Lei i Grasia

Dios ta un Dios di amor, i amor ta e prinsipio fundamental di Su karakter i e fundeshi di Su gobièrnu. I pasobra Dios ke pa nos stim’E bèk, El a krea nos komo kriaturanan moral ku libertat moral, e libertat inherente na amor.

I sentral na e idea di libertat moral tin lei moral. Partíkulanan supatómiko, olanan di oséano, kángarunan, aunke te na sierto grado nan ta sigui lei natural, nan no ta sigui òf tin mester di lei moral. Solamente sernan moral ta hasi esei, kua ta pakiko asta den shelu tin un lei moral pa e angelnan.

Lesa Ezekiel 28:15,16, kua ta papia tokante e kaida di Lucifer den shelu. “Inikidat” a ser hañá den dje, i tambe “el a peka”. Kiko e uso di e palabranan akinan, den konteksto di shelu, ta revelá tokante eksistensia di lei moral den shelu?

Tantu “inikidat” komo “a peka” ta palabranan usá aki entre nos sernan humano. Pero Skritura a usa e mesun términonan pa loke a sosodé den shelu, den un otro parti di e kreashon mes. Esaki mester bisa nos algu tokante loke ta eksistí den shelu, komo tambe riba tera.

“Kiko nos lo bisa anto? Lei ta piká? Siguramente nò! Al kontrario, lo mi no a konosé piká eksepto a traves di lei. Pasobra lo mi no a konosé kudishi a ménos ku e lei a bisa: ‘Lo bo no kudishá’” (Rom. 7:7, NKJV). Kon e mesun idea, a lo ménos den prinsipio, lo por a eksistí den shelu, kaminda sernan moral, angelnan, tambe ta eksistí?

Manera Ellen G. White ta splika: “E boluntat di Dios ta ser ekspresá den e preseptonan di Su lei santu, i e prinsipionan di e lei akí ta e prinsipionan di shelu. E angelnan di shelu no ta alkansá ningun konosementu mas haltu ku di konosé e boluntat di Dios, i hasi Su boluntat ta e servisio di mas haltu ku por okupá nan podernan.” — Thoughts From the Mount of Blessing, p. 109.

Shelu, tera, no ta importá: si Dios tin sernan moral, E lo tin un lei moral pa goberná nan, i violashon di e lei ei, den shelu òf riba tera, ta piká.

E nashon hebreo na e frontera di Kanaan, e pueblo skohí di Dios, finalmente ta na punto di heredá e tera ku Dios a primintí nan. I, manera nos a mira, Deuteronomio ta e instrukshonnan final di Moises na e hebreonan promé ku nan ta okupá e tera. I entre e instrukshonnan ei tabatin e mandamentunan pa obedesé.

Lesa e siguiente tekstonan. Ki punto ta ser ekspresá bes tras bes tras bes atrobe, i dikon e punto akí ta asina importante pa e pueblo? (Deut. 4:44, Deut. 17:19, Deut. 28:58, Deut. 30:10, Deut. 31:12, Deut. 32:46, Deut. 33:2).

Asta e lesamentu di mas superfisial di e buki di Deuteronomio ta mustra kon krusial obediensia na e lei tabata pa e nashon di Israel. Den un sentido real, e tabata e obligashon di pakto di e pueblo. Dios a hasi asina tantu pa nan i lo a sigui hasi asina tantu pa nan, kosnan ku nan no por a hasi pa nan mes i ku nan no tabata meresé, pa kuminsá (kua ta loke grasia ta, Dios dunando nos loke nos no meresé). I loke El a pidi komo kontesta tabata, bon, obediensia na Su lei.

No ta diferente awor. E grasia di Dios ta salba nos, lòs for di e obranan di lei: “P’esei nos ta konkluí ku un hende ta hustifiká pa medio di fe, lòs for di e obranan di lei” (Rom. 3:28, NKJV), i nos kontesta ta obediensia na e lei. Nos ta obedesé e lei, sinembargo, no den un intento bano pa ser salbá dor di dje, “p’esei pa medio di e obranan di lei niun karni lo ser hustifiká den Su bista, pasobra pa medio di e lei tin konosementu di piká” (Rom. 3:20, NKJV), ma komo resultado di e salbashon ku nos a ser duná ku tantu grasia. “Si boso stima Mi, warda Mi mandamentunan” (Juan 14:15, NKJV).

