Bira Nan Kurasonnan

Hebreo bíbliko, meskos ku mayoria idioma, ta di sprengu ku ekspreshonnan, ora palabranan spesífiko ta ser usá pa nifiká algu diferente for di loke nan ta bisa realmente. Un ekspreshon den Tèstamènt Bieu ta "Mi-yitten". "Mi" ta e pregunta "ken?" i "yitten" ta nifiká "lo duna". Pues, literalmente, "Mi-yitten" ta "Ken lo duna?"

Den Tèstamènt Bieu, sinembargo, e frase ta ekspresá e idea di un deseo, di un anhelo, di un hende ku tin hopi gana di algu.

Por ehèmpel, despues di nan huida for di Egipto, e yunan di Israel, enfrentando desafionan den desierto, a sklama, "Ohalá nos a muri na man di SEÑOR na Egipto!" (Eks. 16:3, NIV). E frase "ohalá" a bini for di "mi-yitten".

Den Salmo 14:7 David ta bisa: "O ku e salbashon di Israel lo a bin for di Sion!" E hebreo no ta bisa "O"; e ta bisa "mi-yitten".

Den Job 6:8 (NKJV), ora e sklama: "O, ku mi por a haña mi petishon", “O” ta, atrobe, di "mi-yitten".

Lesa Deuteronomio 5:22-29, enfokando spesialmente riba versíkulo 29. Kiko ta nifiká ku e palabra tradusí komo "O" ta bini for di "mi-yitten"?

Ata Señor, e Dios Kreador, Esun ku a traha espasio, tempu i materia, Esun kende a papia i nos mundu a bini den eksistensia, Esun kende a supla e rosea di bida den Adam, pronunsiando un frase generalmente asosiá ku e debilidatnan i limitashonnan di humanidat. Ki un ehèmpel di e realidat di boluntat liber! Aki nos ta mira ku tin límitenan na loke Dios por hasi meimei di e gran konflikto. E uso akí di "mi-yitten" ta revelá ku ni Dios por trapa riba boluntat liber; na momento ku El a hasi esaki, lo e no tabata liber mas.

I meskos ku nos sernan humano ta liber pa peka, nos ta liber tambe pa skohe Señor, pa skohe di ta habrí pa Su guiansa, pa skohe, dor di respondé na Su Spiritu, pa arepentí di nos pikánan i sigui' É. Finalmente e eskoho ta di nos, i di nos solamente, i ta un eskoho ku nos mester hasi dia pa dia, momento pa momento.

Den henter Beibel nos ta topa evidensia di Dios Su konosementu previo. Es desir, E sa adelantá tur loke lo sosodé. Sea ta e surgimentu i kaida di imperionan mundial (Daniel 7) te na akshonnan individual djis oranan promé ku nan tuma lugá, "Siguramente, Mi ta bisa bo ku awe nochi, promé ku e gai kanta, lo bo nenga Mi tres biaha” (Mat. 26:34, NKJV), Señor konosé e fin for di prinsipio. Su konosementu previo, asta di nos eskohonan liber, no ta kondishoná e libertat di e eskohonan ei.

Por lo tantu, Señor tabata sa, asta promé ku El a hiba e yunan di Israel den e tera, kiko nan lo a hasi ora nan ta den e tera.

Lesa Deuteronomio 4:25-28. Kiko Señor a bisa ku e pueblo lo a hasi despues ku nan tabata den e tera ku a ser primintí na nan?

Den e versíkulonan anterior, Señor ta bisa nan spesífikamente pa no traha ídolonan i pa no adorá nan (Deut. 4:15-20). Sinembargo, e siguiente versíkulonan básikamente ta bisa ku, traha ídolonan i adorá nan ta eksaktamente loke nan ta bai hasi, apesar di tur e atvertensianan.

Nota ku den Deuteronomio 4:25, Moises ta aklará ku lo e no sosodé inmediatamente. Despues di tur loke ku nan a kaba di eksperensiá, no tabata probabel ku nan lo a kai mesora den idolatria. Sinembargo, ku tempu, despues di un generashon asina, e tendensia pa "lubidá" (Deut. 4:9) loke Señor a hasi pa nan, i loke El a atvertí nan kontra di dje, lo a hiba nan na hasi eksaktamente loke El a atvertí kontra dje.

Lesa Deuteronomio 4:29-31. Kiko Señor ta bisa ku lo E hasi pa nan den e situashon spesífiko aki?

