E Raisnan di Ansiedat

Masha poko hende ta disfrutá di konflikto. Nos ta anhelá harmonia i pas. Asta nos ta siña seminarionan riba hasimentu di pas i resolushon di konflikto den nos iglesianan òf institushonnan.

Lesa Mateo 10:34-39. Kiko Hesus ke men ora E ta bisa ku E no a bin pa trese pas sino pa trese spada? Kiko esaki ta nifiká, konsiderando ku Hesus ta “e Prens di Pas” (Isa. 9:6)?

E deklarashon di Hesus den Mateo 10:34-39 ta sorprendentemente kontradiktorio. E Salbador, kende a bin komo un beibi indefenso na lugá di un rei poderoso rondoná pa eskoltanan élite, kende a prediká amor na tantu próhimo komo enemigu, awor ta bisa Su siguidónan ku E ta trese divishon i luchanan. Su disipelnan i Su oudiensia por a puntra nan mes, meskos ku nos: Kon esaki por ta?

Mateo 10:35-39 ta realmente tokante fidelidat i lealtat. Sitando Mikeas 7:6, Hesus ta desafiá Su oudiensia pa hasi eskohonan pa eternidat. Un yu mester stima i honra su mayornan. Esei tabata un rekerimentu legal di e lei ku Moises a risibí riba e seru. E tabata parti di e moda di operashon rekerí di Dios; i sinembargo, si e amor ei lo a superá e kompromiso di e oyente ku Hesus, e tabata rekerí un desishon difísil. Un tata i un mama mester stima i kuida nan yunan. Sinembargo, si e amor ei lo a stroba e dedikashon di e mayornan na Hesus, lo e a rekerí un desishon difisil. Kosnan mas importante promé, Hesus ta kòrda nos den e pasashi akí.

Hesus ta ekspresá e eskoho akí formulando tres frase, kada un usando e palabra digno. Dignidat no ta basá riba standartnan moral haltu òf asta vense piká. Dignidat ta basá riba e relashon di un hende ku Hesus. Nos ta digno ora nos skohe E riba tur otro kos, inkluyendo mama, tata, òf yunan. Nos ta skohe e sufrimentu di e krus i ta sigui Hesus.

“Mi no tin deseo mas haltu ku mira nos hubentut saturá ku e spiritu ei di religion puru ku lo hiba nan na hisa e krus i sigui Hesus. Sigui padilanti, disipelnan hóben di Kristu, kontrolá pa prinsipio, bistí ku e bistínan di puresa i hustisia. Bo Salbador lo guia bo den e posishon ku ta pas mihó ku bo talentonan i kaminda bo por ta mas útil.” — Ellen G. White, Testimonies for the Church, tomo 5, p. 87.

Manera den kaso di e populier tembladó i su sistema supteráneo mas grandi, egoismo ta parti di e enorme sistema supteráneo yamá “piká”, ku ta impedí nos di haña berdadero sosiegu den Hesus. Di tur e ekspreshonnan di piká den nos bida, egoismo ta parse di ta esun di mas fásil pa manifestá, bèrdat? Pa mayoria di nos, egoismo ta mes natural ku hala rosea.

Lesa Lukas 12:13-21. Deskribí e problema destaká den e parabel di Hesus. Plania pa futuro, ta egoista i ta ekspresá despresio pa e reino di Dios? Si no ta asina, òf a lo ménos no nesesariamente, e ora ei kontra kiko Hesus ta spièrtando nos?

E parabel akí ta aparesé solamente den e Evangelio di Lukas i ta ser kontá komo kontesta riba un pregunta anónimo di e oudiensia. Puntrá tokante un kuestion enkuanto di un herensia, Hesus a respondé dor di rechasá e ròl di árbitro entre rumannan. En kambio, E ta opta pa pone Su dede riba e problema fundamental mas grandi, es desir, egoismo. E ta koba mas profundo pa mustra e masa di rais bou di nos akshonnan individual.

Pensa riba ekspreshonnan di egoismo den bo bida. Kon egoismo ta afektá nos relashon ku Dios, ku nos pareha i famianan, ku nos famia di iglesia, ku nos bisiñanan i koleganan na trabou? Ki klave ta ser hañá den Filipensenan 2:5-8?

