E Profeta Intrankil

Jonas tabata un mishonero maraviosamente eksitoso. Na mes momento, e tabata tambe unu masha resistente, a lo ménos na prinsipio. Loke sea ku Jonas tabata hasiendo, e yamada di Dios a interumpí su bida den un gran forma. Na lugá di tuma e yugo di Dios riba su skoudernan i diskubrí pa su mes ku e yugo ta fásil i Su karga lihé (Mat. 11:30), Jonas a disidí pa buska su propio "sosiegu", i esei tabata dor di kore bai den e direkshon kontrali for di unda Dios tabata yamando e pa bai.

Unda Jonas tabata spera di haña pas i sosiegu for di e yamada di Dios ? Kon bon el a funshoná p'e? Lesa Jonas 1.

Jonas ta kuminsá bai den e direkshon kontrali for di unda Dios a yam'é. Ni sikiera e ta para pa rasoná ku Dios, manera hopi otro profetanan di Beibel a hasi ora Dios a yama nan pa ta mensaheronan di Dios (lesa, por ehèmpel, Eks. 4:13).

Ta interesante pa bisa ku esaki no ta e promé biaha ku Dios a yama Jonas pa papia p'E, manera 2 Reinan 14:25 ta sugerí. Den e kaso ei, sinembargo, ta parse ku Jonas a hasi loke Dios a pidié pa hasi. Sinembargo, no e biaha akí.

Dikon?

Registronan históriko i arkeológiko ta dokumentá e krueldat di e soberanonan neo-asirio ku tabata dominá e antiguo Serkano Oriente durante siglo ocho P.K., e tempu ku Jonas tabata ministrá na Israel. Masoménos 75 aña despues, e rei neo-asirio Senakerib a ataká Juda. Israel i Samaria ya kaba a kai masoménos binti aña promé, i Rei Ezekias aparentemente a uni ku un koalishon anti-asirio lokal.

Awor e momento a yega pa e asirionan regla kuenta. Beibel (2 Reinan 18, Isaias 36), dokumentonan históriko asirio, i e relievenan di e muraya di palasio di Senakerib na Nínive tur ta konta nos e storia kruel tokante e kaida di Lakis, un di e fortalesanan di frontera di sùit di mas importante i bon fortifiká di Ezekias. Den un deskripshon, Senakerib ta afirmá di a tuma mas ku dosshen mil prisionero for di 46 siudat fortifiká ku el a afirmá di a destruí. Ora e rei asirio a tuma Lakis, sentenar òf míles di prisionero a ser hinká; defensornan fuerte di Rei Ezekias a ser soyá bibu, miéntras e sobrá a ser mandá Asiria komo obra di esklabo barata.

E asirionan por tabata inkreiblemente kruel, asta pa e normanan di e mundu den e tempu ei. I Dios tabata mandando Jonas den e kurason mes di e imperio ei?

Ta nada straño ku Jonas no ker a bai?

E huida di Jonas for di Dios no tabata sin problema. Su "sosiegu" kòrtiku a ser strobá ora ku Dios milagrosamente a intervení ku e tormenta. Jonas ta ser salbá di un tumba di awa dor di Dios, kende a ordená un piská pa salba Jonas.

Sinembargo, ta solamente ora ku Jonas a haña su mes den un sosiegu fòrsá di tres dia den e stoma di un piská grandi ku e ta realisá kon dependiente e ta riba Dios. Tin biaha nos mester ser hibá na e lugá kaminda nos no tin nada ku e mundu akí ta ofresé pa dependé riba dje, pa realisá ku Hesus ta Esun ku nos mester realmente.

Lesa e orashon di Jonas den barika di e piská (lesa Jon. 2:1-9). Tokante kiko e ta hasi orashon?

Aunke e tabata einan den e profundidat, den un situashon masha peligroso, Jonas, den su orashon, ta resa tokante e santuario. E lo mira den direkshon di "Bo tèmpel santu".

Kiko ta pasando aki?

E tèmpel ta forma un punto sentral di e orashon akí, i e mester ta e punto sentral di orashon en general. Tin primeramente solamente un lugá den Tèstamènt Bieu kaminda Dios por ser hañá. E ta den e santuario (lesa Eks. 15:17, Eks. 25:8). E santuario ta e punto sentral di orashon i komunion ku Dios.

