E Rítmonan di Deskanso

Dios tabata ei na prinsipio. Señor Dios a papia, i asina tabata. Lus tabata dividí dia for di nochi; firmamentu, shelu, i lamannan a ser papiá den eksistensia riba e di dos dia; tera seku i vegetashon a sigui riba e di tres. Dios ta forma e struktura básiko di tempu i geografia, i despues E ta yen'é durante e siguiente tres dianan. Lus ta goberná e shelu den dia i den anochi. Diferente for di e storianan di mayoria kultura antiguo, e storia di Kreashon bíbliko ta hasié masha kla ku solo, luna, òf e streanan no ta deidatnan. Nan ta drenta den e kuadro solamente riba e di kuater dia i ta suheto na e palabra di e Kreador.

E deskripshon di Moises di dianan 5 i 6 (Gen. 1:20-31) ta yen di bida i bunitesa. Paranan, piská, animalnan di tera, tur a yena e espasio prepará dor di Dios.

Kiko e evaluashon di Dios ta indiká tokante Kreashon? Lesa Génesis 1:1-31.

Esaki no ta djis kualke espasio ku Dios a krea; e ta un lugá perfekto. Animalnan ku ta buska otro ta yena tera. Manera e refran di un tono atraktivo, Dios ta sigui bisa ku tabata masha "bon" despues di kada dia.

Kiko ta diferente tokante e kreashon di humanidat for di e sobrá di e mundu kreá? Lesa Génesis 1:26,27 i Génesis 2:7,21-24.

Dios ta sak abou i ta kuminsá na forma lodo. Kreashon di humanidat den e imágen i semehansa di Dios ta un lès ophetivo den intimidat i serkania. Dios ta bùk abou i ta supla e rosea di bida den Adam su nanishi, i tabatin un ser bibu. E kreashon speshal di Eva for di e repchi di Adam ta añadí un otro elemento importante na e siman di Kreashon. Matrimonio ta parti di e diseño di Dios pa humanidat, un enlase sagrado di asosashon entre 'ish i 'ishshah, "hòmber" i "muhé."

E bia akí, ora Dios ta mira tur kos ku El a traha riba dia seis, e refran ta zona diferente: "I Dios a mira tur loke El a traha, i ata, tur kos tabata masha bon" (Gen. 1:31, NKJV , kursiva suministrá).

Kreashon por ta "masha bon," pero ainda e no ta kompleto. Kreashon ta terminá ku e deskanso di Dios i un bendishon speshal di e di shete dia, e Sabat. "E ora ei Dios a bendishoná e di shete dia i a santifik'é, pasobra riba e dia ei El a sosegá di tur Su trabou ku Dios a krea i a traha" (Gen. 2:3, NKJV).

E Sabat ta parti esensial di e kreashon di Dios. De echo, e ta e kulminashon di Kreashon. Dios ta traha deskanso i ta krea un espasio pa komunidat, kaminda humanidat (den e dianan ei e famia sentral di Adam i Eva) por a stòp nan aktividatnan diario i deskansá huntu ku nan Kreador.

Desafortunadamente, piká a drenta e mundu akí i a kambia tur kos. No mas komunion direkto ku Dios. Na lugá di esei, partonan doloroso, trabou duru, relashonnan frágil i disfunshonal, etcetera, e letania di doló, ku nos tur konosé asina bon komo e bida riba e mundu kaí aki. I tòg, asta meimei di tur esaki, e Sabat di Dios ta permanesé, un símbolo duradero di nos kreashon i tambe e speransa i promesa di nos re-kreashon. Si nan tabatin mester di e deskanso di Sabat promé ku piká, kuantu mas despues?

Hopi aña despues, ora Dios ta liberá Su yunan for di sklabitut na Egipto, E ta kòrdá nan atrobe riba e dia speshal akí.

Lesa Eksodo 20:8-11. Kiko esaki ta siña nos tokante e importansia di e Sabat manera e ta relashoná na Kreashon?

