Hesus, e Dunadó di Sosiegu

Lesa Génesis 15:13-21. Kiko Dios a primintí Abraham?

Ora Dios a libra Israel for di sklabitut na Egipto, Su propósito tabata pa trese Israel na e tera di Kanaan, kaminda nan lo tabata kapas pa sirbi i obedes’E libremente (Eks. 8:1; Salmo 105:43-45), inkluyendo gosa di e sosiegu di Sabat ku fárao a prohibí (Eks. 5:5). E tera di Kanaan tabata e erensia ku Dios a primintí na nan tata Abraham pasobra el a obedesé e bos di Dios i a bandoná su pais pa bai na e Tera Primintí (Gén. 11:31-12:4).

E propósito di Dios pa a duna e tera na Israel no tabata simplemente pa nan pose’é. Dios tabata tresiendo nan na Su mes (Eks. 19:4). Dios tabata ke pa nan biba den un tera kaminda nan lo por a disfrutá di un relashon íntimo kunE, sin ningun estorbo, i lo tabata un testimonio tambe na e mundu di ken e berdadero Dios tabata i kiko E tabata ofresé Su pueblo. Meskos ku e Sabat di kreashon, e tera di Kanaan tabata un kader ku a hasi un relashon íntimo ku nan Redentor posibel i e goso di Su bondat.

Den Deuteronomio 12:1-14 Señor a bisa e pueblo ku nan lo a drenta den e sosiegu, no simplemente ora nan a drenta e tera, sino ora nan a limpia e tera di idolatria. Despues di esei, Dios lo a mustra nan, esnan Skohí, un lugá kaminda E lo a biba meimei di nan.

Lesa Eksodo 20:8-11 i Deuteronomio 5:12-15. Kiko ta e dos kosnan ku e sosiegu di Sabat ta konmemorá, i kon nan ta relashoná ku otro?

Dios a konektá e Sabat di kreashon ku e liberashon for di Egipto. El a instruí Israel pa warda e Sabat komo un rekordatorio di kreashon i komo un rekordatorio di nan redenshon for di Egipto. Kreashon i redenshon tur dos ta enserá den e mandamentu di e Sabat. Meskos ku nos no a krea nos mes, nos no por redimí nos mes. E ta un obra ku solamente Dios por hasi, i dor di sosegá nos ta rekonosé nos dependensia riba djE, no solamente pa eksistensia sino tambe pa salbashon. Wardamentu di Sabat ta un ekspreshon poderoso di salbashon pa medio di fe so.

Lesa Hebreonan 3:12-19. Dikon Israel tabata inkapas pa drenta den e sosiegu primintí?

E storia tristu ta ku esnan ku a ser librá for di Egipto tabata inkapas pa drenta den e sosiegu ku Dios a primintí nan. Ora Israel a yega na Kades barnea, na e frontera di e Tera Primintí, nan tabata falta e fe ku nan tabatin mester. Numbernan 13 i 14 ta splika ku e spionnan israelita "a trese pa e yunan di Israel un mal rapòrt di e tera" (Num. 13:32, ESV). Nan a afirmá ku e tera tabata bon, pero a spièrta ku e habitantenan tabata fuerte i ku e statnan tabata fortifiká, i ku nan lo no tabata kapas pa konkist'é.

Hosue i Kaleb a bai di akuerdo ku e Tera tabata bon i no a diskutí e echo ku hendenan einan tabata fuerte i e statnan fortifiká. Pero nan a bisa ku Dios tabata ku nan i ku E lo a trese nan den e tera (Num. 14:7-9). Sinembargo, e pueblo ku a mira Dios destruí Egipto pa medio di plaganan (Eksodo 7-12), destruí e ehérsito di fárao den Laman Kòrá (Eksodo 14), proveé pan for di shelu (Eksodo 16) i awa for di e baranka (Eksodo 17), komo tambe manifestá Su presensia i direkshon kontinuo pa medio di e nubia (Eks. 40:36-38), nan a faya di konfia den djE awor. Ta un ironia trágiko ku e generashon ku a mira manifestashonnan asina poderoso di e poder di Dios a bira un símbolo di infidelidat (Neh. 9:15-17, Salmo 106:24-26, 1 Kor. 10:5-10).

Dios ta primintí Su yunan donnan ku ta mas ayá di alkanse humano. Ta p'esei nan ta basá riba grasia i ta aksesibel solamente pa medio di fe. Hebreonan 4:2 ta splika ku e promesa ku Israel a risibí "no tabata di probecho pa nan, pasobra e no a kompartí e fe di esnan ku a obedesé" (Hebr. 4:2, NIV).

