E Mensahe di Hebreonan

E punto prinsipal di Hebreonan ta ku Hesus ta e Gobernante, kende ta sintá na man drechi di e Tata (Hebr. 8:1). Komo Dios, Hesus semper tabata e gobernante di e universo. Pero ora Adam i Eva a peka, Satanas a bira e gobernante di e mundu akí (Juan 12:31, Juan 14:30, Juan 16:11). Hesus, sinembargo, a bin i a derotá Satanas na e krus, rekobrando e derechi pa goberná esnan ku asept’E komo nan Salbador (Kol. 2:13-15).

E promé dos kapítulonan di Hebreonan ta enfoká spesialmente riba e inougurashon di Hesus komo Rei.

Lesa Hebreonan 1:5-14. Kiko ta sosodiendo aki?

E versíkulonan akí ta organisá den tres sekshon. Kada sekshon ta introdusí un aspekto di e seremonia di inougurashon di e Yu. Di promé, Dios ta instalá Hesus komo e Yu real (Hebr. 1:5). Di dos, Dios ta introdusí e Yu na e korte selestial, kende ta ador’E (Hebr. 1:6,8) miéntras e Tata ta proklamá e outoria i gobièrnu di e Yu (Hebr. 1:8-12). Di tres, Dios ta pone e Yu riba trono, e otorgamentu aktual di poder riba tera (Hebr. 1:13,14).

Un di e kreensianan di mas importante di Tèstamènt Nobo ta ku den Hesus Dios a kumpli ku Su promesanan na David (lesa 2 Sam. 7:8-16 i Lukas 1:30-33). Hesus a nase for di e linahe di David den e stat di David (Mat. 1:1-16; Lukas 2:10,11). Durante Su ministerio hende tabata yam’E hopi bia “Yu di David”. El a ser ehekutá bou di e akusashon ku El a reklamá di ta “rei di e hudiunan” (Mat. 27:37, NKJV). Pedro i Pablo tabata prediká ku Hesus a lanta for di morto den kumplimentu di e promesanan hasí na David (Echonan 2:22-36, Echonan 13:22-37). I Juan a identifiká Hesus komo “Leon di e tribu di Huda” (Rev. 5:5).

Hebreonan, naturalmente, ta di akuerdo. Dios a kumpli ku Su promesanan na David den Hesus: Dios a dun’E un gran “nòmber” (Hebr. 1:4), a instal’E komo di mes Yu (Hebr. 1:5), A afirm’E pa semper komo Kreador i Señor (Hebr. 1:8-12), i a pon’E sinta na Su “man drechi” (Hebr. 1:13,14). Ademas, di akuerdo ku Hebreonan 4, Hesus ta guia hende den e sosiegu di Dios i ta kòrda nos ku Hesus ta e konstruktor di e kas di Dios (Hebr. 3:3,4).

Hesus, anto, ta e gobernante legítimo di e tera akí enbolbí den un guera ku Satanas, e usurpadó, pa nos lealtat.

Un konsepto interesante di e teologia di Tèstamènt Bieu ta ku e Rei Davídiko primintí lo a representá e nashon dilanti di Dios.

Kompará Eksodo 4:22,23 ku 2 Samuel 7:12-14; Deuteronomio 12:8-10 ku 2 Samuel 7:9-11; i Deuteronomio 12:13,14 ku Salmo 132:1-5,11-14. Ki promesanan na Israel lo a ser kumplí a traves di e Rei Davídiko primintí?

Israel tabata yu di Dios, i Dios lo a duna nan un lugá kaminda nan lo a sosegá di nan enemigunan. Dios lo a skohe tambe un lugá entre nan kaminda Su nòmber lo a biba. E promesanan akí pa Israel awor lo a ser kumplí a traves di e Rei Davídiko primintí. E lo a ser adoptá komo yu di Dios, Dios lo a dun’é sosiegu di su enemigunan, i e lo a konstruí un tèmpel pa Dios na Sion kaminda e nòmber di Dios lo a biba. Esaki ta nifiká ku Dios lo a kumpli ku Su promesanan na Israel a traves di e rei Davídiko primintí. E Rei Davídiko lo a representá Israel dilanti di Dios.

E introdukshon di un representante den e relashon entre Dios i Israel a hasi e konstansia di nan relashon di pakto posibel. E pakto mosaiko tabata rekerí e fieldat di henter Israel pa risibí e protekshon i bendishonnan di Dios (lesa Hos. 7:1-13). E pakto davídiko, sinembargo, a sigurá e bendishonnan di pakto di Dios riba Israel a traves di fieldat di un persona, e Rei davídiko.

