“Bin serka Mi ...”

Lesa Mateo 11:20-28, ora Hesus ta bisa: “Bin serka Mi, boso tur ku ta traha i ta kargá, i lo Mi duna boso sosiegu” (NKJV). Kiko ta e konteksto di e deklarashon akí? Kon Hesus ta duna nos e sosiegu akí?

Meskos ku nos tur, Hesus nunka a papia sin un konteksto. Pa nos komprond’E, nos mester kapta e konteksto spesífiko rònt di un deklarashon partikular, spesialmente si nos ke evitá di komprondé Hesus malu.

Mateo 11 ta marka un punto di inflekshon den e Evangelio di Mateo. E deklarashonnan ku ta denunsiá siudatnan galileo importante ta esnan di mas duru tendé ta asina leu den e Evangelio. Hesus no ta mèlè; E ta pone dede kaminda ta hasi doló; E ta asosiá ku e hendenan “robes” (Mat. 9:9-13); Su pretenshon di por pordoná piká ta skandaloso den bista di e lidernan religioso (Mat. 9:1-8).

Enbèrdat, Hesus ta papia algun palabra poderoso di kondenashon na e pueblo, asta komparando nan, den forma desfaborabel, ku Sodoma, konsiderando nan (manera awe) komo un lugá di maldat implakabel. “Ma Mi ta bisa boso ku lo ta mas tolerabel pa e tera di Sodoma riba e dia di huisio ku pa boso” (Mat. 11:24, NKJV).

Tenshonnan ta subiendo i, sinembargo, meimei di tur esaki, Hesus ta kambia rumbo i ta ofresé berdadero sosiegu. E por hasi esei pasobra “tur kos a ser entregá na Mi pa e Tata, i niun hende konosé e Yu eksepto e Tata” (Mat. 11:27, NKJV). E abilidat di Hesus pa duna sosiegu ta basá riba Su divinidat i Su unidat ku e Tata.

Promé ku nos por yega pa deshasí di nos karganan, nos mester komprondé ku nos no por karga nan nos so. De echo, mayoria di nos lo no bin a ménos ku nos a rekonosé nos berdadero kondishon. E invitashon di Hesus ta basá riba nesesidat.

Su deklarashon den Mateo 11:28 ta kuminsá ku un imperativo den griego original. “Bin” no ta opshonal; “bin” ta representá e kondishon previo di haña sosiegu. “Bin” ta nifiká ku nos mester someté kontròl. Den un tempu ora, di forma kumbiniente, nos por kontrolá hopi kos den nos bida via nos telefònnan inteligente, bin serka Hesus no ta e direkshon natural. De echo, pa mayoria hende, someté ta e parti di mas difísil di e bida kristian.

Nos stima papia, i korektamente, tokante tur loke Dios ta hasi pa nos den Kristu i kon nos no por salba nos mes, i kosnan asina. Tur esei ta bèrdat. Pero al final, ainda nos tin ku hasi e eskoho konsiente di “bin” serka Hesus, kua ta nifiká someté na djE. Aki ta kaminda e realidat di boluntat liber ta bira e kos di mas prominente den bida kristian.

Lesa Mateo 11:29,30. Dikon Hesus ta manda nos tuma Su yugo nèt despues ku El a invitá nos pa dun’E nos karganan i haña berdadero sosiegu?

Despues di e promé imperativo “bin” den Mateo 11:28, ta sigui dos imperativo mas den Mateo 11:29.

“Tuma” i “siña” ta enfoká atenshon di e oudiensia (i e lesadó) riba Hesus. nos mester tuma Su yugo i siña di djE.

E relashon íntimo den e Deidat entre e Tata i e Yu (ya sugerí den Mat. 11:25-27) ta ofresé un ilustrashon poderoso ku por splika e metáfora di yugo den e versíkulonan akí. Tantu e Tata komo e Yu ta trahando den union pa salba humanidat. Miéntras e yugo ta un símbolo di sumishon (lesa Jeremias 27), e ta tambe un metáfora ku ta ilustrá propósito uní. Nos ta someté na Su yugo i ta aseptá e tarea ku E ta duna nos pa bendishoná esnan rònt di nos. Nos no ta kargando Su yugo; nos ta simplemente konektá na djE pasobra Su yugo “ta fásil” i Su karga “ta lihé” (Mat. 11:30).

E di dos imperativo “siña di Mi” ta reiterá e konsepto akí. Na griego e verbo “siña” ta konektá na e palabra “disipel”. Ora nos siña di Hesus, nos ta berdaderamente Su disipelnan. Obediensia i kompromiso ta karakterístikanan di disipulado.

Kiko ta e diferensia entre ta “kargá” (Mat. 11:28) i tuma Su yugo (Mat. 11:29)?

