Fe di Pakto

E kaminda di salbashon di Tèstamènt Bieu bou di e pakto di Moises no ta diferente for di e kaminda di salbashon di Tèstamènt Nobo bou di e pakto nobo. Sea den Tèstamènt Bieu òf e Nobo, pakto bieu òf nobo, salbashon ta pa medio di fe so. Si tabata pa kualke otro kos, manera obranan, salbashon lo tabata algu na nos fabor, algu ku e Kreador tabata obligá pa duna nos. Solamente esnan ku no ta komprondé e seriedat di piká lo por kere ku Dios tabata bou di sierto obligashon pa salba nos. Al kontrario, si tin kos, tabatin solamente un obligashon, i esei tabata loke nos tabata debe na e lei violá. Nos, naturalmente, lo no por a kumpli ku e obligashon ei; afortunadamente, Hesus a kumplié pa nos.

"Ora hòmber- i muhénan por komprondé mas plenamente e magnitut di e gran sakrifisio ku a ser hasí dor di e Mahestat di shelu ora El a muri na lugá di hende, e ora ei e plan di salbashon lo ser engrandesé, i reflekshonnan di Kalvario lo spièrta emoshonnan tierno i sagrado den kurason di e kristian. Alabansanan na Dios i E Lamchi lo ta den nan kurason i riba nan lepnan. Orguyo i balor propio no por floresé den e kurasonnan ku ta mantené e esenanan di Kalvario fresku den memoria … Tur e rikesanan di mundu no ta di sufisiente balor pa redimí un alma ku ta peresé. Ken por midi e amor ku Kristu a sinti pa un mundu pèrdí miéntras E tabata kologá riba e krus, sufriendo pa e pikánan di hendenan kulpabel? E amor aki tabata inmenso, infinito.

“Kristu a demostrá ku Su amor tabata mas fuerte ku morto. E tabata kumpliendo ku salbashon di hende; i aunke E tabatin e konflikto di mas spantoso ku e forsanan di skuridat, tòg, meimei di tur esaki, Su amor a krese bira mas i mas fuerte. El a soportá e skondementu di e kara di Su Tata, te ora El a ser hibá na sklama den e amargura di Su alma: 'Mi Dios, Mi Dios, pa kiko Bo a bandoná Mi?' Su brasa a trese salbashon. E preis a ser pagá pa kumpra e redenshon di hende, ora, den e último lucha di e alma, e palabranan bendishoná a ser ekspresá ku tabata parse di a resoná den henter kreashon: ‘Ta kumplí’.

"E esenanan di Kalvario ta yama pa e emoshon di mas profundo. Riba e tema akí lo bo ser diskulpá si bo manifestá entusiasmo. Ku Kristu, asina ekselente, asina inosente, mester a sufri un morto asina doloroso, kargando e peso di e pikánan di mundu, nos pensamentunan i imaginashonnan nunka por komprondé kompletamente. E largura, e hanchura, e haltura, e profundidat, di un amor asina maravioso nos no por komprondé. Kontemplashon di e profundidatnan inkomparabel di e amor di un Salbador mester yena nos mente, konmové i dirti e alma, refiná i elevá e afekshonnan, i transformá henter e karakter kompletamente¬.” — Ellen G. White, Testimonies for the Church, tomo 2, p. 212, 213.

"Boso sa ku boso a ser reskatá di boso manera bano di biba ku boso a heredá di boso tatanan, no ku kosnan ku ta peresé, manera plata òf oro, ma ku e sanger presioso di Kristu, manera esun di un lamchi sin defekto òf mancha" (1 Pe. 1:18,19, RSV).

Kiko Pedro ke men aki ora e bisa ku nos a ser reskatá?

Ora Pedro papia tokante e morto ekspiatorio di Kristu na e krus, e "reskate" òf e idea di preis na kua e ta referí ta trese e práktika antiguo na mente di un katibu ku tabata ser librá di su sklabitut despues ku un preis a ser pagá (hopi bia dor di un famia). Den kontraste, Kristu a reskatá nos for di e sklabitut di piká i su fruta final, kua ta morto, pero El a hasi esaki ku Su "sanger presioso", Su morto sustituto i boluntario na Kalvario. Atrobe, esaki ta e fundeshi di tur e paktonan; sin dje, e pakto ta bira nulo i sin efekto, pasobra Dios no por a kumpli legítimamente ku Su partí di e dil, kua ta e don di bida eterno otorgá na tur esnan ku kere.

