E Aliansa Eterno

Den henter Beibel, e aliansa i e evangelio ta aparesé huntu. Aunke e idea di aliansa tabata eksistí promé ku e nashon di Israel (por ehèmpel, e aliansa di Noe), i aunke e promesa di aliansa a ser hasí promé ku e nashon di Israel tabata eksistí, el a ser ekspresá prominentemente a traves di e interakshon di Dios ku Su pueblo, kuminsando ku nan tatanan, e patriarkanan.

I asta for di kuminsamentu, e bèrdat sentral di e aliansa tabata e evangelio: salbashon pa medio di fe so.

Lesa Génesis 12:1-3, Génesis 15:5-18, i Romanonan 4:1-5. Kiko tabata e promesa di aliansa hasí na Abram (mas despues Abraham), i kon e evangelio ta ser revelá den e promesa di aliansa ei?

Abraham a kere Dios, a kere den e promesanan di Dios na dje, i asina el a ser hustifiká dilanti di Dios. E deklarashon akí, sinembargo, no tabata grasia barata: Abraham a traha na mantené su parti di e aliansa pa medio di obediensia, manera ta ser mirá den Génesis 22, na Seru Moria. Tur esaki, apesar ku “su fe ta ser kontá komo hustisia” (Rom. 4:5, NKJV). Ta p’esei siglonan mas despues, Pablo lo a usa Abraham komo ehèmpel di loke ta nifiká biba pa medio di e promesanan di aliansa ku Dios a hasi ku Su pueblo.

E tema akí ta eko a lo largu di henter Beibel. Pablo a bin kuné un otro bia den Galationan 3:6, kaminda atrobe e ta sita Génesis 15:6 (NKJV), tokante e fe di Abraham siendo “akreditá ... na dje komo hustisia”, i ta referí bèk na e promesa anteriormente hasí na Abram tokante ku tur nashon lo ser bendishoná den su simia (Gal. 3:8,9). E promesanan di aliansa ta ser hasí na tur, hudiu i pagano , ku “ta den fe” (Gal. 3:7) i por lo tantu, ku ta hustifiká pa medio di fe sin e obranan di lei, aunke kuantu nan ta obligá, pa motibu di e aliansa, pa obedesé e lei.

Asta ora Jeremias ta papia tokante e aliansa nobo, e ta hasi esei den konteksto di e lei: “Ma esaki ta e aliansa ku lo Mi hasi ku e kas di Israel despues di e dianan ei, SEÑOR ta bisa: lo Mi pone Mi lei den nan mente, i skirbié riba nan kurason; i lo Mi ta nan Dios, i nan lo ta Mi pueblo” (Jer. 31:33, NKJV), lenguahe ku ta reflehá, ku ta bai bèk na e buki di Levítiko: “Lo Mi kana meimei di boso i ta boso Dios, i boso lo ta Mi pueblo” (Lev. 26:12, NKJV).

“No ta pa motibu di bo hustisia òf e sinseridat di bo kurason ku bo ta drenta pa poseé nan tera, sino pa motibu di e maldat di e nashonnan akí ku SEÑOR bo Dios ta saka nan for di bo dilanti, i pa E por kumpli ku e palabra ku SEÑOR a hura na bo tatanan, na Abraham, Isaak i Jakòb” (Deut. 9:5, NKJV; lesa tambe Deut. 9:27). Kon e promesanan di aliansa a ser hasí manifesto den e versíkulo akí?

Aki tambe e aliansa di grasia ta aparesé: Dios a obra pa nan, apesar di e erornan konstante. (Esaki, siguramente, mester ta e forma kon e evangelio ta funshoná awe, tambe). I tabata pa motibu di e promesa hasí na e tatanan ku e grasia di Dios a ser duná na e futuro generashonnan.

Den e trato di Moises ku e pueblo na ken e promesanan di aliansa a ser duná komo un totalidat, hopi bia e tabata referí bèk na e promesanan di aliansa hasí na e patriarkanan.

Lesa Eksodo 2:24, Eksodo 6:8, i Levítiko 26:42. Kiko ta ser bisá aki ku ta yuda mustra kon e promesanan di aliansa ta funshoná?