E grasia di Dios ta maravioso. Asta despues ku nan kai den e maldat horibel di idolatria, asta despues ku nan a risibí e debido konsekuensianan di nan pikánan, si nan bolbe na Señor, E lo pordoná nan i restourá nan. Pa resumí, si nan skohe di forma liber pa arepentí, E lo aseptá nan arepentimentu.

E palabra den Deuteronomio 4:30, hopi biaha tradusí komo "bolbe", realmente ta nifiká "regresá". Es desir, nan ta bai bèk serka Señor, kaminda nan tabata suponé di tabata tur e tempu. E palabra hebreo teshuvah, for di e mesun palabra rais pa "regresá", ta nifiká "arepentimentu”.

Por lo tantu, básikamente , loke sea ta enbolbí den arepentimentu, e ta un regreso na Dios despues ku nos tabata separá for di djE pa nos pikánan

A lo largu di e buki di Deuteronomio, ta aparesé un tema klave: obedesé Señor i ser bendishoná, desobedesé i lo bo sufrí e konsekuensianan. E no ta diferente den Tèstamènt Nobo. "No ser engañá: Dios no ta laga hasi bofon di djE; pasobra loke sea un hende sembra, esei e lo kosechá tambe. Pasobra esun ku sembra pa su karni lo kosechá korupshon di e karni, ma esun ku sembra pa e Spiritu lo kosechá bida eterno di e Spiritu" (Gal. 6:7, 8, NKJV).

Desafortunadamente, a lo ménos despues di e Kaida, piká ta parse mes fásil i mes natural ku halamentu di rosea. I apesar di tur e atvertensianan i promesanan, "Pasobra e mandamentu akí ku mi ta ordená bo awe no ta muchu misterioso pa bo, ni e no ta fuera di alkanse" (Deut. 30:11, NKJV), hopi hende a hasi presisamente esei: nan a kai den e pikánan ku Dios a spièrta nan kontra dje.

I tòg, asta asina, Dios tabata dispuesto pa tuma nan bèk si, usando nan boluntat liber, eskoho liber, nan a arepentí i a regresá na djE.

Lesa atrobe Deuteronomio 30:1-10. Kiko Señor ta bisando ku E lo hasi pa Su pueblo, apesar di tur e malu ku nan a hasi? Kiko, sinembargo, tabata e kondishon riba kua e promesanan maravioso akí tabata deskansá?

E idea ta simpel i stret: si bo daña kos, konsekuensianan teribel lo resultá pa bo i bo famia. Esei ta loke piká ta hasi. Sinembargo, asta e ora ei, bo por arepentí i Señor lo tuma bo bèk i bendishoná bo.

Numeroso biaha e mesun palabra rais hebreo tras di teshuvah ta aparesé den e versíkulonan akí. Den Deuteronomio 30:2, e teksto ta bisa "i bo bolbe na SEÑOR bo Dios" (NKJV, énfasis añadí); den Deuteronomio 30:8 (NKJV), aunke hopi biaha e ta ser tradusí, i korektamente tambe, "lo bo obedesé e bos di SEÑOR atrobe", e lo por a ser tradusí literalmente: "I abo regresá i obedesé e bos di Señor". Finalmente, den Deuteronomio 30:10 (NKJV), kaminda e ta bisa: “i si bo bira na SEÑOR bo Dios ku henter bo kurason i ku henter bo alma", atrobe e palabra "bira" en realidat ta "regresá".

Ku otro palabra, apesar di tur loke a sosodé ku nan, apesar di nan violensia total i kibramentu di e aliansa, Señor no tabata kla ku e pueblo akí, i si nan no tabata ke pa E ta kla ku nan, nan por a manifestá e deseo ei a traves di arepentimentu.

Deuteronomio 30:1-10 ta revelá e grasia i bondat di Dios pa esnan ku a apostatá i pekadornan, asta ora e pekadornan i esnan ku a apostatá ei a ser bendishoná pa Dios den formanan úniko: "Pasobra ki gran nashon tin, ku tin Dios asina serka di dje, manera SEÑOR nos Dios ta na nos, pa kualke rason ku nos por yama riba djE?” (Deut. 4:7, NKJV). Asta apesar di tur loke El a hasi pa nan, i apesar di e echo ku nan no tabatin niun esküs òf hustifikashon real pa nan piká, nan a peka di tur manera (un hende por relashoná?).

I tòg, e ora ei mes, kiko?

