Deuteronomio den Tèstamènt Nobo

Lesa Mateo 4:1-11. Kon Hesus a reakshoná riba e tentashonnan di Satanas den desierto, i kiko ta e lès importante aki pa nos den Su reakshon?

Hesus no a argumentá ku Satanas ni a debatí kuné. Simplemente El a sita Skritura pasobra, komo e Palabra di Dios, e ta "bibu i poderoso, i mas skèrpi ku kualke spada di dos filo" (Hebr. 4:12, NKJV). I den kada kaso e Palabra ku El a sita tabata for di Deuteronomio. Ki interesante ta ku Hesus, den desierto, a skohe pa sita tekstonan ku tambe a ser duná na Israel den desierto.

Den e promé tentashon, Hesus a referí na Deuteronomio 8:3. Moises a bin ta rekordá e Israel antiguo kon Señor a proveé pa nan tur e añanan ei den desierto, inkluso dunando e mana, tur komo parti di un proseso di refinamentu, komo ku Dios tabata tratando na siña nan lèsnan spiritual. I entre e lèsnan ei tabatin ku "hende lo no biba di pan so; ma hende ta biba di tur palabra ku ta sali for di boka di SEÑOR” (NKJV). Dios a alimentá bo ku kuminda físiko, pero E ta duna bo nutrishon spiritual tambe. Bo no por tuma solamente esun di promé sin tuma e di dos. Hesus a usa e imágen di pan komo un transishon na Deuteronomio i pa reprendé Satanas i e duda ku el a trata di inkulká den Hesus.

Den e di dos tentashon, Hesus ta bai bèk na Deuteronomio 6:16, kaminda Moises a mustra e pueblo bèk riba nan rebeldia na Masa (lesa Eks. 17:1-7), bisando, "Boso lo no tenta SEÑOR boso Dios manera boso a tent'E na Masa" (NKJV). E palabra pa "tenta" por nifiká "purba" òf "tèst". Señor ya a mustra nan, bes tras bes, Su poder i disposishon pa proveé pa nan; sinembargo, e momento ku problema a presentá, nan a grita: "SEÑOR ta meimei di nos òf no?" (Eks. 17:7, NKJV). I tabata for di e storia ei ku Hesus a saka for di e Palabra di Dios pa reprendé Satanas.

Den e di tres tentashon, e bia akí Satanas a buska pa laga Kristu bùig i ador’é. Ki un revelashon habrí i evidente di ken e tabata realmente i kiko e tabata ke realmente! Mas bien ku debatí, Hesus ta reprendé Satanas i atrobe ta bai bèk na e Palabra di Dios, Deuteronomio, kaminda Señor tabata spièrtando Su pueblo tokante loke lo a sosodé si nan mester a apostatá i adorá otro diosnan. "Lo bo teme solamente SEÑOR bo Dios, i sirbiE" (Deut. 6:13, NKJV), ku ta nifiká E i E so.

Den Deuteronomio 10, Moises (atrobe) tabata konta historia di Israel i (atrobe) a usa e relatonan ei pa amonestá su pueblo na fieldat. Entre e amonestashon ei el a bisa algu mas.

Lesa Deuteronomio 10:17-19. Kiko ta e mensahe esensial pa e pueblo aki, i dikon e mensahe akí ta relevante pa e iglesia di Dios awe?

E frase "no ta hasi distinshon di persona" ta tradusí di un forma di papia hebreo; e ta nifiká literalmente ku E no ta "hisa karanan". Ta ser pensá ku esaki ta bin di un konteksto legal den kua e hues òf rei ta mira kara di e persona ku ta ser husgá i, basá riba e status di e persona (persona importante òf un hende insignifikante), e hues òf e rei ta duna un veredikto. E implikashon aki den Deuteronomio ta ku Señor no ta trata hende den un forma asina, apesar di Su gran poder i forsa. E ta hustu ku tur hende, apesar di nan status. E bèrdat akí, naturalmente, a ser revelá den e bida di Hesus i kon E tabata trata asta esnan mas despresiá den sosiedat.

Lesa Echonan 10:34, Romanonan 2:11, Galationan 2:6, Efesionan 6:9, Kolosensenan 3:25, i 1 Pedro 1:17. Kon e tekstonan akí ta hasi uso di Deuteronomio 10:17?

Maske kon variá e sirkunstansianan den kada un di e referensianan akí ta (den Efesionan Pablo ta bisa shonnan pa ta kuidadoso kon nan ta trata nan esklabonan; den Romanonan Pablo ta papiando tokante e echo ku, ora ta trata di salbashon i kondenashon, no tin diferensia entre hudiu i pagano), nan tur ta bai bèk na Deuteronomio i na e idea ku Dios "no ta hisa karanan". I si e " Dios di diosnan i Señor di señornan, e gran Dios, poderoso i temibel" lo no a hasi esaki, e ora ei seguramente nos tampoko lo no mester hasié.