E Eksodo for di Egipto, e gran símbolo di e grasia salbador di Dios, tambe tabata basá riba e aliansa ku Señor a sera ku nan tatanan. Es desir, asta promé ku e benefisiarionan di e aliansa a nase, e promesanan a ser hasí na nan fabor. Por lo tantu, aunke nan no tabatin niun mérito di nan mes (pa bisa lo ménos), nan a risibí e liberashon primintí, ku Dios a hasi pa nan a traves di e milagernan i eventonan di e Eksodo.

Naturalmente, kosnan no a terminá ei. Nan a bai di Egipto pa, unda? Sí, Sinaí, kaminda e aliansa ku nan a ser establesé “ofisialmente” (lesa Eksodo 20). I sentral na e aliansa ei tabata evangelio i e lei, e Dies Mandamentunan, kua nan a ser yamá pa obedesé, un manifestashon di nan relashon di salbashon ku Señor, kende ya a redimí nan (e evangelio). P’esei, bes tras bes den Deuteronomio, nan tabata ser yamá pa obedesé e lei ei komo nan parti di e aliansa, kua a ser ratifiká na Sinaí.

Aunke e idea di e aliansa (berit na hebreo), pa deskribí e relashon di Dios ku Su pueblo, ta ser haña a lo largu di henter Beibel, e palabra akí ta aparesé asina tantu bia den Deuteronomio ku Deuteronomio a ser yamá “E Buki di e Aliansa”.

Wak Deuteronomio 5:1-21. Kiko ta sosodiendo aki ku ta yuda mustra kon sentral e idea di aliansa (berit) ta pa e buki di Deuteronomio?

No hopi tempu despues ku e yunan di Israel a ser redimí for di Egipto, Dios a establesé e aliansa ku nan, na Sinaí, djis promé ku nan tabata suponé di drenta e Tera Primintí. E ora ei, despues di un desviamentu di 40 aña, nèt promé ku nan tabata bai drenta e Tera Primintí atrobe, kua tabata un parti sentral di e promesa di aliansa (lesa Gen. 12:7, Eks. 12:25), a traves di e boka di Moises, Señor atrobe ta duna nan e Dies Mandamentunan, un manera pa bolbe enfatisá kon importante tabata pa nan renobá nan obligashonnan di aliansa, tambe.

Sí, Señor tabata bai kumpli ku Su promesanan di aliansa na nan. Awor, sinembargo, nan ta obligá pa mantené nan parti di e trato: “Asina El a deklará na boso Su aliansa ku El a ordená boso pa ehekutá, e Dies Mandamentunan; i El a skirbi nan riba dos tabla di piedra” (Deut. 4:13, NKJV). El a hasié na Sinaí, i awor E tabata hasiendo e atrobe, na Moab, djis promé ku nan tabata bai kapturá e tera primintí na nan a traves di e promesa hasí na e tatanan siglonan anterior, un manifestashon di e “aliansa eterno” ku a presedé asta e eksistensia di mundu.

“Promé ku e fundeshinan di tera a ser poné, e Tata i e Yu a uni den un aliansa pa redimí hende si e mester ser vensé pa Satanas. Nan a uni Nan mannan den un promesa solèm ku Kristu mester a bira e siguridat pa e rasa humano.” — Ellen G. White, The Desire of Ages, p. 834.

Lesa Deuteronomio 5:3. Kon nos ta saka sentido di e versíkulo akí?

Kiko Moisés tabata bisando nan? Mas probablemente Moisés tabata enfatisando e echo ku nan tatanan awor a bai, i e promesanan di aliansa maravioso hasí na nan tatanan a ser hasí awor na nan. Esaki por tabata e forma di Moises di laga nan sa ku nan no mester brua kos, manera e generashon previo a hasi. E promesanan (i obligashonnan) awor ta di nan.

Ta difísil pa nos awe kapta hopi di kon e mundu antiguo tabata na e momento den kua Israel tabata dual den desierto. Si imperionan kompletu a bin i a bai, ku solamente ruinanan (si ta esei) a keda, kiko nos por sa di hopi di e nashonnan pagano chikitu ku a biba den e mesun área ku Israel a biba?

No mashá, pero sí nos sa un kos: e hendenan akí tabata saturá den paganismo, politeismo, i algun práktikanan apsolutamente degradante, kua tabata inkluí sakrifisio infantil. Trata na imaginá bo kon degradante i malbado un kultura i un religion lo tabata ku lo a hasi esei ku nan propio yunan, i hasi asina den nòmber di algun dios!