Israel a biaha bai te na e fronteranan di e Tera Primintí komo un pueblo. Ora e pueblo a ser enfrentá ku rapòrtnan kontradiktorio, nan a identifiká ku esnan ku tabata falta fe. Fe, òf falta di esaki, ta kontagioso. Ta p'esei Hebreonan ta amonestá su lesadónan pa " enkurashá otro" (Hebr. 3:13), "pa move otro pa stima i bon obra" (Hebr. 10:24, ESV), i pa "mira pa ningun hende faya di optené e grasia di Dios" (Hebr. 12:15, ESV).

Lesa Hebreonan 4:4-8. Kiko ta nifikashon di drenta den sosiegu “awe” en konekshon ku warda e Sabat?

E inkredulidat di e generashon di desierto a prevení nan di drenta den e sosiegu ku Dios a primintí. Pero Dios a keda urgi Su pueblo pa drenta den e sosiegu akí i pa no hasi nan kurason duru. Pablo ta ripití vários bia ku e promesa di Dios "ta keda" (Hebr. 4:1,6,9, NKJV). E ta usa e verbonan griego kataleipo i apoleipo, enfatisando ku "e promesa di drenta den su [di Dios] sosiegu ainda ta para” (Hebr. 4:1, ESV). E echo ku e invitashon pa drenta den e sosiegu akí a ser ripití den tempu di David (Hebr. 4:6, 7, refiriendo na Salmo 95) tabata impliká tantu ku e promesa no a ser reklamá komo ku ainda e tabata disponibel. De echo, Pablo ta sugerí ku e eksperensia di berdadero sosiegu di Sabat tabata disponibel for di tempu di kreashon (Heb. 4:3, 4).

Dios ta invitá nos "awe" pa drenta den Su sosiegu. "Awe" ta un konsepto krusial den henter Skritura. Ora Moises a renobá e aliansa di Israel ku Dios na e frontera di e Tera Primintí, el a enfatisá e importansia di "awe" (Deut. 5:3, kompará Deut. 4:8, Deut. 6:6, etc.). Tabata un momento di reflekshon pa rekonosé e fieldat di Dios (Deut. 11:2-7). i un momento di desishon pa obedesé (Deut . 5:1-3). Di forma similar, Hosue a yama riba e pueblo di su tempu pa “skohe pa boso mes awe ken boso lo sirbi” (Hos. 24:15, NKJV).

Di mes manera, "awe" ta un momento di desishon pa nos, un momento di oportunidat, komo tambe peliger, manera e tabata semper pa e pueblo di Dios. (Lesa 2 Kor. 6:2). “Awe” ta aparesé sinku bia den Hebreonan 3 i 4. E ta enfatisá e importansia di skucha e bos di Dios (Hebr. 3:7, 15; 4:7) pasobra faya di skucha i kere e palabra di Dios ta hiba na desobedensia i e hasimentu duru di nos kurason. E lo por asta retrasá nos entrada den e Kanaan selestial, meskos ku el a tene e generashon di desierto for di drenta e Kanaan terenal.

Pero Hesus a derotá nos enemigunan (Hebr. 2:14-16) i a inougurá un aliansa nobo (Hebreonan 8-10). Por lo tantu, nos por "yega ku konfiansa na e trono di grasia” (Hebr. 4:14-16). E apelashon "awe" ta invitá nos pa rekonosé ku Dios tabata fiel na nos i a proveé nos ku tur motibu pa aseptá Su invitashon mesora, sin tardansa.

Lesa Hebreonan 3:11 i Hebreonan 4:1,3,5,10. Kon Dios ta karakterisá e sosiegu ku E ta invitá nos pa drenta den dje?

Tantu e mandamentu di Sabat den Eksodo 20:8-11 komo Moises su reformulashon di dje den Deuteronomio 5:12-15 ta invitá nos pa kòrda loke Dios a hasi pa nos. Manera nos a mira, loke Dios a skirbi riba tablanan di piedra ta mustra nos na e terminashon di Su obra di kreashon (Eks. 31:18; 34:28). Den Deuteronomio Israel ta ser ordená pa warda e Sabat mirando e obra di liberashon terminá di Dios, for di sklabitut egipsio. E Eksodo for di Egipto a mustra padilanti na e obra final di liberashon for di piká ku Kristu lo a logra riba e krus ora El a bisa: “Ta kumplí!” (Juan 19:30). Asina e Sabat ta bendishoná di forma dòbel i, de echo, ta spesialmente signifikante pa kristiannan.