Den Deuteronomio 30:1-10, enfoká riba loke nan arepentimentu, nan bolbementu (teshuvah) na Dios tabata enserá. Kiko tabata rekerí, i kiko esei mester siña nos awe tokante loke arepentimentu berdadero ta enbolbí?

Finalmente, nan mester a hasi e eskoho pa regresá na djE, i pa obedes'E, ku henter nan kurason. Den un sentido, e problema real tabata nan kurason, pasombra si nan kurason tabata bon ku Dios, nan akshonnan lo a sigui: es desir, nan lo tabata obedesidu.

Ta pa e motibu akí e promesa maravioso a ser duná na nan ku si nan a "regresá" na Señor, a bira na djE sinseramente, e ora ei E lo a obra den nan i lo a "sirkumsidá" nan kurasonnan. Nan mester hasi e eskoho, meimei di nan koutiverio, pa regresá na Dios, i E lo a trese nan bèk na E mes i na e tera. I e ora ei einan, den e tera, E lo a bendishoná nan. I parti di e bendishon ta ku E lo a obra den nan pa kambia nan kurasonnan ainda mas pa kunE, pa asina nan i nan yunan lo a "stima SEÑOR bo Dios ku henter bo kurason i ku henter bo alma, pa bo por biba".

Al final, respondiendo na e indikashonnan di Dios (lesa Echonan 5:31), nan lo mester a arepentí berdaderamente di nan pikánan. I, aunke ta trata ku un konteksto históriko diferente, Ellen G. White a skirbi: "E pueblo a tene rou pasobra nan pikánan a trese sufrimentu riba nan mes, pero no pasobra nan a deshonrá Dios dor di kibra Su lei santu. Arepentimentu berdadero ta mas ku tristesa pa piká. Ta un biramentu determiná for di maldat.” — Ellen G. White, Patriarchs and Prophets, p. 557. I esaki ta un bèrdat ku nos por mira den Deuteronomio 30:1-10.

Tèstamènt Nobo, naturalmente, ta yená ku e idea di arepentimentu. De echo, Juan Boutista a kuminsá su ministerio ku e yamada na arepentimentu.

Lesa Mateo 3:1-8. Kon e idea di "regresá" ta aparesé den e versíkulonan akí? Ku otro palabra, kiko Juan Boutista ta bisando nan pa hasi ku ta reflehá loke a ser hañá den Deuteronomio? Dikon, tambe, su palabranan lo tabatin relevansia spesial pa e fariseonan i saduseonan?

Hesus tambe a kuminsá Su ministerio ku yamadanan pa arepentimentu.

Lesa Marko 1:15. Kiko Hesus ta bisa, i dikon e ta relashoná arepentimentu ku e evangelio?

Sea ta Juan Boutista ta papiando spesífikamente na e lidernan religioso òf Hesus na e nashon komo un totalidat, e idea ta mesun kos. Nos ta pekadornan, i aunke ku Kristu a bin pa salba pekadornan, nos mester arepentí di nos pikánan. I e arepentimentu ei, sea komo un hende ku a apostatá òf komo un kristian fiel ku ta kai den piká òf komo un konverso nobo, ta inkluí un biramentu for di nos kamindanan pekaminoso bieu. Nos mester rekonosé nos pekaminosidat i, ekspresando arepentimentu pa nos pikánan mes (i no solamente nan konsekuensianan), nos mester hasi e eskoho konsiente pa bandoná e pikánan ei, dependiendo totalmente riba e méritonan di Hesus, "obedesé e bos di SEÑOR bo Dios" (Deut. 15:5, NKJV).

Algun eruditonan bíbliko ta mira den Tèstamènt Nobo ekonan di e idea di arepentimentu manera esaki ta ser ekspresá den Deuteronomio. Por ehèmpel, ora Pedro ta akusá e nashon di a krusifiká Hesus, hopi di e hendenan "a ser konmoví te den profundidat di nan kurason, i a bisa Pedro i sobrá di e apòstelnan: "hòmbernan i rumannan, kiko nos lo hasi?" (Echonan 2:37, NKJV). Es desir, siendo konsiente di nan piká, nan tabatin duele di esaki ("konmoví te den profundidat di nan kurason"), i nan ker a sa kiko nan mester hasi awor pa ta bon ku e Dios kende nan a ofendé.

Esaki no ta práktikamente mesun situashon ku nos tur: pekadornan ku a ofendé Dios?