Anhelando pa Mas

Lesa 1 Korintionan 10:1-11. Kiko Pablo tabata ker a komuniká na su lesadónan na Korintio ora el a referí na "ehèmpelnan"?

E término griego usá den 1 Korintionan 10:6 (i tambe adaptá den un forma similar den 1 Korintionan 10:11), tradusí komo "ehèmpel" den mayoria tradukshon ingles, ta typos. Na Papiamentu e palabra tipo ta basá riba e sustantivo griego akí. Un tipo (òf ehèmpel) nunka ta e original sino algun sorto di símbolo òf representashon di dje. E ta un modelo di algu otro.

Hebreonan 8:5 ta ofresé un bon ehèmpel di e klase di relashon akí: “Nan [e saserdotenan di e sirbishi di tèmpel di Tèstamènt Bieu] ta sirbi un kopia i sombra di e kosnan selestial. Pasobra ora Moises tabata na punto di lanta e tènt, el a ser instruí pa Dios, bisando: ‘Mira pa bo traha tur kos di akuerdo ku e patronchi ku a ser mustrá na bo riba e seru’ ” (ESV).

E pasashi akí den Hebreonan ta enfatisá e vínkulo direkto entre realidatnan selestial i terenal, i despues e ta sita Eksodo 25:9, kaminda Dios a bisa Moises pa traha e santuario di desierto "di akuerdo ku ... e patronchi" ku el a mira riba e seru. E punto ta ku e santuario terenal, ku tur su ritualnan i prosedimentunan, tabata "ehèmpelnan", símbolonan, modelonan di loke ta sosodiendo den shelu, ku Hesus komo nos Sumosaserdote den e santuario selestial.

Ku esaki den mente, nos por komprondé mihó loke Pablo tabata papia di dje den 1 Korintionan 10. Den e versíkulonan akí Pablo ta rekonsiderá algun di e eksperensianan klave di e pueblo di Dios den desierto riba nan kaminda pa e Tera Primintí. "Nos tatanan" ta referí na nan antepasadonan hudiu ku a bandoná Egipto, tabata bou di e nubia, a pasa a traves di laman, i, asina, tur a ser batisá den un bida nobo di libertat for di sklabitut.

Pablo ta konsiderá e stashonnan importante akí di e biaha den desierto komo un tipo, òf un ehèmpel, di boutismo individual. Den e pasonan di e lógika di Pablo, e referensia na "kuminda spiritual" mester referí na mana (kompará ku Eks. 16:31-35). Israel a bebe for di e baranka, kua Pablo ta identifiká komo Kristu (1 Kor. 10:4). Pensa riba Hesus, por ehèmpel, komo e "pan di bida" (Juan 6:48) i komo e "awa bibu" (Juan 4:10), i tur esaki tin sentido perfekto. Asina, loke nos ta mira aki, ta e uso di Pablo di historia di Tèstamènt Bieu komo un ehèmpel di revelá bèrdatnan spiritual ku por ser apliká na kristiannan individual awe.

E sistema di Tèstamènt Bieu di ritual i sakrifisionan, manera ta ser hañá den Levítiko, ta ofresé mas ehèmpelnan di loke nos a mira ayera, símbolonan di Tèstamènt Bieu ta mustra na e bèrdatnan di Tèstamènt Nobo. Aunke lesadónan moderno di Beibel hopi biaha ta pasa riba e ritualnan akí, nan ta kontené hopi bèrdat spiritual importante ku por ta di gran balor pa esnan ku studia nan.

Lesa e instrukshonnan pa e ofrenda di piká pa un israelita regular den Levítiko 4:32-35. Kiko nos por siñá for di e ritual akí, ounke nos no tin un santuario òf tèmpel ku un altar kaminda nos por ofresé sakrifisionan pa nos pikánan? Konektá e ritual akí ku Juan 1:29 i 1 Pedro 1:18-21.

Un ritual ta un komunikadó ekselente di balornan i informashon importante, i e mester ser komprondé den su konteksto. Generalmente e ta rekerí un tempu spesífiko, un sitio partikular, i un sekuensia di akshonnan predeterminá pa ta efikas. Enbèrdat, ora nos lesa a lo largu di e mandatonan bíbliko den Tèstamènt Bieu enkuanto di sakrifisio, e ta bira kla ku Dios a duna detayenan masha spesífiko tokante loke por a ser sakrifiká, i ki ora, na unda, i ki ritual i prosedimentu pa sigui.