Deuteronomio lo por a ser mirá komo un gran lès ophetivo den grasia i lei. Pa medio di grasia Dios ta redimí nos, hasiendo pa nos loke nos no por a hasi pa nos mes (komo tampoko Israel por a skapa for di Egipto pa nan mes), i komo kontesta nos ta biba, pa medio di fe, un bida di obediensia na djE i na Su lei. For di e kaida di Adam en adelante, te na esnan ku ta biba a lo largu di e tempu di angustia i e marka di e bestia, un pueblo deskribí komo esnan “ku ta warda e mandamentunan di Dios i e fe di Hesus” (Rev. 14:12, NKJV), e relashon di Dios ku Su pueblo di e pakto ta un di lei i grasia. E grasia di Dios ta pordoná nos pa a violá Su lei, i e grasia di Dios ta kapasitá nos pa obedesé Su lei tambe, un obediensia ku ta surgi for di un relashon di pakto kunE.

Sínikonan, esnan ku ta buska rasonnan pa rechasá e Beibel, hopi bia ta señalá algun palabra fuerte di Dios ku ta aparesé den Tèstamènt Bieu. E idea ta ku e Dios di Tèstamènt Bieu tabata severo, vengativo, i kruel, spesialmente den kontraste ku Hesus. Esaki no ta un argumento nobo, pero e ta mes defektuoso awor ku e tabata ora el a ser promové hopi siglo pasá.

Bes tras bes, Tèstamènt Bieu ta presentá Señor komo stimando Su pueblo antiguo Israel i deseando solamente loke tabata lo mihó pa nan. I e amor akí ta aparesé poderosamente den e buki di Deuteronomio.

Lesa Deuteronomio 10:1-15. Kiko ta e konteksto inmediato di e versíkulonan akí, i kiko nan ta siña nos tokante kon Dios tabata sinti pa ku Su pueblo, asta despues di nan piká? Kiko nan ta siña nos, en realidat, tokante grasia?

E grasia i amor di Dios pa Israel ta evidensiá for di e tekstonan akí. Nota, partikularmente, versíkulonan 12 i 13. Nan ta realmente un frase largu, un pregunta, i e pregunta ta simpel: Kiko Ami, Señor, ta pidiendo bo pa hasi sino lo siguiente ... kana den Mi kamindanan, stima Mi, sirbi Mi, i warda Mi statutonan pa bo mes bon?

Den henter hebreo den e versíkulo akí e palabra pa “bo” ta den singular. Aunke Dios siguramente ta papiando ku e nashon komo un totalidat, ki bon Su palabranan lo hasi si e pueblo, kada un individualmente, no ta obedesé nan? E totalidat ta solamente mes bon ku e total di e partinan. Señor tabata papiando unu unu, individualmente, ku Israel komo un nashon.

Nos no por lubidá tampoko e final di versíkulo 13: warda e kosnan akí letov lak, es desir, “pa bo bon”. Den otro palabra, Dios ta ordenando e pueblo pa obedesé pasobra ta den nan mihó interes pa hasi esei. Dios a traha nan, Dios ta sostené nan, Dios sa kiko ta mihó pa nan, i E ke loke ta mihó pa nan. Obediensia na Su lei, na Su Dies Mandamentunan, por obra solamente pa nan benefishi.

E lei hopi bia a ser kompará ku un kurá, un muraya di protekshon, i dor di keda paden di e muraya ei, Su siguidónan ta protehá di un seri di maldatnan ku, di otro manera, lo a alkansá i destruí nan. Den resúmen, pa amor pa Su pueblo, Dios a duna nan Su lei, i obediensia na Su lei lo tabata “pa bo bon”.

Den e buki di Deuteronomio tin un tema ku ta aparesé i ta bolbe aparesé: esun di Señor ku a redimí Su pueblo Israel for di e tera di Egipto. Bes tras bes nan ta ser rekordá di loke Dios a hasi pa nan: “Asina SEÑOR a saka nos for di Egipto ku un man poderoso i ku un brasa ekstendé, ku gran teror i ku señalnan i maravianan” (Deut. 26:8, NKJV; lesa tambe Deut. 16:1-6).

A lo largu di Tèstamènt Bieu, de echo, e storia di e Eksodo a ser referí na dje komo un ehèmpel di e liberashon poderoso di Dios, pa medio di Su grasia, for di e sklabitut i opreshon di Egipto: “Pasobra Mi a saka boso for di Egipto, Mi a redimí boso for di e kas di sklabitut” (Mik. 6:4, NKJV).

Asta den Tèstamènt Nobo e idea akí ta aparesé, huntu ku e Eksodo di Egipto pa medio di e gran poder di Dios komo un símbolo di salbashon pa medio di fe den Kristu: “Pa medio di fe nan a pasa dor di e Laman Kòrá manera dor di tera seku, miéntras e egipsionan, intentando di hasi meskos, a hoga (Hebr. 11:29, NKJV; lesa tambe 1 Kor. 10:1-4).

