Liber pa Sosegá

Si tin un momentu den kua nos mester di deskanso, ta ora nos ta malu. Nos mester di e deskanso físiko asina ku nos kurpanan por rekuperá nos sistema imün.

I hopi biaha nos mester di deskanso mental, tambe. Tin biaha ta djis algu ku no ta menasá bida manera un fèrkout òf un migraine. Nos ta drumi einan i trata pa no pensa mes riba tur kos ku nos mester ta hasiendo pero simplemente no por.

Tin biaha, ora ku ta trata di algu posiblemente mortal, nos ta drumi lantá i preokupá pa e resultadonan di e tèst médiko. I e ora ei hopi biaha nos ta kuminsá puntra dikon. E estilo di bida no-saludabel ei finalmente a alkansá nos? Tabata e droga ku nos a usa 20 aña pasá? Tabata e peso èkstra ku nos tabata karga durante e último añanan? Ta Dios ta kastigando nos pa e piká sekretu ei ku niun otro hende sa di dje?

Lesa Marko 2:1-4. Kiko tabata pasando aki?

Pa e paralítiko den e storia akí, e tabata un kaso opvio. Den The Desire of Ages (p. 267-271), nos ta hañá e trasfondo. E paralítiko a hasi algun kos di kual e no tabata masha orguyoso. Su bida pekaminoso a kousa e enfermedat akí, i e ekspertonan spiritual a hala un liña stret for di kousa pa efekto. El a trese e enfermedat akí riba su mes dor di su pikánan, i no tabatin kura.

E aktitut akí por ta masha típiko. Hopi biaha nos ta opseshoná ku ken a hasié. Si algun krímen a ser kometé, un hende mester paga p'e. Si tin un aksidente un kaminda, un hende mester ser demandá. Pero asigná kulpa no ta trese sanashon òf sanidat na esun ku ta malu.

E diseño original di Dios no tabata inkluí doló, enfermedat, i sufrimentu. Malesa a bini na e planeta akí solamente ku e entrada di piká. Ta p'esei Dios ta duna nos normanan di salú, asina ku nos por gosa un mihó kualidat di bida awor. Pero tanten ku nos ta den e mundu enfermo di piká akí, lo no tin garantia di salú, no importá kon diligente nos sigui e prinsipionan saludabel.

E bon notisia ta, ku Dios por duna nos deskanso sea ku nos ta malu òf saludabel; sea ku nos malesa ta un resultado di nos propio hasí òf un otro hende su negligensia, nos genenan, òf simplemente un produkto sekundario di biba den e mundu pekaminoso akí. Dios sa kon pa duna nos deskanso.

E paralítiko a ser bahá den e presensia di Hesus, i tur bista tabata riba Hesus. Lo E skohe pa kura un pekador opvio? Lo E bisa un palabra pa reprendé e malesa?

Kon Hesus ta hasi pa kura e paralítiko? Kiko ta e promé kos ku Hesus ta hasi p'e? Lesa Marko 2:5-12.

Pa motibu ku hopi biaha nos no ta konsiente di un enfermedat te ora ku nos tuma nota di síntomanan, nos ta pensa hopi biaha di e enfermedat komo meramente e síntomanan. Nos ta pensa ku deshasí di e síntomanan ta nifiká sanashon. Hesus ta aserká enfermedat di un manera diferente. E konosé e rais di tur sufrimentu i enfermedat i ke trata esaki promé.

Den e kaso di e paralítiko, enbes di trata inmediatamente e efektonan opvio di su enfermedat, Hesus ta bai dirèkt na e rais di e loke ta molestiá e hòmber mas tantu. E paralítiko ta sinti mas severamente e peso di su kulpa i separashon di Dios ku e ta sinti su enfermedat. Un persona ku ta deskansá den Dios ta kapas pa soportá kual sea sufrimentu físiko ku por pasa kuné den e mundu enfermo di piká akí. I asina, Hesus ta bai dirèkt na e rais i ta ofresé pordon promé.

E lidernan religioso ta sorprendí ora nan ta tende Hesus pronunsiá pordon. Komo kontesta riba nan akusashonnan no papiá, Hesus ta hasi un pregunta.

Lesa Marko 2:8,9. Ki desafio Hesus ta dunando na e Eskribanan aki? Ku ki problema E ta tratando realmente?

Generalmente papia ta barata, pero no ora Dios ta papia. Dor di e palabra poderoso di Dios, tur kos a bini na eksistensia (Génesis 1). Aunke pordon no ta algu ku nos por mira, e ta karu. Pordon a kosta e bida di e Yu di Dios riba e krus. Tur otro kos ta sekundario. Pa demostrá e poder i realidat di pordon, Hesus e ora ei a skohe pa kura e paralítiko.