E yugo tabata un metáfora komun den hudaismo pa e lei. Echonan 15:10 ta us’é den referensia na e lei di sirkumsishon. Galationan 5:1 ta kontrastá e libertat ku Hesus ta ofresé ku e yugo di sklabitut, kua ta un referensia na e lei komo un medio di salbashon. Siendo konektá na Hesus ta enfatisá obediensia i kompromiso pa sigui den Su pasonan i partisipá den Su mishon. Miéntras nos no por spera di añadí nada na e salbashon ku Hesus a gana pa nos riba e krus, nos por bira Su embahadornan i kompartí e bon notisia ku esnan rònt di nos. E interpretashon di Hesus di e lei, manera El a demostrá den e Sermon riba Seru (Mateo 5–7) ta ainda mas radikal ku esun ku e fariseonan ta adoptá. E ta rekerí sirugia di kurason i ta transformá nos motibunan, i, Su yugo ta fásil i Su karga ta lihé (Mat. 11:30).

Mansedumbre ta un kualidat menospresiá awendia. Humildat ta un motibu di burla. Ret sosial a siña nos pa pone atenshon na loke ta duru, ku boroto, loke ta misterioso i salbahe, i loke ta strabagante. Berdaderamente asina tantu di e normanan di mundu ta asina kontrali di loke Dios ta konsiderá importante i balioso.

“Un konosementu di e bèrdat ta dependé no asina tantu riba fortalesa di intelekto komo riba puresa di propósito, e simplisidat di un fe ferviente i dependiente. Na esnan ku, den humildat di kurason, ta buska direkshon divino, angelnan di Dios ta hala serka. Spiritu Santu ta ser duná pa habri na nan e tesoronan riku di e bèrdat.” — Ellen G. White, Christ’s Object Lessons, p. 59.

Lesa Mateo 5:5, 1 Pedro 3:4, i Isaias 57:15. Kon lo bo a definí mansedumbre i humildat basá riba e tekstonan akí?

Pablo ta referí na “e suavidat i ternura di Kristu” den 2 Korintionan 10:1. Mansedumbre i humildat no ta deskripshonnan di un hende ku ta fásil pa konvensé, òf hendenan ku no por para firme riba nan mes. Hesus Mes no a buska konfrontashon i hopi bia a evitá esei pasobra ainda Su mishon no a ser kumplí (John 4:1-3). Ora konfrontashon a yega serka dje, sinembargo, El a respondé ku kurashi. Tòg na mes momento, El a papia ku amabilidat. Su lamentonan riba Herusalèm djis promé ku e krus, por ehèmpel, no tabata gritonan di maldishon sino imágennan verbal yen di lágrima, di un futuro devastador (Lukas 19:41-44).

Den Tèstamènt Nobo hopi bia Hesus ta ser deskribí komo e segundo Moises. E ta papia for di un seru ora E ta eksponé e prinsipionan di Su reino (Mat. 5:1). E ta proveé multitutnan grandi ku kuminda milagroso (Mat. 14:13-21). Numbernan 12:3 ta deskribí Moises komo “mansu”, kua ta ser ripití den Mateo 11:29. E hendenan ku a testiguá e alimentashon di e 5.000 ta sklama maraviá: “Esaki berdaderamente ta e Profeta ku mester a bin na mundu” (Juan 6:14, NKJV), un referensia na Deuteronomio 18:15 i e ròl di Moises komo profeta.

E humildat i mansedumbre di Hesus klaramente ta superá esun di Moises. Despues di tur kos, E ta nos Salbador divino. Miéntras Moises a ofresé pa duna su mes pa salba su pueblo (Eks. 32:32), su morto lo no a logra nada, pasobra Moises mes tabata un pekador i den nesesidat di un Salbador, un kargadó di piká pa paga pa su pikánan. Aunke nos por siña di Moises i e storia di su bida, nos no por haña salbashon den dje.

En kambio, nos tin mester di un Salbador ku por para na nos lugá, no solamente komo un Intersesor sino komo nos Supstituto. Interseshon ta importante, pero e ta solamente Dios kologando na e krus komo nos Kargadó di piká, komo Esun ku a paga den Su mes e kastigu pa nos piká, kende por salba nos for di e konsekuensianan legal ku nos pikánan, hustamente, lo a trese pa nos. Ta p’esei, aunke kon grandi e ehèmpel ku Hesus tabata pa nos, tur lo tabata pòrnada sin e Krus i e resurekshon.

Nos a nota kaba ku e uso di Mateo di “yugo” den e sekshon akí ta eko e uso di hudaismo di e término i esun di otro tekstonan di Tèstamènt Nobo ku ta referí na un komprondementu robes di e lei.