Lesa Deuteronomio 5:6-22, kaminda Moisés ta ripití e lei, e Dies Mandamentunan, e stipulashon fundamental di nan aliansa ku Yahweh. Tuma nota di e di kuater mandamentu i e rason duná aki p’e. Kiko ta ser bisá aki ku ta revelá e realidat di lei i grasia?

Moisés ta ripití e mandamentu básiko di sosegá riba e Sabat di e di shete dia, ma e ta duna un énfasis adishonal. Es desir, aunke el a ser skirbí den piedra den Eksodo, aki Moisés ta ekspandiendo riba loke ya a ser duná na nan.Warda e Sabat, no solamente komo un konmemorativo di kreashon, sino komo un konmemorashon di redenshon for di Egipto. E grasia di Dios a salba nan for di Egipto i a ofresé nan sosiegu for di nan trabounan (Hebr. 4:1-5). Awor, den kontesta na e grasia ku Dios a duna nan, nan mester a ekstendé e grasia ei na otronan.

Den e kaso akí, anto, e Sabat di e di shete dia ta bira no solamente un símbolo poderoso di kreashon, sino un símbolo poderoso di redenshon i grasia. Tur hende den e kas, no solamente e yunan, sino e sirbidónan, e animalnan, i asta e strañeronan meimei di nan, por sosegá. E Sabat ta ekstendé e grasia duná na e hudiunan na otronan tambe, asta na esnan pafó di e pueblo di pakto mes. I e ta ser hañá den kurason di e lei di Dios. Loke Dios a hasi yen di miserikòrdia pa nan, nan mester hasi pa otronan. Ta asina simpel.

Sentral na e religion kristian, na tur religion bíbliko, en realidat, tin e gran tema di hustifikashon pa fe so. “Pasobra kiko Skritura ta bisa? ‘I Abraham a kere Dios i esaki a wòrdu kontá komo hustisia p'e’ ” (Rom. 4:3).

Ellen G. White, di forma sélebre, a ekspres’é asin’aki: “Kiko ta hustifikashon pa fe? Ta e obra di Dios di pone e gloria di hende den stòf, i hasi pa hende e loke no ta den su poder pa hasi pa su mes. Ora hende mira nan propio bashí, nan ta prepará pa ser bistí ku e hustisia di Kristu.” — The Faith I Live By, p. 111.

Sin duda, ora bo konsiderá ken Dios ta, i kon santu E ta, den kontraste ku ken nos ta, i kon profano nos ta den kontraste kunE, lo mester a tuma un akto maravioso di grasia pa salba nos. I asina tabata: e akto di grasia ei a tuma lugá na e krus, ora Kristu, esun inosente, a muri pa e pikánan di esnan kulpabel.

Ku e konteksto akí den mente, lesa Deuteronomio 9:1-6. Kiko Moisés ta bisando e pueblo aki ku ta revelá den un forma dramátiko e realidat di e grasia di Dios pa esnan indigno? Kon loke a sosodé aki ta reflehá e prinsipio di hustifikashon pa fe?

Si bo por a resumí e siñansa di Pablo riba e evangelio, kisas e por a ser hañá den e frase di Deut. 9:5, “no pa motibu di bo hustisia òf e rektitut di bo kurason” (NKJV) Dios ta bai salba bo. En kambio, E ta bai hasi esei pa motibu di e promesanan di e “evangelio eterno” (Rev. 14:6), un promesa duná na nos “no di akuerdo ku nos obranan, sino di akuerdo ku Su mes propósito i grasia kua a ser duná na nos den Kristu Hesus promé ku tempu a kuminsá” (2 Tim. 1:9, NKJV; lesa tambe Tito 1:2). Si e promesa a ser duná na nos “promé ku tempu a kuminsá”, siguramente e no por tabata di nos obranan pasobra nos ni sikiera tabata eksistí “promé ku tempu a kuminsá”, i pues no tabatin obranan.

Pa resumí, apesar di bo faltanan, bo defektonan, bo terkedat, Señor ta bai hasi e obra maravioso akí pa bo i den bo. Por lo tantu, komo resultado, Señor ta ordená bo pa obedes’E i Su leinan. E promesa ya a ser duná, i kumplí: bo obranan, bo obediensia, asta si nan tabata sufisiente bon (kua nan no ta), no ta e medionan di bo salbashon. Nan ta, en kambio, e resultado.

Señor a salba bo pa grasia; awor, ku Su lei skirbí den bo kurason i Su spiritu dunando bo poder, bai i obedesé Su lei.