Dor di focus únikamente riba su propio nesesidatnan i ambishonnan, e hòmber riku anónimo di e parabel di Hesus a lubidá di tuma realidatnan selestial invisibel na konsiderashon. Mas grandi, mihó, i mas no ta e prinsipionan fundamental di e reino di Dios. Pablo ta ofresé nos un bistaso den loke a motivá Hesus ora El a disidí di bira nos Sustituto.

Filipensenan 2:5-8 ta deskribí e modelo di altruismo, humildat, i amor. Si amor pa Dios i otronan no ta impulsá nos eskohonan i prioridatnan, nos lo sigui konstruí mas mangasina pa nos mes aki i pone ménos tesoro den shelu (Mat. 6:20).

Studiando e último siman di e ministerio di Hesus riba tera promé ku Su krusifikashon ta semper un fuente di enkurashamentu i inspirashon. E ta ofresé tambe un instantáneo dikon inkietut i ambishon ta hiba hende na hasi i bisa kosnan imprudente.

Lesa Lukas 22:14-30 i pensa tokante e emoshonnan di Hesus miéntras E ta tende Su disipelnan ta diskutí durante e kuminda solèm akí riba ken meimei di nan mester konsiderá esun di mas grandi (Lukas 22:24). Dikon e disipelnan a desviá di e okashon trasendental akí i a focus riba grandesa humano?

Poko bia nos ta diskutí ku otronan ken ta esun di mas grandi den nos iglesia, nos famia, òf nos lugá di trabou. Nos por pensa hopi riba esaki, pero ken, realmente, ta papia abiertamente di dje?

Esaki no tabata e promé bia ku nan a plantia e kuestion akí den e komunidat di e siguidónan di Hesus. Mateo 18:1 ta reportá ku e disipelnan a presentá e tema na Hesus i a formul’é di un manera mas apstrakto: “Ken anto ta esun di mas grandi den e reino di shelu?” (NKJV). E kontesta di Hesus ta envolví un lès ophetivo. Despues di a yama un mucha, E ta pone e mucha den sentro di e grupo. Wowonan a habri hanchu; wènkbrounan a lanta. E akshon di Hesus ta rekerí un splikashon, i den Mateo 18:3 e Maestro ta ofresé esei tambe: “Siguramente, Mi ta bisa boso, a ménos ku boso kombertí i bira manera muchanan chikí, di ningun manera boso lo drenta e reino di shelu” (NKJV).

Kombershon ta fundamental pa haña berdadero sosiegu den Hesus. Nos ta rekonosé ku nos tin mester di ayudo eksterno. Di ripiente nos ta realisá ku nos no por dependé riba nos mes, sino nos mester konfia den Hesus. Nos ta eksperensiá un transformashon di nos balornan i ambishonnan. Hesus ta bisa Su disipelnan: Konfia den Mi i dependé riba Mi manera e mucha akí. Berdadero grandesa ta, renunsiá bo derechonan i adoptá balornan di e reino.

Lamentablemente, ta parse ku e disipelnan no a siña e lès akí ainda pa momento ku Hesus a kome e último sena ku nan. Nan disputanan i luchanan interno a ruiná un momento di perfekto komunion ku no mester a ripití nunka.

Tur esaki, asta despues di añanan di ta huntu ku Hesus, ministrando huntu ku Hesus, i skuchando i siñando na Su pia? Ki un ehèmpel tristu di kon korupto e kurason humano ta keda! Na e banda mas positivo, sinembargo, pensa riba e realidat semper presente di e grasia di Señor, ku, apesar di e diskushon patétiko akí entre Su siguidónan, Hesus no a bandoná nan.

Un hipókrita ta un hende ku ta aktua, ku ke parse di ta un hende ku e no ta. Ta usa e palabra shete bia den Mateo 23 den un diskurso den kua Hesus públikamente ta bergonsá e eskribanan i fariseonan, e núkleo mes di liderazgo religioso hudiu (Mat. 23:13, 14, 15, 23, 25, 27, 29). E Evangelionan ta mustra nos Hesus ofresiendo grasia i pordon na adúlteronan, kobradónan di impuesto, prostitutanan, i asta asesinonan, ma El a demostrá poko toleransia pa hipókritanan (wak e hopi referensianan adishonal den Mat. 6:2,5,16; Mat. 7:5; Mat. 15:7-9; Mat. 22:18).

Lesa Mateo 23:1-13 i enshoná kuater karakterístika prinsipal di un hipókrita menshoná pa Hesus.