Sentral na hopi di e ritualnan, naturalmente, tabatin sanger i e dramamentu i sprengumentu di sanger. Esaki no ta bunita, ni e tabata suponé di ta tampoko, pasombra e ta tratando ku e kos di mas mahos den universo, i esei ta piká.

Ki ròl eksakto e sanger a hunga, i dikon mester a pon’é riba e kachunan di e altar? Miéntras mayoria di e ritualnan asosiá ku e santuario ta aparesé den formanan preskriptivo (es desir, nan ta duna instrukshonnan riba kon hasié), no semper nan ta inkluí tur e splikashonnan. Kisas esei ta pasobra e pueblo ya kaba tabata komprondé loke tur kos tabata nifiká. Despues di tur kos, e pueblo di Israel a komprondé e nifikshon di sanger (Lev. 17:11).

E ehèmpel saká for di Levítiko 4:32-35, sinembargo, ta kontené un splikashon importante den Levítiko 4:35: "Asina e saserdote mester hasi ekspiashon pa su piká ku el a kometé, i e lo ser pordoná" (NKJV). Asina, sanger tabata klave pa henter e proseso di ekspiashon, e medio pa kua nos pekadornan por ser hasí hustu dilanti di un Dios Santu. Loke nos ta mira ku e sakrifisionan akí, e ora ei, ta un tipo, un modelo, di e morto i ministerio di Kristu na nos fabor.

Ademas di e ehèmpelnan ku ya nos a mira, e idea akí di tiponan i símbolonan por apliká na e konsepto bíbliko di sosiegu, tambe. Pa mira esaki, nos ta bai na e buki di Hebreonan den Tèstamènt Nobo.

Lesa Hebreonan 4:1-11. Na kiko e promesa restante di drenta den Su sosiegu ta referí? Kon e eksperensia di Israel durante e Eksodo i e dualmentu den desierto ta ofresé persepshonnan adishonal den e idea di drenta den e sosiegu di Dios?

E tema di perseveransia i fieldat ta masha importante aki. Aunke papiando tokante e Sabat di e di shete dia, e enfoke prinsipal di e versíkulonan akí (i loke a bini promé; lesa Hebreonan 3:7-19) ta realmente un yamada pa e pueblo di Dios pa ta perseverante den fe; es desir, pa permanesé fiel na Señor i e evangelio.

E pasashinan akí ta kòrda e lesadó pa tuma e lèsnan, siñá di e guiansa di Dios den pasado, na serio, "pa asina ningun hende por kai pa e mesun sorto di desobedensia" (Hebr. 4:11, ESV). Pone atenshon, esaki ta un oportunidat! Israel a tende e evangelio, e teksto ta kontinuá, pero e palabra no a probechá nan. Na lugá ku nan fe a fortalesé a traves di konfiansa i obediensia, nan a skohe rebelion (kompará ku Hebr. 3:7-15), i por lo tantu, nunka nan a eksperensiá e sosiegu ku Dios tabata ke pa nan.

Hebreonan 4:3 ta mustra na e relashon estrecho entre fe i sosiegu. Nos por drenta den Su sosiegu solamente ora kere i konfia Esun kende a primintí sosiegu i ku por kumpli ku e promesa akí, i esei ta, naturalmente, Hesu-Kristu.

Lesa Hebreonan 4:3 atrobe. Kiko tabata e problema prinsipal ku e pueblo ku ta ser referí na dje? Ki lès nos por saka for di esaki pa nos mes, nos ku a haña e "evangelio ... prediká na nos komo tambe na nan " (Hebr. 4:2,)?

E komunidat di e kristiannan primitivo a aseptá e revelashon previo di Dios (loke nos ta yama e "Tèstamènt Bieu") i tabata kere ku Hesu-Kristu tabata e Lamchi di Dios, e sakrifisio pa nan pikánan. I pa medio di fe den e sakrifisio, nan por a eksperensiá salbashon den Hesus i e sosiegu ku nos ta ser ofresé den djE.

Lesa Hebreonan 4:4-7 i Salmo 95:8-11. Ki spièrtamentu ta ser duná ei, tantu den Salmonan komo den Hebreonan, i kiko e mester bisa nos awe?

