Hesus, Nos Ruman Hòmber Fiel

Lesa Levítiko 25:25-27,47-49. Ken por a redimí un persona ku a pèrdè su propiedat òf su Iibertat pa motibu di pobresa?

E lei di Moises tabata stipulá ku ora un persona tabata asina pober ku e mester a bende su propiedat, òf asta su mes, pa por a sobrebibí, e lo a risibí e propiedat ei òf su libertat bèk kada sinkuenta aña, den e aña di hubileo. E aña di hubileo tabata un "gran" aña di Sabat den kua debenan tabata ser pordoná, propiedatnan reklamá, i libertat proklamá na e koutivonan.

Sinembargo, sinkuenta aña tabata hopi tempu pa warda. Ta p'esei e lei di Moises tabata stipulá tambe ku e miembro di famia di mas serka por a paga e partí ku ainda tabata debe, i asina, reskatá su miembro di famia mas trempan.

E famia di mas serka tabata tambe esun ku tabata garantisá ku hustisia tabata ser hasí den kaso di un asesinato. E tabata e vengadó di e sanger ku lo a persiguí e asesino di su pariente serka i kastig'é (Num. 35:9-15).

Lesa Hebreonan 2:14-16. Kon Hesus i nos ta ser deskribí den e pasashi akí?

E pasashi akí ta deskribí nos komo katibunan di diabel, pero Hesus komo nos Redentor. Ora Adam a peka, sernan humano a kai bou di e poder di Satanas. Komo resultado, nos no tabatin e poder pa resistí piká (Rom. 7:14-24). Pió ainda, tabatin un kastigu di morto ku nos transgreshon tabata rekerí, ku nos no por a paga (Rom. 6:23). Por lo tantu, nos situashon tabata aparentemente desesperá.

Hesus, sinembargo, a adoptá nos naturalesa humano i a bira karni i sanger manera nos. El a bira nos pariente di mas serka i a redimí nos. E no tabatin bèrgwensa di yama nos "rumannan" (Hebr. 2:11, ESV).

Paradóhikamente, ora El a tuma nos naturalesa i a redimí nos, Hesus a revelá Su naturalesa divino tambe. Den Tèstamènt Bieu, e berdadero Redentor di Israel, nan pariente di mas serka, ta Yahweh (p.e., Salmo 19:14, Isa. 41:14, Isa. 43:14, Isa. 44:22, Jer. 31:11, Ose. 13:14).

Hebreonan ta bisa ku Hesus no tabatin bèrgwensa di yama nos Su rumannan (Hebr. 2:11). Apesar di ta un ku Dios, Hesus a brasa nos komo parti di Su famia. E solidaridat akí ta kontrastá ku e bèrgwensa públiko ku e lesadónan di Hebreonan a sufri den nan komunidatnan (Hebr. 10:33).

Lesa Hebreonan 11:24-26. Na ki manera e desishonnan di Moises ta ilustrá loke Hesus a hasi pa nos?

Bo a imaginá bo mes kiko e tabata nifiká pa Moises ser yamá "yu di e yu muhé di fárao? E tabata un figura poderoso den e imperio di mas poderoso di e tempu ei. El a risibí e entrenamentu sivil i militar di mas haltu i a bira un personahe remarkabel. Esteban ta bisa ku Moises tabata "di poder den palabra i echo" (Echonan 7:22). Ellen G. White tambe ta bisa ku e tabata "un faborito di e ehérsitonan di Egipto" i ku fárao "a determiná pa hasi su ñetu adoptivo su susesor riba e trono" (lesa Patriarchs and Prophets, p. 245). Sinembargo, Moises a bandoná tur e privilegio akí ora el a skohe pa identifiká su mes ku e israelitanan, un nashon di katibu sin edukashon i poder.

Lesa Mateo 10:32,33; 2 Timoteo 1:8,12; i Hebreonan 13:12-15. Kiko Dios ta pidi di nos?

Esaki tabata parti di e problema pa e lesadónan di Hebreonan. Despues di a sufri persekushon i rechaso, hopi di nan a kuminsá sinti bèrgwensa di Hesus. Pa medio di nan akshonnan algun tabata den peliger di pone Hesus "na bèrgwensa públiko" na lugá di honr'E (Hebr. 6:6). Por lo tantu, Pablo konstantemente ta yama e lesadónan na "tene duru" na e "konfeshon" di nan fe (Hebr. 4:14, Hebr. 10:23, NKJV).