Dios ke kura nos paden promé. Anto tin biaha E ta skohe pa duna nos sanashon físiko inmediato, meskos ku e paralítiko, òf tin biaha nos mester warda pa e mainta di resurekshon pa eksperensiá sanashon físiko. Di tur manera, nos Salbador ke pa nos ta kapas na deskansá den e siguransa di Su amor i grasia i pordon asta awor, asta meimei di nos sufrimentu.

Basá riba data for di e World Health Organization (WHO), e enfermedat di mas komun rònt mundu, afektando mas ku tresshen mion hende kada aña, no semper ta presentá síntomanan visibel opvio. Depreshon ta e kousa prinsipal di desabilidat den henter mundu i ta un kontribuidó prinsipal na e karga di enfermedat global.

Desafortunadamente, hopi biaha depreshon no ta ser papiá di dje den Kristiandat pasombra e por ser mirá komo un señal di falta di fe. Despues di tur kos, Kristiannan no ta suponé di semper ta yená ku goso i felisidat i similar? Asina anto, depreshon no ta un señal ku algu ta robes ku nos relashon ku Dios?

Mayoria hende sa ku esaki no ta bèrdat. Asta Kristiannan, Kristiannan fiel, tin biaha por lucha ku depreshon, spesialmente despues di un evento troumátiko, i e no ta un señal di falta di fe òf konfiansa den Dios. Atrobe, bo por lesa e Salmonan i mira e doló, sufrimentu, i angustia ku e pueblo fiel di Dios a sufri.

Tin biaha un depreshon pokopoko i ketuketu den sekreto ta poderá di nos, i nos ta rekonos'é solamente ora e reforsá su gara. Tin biaha e ta ataká rápidamente, despues di un evento físiko òf emoshonal partikularmente agotador. Por ehèmpel, e profeta fiel di Dios, Elias, tabata kompletamente agotá, emoshonalmente i físikamente, despues di Seru Karmelo.

Den 1 Reinan 18, Elias a kaba di mira e milager di Dios di kandela bahando for di shelu. Den kontesta na su orashon, el a mira áwaseru bini i terminá un sekura di tres aña. Dikon Elias ta reakshoná riba e menasa di Jezabel dor di kore? Lesa 1 Reinan 19:1-5.

Elias tabatin un bintikuater ora hopi agotador. E eksperensia akí, konektá ku un spièrtamentu brutu i un menasa di morto, ta sirbi komo un atake di depreshon pa Elias.

Tambe, Elias tabata tei ora ku e profetanan di Baal, a ser matá, podisé asta algun di nan dor di su propio man (1 Reinan 18:40). Un evento asina, asta pa un kousa hustu, fásilmente por hiba na strès troumátiko den esnan ku sea ta mira, òf mas pió ainda, ta tuma parti.

Asina Elias ta kuminsá kore, trata na hui. Tin biaha nos ta kore bai na e frishidèr i kome pa trata na hasi nos felis atrobe. Tin biaha nos ta trata na drumi pa kore ku nos kansansio emoshonal. Tin biaha nos ta buska un relashon nobo, trabou, òf lugá den nos búskeda pa kore bai. I tin biaha nos ta hinka nos mes den mas trabou, mas fecha límite, i sitanan, miéntras nos ta trata mas duru pa kore bai for di algu sin nòmber ku ta kabando ku nos goso i deskanso. I naturalmente, hopi hende ta usa "remedinan" di un sorto òf otro, tur den un intento pa verdof e doló. Sinembargo, finalmente, e kosnan akí solamente ta disfrasá e síntomanan; nan no ta resolvé e problema, i hopi biaha nan solamente por hasié pió.

Elias ta demasiado kansá pa sigui kore. P'esei, e ta bolbe resa. E orashon akí ta masha diferente for di e orashon yená ku fe ku Dios a kontestá riba Seru Karmelo (1 Reinan 18:36,37) dilanti di e saserdotenan i profetanan di Baal, e miembronan di e korte, i e pueblo komun. Esaki ta un orashon simpel, kòrtiku di desesperashon.

Den 1 Reinan 19:4, Elias ta deklará ku e no ta mihó ku su tatanan. Di kiko e tabata papia?

Ora ku Elias finalmente ta ketu, kulpa ta kuminsá poderá di dje. E ta realisá ku su salida purá a sekuestrá e loke por tabata un gran oportunidat pa reformashon den Israel. El a realisá ku el a desapuntá esnan ku tabatin mester di dje. I e ta sin poder pa hasi algu tokante di esei. Asina, den un momentu doloroso di reflekshon propio, konosiendo hopi bon e historia di su pueblo, e ta mira su mes pa loke realmente e ta.

