Pasobra Ki Nashon Tin asina Grandi?

Lesa Deuteronomio 4:1,2. Kiko tabata e spièrtamentu spesífiko ku Señor a duna nan respekto Su “statutonan i huisionan”, i dikon esaki lo tabata algu ku nan ta ser spièrtá mesora di dje? (Lesa tambe Deut. 12:32)

Señor ta bisa nan pa obedesé e “statutonan i huisionan” i pa no añadí òf kita for di nan. Dikon bisa esei? Despues di tur kos, pakiko kualke hende lo ke kambia e lei di Dios?

Nos sa e kontesta, naturalmente.

“Satanas tabata perseverante i inkansabel den su esfuersonan pa prosiguí e obra ku el a kuminsá den shelu, pa kambia e lei di Dios. El a logra laga e mundu kere e teoria ku el a presentá den shelu promé ku su kaida, ku e lei di Dios tabata defektuoso, i tabatin mester di revishon. Un parti grandi di e iglesia kristian profesá, pa nan aktitut, si no ta pa nan palabranan, ta mustra ku nan a aseptá e mesun eror.” — Ellen G. White, Selected Messages, Buki 2, p. 107.

Ora bo pensa riba e historia di Israel antiguo, bo ta mira ku den hopi forma nan a haña nan mes den problema pasobra no solamente nan tabata ignorá sierto preseptonan di e lei, kua pa tur propósitonan práktiko a ser kitá for di e lei, sino nan tabata añadí na dje, den sentido di introdusí práktikanan ku no tabata spesifiká den e lei i ku, de echo, a hiba finalmente na kibr’é.

Lesa Mateo 15:1-9. Kon nos ta mira un ehèmpel aki di e prinsipio ku, aunke den un otro konteksto, Moisés a spièrta e yunan di Israel di dje?

Ora e hebreonan finalmente a haña e tera primintí na nan, hopi biaha nan tabata ignorá e atvertensianan direkto tokante, por ehèmpel, idolatria. Komo resultado, nan a sigui hopi práktikanan pagano, tin biaha asta komo parti di nan supuesto adorashon na Yahweh. Pa tempu di Hesus, sinembargo, nan a añadí tur sorto di tradishonnan humano ku, manera Hesus Mes a bisa, a hasi “e mandamentu di Dios di ningun efekto”.

Di kualke manera, añadiendo òf kitando, e lei a ser kambiá, i e nashon a sufri e konsekuensianan.

Den Deuteronomio 4:3,4, e yuna di Israel ta ser duná un tiki mas di un lès di historia, pa funshoná komo un rekordatorio di pasado i kualke bèrdatnan spiritual i práktiko ku posiblemente nan mester siña di dje.

Lesa Numbernan 25:1-15. Kiko a sosodé, i ki bèrdatnan spiritual i práktiko e pueblo lo mester a saka for di e frakaso akí?

Maske kon inkonfortabel nos ta ku e storianan di kon Israel a eliminá algun di e nashonnan pagano rònt di nan kompletamente, e relato akí siguramente ta yuda splika e lógika tras di e mandato. Israel mester tabata un testigo di e Dios berdadero, e úniko Dios, na e nashonnan pagano. Nan mester tabata un ehèmpel pa mustra kon adorashon na e berdadero Dios tabata. En kambio, dor di tene duru na e “diosnan” pagano rònt di nan, hopi biaha nan a kai den rebelion habrí kontra e mesun Dios kende nan mester a representá na e mundu.

Aunke e frase “kometé prostitushon” hopi biaha tin un nifikashon spiritual, den sentido ku Israel a bai tras di diosnan i práktikanan pagano (lesa Os. 4:12-14), den e kaso akí e lenguahe (i restu di e storia) ta sugerí ku tabatin pekamentu seksual, a lo ménos na prinsipio. Aki atrobe, Satanas a probechá di naturalesa humano kaí, usando e muhénan pagano pa sedusí e hòmbernan, ku opviamente a permití nan mes pa ser sedusí.