Desafortunadamente, pa mayoria parti e reinan davídiko no tabata fiel, i Dios no por a bendishoná Israel manera E tabata ke. Tèstamènt Bieu ta yená ku relatonan di kon infiel hopi di e reinan ei tabata realmente.

E bon notisia ta ku Dios a manda Su Yu pa nase komo Yu di David, i E tabata perfektamente fiel. P’esei, Dios ta kapas pa kumpli den djE tur e promesanan ku El a hasi ku Su pueblo. Ora Dios bendishoná e rei, henter su pueblo ta kompartí den e benefishinan. Ta p’esei Hesus ta e Mediador di e bendishon di Dios na nos. E ta e Mediador den sentido ku E ta e kanal a traves di ken e bendishon di Dios ta kore. Nos speransa final di salbashon ta ser hañá solamente den Hesus i loke El a hasi pa nos.

Kompará 1 Samuel 8:19,20 ku Hebreonan 2:14-16. Kiko e israelitanan tabata buska den un rei, i kon e deseonan akí a ser kumplí den Hesus?

E israelitanan tabata ke un rei pa ta nan hues i nan lider den bataya pasobra nan a lubidá ku Dios tabata nan rei. E restourashon kompletu di e gobièrnu di Dios riba Su pueblo a bin ku Hesus. Komo nos Rei, Hesus ta guia nos den e bataya kontra e enemigu.

Hebreonan 2:14-16 ta deskribí Hesus komo e kampion di sernan humano débil. Kristu ta enfrentá i ta derotá diabel den un kombate E so i ta libra nos for di sklabitut. E deskripshon akí ta kòrda nos riba e bataya entre David i Goliat. Despues di a ser ungí komo rei (1 Samuel 16), David a salba su rumannan for di sklabitut dor di derotá Goliat. E términonan di kompromiso a determiná ku e ganadó di e kombate lo a sklabisá e pueblo di e otro partido (1 Sam. 17:8-10). Por lo tantu, David a aktua komo un kampion di Israel. El a representá nan.

Lesa Isaias 42:13 i Isaias 59:15-20. Kon Yahweh ta deskribí Su mes den e pasashinan akí?

Hebreonan 2:14-16 ta aludí na e noshon ku Dios lo a salba Israel den un solo kombate. Nota e pasashi akí for di Isaias: “Pasobra asina SEÑOR ta bisa: ‘Asta e koutivonan di esun poderoso lo ser tumá, i e presa di e tirano lo ser reskatá, pasobra lo Mi batayá ku esnan ku batayá ku bo, i lo Mi salba bo yunan’ ” (Isa. 49:25, ESV).

Komo kristiannan nos ta pensa hopi bia ku nos ta enbolbí den un kombate nos so ku Satanas. Ora nos lesa Efesionan 6:10-18, nos ta mira ku sí, nos ta den kombate ku diabel. Pero Dios ta nos kampion, i E ta bai batayá nos dilanti. Nos ta parti di Su ehérsito; ta p’esei nos mester usa Su armadura. Tambe, nos no ta bringa nos so. E “boso” den Efesionan 6 ta plural. Nos komo iglesia ta bisti e armadura i ta bringa huntu tras di nos kampion, kende ta Dios Mes.

Hebreonan 5-7 ta introdusí un di dos funshon di Hesus. E ta nos Sumo Saserdote. E outor ta splika ku esaki ta kumpli ku un promesa ku Dios a hasi ku e rei davídiko primintí, ku E lo tabata “un saserdote pa semper di akuerdo ku e órden di Melkisedek” (Salmo 110:4, manera sitá den Hebr. 5:5,6, NKJV).

Lesa Levítiko 1:1-9, Levítiko 10:8-11, Malakias 2:7, Numbernan 6:22-26, i Hebreonan 5:1-4. Ki funshonnan e saserdote tabata ehekutá?

E saserdotenan tabata ser nombrá na fabor di sernan humano pa representá nan i media nan relashon ku Dios i e kosnan ku tabata pertenesé na djE. E saserdote tabata un mediador. Esaki tabata bèrdat di kualke sistema di saserdosio, sea hudiu, griego, romano, òf kualke otro. E saserdote ta hasi posibel pa nos relashoná ku Dios, i tur kos ku e saserdote hasi tin e propósito di fasilitá e relashon entre nos i Dios.

