E Yu Primintí

E promé paragraf di Hebreonan ta revelá ku Pablo tabata kere ku e tabata bibando den “e último dianan”. Skritura ta usa dos ekspreshon tokante futuro ku tin diferente nifikashon. E profetanan tabata usa e ekspreshon “último dianan” òf “dianan final” pa papia tokante futuro en general (Deut. 4:30,31; Jer. 23:20). Profeta Daniel a usa un di dos ekspreshon, “e tempu di fin”, pa papia mas spesífikamente tokante e último dianan di historia di tera (Dan. 8:17, Dan. 12:4).

Lesa Numbernan 24:14-19 i Isaias 2:2,3. Kiko Dios a primintí ku E lo a hasi pa Su pueblo den e “último dianan”?

Vários profeta di Tèstamènt Bieu a anunsiá ku den e “último dianan” Dios lo a lanta un Rei kende lo a destruí e enemigunan di Su pueblo (Num. 24:14-19) i kende lo a atraé e nashonnan na Israel (Isa. 2:2,3). Pablo ta bisa ku e promesanan akí a ser kumplí den Hesus. El a derotá Satanas i, a traves di proklamashon di e Evangelio, E ta atrayendo tur e nashonnan na Su mes (Kol. 2:15, Juan 12:32). Den e sentido akí, anto, “e último dianan” a kuminsá pasobra Hesus a kumpli ku e promesanan di Dios.

Nos tatanan spiritual a muri den fe. Nan a mira i a kumindá e promesanan for di “djaleu”, ma no a risibí nan. Nos, na otro banda, a mira nan kumplimentu den Hesus.

Laga nos pensa pa un momento riba e promesanan di Dios i riba Hesus. E Tata a primintí ku E lo a resusitá Su yunan (1 Tes. 4:15,16). E notisia maravioso ta ku El a inisiá e resurekshon di Su yunan ku e resurekshon di Hesus (1 Kor. 15:20, Mat. 27:51-53). E Tata a primintí tambe un kreashon nobo (Isa. 65:17). El a kuminsá kumpli ku e promesa akí dor di krea un bida spiritual nobo den nos (2 Kor. 5:17, Gal. 6:15). El a primintí ku E lo a establesé Su reino final (Dan. 2:44). El a inougurá e reino ei dor di libra nos for di e poder di Satanas i instalando Hesus komo nos gobernante (Mat. 12:28-30, Lukas 10:18-20). Esaki ta solamente e komienso, sinembargo. Loke e Tata a kuminsá hasi den e promé binida di Hesus, E lo kompletá na e segundo.

Lesa Hebreonan 1:1-4. Kiko ta e idea sentral di e versíkulonan akí?

Den griego original, Hebreonan 1:1-4 ta solamente un frase, i a ser argumentá ku e ta esun di mas bunita den henter Tèstamènt Nobo for di punto di bista di su arte retóriko. Su afirmashon prinsipal ta ku Dios a papia na nos a traves di Su Yu hòmber, Hesus.

Pa e hudiunan den siglo 1 A.D., e palabra di Dios no a ser tendé pa largu tempu. E último revelashon pa ser ekspresá den e Palabra Skirbí di Dios a bin a traves di profeta Malakias i e ministerionan di Esdras i Nehemias kuater siglo promé. Pero awor, a traves di Hesus, Dios tabata papiando ku nan atrobe.

E revelashon di Dios pa medio di Hesus, sinembargo, tabata superior na e revelashon ku Dios a hasi pa medio di e profetanan pasobra Hesus ta un medio mas grandi di revelashon. E ta Dios Mes, kende a krea shelu i tera i ta goberná e universo. Pa Pablo, e deidat di Kristu nunka ta den kuestion. E no ta ser asumí.

Tambe, pa Pablo, Tèstamènt Bieu tabata e Palabra di Dios. E mesun Dios kende a papia den pasado ta sigui papia den presente. Tèstamènt Bieu a komuniká un berdadero konosementu di e boluntat di Dios.

Sinembargo, tabata posibel pa komprondé su nifikashon mas kompletu solamente ora e Yu hòmber a yega riba tera. Den mente di e outor, e revelashon di e Tata den e Yu hòmber a proveé e klave pa komprondé e berdadero hanchura di Tèstamènt Bieu, meskos ku e potrèt riba e kaha di un pùzel ta proveé e klave pa haña e lugá korekto pa kada un di su pidanan. Hesus a trese asina tantu di Tèstamènt Bieu na klaridat.