Sin duda, e akto di prostitushon físiko a degenerá den prostitushon spiritual tambe. E personanan enbolbí finalmente a keda atrapá den práktikanan di adorashon pagano den kua Israel tabata “uní ku Baal Peor”; es desir, di algun manera nan a pega na e dios falsu akí i asta a sakrifiká na dje. Apesar di tur kos ku nan a ser siñá i bisá, nan tabata dispuesto na tira tur afó den e kayente di pashon i plaser karnal.

Kon esaki por a pasa? Fásilmente. Ora nan a hasi nan konsenshi duru ku e promé piká, esun físiko, nan tabata hechu pa kai den esun último, esun spiritual, kua mester tabata e meta final di Satanas. Nan a bira asina degradá ku, di akuerdo ku e teksto, un hòmber a trese su muhé madianita direktamente den e kampamentu mes, hustamente dilanti di Moisés, i dilanti di e pueblo ku tabata yorando pafó di e tabernakel.

Míles a muri den piká ku Baal Peor. “Tur e hòmbernan ku a sigui Baal peor” a ser destruí. Sinembargo, hopi no a sigui den apostasia.

Ken nan tabata?

“Ma boso ku a keda fiel na SEÑOR boso Dios ta na bida, kada un di boso, te awe” (Deut. 4:4). Kon e teksto akí ta splika e diferensia entre esnan ku a kai den piká i esnan ku no a hasi esei? Kiko ta e mensahe importante pa nos aki enkuanto di piká i tentashon i e poder di Dios den nos bida?

Nota e kontraste entre e palabra “tur” den e versíkulo akí i e versíkulo anterior. “Tur” ku a sigui tras di Baal Peor a ser destruí; ma “kada un di boso” ku a keda fiel na Señor tabata na bida. No tabatin kaminda intermedio e tempu ei, i no tin niun aworakí tampoko. Sea nos ta pro òf kontra Hesus (Mat. 12:30).

E palabra hebreo pa “keda fiel”, dbq, hopi biaha ta indiká un kompromiso fuerte pa pega na algu pafó di bo mes. E mesun palabra rais hebreo ta ser usá den Génesis 2:24, ora un hòmber lo bandoná su famia i “uni” ku su esposa (lesa tambe Ruth 1:14). Den e konteksto akí el a aparesé kuater biaha mas den Deuteronomio (Deut. 10:20, Deut. 11:22, Deut. 13:4, Deut. 30:20), i den kada kaso e idea tabata meskos: nan, e pueblo, mester a keda fiel (tene duru) na nan Dios. Es desir, nan mester a duna nan mes na djE i haña poder i forsa di djE.

Loke ta importante pa kòrda ta ku e pueblo mes ta e suheto di e verbo: nan mester keda fiel. Nan mester hasi e eskoho di “keda fiel” na Dios i e ora ei, den Su poder i forsa, evitá di kai den piká.

Lesa Hudas 24 i 1 Korintionan 10:13. Kiko ta ser bisá aki den Tèstamènt Nobo, ku ta ser haña tambe den Deuteronomio 13:4?

Dios ta fiel; Dios ta kapas pa evitá ku nos ta kai. Pero nos tin ku hasi e eskoho konsiente, manera esnan fiel a hasi na Baal Peor, pa tene duru na Dios. Si ta asina, e ora ei nos por ta sigur ku, loke sea ta e tentashon, nos por permanesé fiel.

Loke ta sigui den e siguiente par di versíkulonan despues di Deuteronomio 4:4 ta algun di e tekstonan di mas profundo i bunita den henter Skritura (na hebreo e ta magnífiko!). Hende por argumentá ku, den esensia, e mensahe di Deuteronomio ta ser hañá aki mes, i tur sobrá kos ta komentario. Segun ku bo ta lesa e tekstonan akí, pensa riba vários forma ku e prinsipio akinan por ser apliká tambe na nos awe.

Lesa Deuteronomio 4:5-9. Dikon Señor, a traves di Moisés, lo a bisa loke El a bisa aki na Israel?

Señor ke pa Su pueblo realisá ku nan a ser yamá, skohé, pa un motibu spesial. Nan ta un “gran” nashon, meskos ku Dios a bisa Abram for di e promé yamada pa sali for di e kaldeonan ku: “lo Mi hasi bo un gran nashon” (Gen. 12:2, NKJV; lesa tambe Gen. 18:18).

