E Bida di Pakto Nobo

"I e kosnan akí nos ta skirbi, pa nos alegria ser hasí kompleto" (1 Juan 1:4)

Wak loke Juan a skirbi aki. Den algun palabra simpel, e ta ekspresá loke mester ta un di e gran bentahanan ku nos, komo pueblo di pakto, tin, i esei ta e promesa di goso.

Komo kristiannan, hopi bia ta ser bisá na nos pa no ser hibá pa sintimentu, ku fe no ta sintimentu, i ku nos mester bai mas ayá di nos sintimentunan, kua tur ta bèrdat. Pero na mes momento, nos lo no tabata sernan humano si nos no tabata kriaturanan di sintimentunan, emoshonnan i estadonan di ánimo. Nos no por ninga nos sintimentunan; loke nos mester hasi ta komprondé nan, duna nan nan ròl apropiá, i tantu ku ta posibel, tene nan bou di kontròl. Pero ninga nan ta ninga loke ta nifiká di ta humano (nos lo por bisa un sírkulo tambe pa no ta rondó). Enbèrdat, manera e versíkulo ta bisa, no solamente nos mester tin sintimentunan (den e kaso akí goso), sino nan mester ta kompleto. E ta zona apénas manera kos ku sintimentunan mester ser rechasá, bèrdat?

Lesa e konteksto di e versíkulo aki riba, kuminsando na prinsipio di e kapítulo. Kiko Juan tabata skirbiendo na e promé Kristiannan ku e tabata spera ku lo a hasi nan goso kompleto? I dikon e lo mester a duna nan goso?

Juan tabata un di e Diesdos original. E tabata ei, kasi for di komienso di e ministerio di tres-aña-i-mei di Kristu, un testigu di algun di e eventonan di mas asombroso di e bida di Hesus. (Juan tabata na e Krus, na Getsémani, i tambe na e Transfigurashon). Por lo tantu, komo un testigu okular, siguramente e tabata bon kualifiká pa papia tokante e tema akí.

Sinembargo, nota tambe, ku e énfasis no ta riba e mes; e ta riba loke Hesus a hasi pa e disipelnan pa asina awor nan por tabatin kompañerismo no solamente ku otro sino ku Dios Mes. Hesus a habri e kaminda pa nos drenta den un relashon djaserka ku Señor; i, un resultado di e kompañerismo akí, e relashon akí, ta goso. Juan ke pa nan sa ku loke nan a tende tokante Hesus ta bèrdat (el a mira, a mishi, a sinti, i a tend'E), i p'esei nan tambe por drenta den un relashon gososo ku nan Tata selestial, ku ta stima nan i a duna Su mes a traves di Su Yu pa nan.

"P'esei awor no tin kondenashon pa esnan ku ta den Kristu Hesus, ku no ta kana segun karni ma ta kana segun e Spiritu" (Rom. 8:1).

Un dama hóben a ser asesiná brutalmente, su asesino tabata deskonosí. Polis, trahando un trampa, a pone un mikrofon den su graf. Un anochi, hopi luna despues di su morto, un hòmber hóben a aserká e graf i, na rudia i yorando, el a roga e dama pa pordon. Polis, naturalmente, ku a monitoriá su palabranan, a deten'é pa e krímen.

Kiko a hiba e hòmber na e graf? Tabata kulpa, kiko otro?

Naturalmente, aunke ningun di nos (nos ta spera) nunka a yega di hasi algu asina malu manera e hóben ei a hasi, nos tur ta kulpabel; nos tur a hasi kosnan ku nos tin bèrgwensa di dje, kosnan ku nos ta deseá di por a deshasí pero no por.

Danki na Hesus i e sanger di e pakto nobo, ningun di nos tin ku biba bou di e stigma di kulpa. Di akuerdo ku e teksto pa awe, no tin niun kondenashon kontra nos. E Hues Supremo ta konsiderá nos no kulpabel, ta konta nos komo si fuera nos no a hasi e kosnan ku nos ta sinti kulpabel p’e.

Kon e versíkulonan akí ta yuda nos komprondé Romanonan 8:1? Juan 5:24; Rom. 3:24-25; 2 Kor. 5:21.