Sinembargo, Jonas no ta refiriendo na e tèmpel di Herusalèm. Mas bien, e ta papiando tokante e santuario selestial (Jon. 2:7). Ta einan ta kaminda su speransa ta eksistí, pasobra einan ta e kaminda for di unda Dios i e salbashon ku E ta ofresé berdaderamente ta bini.

Jonas finalmente ta komprondé e bèrdat importante akí. El a eksperensiá e grasia di Dios. El a ser salbá. Ora e piská grandi skupié afó, e ta komprondé direktamente tokante e amor di Dios p'e, un profeta fugitivo. Siguramente el a siña (aunke no sin algun kambio di ruta riba kaminda) ku e úniko kaminda sigur pa kualke kreyente ta pa trata di ta den e boluntat di Dios.

Asina, awor e ta disidí di kumpli ku su deber i obedesé e òrdunan di Dios, finalmente dirigiendo su mes pa Nínive, sin duda riba fe, siendo ku e ta dirigí su mes den direkshon di un siudat ekstremadamente malbado kua su siudadanonan kisas lo no gusta e profeta strañero akí, bisando nan kon malu nan ta.

Kompará ku kualke siudat òf pueblo na Israel, Nínive ta un siudat enorme. E ta un “stat ekstremadamente grandi, un biahe di tres dia den ekstenso” (Jon. 3:3, NKJV).

Lesa Jonas 3:1-10. Kiko ta e kontesta di e lugá malbado akí? Ki lèsnan nos por saka for di e storia akí pa nos mes den nos intentonan pa testifiká na otronan?

Miéntras e ta kana den e siudat, Jonas ta proklamá e mensahe di Dios: "Kuarenta dia mas, i Nínive lo ser destruí!" (Jon. 3:4, NKJV). E mensahe ta bai dirèkt na e punto prinsipal. Aunke no ta duna e detayenan, ta keda kla ku e mensahe ta kai den oidonan reseptivo, i e pueblo di Nínive (kolektivamente!) ta kere e palabranan di spièrtamentu di Jonas.

Den un forma típiko di serkano oriente, e rei di Nínive ta proklamá un dekreto pa asina demostrá un kambio di kurason. Tur hende, inkluyendo animalnan, mester yuna i lamentá (e teksto no ta bisa kon animalnan ta lamentá). E rei ta baha for di su trono i ta sinta den stòf di tera, un akto simbóliko masha importante.

Lesa Jonas 3:6-9. Kompar'é ku Jeremias 25:5, Ezekiel 14:6, i Revelashon 2:5. Ki elementonan tabata envolví den e diskurso di e rei, ku ta mustra ku el a komprondé di kiko berdadero arepentimentu ta trata?

E sermon tabata kòrtiku, relevante na e tema, pero yená ku teologia korekto enkuanto di berdadero arepentimentu. Miéntras Jonas tabata predikando, Spiritu Santu mester tabata trahando duru den kurason di e ninivitanan.

E ninivitanan no tabatin e benefishi di tur e storianan di e guia tierno di Dios ku e israelitanan tabatin, i tòg, nan a respondé na djE den un forma positivo. En realidat nan ta bisando: "Laga nos tira nos mes riba e miserikòrdia di Dios, no riba nos propio logronan! Laga nos dependé kompletamente riba Su bondat i grasia".

Masha straño, Jonas, ku a eksperensiá e grasia di Dios e mes personalmente, parse di ta pensa ku e grasia di Dios ta algu asina eksklusivo ku ta solamente algun por tin oportunidat di deskansá den dje.

Desafortunadamente, e storia di Jonas no ta terminá ku kapítulo 3.

Lesa Jonas 4:1-11. Kiko ta e problema di Jonas ? Ki lès nos por siña for di su karakter mas bien defektuoso?

Jonas 4 ta kuminsá ku e rabia di Jonas pa ku Dios pasobra e alkanse di su mishon no tabata asina eksitoso. Jonas ta preokupá tokante mustra bobo. Nos ta haña Dios tumando tempu pa papia i rasoná ku Su profeta, ku ta komportá su mes manera un mucha chikitu ku un atake di rabia.

Aki tin evidensia ku berdadero siguidónan di Dios, asta profetanan, por tin ku krese i superá ainda.