Pero e propósito di hasi nan grandi tabata pa nan por tabata un “bendishon” (Gen. 12:2) pa “tur e famianan di tera” (Gen. 12:3, NKJV). I aunke e bendishon máksimo lo tabata ku Hesus, e Mesias, lo a bin a traves di nan liña di sanger, te na e ora ei nan mester tabata e lus di mundu. “I tambe lo Mi duna Bo komo un lus na e Paganonan, pa Bo ta Mi salbashon te na e finnan di tera” (Isa. 49:6, NKJV). No ku salbashon tabata ser hañá den nan, sino ku, a traves di nan, e berdadero Dios, kende E so por salba, mester a ser revelá.

Israel tabata adorando i sirbiendo e Dios kende a krea e kòsmòs, e Señor di shelu i tera; e paganonan tabata adorando barankanan, piedranan, palu, i demoñonan (Deut. 32:17, Salmo 106:37).

Ki un diferensia rígido!

Den e versíkulonan akí, Moisés a señalá dos kos ku tabata hasi Israel spesial. Na promé lugá, Señor tabata serka di nan, manera E tabata den un forma úniko manera a traves di e santuario, i na di dos lugá, pa motibu di e “statutonan i huisionan hustu manera tin den henter e lei akí” (Deut. 4:8, NKJV).

Lesa Deuteronomio 4:32-35. Kiko mas Señor tabata bisando nan ku mester a pone nan realisá ki un yamada spesial a ser duná na nan?

Deuteronomy 4:1-9, manera nos a mira, tabata un ekspreshon poderoso di no solamente e status spesial di e nashon sino tambe di su yamada mishonero. Mesklá den tur e versíkulonan ei tin e idea ku nan mester obedesé, sigui, hasi loke Señor a ordená nan pa hasi.

Bolbe lesa Deuteronomio 4:6. Kiko Señor ta bisa spesífikamente ku ta nan “sabiduria” i “komprondementu” den bista di e nashonnan akí?

Na promé bista lo por a parse manera kos ku e statutonan i huisionan mes tabata loke tabata kontené e sabiduria i komprondementu. Pero esei no ta loke e teksto ta bisa. Señor a siña nan statutonan i huisionan, sí; pero nan sabiduria i komprondementu tabata bin di ora nan warda nan, di ora nan obedesé nan. Nan obediensia, esei tabata nan sabiduria i komprondementu.

Israel por tabatin e sistema di lei i reglanan i regulashonnan di mas maravioso ku mundu a yega di mira (de echo, el a hasié), pero di kiko e lo a sirbi si Israel no a sigui nan? En kambio, nan sabiduria, nan komprondementu, tabata bin di e manifestashon di tempu real di e leinan di Dios den nan bida. Nan mester a biba e bèrdatnan ku Señor a duna nan, i nan por a hasi esei solamente dor di obedesé nan. Tur e lus i tur e bèrdat no tabata bai hasi nan òf e paganonan rònt di nan niun bon si Israel no a biba e bèrdat ei. P’esei, bes tras bes nan ta ser yamá pa obedesé, pasobra nan obediensia na e statutonan i huisionan, no e statutonan i huisionan mes, tabata loke tabata importá, den términonan di ta un testimonio na e mundu.

“Nan obediensia na e lei di Dios lo a hasi nan maravianan di prosperidat dilanti di e nashonnan di mundu. E ku por a duna nan sabiduria i abilidat den tur obra artesanal lo a sigui ta nan maestro, i lo a honra i elevá nan pa medio di obediensia na Su leinan. Si nan tabata obediente, nan lo a ser preservá di e enfermedatnan ku tabata aflihí otro nashonnan i lo a ser bendishoná ku vigor di intelekto. E gloria di Dios, Su mahestat i poder, mester a ser revelá den tur nan prosperidat. Nan mester tabata un reino di saserdotenan i prensnan. Dios a proveé nan ku tur fasilidat pa bira e nashon di mas grandi riba tera.” — Ellen G. White, Christ’s Object Lessons, p. 288.

Lesa Mateo 5:13-16. Den e versíkulonan akí, kiko Hesus ta bisando nos ku ta reflehá e mesun kos ku El a bisa Israel antiguo? Kon, spesialmente, esaki lo mester apliká na nos komo atventistanan di e di shete dia?