E saserdote ta ofresé sakrifisionan na fabor di sernan humano. E pueblo no por trese e sakrifisionan akí na Dios den persona. E saserdote sa kon nos por ofresé un sakrifisio “aseptabel” pa asina nos regalonan por ta aseptabel pa Dios òf pa nan por proveé purifikashon i pordon.

Saserdotenan tabata siña e pueblo tambe e lei di Dios. Nan tabata ekspertonan den e mandamentunan di Dios i tabata na enkargo di splika i apliká nan.

Finalmente, e saserdotenan tabatin tambe e responsabilidat di bendishoná den nòmber di Yahweh. A traves di nan, Dios tabata media Su bon boluntat i propósito benevolente pa e pueblo.

Sinembargo, den 1 Pedro 2:9, nos ta mira algu mas. Nos, kreyentenan den Hesus, ta ser yamá “un saserdosio real.” E ròl akí ta impliká privilegionan inkreibel. Saserdotenan por a aserká Dios den e santuario. Awe, nos por aserká Dios pa medio di orashon ku konfiansa (Hebr. 4:14-16; Hebr. 10:19-23). Tin, tambe, responsabilidatnan importante. Nos mester kolaborá ku Dios den Su obra di salba e mundu. E ke pa nos siña i splika e leinan i preseptonan di Dios na otronan. Tambe E ke pa nos ofresé sakrifisionan di alabansa i bon obranan, kua ta agradabel p’E. Ki un privilegio i responsabilidat!

Hebreonan 8-10 ta enfoká riba e trabou di Hesus komo Mediador di un pakto nobo. E problema ku e pakto bieu tabata simplemente ku e tabata solamente un sombra di e bon kosnan ku lo a bin. Su institushonnan tabata destiná pa prefigurá, pa ilustrá, e trabou ku Hesus lo a hasi den futuro. Por lo tantu, e saserdotenan tabata prefigurá Hesus, ma nan tabata mortal i pekador. Nan no por a proveé e perfekshon ku Hesus tabata proveé. I nan tabata ministrá den un santuario ku tabata un “kopia i sombra” (Hebr. 8:5, NKJV) di e santuario selestial.

Hesus ta ministrá den e berdadero santuario i ta proveé nos akseso na Dios. E sakrifisionan di animalnan tabata prefigurá e morto di Hesus komo un sakrifisio na nos fabor, pero nan sanger no por a limpia e konsenshi. E sanger di Hesus, sinembargo, ta purifiká nos konsenshi, i a traves di djE, teniendo fe den djE i aseptando Su obra intermediario na nos fabor, nos por aserká Dios ku kurashi (Hebr. 10:19-22).

Lesa Hebreonan 8:8-12. Kiko Dios a primintí nos den e pakto nobo?

Dor di nombra Hesus komo nos Sumo saserdote, e Tata a inougurá un pakto nobo ku lo logra loke e pakto bieu por a solamente antisipá. E pakto nobo ta duna loke solamente un saserdote humano-divino, perfekto i eterno por. E Sumo Saserdote akí no solamente ta splika e lei di Dios sino ta implantá e lei den nos kurason. E Saserdote akí ta ofresé un sakrifisio ku ta trese pordon. E Saserdote akí ta limpia i ta transformá nos. E ta transformá nos kurason di piedra na karni (Ezek. 36:26). E ta krea nos realmente di nobo (2 Kor. 5:17). E Saserdote akí ta bendishoná nos den e forma di mas inkreibel, dor di proveé nos akseso den e presensia mes di e Tata Mes.

Dios a diseñá e pakto bieu pa asina mustra padilanti na futuro, na e trabou di Hesus. E tabata bunita den su diseño i propósito. Sinembargo, algun hende a mal komprondé su propósito. Sin boluntat pa laga e símbolonan, e sombranan, i brasa e bèrdatnan ku e símbolonan tabata mustra na dje, nan a hera e benefishinan maravioso ku e ministerio di Hesus tabata ofresé nan.

“Kristu tabata e fundeshi i bida di e tèmpel. Su servisionan tabata típiko di e sakrifisio di e Yu di Dios. E saserdosio a ser establesé pa representá e karakter intermediario i trabou di Kristu. Henter e plan di adorashon di sakrifisio tabata un sombra di e morto di e Salbador pa redimí e mundu. Lo no tabatin efikasia den e ofrendanan akí ora e gran evento den direkshon di kua nan a mustra pa siglonan a ser kumplí.” — Ellen G. White, The Desire of Ages, p. 165.