Dios ke pa nos rekonosé Hesus komo nos Dios i nos ruman. Komo nos Redentor, Hesus a paga nos debe; komo nos ruman, Hesus a mustra nos e manera ku nos mester biba pa asina nos lo "sea konforme e imágen di Su Yu, pa E por ta e primogénito den hopi ruman" (Rom. 8:29).

Hebreonan ta bisa ku Hesus a adoptá nos naturalesa humano pa asina E por a representá nos i por a muri pa nos (Hebr. 2:9,14-16; Hebr. 10:5-10). Aki tin e fundeshi di e plan di salbashon i nos úniko speransa pa bida eterno.

Lesa Mateo 16:17, Galationan 1:16, 1 Korintionan 15:50, i Efesionans 6:12. Na ki defisiensianan di naturalesa humano e pasashinan akí ta relashoná e ekspreshon "karni i sanger"?

E ekspreshon "karni i sanger" ta enfatisá e fragilidat di e kondishon humano, su debilidat (Efe. 6:12), falta di komprondementu (Mat. 16:17, Gal. 1:16), i sumishon na morto (1 Kor. 15:50). Hebreonan ta bisa ku Hesus a ser hasí manera Su rumannan "den tur kos" (Hebr. 2:17). E ekspreshon akí ta nifiká ku Hesus a bira kompletamente humano (NIV). Hesus no simplemente tabata "parse” òf "parse di ta" humano; E tabata berdaderamente humano, berdaderamente un di nos.

Hebreonan ta bisa tambe, sinembargo, ku Hesus tabata diferente for di nos pa loke ta trata piká. Na promé lugá, Hesus no a kometé niun piká (Hebr. 4:15). Na di dos lugá, Hesus tabatin un naturalesa humano ku tabata "santu, inosente, sin mancha, separá di pekadornan" (Hebr. 7:26, ESV). Nos tur a peka, i nos tur tin tendensianan malu. Nos sklabitut na piká ta kuminsá profundo denter di nos propio naturalesa. Nos ta "karnal, bendé bou di piká" (Rom. 7:14; lesa tambe Rom. 7:15-20). Orguyo i otro motivashonnan pekaminoso hopi bia ta kontaminá asta nos bon akshonnan. Hesus Su naturalesa, sinembargo, no tabata manchá pa piká. Mester tabata asin’aki. Si Hesus tabata "karnal, bendé bou di piká," manera nos, E tambe lo tabatin mester di un Salbador. En kambio, Hesus a bin komo un Salbador i a ofresé Su mes komo un sakrifisio "sin mancha" na Dios pa nos (Hebr. 7:26-28, Hebr. 9:14, ESV).

Despues Hesus a destruí e poder di diabel dor di muri komo e ofrenda sin piká pa nos pikánan, asina hasiendo nos pordon i rekonsiliashon ku Dios posibel (Hebr. 2:14-17). Hesus a kibra tambe e poder di piká dor di duna nos e poder pa biba un bida hustu a traves di Su kumplimentu di e promesa di e aliansa nobo pa skirbi e lei den nos kurason (Hebr. 8:10). Asina, Hesus a derotá e enemigu i efektivamente a libra nos pa asina awor nos por "sirbi e Dios bibu" (Hebr. 9:14). E destrukshon final di Satanas, mientrastantu, lo bin na e huisio final (Rev. 20:1-3,10).

Lesa Hebreonan 2:10,17,18 i Hebreonan 5:8,9. Kiko tabata e funshon di sufrimentu den bida di Hesus?

E apòstel ta bisa ku Dios a hasi Hesus "perfekto pa medio di sufrimentu." E ekspreshon akí ta sorprendente. E outor a bisa ku Hesus ta "e resplandor di e gloria di Dios i e representashon eksakto di Su naturalesa" (Hebr. 1:3, ESV) i ku E ta sin piká, sin mancha, sin fayo, i santu (Hebr. 4:15, Hebr. 7:26-28, Hebr. 9:14, Hebr. 10:5-10). Hesus no tabatin mester di vense niun tipo di imperfekshon moral òf étiko. E tabata perfekto tantu moralmente komo étikamente.

Hebreonan ta bisa sí, sinembargo, ku Hesus a pasa dor di un proseso di "perfekshonamentu" ku a prove’E ku e medionan pa salba nos. Hesus a ser perfekshoná den sentido ku E tabata ekipá pa ta nos Salbador.