Buska e siguiente versíkulonan: Rom. 6:23, 1 Juan 5:11,13. Ki mensahe nan tur ta kompartí en komun?

Nos tin e promesa akí di bida eterno, pasobra Hesus so por a drecha e abismo ei ku na promé instante a pone nos pèrdè e bida eterno ei. Kon? Pasobra e hustisia i balor infinito di e Kreador so por a kanselá e debe ku nos tabatin ku e lei kibrá, ta asina hanchu e abismo kousá pa piká tabata. Despues di tur kos, kiko esaki lo a bisa tokante e seriedat di e lei moral eterno di Dios si algun ser finito, temporal i kreá por a paga e kastigu pa a viol'é? Solamente Un Hende ku ta igual na Dios Mes, den ken bida tabata eksistí, natural i no derivá i eterno, por a paga e reskate rekerí pa libra nos di e debe mará na e lei. Ta asin’aki tur e promesanan di pakto ta ser kumplí; ta asin’aki nos tin e promesa di bida eterno, asta awor; ta asin’aki nos a ser reskatá di piká i morto.

"El a kere den SEÑOR, i El a konta esaki komo hustisia p'e”(Gen. 15:6).

E versíkulo akí ta keda un di sitanan di mas profundo den henter Skritura. E ta yuda establesé e bèrdat krusial di religion bíbliko, esun di hustifikashon pa fe so, i e ta hasi esaki hopi siglo promé ku Pablo a skirbi tokante dje den Romanonan. Di kua tur ta yuda komprobá e punto ku for di Eden en adelante, salbashon semper a bin di e mesun forma.

E konteksto inmediato di e versíkulo ta yuda nos komprondé presis kon grandi e fe di Abram tabata, keriendo den e promesa di Dios di un yu hòmber apesar di henter e evidensia físiko ku lo tabata parse di ta hasi e promesa ei imposibel. Ta e tipo di fe ku ta realisá su propio impotensia apsoluto, e tipo di fe ku ta rekerí sumishon total di e ami, e tipo di fe ku ta rekerí un sumishon total na Señor, e tipo di fe ku ta resultá den obediensia. Esaki tabata e fe di Abram, i el a ser kontá p’e "komo hustisia".

Dikon Beibel ta bisa ku el a ser "kontá" p’e òf "akreditá na" dje komo hustisia? Abram mes tabata "hustu" den sentido di e hustisia di Dios? Kiko el a hasi, no masha tempu despues ku Dios a deklar'é hustu, ku ta yuda nos komprondé dikon e hustisia akí a ser akreditá na dje, kontrali na loke e mes tabata en realidat?

Maske kuantu e bida di Abram tabata un bida di fe i obediensia, e no tabata un bida di fe perfekto i obediensia perfekto. Tin biaha e tabata desplegá debilidat den tur dos área. (Esei ta zona manera kualke hende ku bo konosé?) Tur esaki ta hiba na e punto krusial, i esei ta: e hustisia ku ta salba nos ta un hustisia ku ta ser akreditá na nos, un hustisia ku ta (pa usa un terminologia elegante) atribuí na nos. Esaki ta nifiká ku nos ta ser deklará hustu den bista di Dios, apesar di nos fayonan; e ta nifiká ku e Dios di shelu ta mira nos komo hustu asta si nos no ta. Esaki ta loke El a hasi ku Abram, i esaki ta loke E lo hasi ku tur ku bin serka djE den "e fe di Abraham" (Rom. 4:16).

Lesa Romanonan 4:1-7. Wak e konteksto den kua Pablo ta usa Génesis 15:6. Hasi orashon riba e versíkulonan ei i skirbi den bo mes palabranan kiko bo ta kere ku nan ta bisando bo.

Si nos bolbe wak Génesis 15:6, nos por mira ku vários tradukshon a usa e término kontá (hebreo, chashab) òf “atribuí” òf “akreditá” (RSV, NIV) òf “kontá” (NKJV).