Lesa Hebreonan 4:9-11,16. Kiko nos ta ser yamá pa hasi?

E sosiegu di Sabat ta selebrá e echo ku Dios a terminá, òf a finalisá, Su trabou di kreashon (Gen.2:1-3, Eks. 20:8-11) òf redenshon (Deut. 5:12-15). Di forma similar, Hesus Su inougurashon den e tèmpel selestial ta selebrá ku El a kaba di ofresé un sakrifisio perfekto pa nos salbashon (Hebr. 10:12-14).

Nota, Dios ta sosegá solamente ora El a sigurá nos bienestar. Na kreashon, Dios a sosegá ora El a finalisá e kreashon di e mundu. Mas despues, Dios a sosegá den e tèmpel solamente despues ku e konkistá di e tera ku El a primintí Abraham a ser kompletá a traves di e viktorianan di David, i Israel "tabata biba den seguridat" (1 Reinan 4:21-25, ESV; kompará ku Eks. 15:18-21, Deut. 11:24, 2 Sam. 8:1-14). Dios tabatin un kas trahá pa Su mes solamente despues ku Israel i e rei tabatin kasnan pa nan mes.

Kompará Eksodo 20:8-11, Deuteronomio 5:12-15, i Hebreonan 4:8-11. Ki diferensianan bo ta haña enkuanto di e nifikashon di e sosiegu di Sabat?

Manera nos a mira kaba, e tekstonan akí den Eksodo i Deuteronomio ta invitá nos pa wak pasado. Nan ta amonestá nos pa sosegá riba Sabat pa asina selebrá e logronan di Dios na kreashon i na Redenshon. Hebreonan 4:9-11, sinembargo, ta invitá nos pa wak futuro. E ta bisa nos ku Dios a prepará un sosiegu di Sabat ku ta den futuro. E ta sugerí un dimenshon nobo pa wardamentu di Sabat. Sosiegu di Sabat ta laga nos konmemorá no solamente e viktorianan di Dios den pasado, sino tambe ta selebrá e promesanan di Dios pa futuro.

E dimenshon futuro di wardamentu di Sabat semper tabata tei, pero hopi bia el a ser neglishá. Despues di e kaida, el a bin impliká e promesa ku Dios lo a restourá kreashon un dia na su gloria original pa medio di e Mesias. Dios a komandá nos pa selebrá Su aktonan di redenshon pa medio di wardamentu di e Sabat pasobra Sabat tabata mustra padilanti na e kulminashon di redenshon den un kreashon nobo. Wardamentu di Sabat ta un antisipashon di shelu den e mundu imperfekto akí.

Esaki semper tabata kla den tradishon hudiu. "Life of Adam and Eve", un obra komponé entre aña 100 promé ku Kristu i 200 despues di Kristu (den James H. Charlesworth, ed., The Old Testament Pseudepigrapha, [New Haven, London: Yale University Press, 1985], vol. 2, p. 18}, a bisa: "E di shete dia ta un señal di e resurekshon, e sosiegu di e era binidero." Un otro fuente hudiu antiguo a bisa: E era binidero ta "e dia kua ta kompletamente sosiegu di Sabat pa eternidat.” — Jacob Neusner, The Mishnah, a New Translation (New Haven: Yale University Press, 1988), p. 873. The Othiot of Rabbi Akiba, un fuente mas despues, a bisa: "Israel a bisa dilanti di Esun Santu, Bendishoná Sea E, ‘Maestro di e Mundu, si nos warda e mandamentunan, ki rekompensa nos lo tin?’ El a bisa nan: ‘E mundu ku ta bin.’ Nan a bis'E: ‘Mustra nos su semehansa.’ El a mustra nan e Sabat.” — Theodore Friedman, "The Sabbath Anticipation of Redemption," Judaism: A Quarterly Journal, vol. 16, p. 443, 444.

Sabat ta pa selebrashon, pa goso i gradisimentu. Ora nos warda e Sabat, nos ta indiká ku nos ta kere den e promesanan di Dios, ku nos ta aseptá Su don di grasia. Sabat ta fe bibu i vibrante. Pa loke ta trata akshonnan, wardamentu di Sabat ta probablemente e ekspreshon di mas pleno di nos konvikshon ku nos ta salbá pa grasia pa medio di fe den djE.