Skohe Bida

Nos niun a pidi pa ta aki, bèrdat? Nos no a skohe pa bin den eksistensia meskos ku nos no a skohe unda i ki ora nos a nase i ken nos mayornan tabata.

Tabata meskos ku Adam i Eva. Nan tampoko a skohe pa ser kreá pa Dios, meskos ku un blachi, un piedra, un seru. Komo sernan humano, nos a ser duná no solamente eksistensia (un piedra tin eksistensia), i no solamente bida (un amoeba tin bida), sino bida komo sernan rashonal liber trahá den imágen di Dios.

Pero nos no a skohe pa bin den eksistensia komo sernan rashonal liber trahá den imágen di Dios tampoko. Loke Dios ta ofresé nos, sinembargo, ta e eskoho di permanesé den eksistensia; es desir, skohe pa tin bida, bida eterno, den djE, kua ta loke nos por tin pa motibu di Hesus i Su morto riba e krus.

Lesa Génesis 2:8,9,15-17 i Génesis 3:22,23. Ki dos opshon Dios a presentá na Adam enkuanto di su eksistensia?

“Meimei di Eden tabata krese e palu di bida, kua su fruta tabatin e poder di perpetuá bida. Si Adam a keda obedesidu na Dios, e lo a sigui gosa di akseso liber na e palu akí i lo a biba pa semper. Pero ora el a peka el a ser privá di partisipá di e palu di bida, i el a bira suheto na morto. E sentensia divino, ‘Stòf bo ta, i na stòf lo bo bolbe’, ta señalá e ekstinshon kompletu di bida.” — Ellen G. White, The Great Controversy>, p. 532, 533.

Pues, for di komienso, Beibel ta presentá nos djis ún di dos opshon: bida eterno, kua ta loke nos tabata suponé di tin originalmente, i morto eterno, kua den un sentido ta simplemente bai bèk na e nada for di kua nos a bin na prinsipio.

Ta interesante, tambe, kon e “palu di bida”, kua Skritura ta bisa ta duna inmortalidat, i ku pa promé bia ta aparesé den e promé buki di Beibel, ta bolbe aparesé den e último buki. Lesa Revelashon 2:7 i Revelashon 22:2,14. Kisas e mensahe ta ku aunke nos ta suponé di tin akseso na e palu di bida, debí na piká nos a pèrdè e akseso ei; despues, na final, unabes e problema di piká a terminá finalmente i kompletamente, danki na Hesus i e plan di salbashon, esnan redimí, esnan ku a skohe bida, lo tin akseso na e palu di bida manera nos tabata suponé di tin for di prinsipio.

Atraves di Beibel, un for di dos opshon ta ser presentá na nos. Akin dos opshon ta ser presentá na nos.

Lesa e siguiente tekstonan . Kua dos opshon, kua dos eskoho sea ta ser ekspresá abiertamente aki òf ta ser impliká den e tekstonan aki i kon e opshonnan aki ta ser presentá?

Juan 3:16

Gen. 7:22,23

Rom. 6:23

Rom. 8:6

1 Juan 5:12

Mat. 7:24-27

Na final lo no tin un término medio pa nos komo sernan humano. Promé ku e gran konflikto terminá kompletamente, piká, Satanas, maldat, desobedensia, i rebelion lo ser eliminá. Despues ku esei sosodé, kada un di nos, individualmente, lo sea tin e bida, e bida eterno, ku Dios originalmente a plania pa nos tur tin promé ku kreashon di e mundu, òf nos lo enfrentá morto eterno, kual ta, "destrukshon eterno for di e presensia di Señor i di e gloria di Su poder" (2 Tes. 1:9). E Beibel no ta parse di presentá ningun otro opshon na nos.

Kua lo ta nos destino? E kontesta ei, finalmente ta sintá serka nos mes. Nos tin e eskoho nos dilanti, bida òf morto.