E mesun término ta ser usá den otro tekstonan den e bukinan di Moises. Un persona òf un kos ta ser "atribuí" òf " konsiderá " komo algu ku e persona ei òf e kos ei no ta. Por ehèmpel, den Génesis 31:15, Raquel i Lea ta afirmá ku nan tata ta "atribuí" ("konsiderá" òf "konta") nan komo strañero, apesar ku nan ta su yunan. E diesmo di e Levita ta ser "atribuí"("konsiderá" òf "kontá") komo si fuera e tabata e maishi di e plenchi di bati maishi, maske opviamente e no ta e maishi (Num. 18:27, 30, NIV).

Kon e idea di kontamentu ta ser ekspresá den e konteksto di sakrifisionan? (Lev. 7:18, Lev. 17:1- 4).

King James Version ta usa e palabra imputá pa tradusí chashab. Si un sakrifisio partikular ("ofrenda di pas") no ser komé pa e di tres dia, su balor ta bai pèrdí, i e lo no ser "kontá" (Lev. 7:18, NASB; hebreo, chashab) na benefisio di esun ku a ofresé. Levítiko 7:18 ta papia di un situashon den kua un sakrifisio ta ser "kontá" pa benefisio di e pekador (kompará Lev. 17:1-4, NASB) ken despues ta para dilanti di Dios den hustisia. Dios ta kontando e pekador komo hustu, aunke e individuo en realidat ta inhustu.

Tuma un tiki tempu pa kontemplá e bèrdat maravioso ku nos, apesar di nos faltanan, por ser kontá, òf akreditá, komo hustu den bista di Dios. Skirbi den bo propio palabranan bo komprondementu di loke esaki ta nifiká.

E gran bèrdat, esun di ser deklará hustu, no pa motibu di kualke akto ku nos por hasi sino solamente pa motibu di fe den loke Kristu a hasi pa nos, esaki ta e esensia di e frase "hustifikashon pa medio di fe". Sinembargo, no ta ku nos fe riba su mes ta hasi nos hustu; mas bien, fe ta e vehíkulo pa medio di kua nos ta optené e don di hustifikashon. Esaki, den esensia, ta e bunitesa, e misterio i e gloria di kristianismo. Tur loke nos ta kere komo kristiannan, komo siguidónan di Kristu, ta haña un rais importante den e konsepto maravioso akí. Pa fe, nos ta ser kontá komo hustu den bista di Dios. Tur sobrá kos ku ta sigui: obediensia, santifikashon, santidat, desaroyo di karakter, amor, mester surgi di e bèrdat krusial akí.

Tin un storia ta ser kontá tokante e famoso kardinal Bellarmine, e gran apologista katóliko ku henter su bida a bringa e mensahe di hustifikashon pa medio di un hustifikashon imputá so. Miéntras e tabata drumi muriendo, nan a trese un krusifiho p’e i e méritonan di e santunan pa yuda dun'é siguransa promé ku morto. Pero Bellarmine a bisa: "Bai kuné. Mi ta kere ku ta mas sigur pa konfia den e méritonan di Kristu".

Pa hopi hende, segun ku nan ta aserká e final di nan bida, nan ta wak bèk i ta mira kon bano, kon inútil, kon sin sentido nan echonan i nan obranan ta pa gana salbashon dilanti di un Dios santu, i por lo tantu kuantu nan tin mester di e hustisia di Kristu.

Sinembargo, e bon notisia ta ku nos no tin mester di warda riba e aserkamentu di morto pa tin seguridat den Señor awor. Henter e pakto ta basá riba e promesanan sigur di Dios awor, promesanan pa nos awor, promesanan ku por hasi nos bida mihó awor.

Buska e siguiente versíkulonan i kontestá e pregunta hasí ku kada un den e konteksto di desaroyá, mantené, i fortifiká bo relashon di pakto ku Dios:

Salmo 34:8 Kon bo por purba e bondat di Dios?

Mat. 11:30 Kiko tin ku loke Kristu a hasi pa nos ku ta hasi e yugo aki fásil?

Rom 5:1 Kiko hustifikasbon tin di aber ku pas?

Fil. 2:7-8 Kiko bo a gana for di e eksperensia di Kristu?