E término griego tradusí komo “fásil” den e NKJV den Mateo 11:30 por ser tradusí tambe komo “bon, plasentero, útil, i karitativo”. Hopi hende rònt di nos ta konsiderá e lei di Dios pisá, difísil pa kumpli kuné, i, tin bia, irelevante. Kon nos por yuda nan deskubrí e bunitesa di e lei i inspirá amor pa e Dunadó di lei?

Mayornan semper ta kòrda e momento ora nan yu a dal e promé paso ei. Un promé stap basilante ta ser siguí pa un di dos stap tentativo, despues un di tres stap, i pa e momento ei ta mas probabel ku e mucha lo trompeká i kai. Lo tin algun lágrima i kisas un raská, pero unabes e mucha a sinti e libertat di movementu, e lo lanta i purba atrobe. Kana, kai, lanta, kana kai lanta. E sekuensia ta ripití si mes hopi bia promé ku e mucha por kana ku siguridat. I, sinembargo, meimei di trompekamentu i kaidanan, tin un kara chikí orguyoso ku ta deklará triunfal: Papa, Mama, mi por kana!

Kana ku Hesus kisas no semper ta fásil, pero semper e ta bon i e kos korekto pa hasi. Nos por trompeká; nos por asta kai; sinembargo, nos por lanta i sigui kana ku Hesus banda di nos.

Den Galationan 5:1, Pablo a skirbi: “P’esei, para firme den e libertat pa medio di kua Kristu a hasi nos liber, i no ser bruá atrobe ku un yugo di sklabitut” (NKJV). Kiko esei ta nifiká? Kon Kristu a hasi nos liber? Kiko ta e diferensia entre e yugo ku E ta pidi nos karga i e “yugo di sklabitut” kontra kua Pablo ta spièrta nos?

Nos por ta sigur ku loke sea Pablo tabata ke men eksaktamente ku e “yugo di sklabitut”, e no tabata refiriendo na obediensia na e lei di Dios, e Dies Mandamentunan. Al kontrali, ta a traves di obediensia, pa medio di fe, komprondiendo ku nos salbashon ta sigur, no basá riba e lei sino riba e hustisia di Kristu ku ta kubri nos, ku nos por tin berdadero sosiegu i libertat.

E deklarashon final den Mateo 11:30 ta usa e imágen di karga un karga: “Pasobra mi yugo ta fásil i Mi karga ta lihé” (NKJV).

Moises tabata kontentu di mira su suegu Jetro despues ku Israel a bandoná Egipto i a krusa laman. Lesa Eksodo 18:13-22. Kon ta pa karga e karga di un otro persona den e storia akí?

Eksodo 18:13 ta bisa nos ku hende tabata bin serka Moises pa huisionan for di mainta te atardi. Ora e suegu di Moises a mira esaki, el a supliká su yerno sinseramente pa establesé un struktura ku lo a permitié focus riba e kosnan grandi miéntras e tabata konfia otronan pa enkargá ku e kosnan mas sekular. Skritura ta bisa nos ku Moises a skucha e bos di Jetro i a implementá e kambionan alentador akí.

Ora Hesus a bisa nos ku Su karga ta lihé, E ker a kòrda nos ku nos por dependé riba djE, e mayó Kargadó di Karga. Meskos ku Moises, nos mester siña ku nos mester di otronan pa kompartí nos karganan. Den 1 Korintionan 12:12-26, e imágen di Pablo di e kurpa di Kristu ta ofresé un bon ilustrashon di kon karganan kompartí por ta. Nos mester di un kurpa funshonal pa ta kapas di karga kualke peso. Nos tin mester di pia-, brasa-, skouder-, múskulo-, i tendonnan pa karga kualke kos.

Lesa Galationan 6:2. Kon un karga e karganan di otro ta yuda nos kumpli ku e lei di Kristu?

E konteksto inmediato di e pasashi akí por ofresé algun yudansa. Den Galationan 6:1 Pablo ta deklará ku si un ruman hòmber òf ruman muhé kai den tentashon, nos mester restourá e persona ei den un spiritu di mansedumbre (kòrda e deklarashon di Hesus den Mateo 11:29 ku E ta mansu). Kargamentu di karga ta nifiká restourá un hende ku a desviá pa asina yuda e persona ei mira grasia divino. Pero e ta nifiká tambe un yuda otro ora nos, òf nan, ta sufri difikultatnan. E término griego “karga” por referí na un peso pisá òf piedra. E ta un rekordatorio ku nos tur ta karga karganan i ku nos tur tin mester di esnan ku por yuda nos karga e karga. Kompartí karga ta un aktividat di iglesia, ordená divinamente, ku ta rekerí mansedumbre i ta produsí kompashon.