E Strañero den Bo Portanan

Deuteronomio 10, un kontinuashon di Deuteronomio 9, ta básikamente e reafirmashon di Dios di e aliansa ku El a sera ku Israel. Enbèrdat, hopi di e buki akí ta un tipo di renobashon di e aliansa. Es desir, asta despues di e teribel piká na Horèb, den kua Moisés no a kaba di bandoná nan pa un poko tempu ku nan a kai den idolatria, Señor ainda no tabata kla ku nan.

Lesa Deuteronomio 10:1-11. Kiko ta pasando aki ku ta yuda nos komprondé ku Dios a pordoná Su pueblo nan piká i tabata reafirmando e promesa di aliansa hasí na nan i nan tatanan?

Moisés a kibra e tablanan di e Dies Mandamentunan (Deut. 9:17), un señal di e aliansa kibrá (Deut. 32:19). “Pa demostrá e asko di nan krímen, el a tira e tablanan di piedra abou, i nan a ser kibrá den bista di henter e pueblo, ku tabata nifiká ku manera nan a kibra nan aliansa ku Dios, asina Dios a kibra Su aliansa ku nan.” — Ellen G. White, Patriarchs and Prophets, p. 320.

Por lo tantu, e echo ku Dios a bisa Moisés pa kòrta tablanan nobo “meskos ku esnan di promé” i E lo a skirbi riba nan e palabranan ku tabatin riba esun promé ta mustra ku Dios a pordoná e pueblo i no tabata kla ku nan, asta e ora ei.

Lesa Deuteronomio 10:14-16. Kiko Dios tabata bisando nan? Kiko ta nifikashon di e imágennan ku Señor a usa aki?

Tin un meskla di imágennan aki: e prepusio, e kurason, e nèk. Sinembargo, e punto ta kla. Sirkumsishon tabata un señal di e aliansa, pero e ta solamente un señal eksterno. Dios tabata ke nan kurason, es desir, nan mente, nan afektonan, nan amor. E imágen di nèk steif tabata mustra na kon tèrko nan tabata den nan falta di boluntat pa obedesé Señor. I, básikamente, aki i otro kaminda, Señor tabata bisando nan pa stòp ku nan lealtatnan dividí i sirbiE ku henter nan kurason i alma.

Meimei di e atvertensianan akí Moisés ta deklará: “Enbèrdat shelu i e shelunan di mas haltu ta pertenesé na SEÑOR bo Dios, tambe tera ku tur loke tin den dje” (Deut. 10:14, NKJV). Ki un ekspreshon poderoso di e soberania di Señor, un idea hañá na otro lugánan den Beibel, tambe: “Tera ta di SEÑOR, i tur su plenitut, mundu i esnan ku ta biba den dje” (Salmo 24:1, NKJV).

Lesa Deuteronomio 10:17-19. Ki otro deklarashon Moisés ta hasi tokante Señor aki, tambe? Ainda mas importante, kiko Dios ta ordená di Su pueblo komo resultado di e deklarashon ei?

Yahweh no ta solamente soberano di shelu i tera, E ta tambe e “Dios di diosnan, i Señor di señornan” (Deut. 10:17). Esaki no ta nifiká ku tin otro diosnan, diosnan menor, manera e supuesto diosnan ku e paganonan rònt di nan tabata adorá. Mas bien, e ta un manera di papia di dje, mas ku ta E so ta e úniko Dios (“Awor mira ku ta Ami, asta Ami, ta E, i no tin niun Dios ademas di Mi” [Deut. 32:39, NKJV]), e ta afirmá Su soberania total riba tur otro podernan, real òf imaginá, sea den shelu òf riba tera.

E teksto ta bisa tambe ku E ta “e gran Dios, poderoso i impreshonante, kende no ta demostrá niun parsialidat ni ta aseptá soborno”. Tur esaki ta parti di e mensahe mas grandi: “Yahweh ta bo Dios, i abo, Su pueblo, mester obedes’E.

Ki un kontraste poderoso ta ser presentá aki tambe. Sí, Yahweh ta e Dios di diosnan i Señor di señornan, e Gobernante soberano i Sostenedó di e kreashon (Kol. 1:16,17), pero tambe E ta preokupá pa e wérfanonan, e biuda, i e strañero, i E ta demostrá e kuido ei dor di ministrá na nan nesesidatnan físiko inmediato. E Dios kende ta tuma nota si un mòfi kai na suela (Mat. 10:29) sa tokante e situashon penoso di esnan marginá di sosiedat. Den otro palabra, Señor ta bisando e pueblo ku, Bon, kisas boso ta skohí, boso ta spesial, i Mi ta stima boso, pero Mi ta stima otronan tambe, inkluyendo esnan den nesesidat i desampará meimei di boso. I meskos ku Mi ta stima nan, boso mester stima nan tambe. Esaki ta un di boso obligashonnan di e aliansa, i un importante tambe.