Hebreonan 4:4-7 ta sita tantu e relato di kreashon komo Salmo 95:11 den konteksto di papia tokante e infidelidat di e israelitanan i, por lo tantu, nan frakaso pa drenta den e sosiegu ku Dios tabata ke pa nan.

En realidat, Salmo 95:8-11 ta konektá e eksperensia di Israel den desierto ku e sosiegu di Dios i ta inkluí e huramentu divino ku Israel infiel lo no a drenta den Su sosiegu, originalmente asosiá ku e Tera primintí.

Naturalmente, Israel a drenta e Tera Primintí. Un generashon nobo a krusa e frontera i, ku yudansa di Dios, a tuma e fortalesanan di e tera i a establesé einan.

Sinembargo, nan no a drenta den e sosiegu di Dios, e idea tabata ku hopi no a eksperensiá e realidat di salbashon den Hesus pasobra nan falta di fe a manifestá su mes pa medio di obediensia flagrante. Aunke sosiegu tabata asosiá ku e tera, e tabata inkluí mas ku solamente e lugá kaminda e hende tabata biba.

Hebreonan 4:6 ta sugerí ku esnan ku a tende e promesa divino di sosiegu berdadero no a drenta pa motibu di desobedensia. Kiko ta e konekshon entre desobedensia i no drenta e sosiegu di Dios?

"Awe" ta ekspresá urgensia. "Awe" ta nifiká ku no tin mas tempu pa bira rònt. "Awe" ta rekerí un kontesta i desishon aworakí.

Pablo ta tene na e palabra semeron, "awe", i realmente ta enfatisá kon importante e tabata den e konteksto di sosiegu. Salmo 95:7,8, mientrastantu, ta un spièrtamentu i un súplika na e pueblo Dios pa no ripití e erornan di nan antepasadonan i faya di drenta den e berdadero sosiegu ku ta haña solamente den e salbashon ku Dios ta ofresé nos.

E desaroyo lógiko di e ideanan klave den Hebreonan 4 ta bira partikularmente evidente ora bo lesa Hebreonan 4:8-11. Josue no a duna Israel sosiegu. Konsekuentemente, ya ku Dios no ta un gañadó, mester tin un otro "sosiegu" ku ta permanesé pa e pueblo di Dios. E grupo akí no ta formá eksklusivamente di kreyentenan hudiu. E ta inkluí tur esnan ku a aseptá Hesus komo nan Salbador personal.

Lesa Galationan 3:26-29 i nota e karakterístikanan di e pueblo di pakto di Dios despues di e krus. Kiko ta nifiká ku no tin ni hudiu ni griego, ni esklabo ni hende liber, ni máskulino ni femenino den e konteksto den kua Pablo ta skirbiendo?

Tin biaha, Hebreonan 4 a ser usá pa enfatisá e opservansia di e Sabat di e di shete dia, miéntras otronan a us'é pa desafiá e balides di e sosiegu di Sabat akí, den lus di e echo ku tin un otro sosiegu (di tempu di fin). Niun di dos posishon ta reflehá e teksto bíbliko bon. En kambio, e teksto ta sugerí ku e enfoke di tempu di fin riba e sosiegu spesial di Dios tabata presente for di Kreashon i ku e selebrashon di e sosiegu di Sabat ta ofresé un muestra chikitu, semanal di e sosiegu ei di e tempu di fin. Por sierto, pa e hudiunan e Sabat a ser komprondé di ta un prekursor chikitu di e “olam haba” ("e mundu ku ta bin").

E sosiegu meskos ku e Sabat ku ta permanesé pa e pueblo di Dios, ku ta eko e sosiegu di riba e promé Sabat den historia di tera, ta nifiká ku nos por stòp nos propio obranan i konfi’E pa kumpli Su promesa di salbashon pa nos.

Kontrali na argumentonan di algun intérprete, e konteksto no ta sostené e sugerensia ku e mandamentu di Sabat a ser kumplí den e sosiegu di salbashon ku Kristu a trese, hasiendo e innesesario pa kristiannan obedes’é. E sosiegu final ku a primintí nos pa medio di loke Kristu a hasi pa nos no ta remplasá e Sabat di e di shete dia bíbliko; al kontrario, e ta mehor'é.

Den un mundu ku altamente ta balorá hendenan outosufisiente, trabou duru, i esnan ku ta perseverá, sosegá den Hesus i konfia ku Su grasia ta sufisiente pa salba i transformá nos, ta berdaderamente kontra kultura.