Stima Señor Bo Dios

Despues ku Moisés a relatá na e yunan di Israel nan historia, el a kuminsá duna nan instrukshonnan riba loke nan mester a hasi pa asina tuma e tera i prosperá riba dje. En realidat, bo por a argumentá ku e parti mas grandi di Deuteronomio tabata simplemente esei: Señor bisando e pueblo loke nan mester a hasi pa asina kumpli ku nan parti di e aliansa, kua El a hasi ku nan kumpliendo ku Su promesa na nan tatanan.

Deuteronomio 6 ta kuminsá asin’aki: “Awor esaki ta e mandamentu, i esakinan ta e statutonan i huisionan ku SEÑOR boso Dios a ordená pa siña boso, pa boso por warda nan den e tera ku boso ta krusando pa poseé, pa bo por teme SEÑOR bo Dios, pa warda tur Su statutonan i Su mandamentunan ku mi ta ordená bo, abo i bo yu hòmber i bo nietu, tur e dianan di bo bida, i pa bo dianan por ser prolongá” (Deut. 6:1,2, NKJV).

Lesa Deuteronomio 6:4,5. Ki mandato SEÑOR Dios ta duna na e yunan di Israel den versíkulo 5? Kiko esei ta nifiká?

Stima Señor bo Dios ku henter bo kurason ... ? Ki interesante ta ku aki, meimei di e lei, meimei di tur e atvertensianan, reglanan, i provishonnan, e pueblo ta ser yamá pa stima Dios. I no solamente pa stim’E sino pa hasi esei “ku henter bo kurason, ku henter bo alma, i ku tur bo forsa”, kua ta mustra na e naturalesa apsoluto di e amor akí.

Stima Dios ku henter kurason i alma i forsa ta nifiká ku nos amor p’E mester ta supremo riba nos amor pa tur kos i tur otro hende, pasobra E ta e fundeshi i base di tur nos ser i eksistensia i tur otro kos. Amor p’E mester pone nos amor pa tur otro kos den perspektiva adekuá.

Na hebreo, e palabra “bo” pa bo Dios, bo kurason, bo poder, ta den singular. Sí, Dios tabata papiando ku e pueblo komo un totalidat, pero e unidat ta solamente mes fuerte ku e partinan. Señor ke pa nos kada un, aunke parti di un kurpa mas grandi, ta fiel na djE individualmente, i e fundeshi di e fieldat ei mester ta nos amor p’E, pa ken E ta, i pa loke El a hasi pa nos.

Moisés a bisa e yunan di Israel pa stima Dios ku tur loke nan tabatin. Esei tabata un mandato. Sinembargo, un par di versíkulonan mas promé Moisés a duna nan un otro mandato: “Pa boso por teme SEÑOR boso Dios” (Deut. 6:2, NKJV).

Lesa Deuteronomio 10:12. Kiko e ta bisa den e teksto akí tokante amor i temor, i kon nos ta komprond’é?

Den un versíkulo nan ta ser bisá pa teme Dios, den un otro pa stim’E, i den e versíkulo akí nan ta ser bisá pa tantu tem’E komo stim’E na mes momento. Den e komprondementu komun di e palabra “teme” esaki kisas por parse manera un kontradikshon, pero e no ta. En kambio, e temor di Dios, den sentido di reverensia i rèspèt pa ken E ta, Su outoridat i poder i hustisia i rektitut, spesialmente den kontraste ku nos pekaminosidat, debilidat, i dependensia total riba djE, mester ta un reakshon natural. Nos ta sernan kaí, sernan ku a violá e lei di Dios i ku, si no tabata pa Su grasia, ta meresé kondenashon i morto eterno.

Lesa Efesionan 2:1-10. Kon e versíkulonan akí lo mester yuda nos komprondé kon nos por tantu teme komo stima Dios na mes momento?

Apesar di e echo ku nos tabata “yunan di furia” (kua ta pa kiko nos lo mester tem’E), Kristu a muri pa nos i asina a duna nos bida nobo den djE, kua ta inkluí libertat for di e piká i kondenashon di pasado (kua ta pa kiko nos mester stim’E).