Un di e gran promesanan di biba den un relashon di pakto ku Señor ta ku ya nos no tin mester di biba bou di e karga di kulpa. Pa motibu di e sanger di e pakto, nos, ku ta skohe pa drenta den e relashon di pakto ei ku Dios, ku ta skohe pa biba segun e kondishonnan di fe, arepentimentu, obediensia, por tin e karga di kulpabilidat kitá for di nos. Ora Satanas trata na murmurá den nos orea ku nos ta malbado, ku nos ta malu, ku nos ta demasiado pekaminoso pa ser aseptá pa Dios, nos por hasi loke Hesus a hasi ora Satanas a tent'E den desierto: nos por sita Skritura, i un di e mihó versíkulonan di tur pa sita ta Romanonan 8:1. Esaki no ta nifiká ninga di rekonosé e realidat di piká den nos bida; e ta nifiká, en kambio, ku debí na e relashon di pakto ku nos tin ku Señor, nos no ta biba mas bou di e kondenashon di e piká ei. Hesus a paga e kastigu pa nos, i awor E ta para den presensia di e Tata invokando Su propio sanger na nos fabor, presentando Su propio hustisia na lugá di nos pikánan.

"Pa asina Kristu por biba den boso kurason pa medio di fe; i pa boso, teniendo rais bon pegá i fundá den amor, por komprendé, huntu ku tur e santunan, kual ta e hanchura i largura i haltura i profundidat, i pa konosé e amor di Kristu ku ta surpasá konosementu, pa boso ser yená ku tur e plenitut di Dios"(Efe. 3:17-19).

Manera lèsnan anterior den e trimèster akí a mustra, e pakto nobo ta unu den kua Señor ta pone e lei den nos kurason (Jer. 31:31-33). No solamente e lei tei, sino di akuerdo ku e tekstonan pa awe, Kristu tambe tei, kua, naturalmente, tin sentido, pasobra Kristu i Su lei ta asina estrechamente konektá. Pues, ku e lei di Kristu den nos kurason, i ku Kristu tambe bibando ei (e palabra griego tradusí den e teksto aki riba biba ta nifiká tambe "establesé Su mes," dunando e idea di permanensia), nos ta yega na un otro di e gran benefishinan di e pakto, un kurason nobo.

Dikon nos mester di un kurason nobo? Ki kambionan lo ser manifestá den esnan ku tin un kurason nobo?

Lesa e teksto di awe atrobe. Nota ku Pablo ta enfatisá e elemento amor, bisando ku nos mester ta “ankrá i bon fundá” den dje. E palabranan akí ta impliká stabilidat, firmesa i permanensia den e fundeshi di amor. Nos fe no ta nifiká nada si e no ta ankrá den amor pa Dios i amor pa otronan (Mat. 22:37-39, 1 Korintionan 13). E amor akí no ta bin den un bashí. Al kontrario, e ta bin pasobra nos ta haña un sombra di e amor di Dios pa nos (un amor ku ta "surpasá komprondementu") manera manifestá a traves di Hesus. Komo resultado, nos bida ta ser kambiá, nos kurason ta ser kambiá, i nos ta bira hendenan nobo ku pensamentunan nobo, deseonan nobo i metanan nobo. Ta nos reakshon riba e amor di Dios pa nos ku ta kambia nos kurason i ta implantá amor pa otronan. Kisas ta esaki ta loke Pablo ke men, a lo ménos parsialmente, ora e ta papia tokante ku nos ta ser yená ku "e plenitut di Dios".

Lesa 1 Juan 4:16. Kon e teksto akí ta relashoná ku loke Pablo a skirbi den Efesionan 3:17-19?

"Ami ta e resurekshon i e bida; esun ku kere den Mi lo biba asta si e muri, i tur hende ku ta biba i ta kere den Mi lo no muri nunka" (Juan 11:25-26, NASB).

Tin dos dimenshon na bida eterno. E dimenshon presente ta duna e kreyente un eksperensia di e bida abundante awor (Juan 10:10), kua ta inkluí e hopi promesanan ku a ser duná na nos pa nos bida awor.