Partikularmente den kon Pablo ta us'é den Romanonan, nos por mira un revelashon di e evangelio: nos tur ta riba e mesun plano, no importá ken nos ta den términonan di status. Nos tur ta sernan kaí ku nesesidat di e grasia salbador di Dios. I e bon notisia ta ku, no importá nos status, salbashon ta ser ofresé na nos tur den Hesu-Kristu.

Lesa Galationan 3:1-14. Kiko Pablo ta bisando ei ku ta relevante pa nos awe, i kon e ta usa Deuteronomio 27:26 i Deuteronomio 21:22,23 pa presentá su punto?

Desafortunadamente, ta komun den kristianismo pa usa e karta akí komo un tipo di hustifikashon pa no warda e lei, e Dies Mandamentunan. Naturalmente, e argumento ei ta ser usá realmente komo un motibu pa no warda e di kuater mandamentu, komo si fuera warda esun mandamentu ei, kontrali na e otro nuebe, di algun forma ta un ekspreshon di e legalismo ku Pablo tabata dil kuné aki.

Sinembargo, Pablo no tabata papiando kontra e lei, i seguramente nada den e pasashi akí por a hustifiká kibramentu di e mandamentu di Sabat. E klave por ser hañá den Galationan 3:10 (NIV), kaminda e ta skirbi ku "tur esnan ku ta dependé di e obranan di Lei ta bou di un maldishon," i despues e ta sita Deuteronomio 27:26. E problema no ta obediensia na e lei, sino dependé riba e lei", un posishon difísil, si no ta unu imposibel, pa sernan kaí manera nos mes.

E punto di Pablo ta ku nos no ta salbá pa medio di e obranan di lei sino pa medio di e morto di Kristu na nos fabor, kua ta ser akreditá na nos pa medio di fe. Su énfasis aki ta riba loke Kristu a hasi pa nos, na e krus. I pa yuda aklará esaki, e ta referí bèk na Deuteronomio, e biaha aki Deuteronomio 21:23. Meskos ku Hesus, Pablo ta bisa "ta pará skirbí", mustrando e outoridat di Tèstamènt Bieu, i awor e ta sita for di un teksto ku ta trata ku un hende ku, despues di a kometé un krímen grandi, i a ser ehekutá p’e, a ser kologá na un palu, kisas komo un medio pa spanta otronan.

Pablo, no opstante, ta usa esei komo un símbolo pa e morto supstituto di Kristu na nos fabor: Kristu a bira un "maldishon pa nos" den sentido ku El a enfrentá e maldishon di lei; es desir, morto, kual tur ser humano lo a enfrentá pasobra tur a violá e lei. E bon notisia di e evangelio, sinembargo, ta ku e maldishon, ku mester tabata di nos, a bira di djE, na e krus, "pa nos por risibí e promesa di e Spiritu pa medio di fe" (Gal. 3:14, NKJV).

Of, manera Ellen G. White a bis’é: "Ningun otro sino Kristu por a redimí hende kaí for di e maldishon di lei i tres'e atrobe den harmonia ku Shelu. Kristu lo a tuma riba djE e kulpa i bèrgwensa di piká, piká asina ofensivo pa un Dios santu ku e mester separá e Tata i Su Yu.” — Ellen G. White, Patriarch and Prophets, p. 63.

Bes tras bes, Señor a spièrta Israel pa no sigui tras di e práktikanan di e nashonnan rònt di nan. Al kontrario, nan mester tabata testigonan na e nashonnan ei(Deut. 4:6-8). Den Deuteronomio 18:9-14, , Moises ta spièrta nan atrobe tokante nan práktikanan spesífiko, kua tabata un "abominashon na SEÑOR" (Deut. 18:12, NKJV). Den e konteksto ei, e ta bisa nan ku mester ta "ireprochabel dilanti di SEÑOR bo Dios" (Deut. 18:13, NKJV).

Lesa Deuteronomio 18:15-19. Kiko Moises ta bisando nan einan? Despues, kompará esaki ku Echonan 3:22 i Echonan 7:37. Kon Pedro i Esteban ta apliká Deuteronomio 18:18?/span>

Refiriendo na e pakto na Sinaí, Moises ta papia tokante kon e yunan di Israel, na revelashon di e lei di Dios (Eks. 20:18-21), tabata ke pa Moises aktua komo mediador, un intersesor entre nan i Dios. Ta na e momento ei Moises ta primintí nan, dos biaha (Deut. 18:15,18), ku Señor lo lanta un profeta manera Moises, ku e idea, mirando e konteksto, ku E profeta akí, meskos ku Moises, entre otro lo ta tambe un intersesor entre e pueblo i Señor.