Ku e mandato aki, Dios ta yama nos pa kòrda nos orígennan. Kontrali na loke asina tantu ta kere, nos no ta produkto kasual di forsanan friu, indiferente, i siegu. Kontrali na esei, nos ta sernan kreá den e imágen di Dios. Nos ta kreá pa kompartí kompañerismo ku Dios. No importá ku e Israelitanan a ser tratá komo esklabonan ku poko balor. Ku kada Sabat, den un manera speshal nan a ser yamá pa rekordá ken nan tabata realmente, sernan trahá den e imágen di Dios mes.

"I dor ku e Sabat ta un konmemorativo di e obra di kreashon, e ta un señal di e amor i poder di Kristu."- Ellen G. White, The Desire of Ages, p. 281.

Despues di 40 aña di dual den e desierto, un generashon nobo, ku rekuerdonan vago, si tin algun, di Egipto, a krese. Nan tabatin un eksperensia di bida masha diferente for di esun di nan mayornan. E generashon nobo tabata testigu di e falta di fe kontinuo di nan mayornan, i komo konsekuensia, nan tambe mester a dual den e desierto miéntras e generashon di nan mayornan tabata muri.

Nan tabata privilegiá di tin e Santuario den e sentro di nan kampamentu i por a mira e nubia indikando e presensia di Dios ku tabata zueif riba e tabernakel. Ora ku e move, nan tabata sa ku ta tempu pa paketá i sigui. E nubia akí ku tabata proveé sombra durante dia i lus i kayente anochi, tabata un rekuerdo konstante di e amor i kuido di Dios pa nan.

Ki rekuerdo personalisá di e deskanso di Sabat nan tabatin? Lesa Eksodo 16:14-31.

Kontrario na teologia popular, e versíkulonan akí ta proba ku e Sabat di e di shete dia ta presedé e dunamentu di e lei na Sinai.

Kiko a pasa aki?

E kuminda speshal ku Dios a supli tabata un rekuerdo diario di e echo ku e Kreador tabata sostené Su Kreashon. Di un forma masha tangibel, Dios tabata supli nan nesesidatnan. Tur dia tabata un milager ku e kuminda ku tabata aparesé i disparsé ku solo. Tur biaha ku un hende trata na akumulá pa e siguiente dia, e lo a putri i hole stinki; i tòg, tur djabièrnè tabatin sufisiente pa un porshon dòbel, i e sobrá, pa ser komé riba Sabat, tabata permanesé milagrosamente fresku.

Israel awor tabatin e sirbishi di santuario i tur e leinan i regulashonnan registrá den Levítiko i Numbernan. atmósfera asina, e Moises ya ansiano ta yama tur hende huntu i ta ripití nan historia i ta revisá e leinan ku Dios a duna (lesa Deut. 5:6-22).

Finalmente e generashon nobo tabata kla pa drenta e Tera Primintí. Israel tabata na punto di eksperensiá un kambio di liderazgo, i un Moises ya ansiano tabata ke sigurá ku e generashon akí lo a kòrda ken nan ta i kiko nan mishon tabata. E no tabata ke pa nan ripití e erornan di nan mayornan. I asina e ta ripití e leinan di Dios. E Dies Mandamentunan ta ser ripití asina ku e generashon akí, pará na punto di konkista Kánaan, lo no a lubidá.

Israel ta kamper na e banda ost di e Jordan. Nan a tuma poseshon di e teranan di e rei di Basan i dos reinan di e Amoritanan. Un bes mas, na e momentu krusial akí, Moises ta yama Israel huntu i ta kòrda nan ku e pakto trahá na Sinai no tabata solamente pa nan mayornan sino pa nan, tambe. Despues e ta kontinuá na ripití e Dies Mandamentunan, pa nan benefisio.

Kompará Eksodo 20:8-11 i Deuteronomio 5:12-15. Kua ta e diferensia den e manera kon e mandamentu di Sabat a ser ekspresá den nan?