1. Hesus a ser "perfekshoná" pa medio di sufrimentu pa asina bira e Kapitan di nos salbashon (Hebr. 2:10). Hesus mester a muri riba e krus komo un sakrifisio pa asina e Tata por tabatin e medionan legal pa salba nos. Hesus tabata e ofrenda di sakrifisio perfekto, e úniko. Komo Dios, Hesus por a husga nos; pero, pa motibu di Su sakrifisio, Hesus tambe por salba nos.
2. Hesus a siña obediensia a traves di sufrimentu (Hebr. 5:8). Obediensia tabata nesesario pa dos kos. Na promé lugá, obediensia a hasi Su sakrifisio aseptabel (Hebr. 9:14, Hebr. 10:5-10 ). Na di dos lugá, Su sufrimentunan a kapasit’E pa bira nos ehèmpel (Hebr. 5:9). Hesus "a siña" obediensia pasobra nunka El a eksperensiá esaki promé. Komo Dios, ta ken lo E tabatin ku obedesé? Komo e Yu eterno, i unu ku Dios, E mester a ser obedesé komo e gobernador di e universo. P'esei, Hesus no a progresá di desobedensia na obediensia, sino di soberania i dominio na sumishon i obediensia. E Yu di Dios eksaltá a bira e Yu di Hende obediente.
3. Sufri tentashon i ser viktorioso a kapasitá Hesus komo un Sumo Saserdote miserikòrdioso i fiel (Hebr. 2:17, 18). Sufrimentu no a hasi Hesus mas miserikòrdioso. Al kontrario, tabata pa motibu di e miserikòrdia di Hesus ku El a hasi Su mes boluntario pa muri na e krus pa salba nos, pa kuminsá (Hebr. 10:5-10; kompará ku Rom. 5:7,8). Sinembargo, tabata pa medio di sufrimentu ku e realidat di e amor fraternal di Hesus a ser ekspresá i revelá berdaderamente.

Un otro motibu pakiko Hesus a adoptá nos naturalesa humano i a biba meimei di nos tabata pa E por tabata nos ehèmpel, e úniko kende por modelá pa nos kiko ta e manera korekto pa biba dilanti di Dios.

Lesa Hebreonan 12:1-4. Di akuerdo ku e apòstel, kon nos mester kore e kareda di e bida kristian?

Den e pasashi akí Hesus ta e kulminashon di un lista largu di personahenan ku e apòstel ta proveé komo ehèmpelnan di fe. E pasashi akí ta yama Hesus "e fundadó i kumplidó di fe" (ESV). E palabra griego archegos ("outor") por ser tradusí tambe komo "pionero." Hesus ta e pionero di e kareda den sentido ku E ta kore dilanti di e kreyentenan. De echo, Hebreonan 6:20 ta yama Hesus nos "prekursor." E palabra "kumplidó" ta duna e idea ku Hesus a desplegá fe den Dios den e forma di mas puru posibel. E pasashi akí ta siña tantu ku Hesus ta esun di promé ku a kore nos kareda ku éksito komo ku E ta esun ku a perfekshoná e arte di loke biba pa medio di fe ta trata di dje.

Hebreo 2:13 ta bisa: "I atrobe: 'Lo Mi pone Mi konfiansa den djE.' I atrobe: ‘Ata Ami i e yunan ku Dios a duna Mi' " (NKJV). Loke ta sosodiendo aki ta ku Hesus a bisa ku E lo a pone Su konfiansa den Dios. E referensia akí ta un alushon na Isaias 8:17,18.

Isaías a papia e palabranan akí dilanti di un menasa teribel di invashon di parti di nort di Israel i Siria (Isa. 7:1,2). Su fe tabata kontrastá e falta di fe di Akaz, e rei (2 Reinan 16: 5-18). Dios a eksortá Akaz pa konfia den djE i pa pidi un señal ku E por a libr'e (Isa. 7:1-11). Dios ya a primintié, komo un yu di David, ku lo E a protehá Akaz manera Su propio yu. Awor, Dios yen di grasia a ofresé Akaz pa konfirmá e promesa ei ku un señal. Akaz, sinembargo, a ninga di pidi pa un señal i, en kambio, a manda mensaheronan na Tiglat pileser, rei di Asiria, bisando, "Mi ta bo sirbidó i bo yu hòmber" (2 Reinan 16:7, NKJV). Ki tristu! Akaz a preferá di ta "yu hòmber" di Tiglat pileser na lugá di yu hòmber di Dios.

Hesus, sinembargo, a pone Su konfiansa den Dios i den Su promesa ku E lo pone Su enemigunan bou di Su pianan (Hebr. 1:13; Hebr. 10:12,13). Dios a hasi e mesun promesa na nos, i nos mester ker'E, meskos ku Hesus a hasi (Rom. 16:20).