“P’esei stima e strañero, pasobra boso tabata strañero den e tera di Egipto” (Deut. 10:19, NKJV). Kiko ta e mensahe na Israel antiguo aki? Kiko lo mester ta e mensahe di e versíkulo akí pa nos tambe?

Siglonan promé Señor a bisa Abram: “Sa siguramente ku bo desendientenan lo ta strañeronan den un tera ku no ta di nan, i lo sirbi nan, i nan lo aflihí nan pa shen aña” (Gen. 15:13, NKJV; lesa tambe Gen. 17:8, Echonan 13:17). Esaki ta, naturalmente, loke a sosodé, i den e promé kapítulonan di Eksodo e storia dramátiko di nan redenshon (Eks. 15:13) i salbashon (Eks. 14:13) for di Egipto a ser registrá pa desendensia, un símbolo, un tipo, di e redenshon i salbashon ku nos a ser duná den Kristu Hesus. Den e versíkulo akí, Señor ke pa nan kòrda unda nan tabata i kiko nan tabata, i esei tabata, strañeronan den un otro tera.

Lesa Mateo 7:12. Kon e versíkulo ta kubri loke Señor tabata bisando Israel antiguo tokante kon nan mester a trata esnan débil meimei di nan?

E atvertensia akí na Israel tokante kon nan mester a trata esnan marginá no tabata, di ningun manera, e norma den e mundu antiguo, kaminda den algun kaso esnan marginá por a ser tratá no mihó ku animalnan, òf ainda pió.

Den kontraste, Israel mester tabata diferente, un lus pa e nashonnan. I sí, e diferensia ei lo a ser hañá den e Dios kende nan tabata adorá, kon nan tabata ador’E, i henter e sistema religioso di bèrdat ku Dios a duna nan. Sinembargo, nan trato amabel di esnan marginá por tabata un testimonio poderoso na e mundu di e superioridat di nan Dios i di nan fe, kua den un sentido tabata henter e punto di nan eksistensia, di tur manera, pa ta un testimonio di nan Dios na e mundu.

Komo kreyentenan, nos a ser yamá pa reflehá e karakter di Dios. Pablo a skirbi: “Mi yunan chikitu, pa ken mi a bolbe sufri doló di parto te ora Kristu ser formá den boso” (Gal. 4:19, NKJV). Despues di tur kos, originalmente nos a ser trahá “den imágen di Dios” (Gen. 1:27), un imágen ku despues a ser desfigurá pa piká. I manera nos a mira, ora Moisés a papia tokante e poder i mahestat di Dios, el a bisa tambe ku Dios no a aseptá soborno i ku El a preokupá su mes ku esnan débil i esnan marginá. Dios ta hasi esaki; por lo tantu, nos tambe mester hasi e mesun kos.

Lesa e siguiente tekstonan den Deuteronomio. Kiko ta e tema komun entre nan tur?

Deut. 1:16

Deut. 16:19

Deut. 24:17

Deut. 27:19

Lesa Deuteronomio 24:10-15. Ki prinsipionan importante ta ser ekspresá aki enkuanto di kon nos mester trata esnan ku ta bou di nos kontròl?

Atrobe, nos ta mira e preokupashon di Señor pa dignidat humano básiko. Sí, un hende debe bo algu, i ta tempu pa kobra, pero mustra e hende un poko rèspèt, un tiki dignidat, bon? No bai invadí su lugá i eksigié. En kambio, warda pafó i lag’é bin i duna bo e. Deuteronomio 24:12,13 parse ta bisa ku si un alma pober a duna bo su bistí komo “garantia”, bo mester a lo ménos lag’é drumi den dje durante anochi. E otro versíkulonan ta trata ku kon trata esnan pober ku ta traha p’e, ku por ser oprimí asina fásil. No oprimí nan, pasobra den bista di Dios e ta un piká, i siguramente un grave tambe. Atrobe, si Israel mester tabata un testimonio, un pueblo santu ku ta kana den bèrdat meimei di un mundu saturá di eror, idolatria, maldat, i piká, siguramente nan lo mester tabata amabel ku esnan mas débil i marginá entre nan. Di otro manera, nan testimonio lo tabata nada.

Lesa Santiago 1:27-2:11. Kiko Santiago ta bisando aki ku ta reflehá loke Señor tabata bisando Su pueblo den Deuteronomio? Ki nifikashon tin den e echo ku den e versíkulonan akí Santiago ta konektá maltrato di esnan pober ku e Dies Mandamentunan?

Aunke nada den e Dies Mandamentunan mes ta relashoná direktamente ku mustra parsialidat na esnan riku riba esnan pober, tene estriktamente na e lèter di e lei miéntras na mes momento maltratá esnan pober òf den nesesidat ta hasi burla di un hende su profeshon di fe i kualke pretenshon di warda e mandamentunan. Stima bo próhimo manera bo mes ta e ekspreshon di mas haltu di e lei di Dios, i esaki ta bèrdat presente mes tantu awor komo e tabata den tempu di Santiago, i manera e tabata ora Moisés a papia ku Israel riba e fronteranan di e Tera Santu.