Mientrastantu, Hesus a bin pa ta nos Representante i nos Salbador. E lo a tuma nos lugá den e pelea i derotá e kolebra. Di forma similar, den Hebreonan, Hesus ta e “pionero” òf “kapitan” i “prekursor” di kreyentenan (Hebr. 2:10, Hebr. 6:20). E ta bringa pa nos i ta representá nos. Esaki ta nifiká tambe ku loke Dios a hasi pa Hesus, nos Representante, e Tata ke hasi pa nos tambe. Esun ku a halsa Hesus na Su man drechi ke tambe pa nos sinta huntu ku Hesus riba Su trono (Rev. 3:21). E mensahe di Dios na nos den Hesus ta inkluí no solamente loke Hesus a bisa sino tambe loke e Tata a hasi a traves di djE i p’E, tur pa nos benefishi temporal i eterno.

Lesa Hebreonan 1:2-4. Kiko ta algun di e kosnan ku e pasashi akí ta siña nos tokante Hesus?

Den e sekshon akí nos lo enfoká riba e porshon ku ta bisa: “E ta e resplandor di e gloria di Dios i e impreshon eksakto di su naturalesa” (Hebr. 1:3, ESV).

Lesa Eksodo 24:16,17; Salmo 4:6; Salmo 36:9; i Salmo 89:15. Kon e tekstonan akí ta yuda nos komprondé kiko e gloria di Dios ta?

Den Tèstamènt Bieu, e gloria di Dios ta referí na Su presensia visibel entre Su pueblo (Eks. 16:7; Eks. 24:16,17; Lev. 9:23; Num. 14:10). E presensia akí ta ser asosiá hopi bia ku lus òf resplandor.

Skritura ta informá nos ku Hesus ta e lus kende a bin na e mundu akí pa revelá e gloria di Dios (Hebr. 1:3; Juan 1:6-9, 14-18; 2 Kor. 4:6). Pensa, por ehèmpel, riba kon Hesus a aparesé den e transfigurashon. “I El a ser transfigurá nan dilanti. Su kara tabata bria manera solo, i Su pañanan a bira mes blanku ku lus” (Mat. 17:2, NKJV).

Meskos ku solo no por ser persibí eksepto pa e resplandor di su lus, Dios ta konosí a traves di Hesus. For di nos perspektiva, e dosnan ta ún. Pa motibu ku e gloria di Dios ta lus mes, no tin diferensia, den ser aktual i karakter, entre Dios i Hesus, meskos ku no tin diferensia entre lus i su resplandor.

Hebreonan ta bisa tambe ku Hesus ta e “representashon eksakto” di e naturalesa di e Tata (Hebr. 1:3, NASB). E punto di e metáfora ta ku tin un korespondensia perfekto den ser, òf esensia, entre e Tata i e Yu hòmber. Nota ku sernan humano ta karga e imágen di Dios ma no Su naturalesa (Gen. 1:26). E Yu hòmber, sinembargo, ta kompartí e mesun naturalesa ku e Tata. Nada straño ku Hesus a bisa: “Es ku a mira Mi a mira e Tata” (Juan 14:9, NKJV).

Hebreonan ta afirmá ku Dios a krea e mundu "pa medio di" òf "dor di" Hesus i ku Hesus ta sostené e mundu ku Su palabra poderoso.

Lesa Isaias 44:24, Isaias 45:18, i Nehemias 9:6. Pa motibu ku den e Tèstamènt Bieu Señor a afirmá ku El a krea e mundu "su so" i ku E ta e "úniko Dios," kon nos por rekonsiliá e afirmashon akí ku e afirmashonnan den Tèstamènt Nobo ku Dios a krea e universo "pa medio di" Hesus (Hebr. 1:2,3)?

Algun hende ta pensa ku Hesus tabata simplemente e instrumento pa medio di ken Dios a krea. Esaki no ta posibel. Na promé lugá, pa Pablo, Hesus ta e Señor kende a krea e mundu; E no tabata un yudadó. Hebreonan 1:10 ta bisa ku Hesus ta e Señor ku a krea tera i e shelunan, i Pablo tambe ta apliká na djE loke Salmonan 102:25-27 ta bisa tokante di Señor (Yahweh) komo Kreador. Na di dos lugá, Hebreonan 2:10 ta bisa ku e universo a ser kreá "dor di" òf "pa medio di" e Tata. (Eksaktamente e mesun ekspreshonnan ku ta ser apliká na Hesus den Hebreonan 1:2). E Tata a krea i Hesus a krea (Hebr. 1:2,10; Hebr. 2:10). Tin un akuerdo perfekto entre Tata i Yu den propósito i aktividat. Esaki ta parti di e misterio di e Trinidat. Hesus a krea i Dios a krea, ma tin solamente Un Kreador, Dios, kua ta impliká ku Hesus ta Dios.