Hopi siglo despues, tantu Pedro komo Esteban ta sita e teksto den referensia na Hesus. Pa Pedro, Hesus tabata e kumplimentu di loke a ser papiá di dje pa medio di "tur Su profetanan santu" (Echonan 3:21, NKJV), i ku e lidernan mester obedes'E, i loke E ta bisa. Esta, Pedro ta usa e teksto akí, kua e hudiunan tabata konosé, i a aplik'é direktamente na Hesus, ku e idea ku nan mester a repentí pa loke nan a hasiE(Echonan 3:19).

Na kontinuashon, den Echonan 7:37, ora Esteban, aunke den un konteksto diferente for di esun di Pedro, tabata proklamando Hesus, e tambe, a refirí bèk na e promesa famoso ei, i e tambe, a afirmá ku e tabata mustra na Hesus. E tabata bisando ku Moises, den su ròl den historia i guiando e hudiunan, a prefigurá Hesus. Es desir, meskos ku Pedro a hasi, Esteban tabata purba mustra e pueblo ku Hesus tabata e kumplimentu di profesia i ku nan mester skuch'E. Kontrali na e akusashon kontra dje, ku Esteban tabata papia "palabranan di blasfemia kontra Moises i Dios” (Echonan 6:11, NKJV), Esteban a proklamá Hesus komo e Mesias, un kumplimentu direkto di loke Dios a primintí a traves di Moises.

E buki di Hebreonan, den tur su profundidat i elevashon, tabata, den hopi forma, djis un atvertensia largu na e kreyente hudiu den Hesus. I loke el a atvertí nan pa hasi ta: Keda fiel na Señor!

E fieldat aki, naturalmente, mester a surgi di nos amor pa Dios, di ken E ta i di Su karakter i bondat, ekspresá di forma mas poderoso na e krus di Kristu. Tin biaha, sinembargo, sernan humano mester ser rekordá di kiko e konsekuensianan teribel di desviá lo ta. Es desir, nos mester kòrda ku, na final, si nos no aseptá loke Hesus a hasi pa nos ora El a paga e kastigu di nos pikánan, nos mes mester paga pa e kastigu ei, i esei ta nifiká "yoramentu i mordementu riba djente" (Mat. 22:13) siguí pa destrukshon eterno.

Lesa Hebreonan 10:28-31. Kiko Pablo ta bisando i kon e ta apliká pa nos tambe?

Ki interesante ku, pa atvertí e hudiunan pa keda fiel na Dios, Pablo ta sita Deuteronomio, un atvertensia anterior na e kreyentenan hudiu pa keda fiel na Dios! Pablo ta sita Deuteronomio 17:6 enkuanto di e echo ku un hende konsiderá digno di morto lo a enfrentá e morto ei solamente despues ku por lo ménos dos persona a testifiká kontra e persona ei.

Pero Pablo a hasi esaki pa yama atenshon riba e punto ku si infidelidat por a hiba na morto bou di e Pakto Bieu, kuantu "kastigu mas pió, bo ta suponé, e lo tabata digno [di dje], e ku a trapa e Yu di Dios bou di su pia, a konsiderá e sanger di e aliansa, pa medio di kua el a ser santifiká, un kos komun, i a insultá e Spiritu di grasia?" (Hebr. 10:29, NKJV). Ku otro palabra, abo tin mas lus i mas bèrdat ku nan tabatin, i bo sa tokante e sakrifisio di e Yu di Dios pa bo pikánan; pues, si bo apartá bo mes, bo kondenashon lo ta mas grandi ku esun di nan.

Despues Pablo ta bai bèk inmediatamente na Deuteronomio, awor na Deuteronomio 32:35, simplemente pa reforsá su argumento. Konsiderando loke a ser duná na nan den Kristu i nan konosementu di e gran provishon hasí pa nan, Señor, kende a bisa, "vengansa ta di Mi”, lo "huzga Su pueblo" (Hebr. 10:30, NKJV) pa nan apostasia i infidelidat. Despues di tur kos, El a husga nan antepasadonan, ku no tabatin loke e hudiunan di Tèstamènt Nobo tabatin, e revelashon mas kompleto di e amor di Dios na e krus. Pues, básikamente, Pablo tabata bisando: Sea atvertí.