Den final di e buki di Deuteronomio, despues di un diskurso largu riba loke lo sosodé ku e pueblo si nan desobedesé Señor i violá e promesanan di e aliansa, Deuteronomio 30 ta kuminsá ku un promesa ku asta si nan a kai den desobedensia i a ser kastigá ku eksilio, Dios, no opstante, lo a restourá nan na e tera.

Es desir, si nan a arepentí i a bira bèk for di nan mal kamindanan.

Lesa Deuteronomio 30:15-20. Kiko ta e opshonnan presentá na Israel antiguo aki, i kon e opshonnan akí ta reflehá loke nos a mira a lo largu di henter Beibel?

Señor ta hopi kla; E, Yahweh, a pone nan dilanti ún di dos opshon, básikamente loke El a hasi ku Adam i Eva den Eden. De echo, e palabranan hebreo pa "bon" (tov) i "maldat" (ra‘) den Deuteronomio 30:15 ta e mesun palabranan hebreo usá den Génesis pa e palu di konosementu di "bon" (tov) i "malu" (ra‘). Aki, manera den henter Beibel, no tin un término medio, ni un lugá neutral pa ta. Sea nan lo sirbi Señor i tin bida, òf nan lo skohe morto. E ta mesun kos pa nos tambe.

Bida, bon, bendishon, den kontraste ku kiko? Morto, maldat, i maldishonnan. Na final, sinembargo, un hende por argumentá korektamente ku Dios realmente ta ofresé nan solamente e bon, solamente bida, i solamente bendishonnan. Pero si nan apartá for di djE, e kosnan malu akí lo ta e resultado natural, pasobra nan no tin Su protekshon spesial mas.

Kon ku nos komprondé esaki, e pueblo ta ser presentá ku e opshonnan akí. E ta hopi kla tambe, e realidat di nan boluntat liber, nan eskohonan liber. E versíkulonan akí, huntu ku asina tantu mas di e Beibel, Tèstamènt Bieu i Nobo, no tin sentido sin e regalo sagrado di boluntat liber, eskoho liber.

Den un sentido real, Señor a bisa nan: P'esei, ku e boluntat liber ku Mi a duna boso, skohe bida, skohe bendishon, skohe bondat, no morto, maldat i maldishonnan.

Ta parse asina opvio kiko e eskoho korekto lo tabata, bèrdat? I tòg, nos sa kiko a sosodé. E gran konflikto tabata mes real e tempu ei ku e ta awor, i nos mester siña di e ehèmpel di Israel kiko por sosodé si nos no duna nos mes kompletamente na Señor i skohe bida i tur loke e eskoho akí ta enserá.

Deuteronomio 30 ta kuminsá ku Señor bisando kiko lo a sosodé si e pueblo lo a arepentí i lo a apartá di nan mal kamindanan. Ki promesanan maravioso a ser ofresé nan nan tambe!

Lesa Deuteronomio 30:1-10. Kiko ta e promesanan ku Dios a duna nan, asta apesar di e echo ku esaki ta papia tokante kiko lo a sosodé ku nan si nan lo a desobedesé? Kiko esaki ta siña nos tokante e grasia di Dios?

Esei seguramente tabata trankilisante pa tende. Sinembargo, e punto no tabata ku no ta importá si nan bira lomba for di loke Dios a ordená. Señor no ta ofresé ningun hende grasia barata. Al kontrario, e mester a mustra nan e amor di Dios i, por lo tantu, komo kontesta, nan lo a stim'E bèk, revelando nan amor dor di ta obedesidu na loke El a bisa nan hasi.

Lesa Deuteronomio 30:11-14. Kiko Señor ta bisando nan ei? Kiko ta e promesa básiko den e versíkulonan aki, i ki tekstonan di Tèstamènt Nobo bo por pensa riba dje ku ta reflehá e mesun promesa?