“Ora ku Jonas a hañá sa di e propósito di Dios pa spar e siudat ku, apesar di su maldat, a ser hibá na arepentí den paña di saku i shinishi, e mester tabata e promé pa regosihá pa motibu di e grasia asombroso di Dios; pero en kambio el a permití su mente para ketu riba e posibilidat di ser konsiderá komo un profeta falsu. Yalurs di su reputashon, el a pèrdè for di bista e balor infinitamente mas grandi di e almanan den e siudat miserabel ei.” — Ellen G. White, Prophets and Kings, p. 271.

E pasenshi di Dios ku Su profeta ta asombroso. E parse desidido pa usa Jonas, i ora Jonas kore bai, Dios ta manda e tormenta i e piská pa trese e fugitivo bèk. I asta awor, atrobe, ora ku Jonas ta kontrali, Dios ta trata na rasoná ku Jonas i su mal aktitut, bisando e: “Ta korekto pa bo ta rabiá?” (Jon. 4:4, NKJV).

Lesa Lukas 9:51-56. Kon e relato akí ta un poko paralelo na loke a sosodé den e storia di Jonas?

“Dios a stima mundu asina tantu ku El a duna Su Yu unigénito, pa ken ku kere den djE no mester peresé sino tin bida eterno” (Juan 3:16, NKJV) òf, manera Dios ta pon'é den Jonas 4:11: "Mi no mester tene duele di Nínive, e gran stat ei, den kua tin mas ku shentibinti mil persona ku no por diserní entre nan man drechi i nan man robes, i hopi bestia?” (NKJV). Kon agradesido nos mester ta ku, al final, Dios, i no nos mes, ta e Hues supremo di kurasonnan i mentenan i motibunan.

Parse ku Jonas ta mas problema ku e ta bal. Nínive tabata peligroso, pero den e storia di Jonas, e ninivitanan no parse di ta e problema. Nan ta komprondé e mensahe i ta arepentí rápidamente. Jonas, e mishonero, parse di ta e konekshon débil den e storia mishonero akí.

Den e relato akí, Dios ta persiguí un profeta mal dispuesto pasobra E sa ku Jonas tabatin mester di e biahe mishonero pa Nínive mes tantu ku e ninivitanan tabatin mester di skucha e mensahe di e mishonero.

Lesa e buki di Judas. Kon nos por "mantené [nos] mes den e amor di Dios" (Judas 21, NKJV). Kiko esei ta nifiká?***

Den su buki kòrtiku den Tèstamènt Nobo, Judas ta bisa nos den Judas 21 pa "mantené boso mes den e amor di Dios miéntras boso ta spera riba e miserikòrdia di nos Señor Hesu-Kristu pa trese bida eterno pa boso" (NIV).

Eksperensiá e amor i grasia di Dios personalmente no ta un evento di un biaha. Un manera sigur pa "mantené boso mes den e amor di Dios" ta pa alkansá otronan. Den e siguiente versíkulonan Judas ta bisa nos pa " ta miserikòrdioso", i "salba" otronan dor di "ranka nan for di kandela" (NIV).

Lesa Judas 20-23. Kiko e ta bisando aki ku ta relashoná ku e storia di Jonas, i kiko esaki ta bisa nos, tambe?

Dios a yama Jonas pa bai Nínive pasobra probablemente Jonas no a pasa hopi tempu pensando tokante su relashon ku e asirionan promé ku e yamada partikular akí. Probablemente e tabata sa ku e no tabata gusta nan, pero e no tabatin idea kuantu e tabata odia nan òf e ekstremonan ku e lo a pasa pa asina evitá nan, asta despues ku el a haña e yamada. Jonas no tabata kla pa tin un ninivita komo un bisiña den shelu. Jonas no a siña stima manera Dios ta stima. Dios ta yama Jonas pa bai Nínive pasobra Dios ta stima e ninivitanan i ke nan den Su reino. Pero Dios ta yama Jonas tambe pasobra Dios ta stima Jonas. E ke pa Jonas krese i bira mas manera E miéntras nan ta traha huntu. Dios ke pa Jonas hañá e berdadero sosiegu ku ta bini solamente dor di ta den un relashon di salbashon kunE i dor di hasi e boluntat di Dios, kua ta inkluí alkansá otronan i mustra nan na e fe i speransa ku nos tin.