Mientrastantu Hebreonan 4:13 ta mustra ku Hesus ta Hues tambe. Su outoridat pa goberná i husga ta derivá for di e echo ku Dios a krea tur kos i ta sostené e universo (Isa. 44:24-28).

Hebreonan 1:3 i Kolosensenan 1:17 ta afirmá ku Hesus ta sostené tambe e universo. E akshon di sostenementu akí probablemente ta inkluí e idea di direkshon òf gobernashon. E palabra griego pheron (sosteniendo, kargando) ta ser usá pa deskribí e bientu suplando un boto (Echonan 27:15, 17) òf Dios dirigiendo e profetanan (2 Pe. 1:21). Por lo tantu, den un sentido real, Hesus no solamente a krea nos sino ta sostené nos tambe. Tur rosea, tur batimentu di kurason, tur momento di nos eksistensia ta ser hañá den djE, Hesus, e fundeshi di tur eksistensia kreá.

Hebreonan 1:5 ta reportá e siguiente palabranan di e Tata na Hesus: "Bo ta Mi Yu, Awe Mi a engendrá Bo" (NKJV). Kiko ta nifiká ku Hesus a ser "engendrá," i ki ora esaki a tuma lugá? Esaki no ta mustra ku, di un manera òf otro, Hesus a ser kreá pa Dios algun tempu leu den pasado, manera hopi ta kere?

Lesa Hebreonan 1:5; 2 Samuel 7:12-14; Salmo 2:7; i Lukas 1:31,32. Ki promesa na David Pablo a apliká den Hebreonan na Hesus?

Hesus a ser engendrá den sentido di ku El a ser instalá, òf "adoptá", pa Dios komo e gobernante primintí, e yu hòmber di David. E konsepto di e adopshon divino di e gobernante tabata komun den e mundu greko-romano i ost. E tabata duna e gobernante legitimidat i poder riba e tera.

Dios a primintí David, sinembargo, ku su Yu hòmber lo tabata e berdadero gobernante legítimo di e nashonnan. E lo a "adoptá" e yu hòmber di David komo Su propio Yu hòmber. A traves di e proseso akí e Rei davídiko lo a bira e protegido di Dios i Su eredero. Dios lo a derotá Su enemigunan i ta dun'E e nashonnan komo Su erensia (Salmo 89:27; Salmo 2:7, 8).

Manera nos por lesa den Romanonan 1:3,4 i Echonan 13:32,33, Hesus a ser revelá públikamente komo e Yu hòmber di Dios. E boutismo i transfigurashon di Hesus tabata momentonan ora Dios a identifiká i a anunsiá Hesus komo Su Yu hòmber (Mat. 3:17, Mat. 17:5).

Sinembargo, segun Tèstamènt Nobo, Hesus a bira e "Yu hòmber di Dios ku poder" ora El a ser resusitá i a sinta na man drechi di Dios. Tabata na e momento ei ku Dios a kumpli ku Su promesa na David di ku su yu hòmber lo a ser adoptá komo Dios Su propio Yu hòmber i Su trono riba e nashonnan lo ser establesé pa semper (2 Sam. 7:12-14).

Pues, Cesar (símbolo di Roma) no tabata e "yu hòmber di dios" legítimo, gobernante di e nashonnan. En kambio, Hesus tabata. E "engendramentu" di Hesus ta referí na e komienso di e gobernashon di Hesus riba e nashonnan, i no na e komienso di Su eksistensia, pasobra Hesus a eksistí semper. Nunka tabatin un tempu ku Hesus no tabata eksistí, pasobra E ta Dios.

De echo, Hebreonan 7:3 ta bisa ku Hesus no tin "prinsipio di dianan òf fin di bida" (kompará Hebr. 13:8) pasobra E ta eterno. Pues, e idea di Hesus komo e "Yu unigénito" di Dios no ta tratando ku e naturalesa di Kristu komo deidat sino ku Su ròl den e plan di salbashon. A traves di e enkarnashon, Kristu a kumpli ku tur e promesanan di e aliansa.