Hesus ta asosiá kuater karakterístika ku e eskribanan i fariseonan. Den e spektro di hudaismo di siglo 1 A.D., e fariseonan tabata representá e derecho religioso konservativo. Nan tabata interesá den e lei skirbí i oral i tabata enfatisá puresa ritual. Na otro banda di e spektro tabatin e saduseonan, un grupo di mayormente lidernan riku, hopi bia asosiá ku e klase saserdotal élite. Nan tabata sumamente helenisá (es desir, nan tabata papia griego i tabata kómodo ku filosofia griego) i no tabata kere den un huisio òf un bida despues di morto. Nos lo por a deskribí nan komo liberal. Tur dos grupo tabata kulpabel di hipokresia.

Di akuerdo ku Hesus, nos ta hipókritanan si nos no ta hasi loke nos ta bisa, ora nos ta hasi religion mas difísil pa otronan sin apliká e mesun normanan na nos mes, ora nos ke pa otronan aploudí nos fervor religioso, i ora nos ta rekerí honor i rekonosementu ku ta pertenesé solamente na nos Tata selestial.

No importá kon skèrpi i direkto Su palabranan tabata, e kompromiso di Hesus ku esnan ku El a yama hipókrita tabata sinembargo yen di amor i preokupashon, asta pa e hipókritanan akí.

“Kompashon divino tabata marka e kara di e Yu di Dios miéntras e tabata dirigí un último mirada riba e tèmpel i despues riba Su oyentenan. Den un bos choká pa angustia profundo di kurason i lágrimanan amargo El a sklama: ‘O Herusalèm, Herusalèm, abo ku a mata e profetanan, i a piedra nan ku a ser mandá serka bo, kuantu bia Mi ker a hunta bo yunan, meskos ku un galiña ta hunta su puitunan bou di su alanan, i bo no tabata ke! ’” — Ellen G. White, The Desire of Ages, p. 620.

Lesa Juan 14:1-6. Meimei di nos mes inkietut, kiko nos por hasi pa nos kurason no sinti preokupá? Kiko ta e klave pa superá divishon, egoismo, ambishon, hipokresia, i berdaderamente haña sosiegu?

Superá ansiedat semper ta kuminsá ku Hesus. E ta e kaminda, e bèrdat, i e bida. E konosé e direkshon korekto ora nos ta dual sin rumbo den e desierto di nos mundu saturá di media; komo e Legislador divino E Mes ta e bèrdat personifiká, i Su Spiritu lo guia nos den tur bèrdat (Juan 16:13). Ora nos ta heridá, kansá, agotá, malu, i deskurashá, E ta e bida, no djis kualke bida. De echo, El a primintí nos bida na abundansia (Juan 10:10). Esaki ta inkluí nos hogar eterno i bida eterno, pero e ta impliká tambe un kalidat di bida diferente aki. E Kreador siguramente ta kapas di duna na abundansia i mas ayá di midí, asta awor.

“No laga boso kurason bira intrankil” ta un invitashon pa biba den antisipashon. Ora nos ta sinti nos mes deprimí, E ta kapas di pone nos riba un plano mas haltu. Ora nos ta lucha ku skuridat i piká, E ta Esun kende no solamente a kuminsá, sino tambe lo terminá Su bon obra den nos (Fil. 1:6).

No importá kon malu kosnan bira aki (i sí, nan por bira malu) wak e promesa ku a duna nos den Hesus. E ta preparando un “lugá” pa nos, un lugá kaminda nos doló, ansiedat i sufrimentu lo eksiliá pa semper. Esei ta e speransa ku a duna nos den Kristu Hesus, i e ta ser ofresé na nos tur, no importá ken nos ta, no importá nos trasfondo, no importá kon miserabel nos bida tabata òf ta awor aki.

E klave, sinembargo, ta pa nos bin serka Dios, di tur manera, den nos debilidat, den nos doló, den nos estado kibrá, den nos estado kaí en general, sabiendo ku E ta aseptá nos apesar di e kosnan akí. Ta di esei grasia ta trata, i pa kiko nos mester kere ku el a ser duná na nos si nos busk’é ku fe.

Lesa Jeremias 3:22. Kiko Dios ta pidi nos pa hasi, i despues, kiko E lo hasi den kontesta pa nos?