E dimenshon futuro ta, naturalmente, bida eterno, e promesa di resurekshon di e kurpa (Juan 5:28, 29; Juan 6:39). Aunke esei ainda ta den futuro, e ta esun evento ku ta hasi ku tur otro kos ta bale la pena, esun evento ku ta koroná tur nos speransanan komo kristiannan.

Studia e versíkulo pa awe. Kiko Hesus ta bisando aki? Unda bida eterno ta ser hañá? Kon nos ta komprondé Su palabranan ku esnan ku biba i kere den djE, asta si nan muri, lo no muri nunka? (Lesa Rev. 2:11; Rev. 20:6,14; Rev. 21:8.)

Naturalmente, nos tur ta muri, pero di akuerdo ku Hesus, e morto akí ta solamente un soño, un pousa temporal ku, pa esnan ku kere den djE, lo terminá den resurekshon di bida. Ora Kristu regresá, e mortonan den Kristu lo lanta inmortal, i e siguidónan di Kristu bibu lo ser kambiá den inmortalidat den un habrí i será di wowo. Tantu esnan morto komo esnan bibu ku ta di Kristu lo poseé e mesun tipo di kurpa resusitá. Inmortalidat ta kuminsá na e momentu ei pa e pueblo di Dios.

Ki un gran goso pa sa awor ku nos fin no ta den e graf sino ku no tin un fin, ku nos lo tin un bida nobo ku ta dura pa semper.

"Kristu a bira un karni ku nos, pa asina nos por bira un spiritu kunE. Ta pa birtut di e union akí ku nos mester sali for di e graf, no meramente komo un manifestashon di e poder di Kristu, sino pasobra, a traves di fe, Su bida a bira di nos. Esnan ku ta mira Kristu den Su karakter berdadero, i risibiE den nan kurason, tin bida eterno. Ta pa medio di e Spiritu ku Kristu ta biba den nos; i e Spiritu di Dios, risibí den e kurason pa fe, ta e prinsipio di bida eterno.” — Ellen G. White, The Desire of Ages, p. 388.

"P'esei, bai i hasi tur e nashonnan disipel di Mi, i batisá nan den nòmber di e Tata i di e Yu i di e Spiritu Santu, i siña nan pa kumpli ku tur loke Mi a ordená boso; i mira, Mi ta ku boso semper, te na fin di mundu" (Mat. 28:19, 20).

Den henter mundu, hende hopi bia ta lucha ku loke e eskritor surafrikano Laurens Van Der Post a yama "e karga di sin sentido". Hende ta haña nan mes ku e don di bida, sinembargo nan no sa kiko hasi kuné, no sa kiko e propósito di e don akí ta, i no sa kon us'e. E ta meskos ku duna un hende un biblioteka yená ku buki straño, solamente pa e persona no lesa e bukinan sino usa nan pa sende kandela. Ki un desperdisio teribel di algu asina presioso!

Pa e kristian di e pakto nobo, sinembargo, e problema ei no ta un ku e mester lucha kuné. Al kontrario, esnan ku konosé (i a eksperensiá personalmente) e notisia maravioso di un Salbador krusifiká i resusitá, ku a muri pa e pikánan di kada ser humano tur kaminda pa nan tur por tin bida eterno, konosé goso. Konsiderando e yamada indiskutibel den Mateo 28:19, 20, e kreyente seguramente tin un mishon i propósito den bida, i esei ta di plama e bèrdat maravioso, ku el a eksperensiá personalmente den Kristu Hesus, na e mundu. Ki un privilegio! Kasi tur otro kos ku nos hasi den e mundu akí lo terminá ora e mundu akí kaba. Pero plama e evangelio na otronan ta un obra ku lo traha un stèmpel riba eternidat. Papia tokante un sentido di mishon i propósito!

Analisá e versíkulonan di awe den nan vários elementonan. Kiko ta e kosnan spesífiko ku Hesus ta bisando nos pa hasi, i kiko tin enbolbí den kada un? Ki promesa nos tin ku mester duna nos e fe i kurashi pa hasi loke Kristu ta manda?