Den Eksodo 20:8, e mandamentu ta kuminsá ku e palabra "Kòrda." Deuteronomio 5:12 ta kuminsá ku e palabra "Opservá" (NKJV). E palabra "kòrda" ta bini un poko despues den e mandamentu mes (Deut. 5:15). Den e versíkulo akí, nan a ser bisá pa kòrda ku nan tabata esklabonan. Ounke e generashon akí a lanta liber, nan tur lo a nase den sklabitut si no tabata pa e reskate milagroso. E mandamentu di Sabat tabata pa rekordá nan ku e mesun Dios ku tabata aktivo den e storia di Kreashon tambe tabata aktivo den nan liberashon: "Señor bo Dios a saka bo for di ayanan pa medio di un man poderoso i un brasa ekstendé" (Deut. 5:15, NABRE).

E bèrdat akí ta pas e sirkunstansianan aktual di e Israelitanan, pará pa di dos biaha na e frontera di e Tera Primintí, algun kuarenta aña despues ku e promé generashon a faya di forma asina miserabel. Nan tabata mesun desampará den konkistá e tera akí manera nan antepasadonan tabata den skapa for di Egipto. Nan tabatin mester di e Dios akí ku ta aktua ku un “man poderoso" i un "brasa ekstendé."

E Sabat ta na punto di atkerí un dimenshon adishonal. Pasombra Dios ta e Dios di liberashon, Israel mester warda e dia di Sabat (Deut. 5:15).

Naturalmente, kreashon no ta masha leu for di e mandamentu di Sabat, asta den Deuteronomio 5, apesar di e motibu adishonal pa ward’é: e liberashon di Israel. Den un sentido, e liberashon di Israel for di e tera di Egipto ta e punto di salida di un kreashon nobo, similar na e storia di Kreashon den Génesis. Israel, komo pueblo liberá, ta e kreashon nobo di Dios (lesa tambe, por ehèmpel, Isa. 43:15).

I pa motibu ku e Eksodo ta ser mirá komo un símbolo di libertat for di piká, esta, Redenshon, nos por haña den Sabat un símbolo di tantu Kreashon komo Redenshon. P'esei, den un manera masha real, e Sabat ta señalá nos na Hesus, nos Kreador i nos Redentor.

Dios ta ordená Su pueblo pa warda e dia di Sabat. Huntu ku no mata i no hòrta tin e mandamentu pa rekordá e Sabat, ounke Beibel no ta duna nos detayenan riba eksaktamente kon nos mester ward'é.

Kua mester ta e atmósfera ku nos ta krea i promové riba Sabat? Lesa Salmo 92 i Isaias 58:13.

Pa motibu ku warda Sabat ta nifiká selebrá Kreashon i Redenshon, su atmósfera mester ta unu di goso i delisia den Señor i no un di tristesa.

Rekordá e Sabat no ta kuminsá riba e di shete dia. Komo e promé Sabat tabata e kulminashon di e siman di Kreashon, asina nos mester "rekordá e dia di Sabat” henter siman i plania adelantá asina ku nos por pone un banda nos trabou di siman i asina "santifik'é" ora e Sabat yega. Prepará intenshonalmente durante siman i spesialmente riba e dia di preparashon (Marko 15:42) òf djabièrnè ta klave i ta añadí na e delisia segun ku antisipashon ta krese pa e dia masha speshal akí.

Ki aspekto importante di warda Sabat Levítiko 19:3 ta enfatisá?

Warda Sabat tambe ta nifiká alimentá nos relashonnan ku famia i amigunan. Dios ta proveé tempu pa kompañerismo enfoká ku e famia kompletu, i e ta inkluí deskanso pa asta e sirbientenan i e animalnan di famia (lesa Eks. 20:8-11). Sabat i famia ta bai huntu.

Miéntras deskanso i tempu pa famia ta prinsipionan importante, warda Sabat tambe ta nifiká partisipá den adorashon kolektivo i enfoká di Dios ku nos famia di iglesia. Hesus a atendé i a dirigí sirbishi di adorashon miéntras E tabata riba tera. (Lesa Lev. 23:3, Lukas 4:16, i Heb. 10:25.)

Ounke nos rutina i ritmonan di siman por ser hasí den hansha, tòg, den profundidat di nos kurason, tin un anhelo pa e berdadero deskanso di Sabat, berdadero komunion ku nos Hasidó. Ora nos kòrda stòp tur nos negoshi i plania pa pasa tempu ku Dios i alimentá nos relashonnan, nos por drenta den e ritmo i deskanso di Sabat.