Esei por ta un revelashon doloroso pa kualke di nos, no ta bèrdat, esta, pa mira nos mes pa loke realmente nos ta? Kon agradesido nos mester ta pa e promesa ku, pa pekaminoso ku nos bida tabata, den Kristu, Dios lo mira nos manera E ta mira Hesus. Ki mas speransa nos por tin ku, pa medio di fe, nos por reklamá pa nos mes e hustisia di Kristu? (Lesa Fil. 3:9.)

Sinembargo, depreshon tin un manera di lastra nos den un remolino skur di despresio propio. I tin biaha nos ta kuminsá pensa ku morto ta e úniko salida.

Esaki ta parse di ta e kaso pa Elias. Tabata demasiado p' e. E ta bisa, "Ta basta! Awor, O Señor, tuma mi bida, pasobra mi no ta mihó ku mi tatanan!" (1 Reinan 19:4, NKJV).

E bon notisia ta ku e gran Sanadó no ta kondená Elias. Dios ta komprondé mihó ku nos, den kiko nos ta pasando ora ku nos ta lucha ku depreshon.

"Ta posibel ku nos no tin evidensia remarkabel na e momentu ku e kara di nos Redentor ta inkliná riba nos den kompashon i amor, pero esaki ta asina. Ta posibel ku nos no ta sinti Su toke visibel, pero Su man ta riba nos den amor i ternura kompasivo."-Ellen G. White, Steps to Christ, p. 97.

Dios sa i ta komprondé ku "e biahe ta muchu largu" (1 Reinan 19:7, NIV) pa nos, pero tin biaha E tin ku warda te ora nos stòp di kore. E ora ei, E por intervení.

Tin biaha hende ku ta hogando ta bira asina konfundí ku nan lo lucha kontra un salbabida. E salbabida e ora ei tin ku hala tras i warda pa ehekutá un reskate te ora ku e víktima bira inkonsiente.

Dios sa ku tur e korementu a hasi Elias kansá. Dios sa ku mas ku físikamente kansá, Elias ta emoshonalmente kansá i ta karga un peso tremendo di kulpa. Manera Hesus lo a hasi pa e paralítiko asina tantu aña despues, Dios ta limpia e bòrchi i ta proveé deskanso pa Elias. Finalmente, e por drumi realmente i ser refreská.

Nos lo a spera ku esaki ta e fin di e storia, pero e no ta. E deskanso di Dios no ta un evento di un biaha. Drenta den e deskanso di Dios tin di hasi ku sanashon, ku saka poko poko for di bo mente patronchinan di pensamentu negativo i kustumbernan destruktivo. Dios no ta hasi purá ku sanashon.

Lesa 1 Reinan 19:5-8. Unda Elias ta bayendo awor, i dikon?

Despues di deskansá, Elias ta koriendo atrobe. Pero e biaha aki, Dios ta reorientá su korementu. Dios ta komprondé ku bida den e mundu pekaminoso akí, por i lo kousa depreshon. E ta komprondé nos impulso pa kore, pero E ke re-dirigí nos korementu. Enbes di tur e mekanismonan di destrukshon propio di lucha ku nos ta trata, E ke pa nos kore bai serka djE. I unabes nos kuminsá kore bai serka djE, E ke siña nos pa skucha na e ''bos suave delikado" (1 Reinan 19:12, NKJV) ku lo duna nos deskanso.

Elias no tabatin energia pa lanta ariba i hasi e biahe pa topa ku Dios. Dios ta proveé e energia pa e enkuentro, i Dios ta primintí un mihó mayan.

Ora Elias a drumi bou di su mata di enebro i a deseá di muri, el a kere ku su mihó dianan a pasa.

Lesa 1 Reinan 19:15,16 i 2 Reinan 2:11. Kiko tabatin wardá ainda pa Elias?

Dios tabata sa ku dianan mihó tabata spera Elias. Sanashon lo a bini pa e profeta ora e siña regulá su bida den e ritmo di Dios i aseptá Su deskanso. Ainda tabatin reinan pa ungi i un susesor pa ser skohé. Dios ya kaba tabata sa di Eliseo, ku lo yega di ta manera un yu hòmber serkano pa Elias. Dios tabata sa ku den fe Elias lo a bolbe yama pa kandela baha for di shelu (2 Reinan 1:10). Pa Elias, lo no tin niun morto desesperá bou di un mata di enebro sino mas bien un biahe den garoshi di kandela pa deskanso selestial.