Nada straño, bes tras bes, a lo largu di henter e historia di Israel antiguo, Señor a spièrta Su pueblo kontra sigui e práktikanan di e nashonnan rònt di nan. “Ora boso drenta den e tera kua SEÑOR boso Dios ta dunando boso, boso lo no siña sigui e abominashonnan di e nashonnan ei” (Deut. 18:9, NKJV).

I esei ta pasobra Dios a yama e nashon akí pa un propósito spesial. Ora nan a drenta den e aliansa ku Dios, nan tabata bai ta un pueblo spesial, un testimonio na e mundu di e Dios kende a krea shelu i tera, e úniko Dios.

Lesa Deuteronomio 26:16-19. Kon e relashon di aliansa entre Dios i Israel ta resumí den e versíkulonan akí? Kon nan fieldat na e aliansa mester ser manifestá den e tipo di pueblo ku nan tabata bai bira? Ki lèsnan nos por saka for di ei pa nos mes, tambe?

Kon fasinante ku Moisés ta kuminsá e kuater versíkulonan akí ku e palabranan “e dia akí”, manera den aworakí mes, atrobe, Dios ta ordená boso pa hasi e kosnan akí (Moisés ta ripití e idea den versíkulo 17). E tabata ordenando nan tur e tempu pa hasi e kosnan akí. Ta manera kos ku e ta bisando nan ku nan mester komprometé nan mes na e momento akí mes, atrobe, pa ta e hendenan fiel, santu, i spesial ku ta berdaderamente e rason sentral pa nan eksistensia komo e nashon di aliansa. Nan tabata e úniko nashon, komo un nashon, ku tabata konosé e berdadero Dios i tabata konosé e bèrdat tokante e Dios akí i kon E tabata ke pa hende biba. Den un sentido real, nan no solamente tabatin “bèrdat presente” sino na nan mes manera, nan tabata bai representá e bèrdat ei te ora Hesus, “e Bèrdat” Mes (Juan 14:6), tabata bai bin.

Eruditonan bíbliko pa hopi tempu a rekonosé e similaridatnan entre e aliansa di Israel ku Dios i otro akuerdonan di aliansa entre reinonan. E paralelo akí no mester ta sorprendente. Señor simplemente tabata trahando ku Su pueblo den un ambiente ku nan por a komprondé.

Na mes momento, e idea di un aliansa, un akuerdo legal entre dos partido, ku reglanan i stipulashonnan i regulashonnan, por parse asina friu i asina formal. Aunke e elemento ei mester eksistí di bèrdat (Dios ta e Dunadó di lei), e no ta amplio sufisiente pa abarká e profundidat i hanchura di e tipo di relashon ku Dios tabata ke ku Su pueblo. Por lo tantu, otro imágennan ta ser usá den Deuteronomio pa yuda deskribí e mesun idea ku e aliansa entre Dios i Israel, pero solamente pa dun’é dimenshonnan adishonal.

Lesa Deuteronomio 8:5; Deuteronomio 14:1; i Deuteronomio 32:6,18-20. Ki tipo di imágennan ta ser usá aki, i kon esaki por a yuda revelá e relashon ku Dios tabata ke ku Su pueblo?

Lesa Deuteronomio 4:20 i Deuteronomio 32:9. Ki imágennan ta ser usá aki, i kon, tambe, esaki ta yuda revelá e tipo di relashon ku Dios tabata ke ku Su pueblo?

Den kada kaso tin e idea di famia, kua, idealmente, mester ta e vínkulo di mas serka, di mas estrecho, i di mas amoroso. Dios semper tabata ke e tipo di relashon akí ku Su pueblo. Asta despues di nan rechaso bergonsoso di Hesus durante e momento di e krus, Hesus a bisa e dos Marianan despues ku el a ser resusitá: “Bai i bisa Mi rumannan pa bai Galilea, i aya nan lo mira Mi” (Mat. 28:10, NKJV). Asta komo e Kristu resusitá, El a referí na e disipelnan komo “Mi rumannan”, un ehèmpel di amor i e grasia ku ta kore di amor pa esnan ku siguramente no tabata meres’é. Esei ta en esensia loke e relashon entre Dios i humanidat tabata semper: grasia i amor duná na esnan ku no meresé.