I meskos ku esaki ta bèrdat pa nos awe, e mesun prinsipio akí tabata apliká na Israel antiguo: nan tabata koutivonan na Egipto, kondená na sklabitut i opreshon, i tabata solamente e amor di Dios pa nan i miserikòrdia pa ku nan ku a hiba na nan gran redenshon. “Kòrda ku boso tabata esklabo den e tera di Egipto, i SEÑOR boso Dios a saka boso for di aya” (Deut. 5:15, NKJV). No ta straño, anto, ku nan ta tantu stima komo teme Dios na mes momento. I si nan tabata hasi esei, kuantu mas nos lo mester hasié, teniendo e gran bèrdat di Hesus kende a muri riba e krus pa nos?

Asta meimei di reglanan i regulashonnan den Deuteronomio i tur e amonestashonnan spièrtando e nashon hudiu ku e pueblo mester obedesé “Su mandamentunan, Su huisionan, i Su statutonan”, nan mester a stima Dios mas ku kualke otro kos ku henter nan kurason i alma i forsa. Naturalmente, nan tabatin bon rasonnan pa hasi esei.

Lesa Deuteronomio 4:37; Deuteronomio 7:7,8,13; Deuteronomio 10:15; Deuteronomio 23:5; i Deuteronomio 33:3. Kiko e versíkulonan akí ta siña tokante e amor di Dios pa Su pueblo?

Bes tras bes den Deuteronomio, Moisés a konta e pueblo tokante e amor di Dios pa nan tatanan i pa nan. Pero mas ku solamente palabranan, Señor a revelá e amor akí a traves di Su akshonnan. Es desir, asta apesar di nan defektonan, nan frakasonan, nan pikánan, e amor di Dios pa nan a keda firme, un amor ku a ser manifestá poderosamente den Su trato ku nan.

“Nos ta stim’E pasobra El a stima nos promé” (1 Juan 4:19, NKJV). Kon e teksto akí ta yuda nos komprondé pa kiko nos mester stima Dios?

E amor di Dios pa nos ta promé ku nos eksistensia, den sentido ku e plan di salbashon tabata reglá hopi tempu promé ku “fundashon di mundu”(Efe. 1:4).

Manera Ellen G. White a bis’é: “E plan pa nos redenshon no tabata un idea ku a bin despues, un plan formulá despues di e kaida di Adam. E tabata un revelashon di ‘e misterio kua a ser tené den silensio a traves di tempunan eterno’. Rom. 16:25, R.V. Tabata un manifestashon di e prinsipionan ku for di siglonan eterno tabata e fundeshi di e trono di Dios.” — The Desire of Ages, p. 22.

Kon fortuná nos tur ta ku Dios, enbèrdat, ta un Dios di amor, un amor asina grandi ku El a bai na e krus pa nos, un amor apnegá den kua “El a humiá Su mes i a bira obedesidu te na e punto di morto, asta morto di e krus” (Fil. 2:8, NKJV). Por lo tantu, awe nos tin un revelashon di e amor di Dios pa nos ku e yunan di Israel probablemente ni sikiera por a imaginá nan mes.

Israel, e nashon komo un totalidat, a ser yamá pa stima Dios. Pero esaki tabata algu ku por a sosodé solamente individualmente. Komo un solo ser humano ku a ser duná boluntat liber, kada israelita mester a hasi e eskoho di stima Dios, i nan mester a demostrá e amor ei a traves di obediensia.

Kiko e siguiente tekstonan tin en komun? Es desir, kiko ta e tema komun entre nan?

Deut. 5:10

Deut. 7:9

Deut. 10:12,13

Deut. 11:1

Deut. 19:9

Kuantu mas kla e Palabra di Dios por tabata? Meskos ku Dios no ta bisa solamente ku E ta stima nos sino a revelá e amor ei pa nos pa medio di loke El a hasi i ainda ta hasi, e pueblo di Dios, tambe, mester demostrá nan amor na Dios pa medio di nan akshonnan. I den e tekstonan akí nos ta mira ku amor pa Dios ta konektá di forma inseparabel na obediensia na djE.

