base di e relashon di pakto ta ser establesé.

"Kende a duna Su mes pa nos pikánan, pa E por a libra nos di e siglo malu di awor aki, konforme e boluntat di Dios i nos Tata" (Gal. 1:4).

No tin duda ku: un di e temanan klave (si no ta e tema klave) di Tèstamènt Nobo ta, ku Hesu-Kristu a muri komo e Sakrifisio pa e pikánan di mundu. E bèrdat akí ta e fundeshi di henter e plan di salbashon. Kualke teologia ku ta nenga e ekspiashon pa medio di e sanger di Kristu ta nenga e kurason i alma di Kristianismo. Un krus sin sanger no por salba niun hende.

Meditá riba e teksto pa awe i despues kontestá e preguntanan akí: Hesus a ofresé Su mes komo boluntario pa muri? Pa ken El a muri? Kiko su morto lo a logra?

Sustitushon ta e klave pa henter e plan di salbashon. Pa motibu di nos pikánan, nos meresé muri. Kristu, pa Su amor pa nos, "a duna Su mes pa nos pikánan” (Gal. 1:4). El a muri e morto ku nos meresé. E morto di Kristu komo e Sustituto pa pekadornan ta e gran bèrdat for di kua tur otro bèrdat ta kore. Nos speransa, esun di restourashon, di libertat, di pordon, di bida eterno den paraiso, ta basa riba e obra ku Hesus a hasi, esun di duna Su mes pa nos pikánan. Sin esei, nos fe lo tabata sin nifikashon. Nos lo por a bien pone nos speransa i konfiansa den un estatua di un piská. Salbashon ta bin solamente pa medio di e sanger, e sanger di Kristu.

Buska e siguiente tekstonan: Mat. 26:28, Efe. 2:13, Hebr. 9:14, 1 Pe. 1:19. Kiko nan ta bisa nos tokante e sanger? Ki ròl, e ora ei, sanger ta hunga den e plan di salbashon?

"No ta boluntat di Dios ku lo bo ta deskonfiá, i torturá bo alma ku e miedu ku Dios lo no aseptá bo pasobra bo ta pekaminoso i indigno ... Bo por bisa: 'Mi sa ku mi ta un pekador, i esei ta e rason ku mi tin mester di un Salbador ... Mi no tin mérito òf bondat pa medio di kua mi por reklamá salbashon, pero mi ta presentá dilanti di Dios e sanger ekspiatorio di e Lamchi di Dios sin mancha, ku ta kita e piká di mundu. Esaki ta mi úniko bogamentu.’ ” — Ellen G. White, The Faith I Live By, p. 100.

E santuario terenal, kaminda Dios a skohé pa biba ku Su pueblo, tabata sentra rondó di e sakrifisio di animalnan. Sinembargo, e servisio no a terminá ku e morto di e kriaturanan akí. E saserdote tabata ministrá e sanger den e santuario na fabor di e pekador despues ku e sakrifisio mes a ser matá.

Henter e servisio akí, sinembargo, tabata solamente un sombra, un símbolo, di loke Kristu lo a hasi pa e mundu. Por lo tantu, meskos ku e símbolonan (e servisio di e santuario) no a terminá ku e morto di e animal, e obra di Kristu pa nos, tampoko no a terminá ku Su morto riba e krus.

Studia pa awe Hebreonan 8:1-6. Hasi orashon riba e versíkulonan. Pidi Señor pa yuda bo komprondé kiko ta ser bisá akinan i dikon ta importante pa nos sa esaki. Ora bo kaba, skirbi den bo propio palabranan kiko bo ta kere ku e mensahe di Señor ta pa nos den e versíkulonan akí. Puntra bo mes, tambe, kon e tekstonan akí ta yuda nos komprondé e pakto nobo?

Meskos ku tabatin un santuario, saserdosio, i ministerio terenal bou di e pakto bieu, asina tin un santuario selestial, un saserdosio selestial, i ministerio selestial bou di e pakto nobo. Loke tabata, sinembargo, solamente símbolonan, imágennan, i un sombra (Hebr. 8:5) den e pakto bieu a bira un realidat den esun nobo.

Tambe, mas bien ku un animal amoral komo nos sustituto, nos tin e Hesus sin piká; mas bien ku sanger di animal, nos tin e sanger di Kristu; mas bien ku un santuario trahá pa hende, nos tin e "tabernakel berdadero, kua Señor a lanta, i no hende" (Hebr. 8:2); i mas bien ku un saserdote pekaminoso, suheto na eror, nos tin Hesus nos Sumosaserdote ministrando na nos fabor. Ku tur esaki den mente, pensa riba e palabranan di Pablo: "Kon nos lo skapa, si nos neglishá un salbashon asina grandi...?" (Hebr. 2:3).

Studia Hebreonan 9:24, partikularmente den e konteksto den kual e ta ser duná, esun ku ta splika e ministerio di Kristu den shelu pa nos despues di Su morto di sakrifisio na nos fabor. Aunke hopi por ser bisá, nos ke enfoká riba un punto, e frase na final, kua ta bisa ku Kristu awor ta aparesé den e presensia di Dios pa nos.

Pensa riba loke esei ta nifiká. Nos, humanidat pekador i kaí; nos, ku lo a ser konsumí pa e resplandor di e gloria di Dios si nos lo a enfrent’é awor aki; nos, no importá kon malu nos tabata òf kon opviamente nos a violá e lei santu di Dios, tin Un Hende ku ta aparesé den e presensia di Dios pa nos. Nos tin un Representante pará dilanti di e Tata na nos fabor. Pensa riba kon amoroso, pordonadó, i kla pa aseptá nos Kristu tabata ora E tabata riba tera. E mesun Persona akí awor ta nos Mediadó den shelu?

Esaki ta e otro parti di e bon notisia. No solamente Hesus a paga e kastigu pa nos pikánan, ora El a tuma nan riba Su mes na e Krus (1 Pe. 2:24), sino awor e ta para den e presensia di Dios, un Mediador entre shelu i tera, entre humanidat i Divinidat.

Esaki tin sentido perfekto. Hesus, tantu Dios komo Hende (un Hòmber perfekto sin piká) ta e Úniko ku por kubri e abismo entre humanidat i Dios, kousá pa piká. E punto krusial pa kòrda den tur esaki (aunke tin hopi) ta ku awor tin un Hòmber, un Ser Humano, ku por relashoná Su mes ku tur nos pruebanan, dolónan i tentashonnan (Hebr. 4:14, 15), representando nos dilanti di e Tata.

"Pasobra tin ún Dios, i ún Mediador tambe entre Dios i hende, e hende Kristu Hesus, Kende a duna Su mes komo un reskate pa tur hende, e testimonio duná na su debido tempu" (1 Tim. 2:5, 6). Ki dos ròl e teksto akí ta pone Hesus aden, i kon e ròlnan akí tabata prefigurá den e servisio di e santuario terenal?

E gran notisia di e pakto nobo ta ku awor, pa motibu di Hesus, pekadornan arepentí tin un Hende representando nan den shelu dilanti di e Tata, Un Hende ku a gana pa nan loke nunka nan por a gana pa nan mes, i esei ta hustisia perfekto, e úniko hustisia ku por para den e presensia di Dios. Hesus, ku e hustisia perfekto ei, formá den Su bida a traves di sufrimentu (Hebr. 2:10), ta para dilanti di Dios, reklamando pa nos pordon di piká i poder riba piká, pasobra sin esakinan nos lo no tabatin speransa, ni awor aki i seguramente no den e huisio.