Ku e bunita lenguahe aki i lógika inkuestionabel, wak e apelashon aki. Señor no ta pidiendo nan nada demasiado difísil pa hasi. E mandato di Dios no ta demasiado "difísil" òf "misterioso" pa nan komprondé. Tampoko e ta demasiado leu for di nan alkanse pa logra. E no ta te ariba den shelu, asina leu ku ta un otro hende mester koh'é pa nan; tampoko e ta na otro banda di laman, asina ku ta otro hende mester tres'é pa nan. En kambio, Señor ta bisa: "Ma e palabra ta masha serka di bo, den bo boka i den bo kurason, pa bo por hasié" (Deut. 30:14, NKJV). Es desir, bo konos'é sufisiente bon pa ta kapas di papi'é, i e ta den bo kurason pa asina bo sa ku bo mester hasié. P'esei no tin esküs pa no obedesé. "Tur Su mandatonan ta posibel." - Ellen G. White, Christ's Object Lessons, p. 333.

De echo, apòstel Pablo ta sita algun di e versíkulonan akí den konteksto di salbashon den Kristu; es desir, Pablo ta referí na nan komo un ehèmpel di hustifikashon pa fe. (Lesa Rom. 10:6-10.)

I despues, despues di e versíkulonan akí den Deuteronomio, ta bisa e yunan di Israel, sí, pa skohe bida òf morto, bendishon òf maldishon. I si, pa grasia i pa fe, nan skohe bida, nan lo tin esaki.

Esaki no ta diferente awe, bèrdat?

Adorashon tabata sentral na e relashon di aliansa entre Señor i Israel. Loke tabata hasi e israelitanan diferente for di e mundu rònt di nan tabata ku solamente nan komo nashon tabata adorando e Dios berdadero, kontrali na e diosnan i diosanan falsu di e mundu pagano, kua realmente no tabata diosnan ètòl. "Mira awor ku ta Ami, asta Ami, ta E, i no tin ningun dios ademas di Mi" (Deut. 32:39, NKJV).

Lesa Deuteronomio 4:19, Deuteronomio 8:19, Deuteronomio 11:16, i Deuteronomio 30:17. Kiko ta e spièrtamentu komun den tur e versíkulonan akí? Dikon e spièrtamentu akí ta asina esensial pa e nashon di Israel?

Míles di aña pasá, meskos ku awe, e pueblo di Dios tabata eksistí den un kultura i ambiente ku, den mayoria kaso, tabata eksudá normanan i tradishonnan i konseptonan ku tabata den konflikto ku nan fe. Por lo tantu, e pueblo di Dios semper mester ta alerta, sino e kamindanan di e mundu, su ídolonan, i su "diosnan" ta bira e ophetonan di nan adorashon tambe.

Nos Dios ta un "Dios yalurs" (Deut. 4:24, Deut. 5:9, Deut. 6:15), i solamente E, komo nos Kreador i Redentor, ta digno di nos adorashon. Aki tampoko tin término medio: sea nos ta adorá Señor, kende ta trese bida, bondat, i bendishonnan, òf nos ta adorá kualkier otro dios, kua ta trese maldat, maldishonnan i morto.

Lesa Revelashon 13:1-15 i enfoká riba e kuestion di kon adorashon ta ser presentá aki. Despues kompará e versíkulonan ei ku Revelashon 14:6-12. Kiko ta pasando aki den Revelashon ku ta reflehá e spièrtamentu duná den Deuteronomio (i den henter Skritura realmente) tokante adorashon falsu?

Maske kon diferente e konteksto ta, e asuntu ta meskos: Hende lo adorá e Dios berdadero i tin bida, òf nan lo sukumbí pa e preshonnan, sea habrí òf sutil òf tur dos, pa kita nan lealtat for di djE i enfrentá morto? Finalmente e kontestanan ta den kada kurason individual. Dios no a fòrsa Israel antiguo pa siguiE, i lo E no fòrsa nos. Manera nos ta mira den Revelashon 13, forsa ta loke e bestia i su imágen lo usa. Dios, en kambio, ta obra pa amor.