Ta p’esei, ora Juan bisa kosnan manera: “Pasobra esaki ta e amor di Dios, ku nos ta warda Su mandamentunan” (1 Juan 5:3, NKJV), òf ora Hesus bisa: “Si boso stima Mi, warda Mi mandamentunan” (Juan 14:15, NKJV), e versíkulonan akí ta simplemente ekspresando e siñansa básiko akí. Amor pa Dios mester ser ekspresá semper mediante obediensia na Dios. Esei semper tabata e kaso, i e lo ta semper. I e obediensia akí na Dios ta nifiká obediensia na Su lei, e Dies Mandamentunan, kua ta inkluí e di kuater mandamentu tambe, e Sabat. Warda e di kuater mandamentu no ta mas legalismo ku warda kualke di e otro nuebe.

Aunke obediensia na kualke di e mandamentunan por ta legalismo, e tipo di obediensia ei no ta ser hasí realmente pa amor pa Dios. Ora nos ta stima Dios berdaderamente, spesialmente pa motibu di loke El a hasi pa nos den Kristu Hesus, nos ke obedes’E, pasobra ta esei ta loke E ta pidi nos pa hasi.

Ora Moisés, bes tras bes, a bisa Israel pa stima i obedesé Dios, el a hasié despues ku nan a ser redimí di Egipto. Es desir, nan amor i obediensia tabata un kontesta riba e redenshon ku Dios a duna nan. Nan a ser redimí pa Señor. Awor nan lo a respondé dor di fielmente obedesé Su mandamentunan. E ta nada diferente awe?

Maske kuantu algun kristian, pa vários motibu, ta trata na separá e Tèstamènt Bieu for di esun Nobo, e no por ser hasí, a lo ménos no sin kita e berdadero nifikashon di e Tèstamènt Nobo. Tèstamènt Nobo, den su revelashon di Hesus i su splikashonnan teológiko di Su bida, morto, resurekshon, i ministerio di Sumo Saserdote, ta mustra na e kumplimentu di hopi di e profesianan i tiponan di Tèstamènt Bieu. Den hopi forma, Tèstamènt Bieu ta forma e trasfondo, e konteksto, e base pa esun Nobo. Tur dos Tèstamènt ta revelá e bondat i amor di Dios.

Esaki ta un rason pa kiko, bes tras bes, Tèstamènt Nobo, inkluyendo Hesus, ta sita esun Bieu.

Lesa Marko 12:28-30. Kiko tabata e pregunta hasí tokante e “promé mandamentu di tur”? Kiko Hesus ta respondé i for di unda E ta haña Su kontesta?

Ta interesante ku un eskriba, un hende ku a dediká su bida na komprondé e lei i kon e mester ser apliká, lo a hasi e pregunta akí. Sinembargo, hopi lei ku kisas nan por a kere ku nan mester a obedesé (mas despues tradishon hudiu a bisa ku tabatin 613 lei), no ta sorprendente ku nan lo tabata ke tur destilá den un pregunta.

I kiko Hesus ta hasi?

E ta bai direktamente na Deuteronomio 6, kuminsando ku e “Tende, o Israel: SEÑOR nos Dios, SEÑOR ta un!” (Deut. 6:4, NKJV), i despues ta sita e siguiente versíkulo tambe, tokante stima Dios ku henter bo kurason, alma, i forsa. El a mustra na e afirmashon klave di Señor komo nan Dios, nan úniko Dios, i basá riba e gran bèrdat ei, nan ta ser yamá pa stim’E supremamente.

Kiko por tabata mas “bèrdat presente” ku e mandato akí? Den e último dianan, ora eventonan final desaroyá i tur hende lo ser yamá pa skohe un banda òf e otro den un forma hopi dramátiko, e mandamentunan di Dios (Rev. 14:12) lo hunga un ròl krusial.

Finalmente, e banda ku nos skohe, asta den kara di persekushon, lo ta basá riba sea nos ta stima Dios berdaderamente òf nò. Esei ta e tema desisivo, i nos por yega na stima Dios ku henter nos kurason i alma i forsa solamente ora nos yega na konos’E pa nos mes i eksperensiá pa nos mes Su bondat, amor, i grasia. Si ta nesesario, esei ta algu pa muri p’e.