Hesus, E Saserdote Fiel

Lesa Hebreonan 5:1-10. Kiko ta e ròl di e saserdosio i, di akuerdo ku e pasashi akí, kon Hesus ta kumpli ku e ròl ei?

E propósito básiko di e saserdote levítiko tabata pa media entre hende pekaminoso i Dios. Saserdotenan tabata ser designá pa Dios pa asina ministrá na fabor di sernan humano; p'esei, nan mester tabata miserikòrdioso i komprensivo di debilidatnan humano.

Den Hebreonan 5:5–10, Pablo ta mustra ku Hesus ta kumpli perfektamente ku e propósitonan ei: Dios a design'E (Hebr. 5:5,6), i tambe Hesus ta komprondé nos pasobra E tambe a sufri (Hebr. 5:7,8).

Sinembargo, tin algun diferensia importante. Hesus no a ser "skohí for di entre hende" (Hebr. 5:1, ESV). Na lugá di esei, Hesus a adoptá naturalesa humano pa asina, entre otro, sirbi komo un saserdote na nos fabor. Hesus no a ofresé sakrifisionan pa Su propio pikánan (Hebr. 5:3) sino solamente pa nos pikánan, pasobra E tabata sin piká (Hebr. 4:15, Hebr. 7:26-28).

Hebreonan ta bisa ku Hesus tabata hasi orashon "na Esun ku tabata kapas pa salb'E for di morto, i El a ser tendé" (Hebr. 5:7, NKJV). Hebreonan tabata refiriendo na e segundo morto, for di kua Dios a salba Hesus ora El a resusit'E (Hebr. 13:20). Hebreonan ta bisa tambe ku Hesus "a siña obediensia a traves di e kosnan ku El a sufri" (Hebr. 5:8, ESV). Obediensia tabata nobo pa Hesus, no pasobra E tabata desobediente, sino pasobra E tabata Dios. Komo soberano riba e universo, Hesus no a obedesé niun hende; en kambio, tur hende a obedesé E.

E sufrimentunan i morto di Hesus na e krus ta un parti esensial di Su ministerio saserdotal. Sufrimentu no a hasi Hesus perfekto den sentido di ku El a mehorá moralmente òf étikamente. Sufrimentu no a hasiE miserikòrdioso. Al kontrario, Hesus a bin na e tera akí pasobra semper E tabata miserikòrdioso, motibu pa kua E tabatin kompashon di nos (Hebr. 2:17). Loke Hebreonan ke men ta ku tabata pa medio di sufrimentu ku e realidat di e amor fraternal di Hesus, e outentisidat di Su naturalesa humano, i e profundidat di Su sumishon komo representante di humanidat na boluntat di e Tata a ser ekspresá i revelá berdaderamente. El a ser "hasí perfekto" den sentido di ku Su sufrimentunan a kalifik'E pa ta nos Sumo Saserdote. Tabata Su bida di obediensia perfekto, i despues Su morto na e krus, kua ta konstituí e ofrenda di sakrifisio ku Hesus a presentá dilanti di e Tata komo nos saserdote.

Lesa Génesis 14:18-20 i Hebreonan 7:1-3. Ken tabata Melkisedek, i kon el a prefigurá Hesus?

Melkisedek tabata tantu un rei komo saserdote. Tambe e tabata superior na Abraham, ya ku Abraham tabata pag’é diesmo. Di mes manera, Hesus ta rei i saserdote (Hebr. 1:3); diferente for di Melkisedek, sinembargo, Hesus tabata sin piká (Hebr. 7:26-28).

Hebreonan 7:15 ta splika ku Hesus tabata saserdote "den e semehansa di Melkisedek" (MKJV). Esaki ta loke e ekspreshon anterior den Hebreonan, "di akuerdo ku e órden di Melkisedek" (Hebr. 5:6, NKJV), ta nifiká. Hesus no tabata un susesor di Melkisedek, sino Su saserdosio tabata similar na di dje.

Por ehèmpel, Pablo ta bisa ku Melkisedek tabata sin tata, mama, genealogia, nasementu, i morto. Algun a sugerí ku Melkisedek tabata un enkarnashon di Hesus den tempu di Abraham. Pero e pensamentu akí no ta pas ku e argumento di Hebreonan. Melkisedek "ta semehante na" Hesus (lesa ESV), kua ta impliká ku E tabata diferente for di Hesus (Hebr. 7:3).

Tambe a ser sugerí ku Melkisedek tabata un ser selestial, pero esaki lo a destruí e argumento di Hebreonan. Si Melkisedek lo tabata sin tata, mama, prinsipio, òf fin, lo e tabata Dios Mes. Esaki ta plantia un problema. E saserdioso selestial, kompletamente divino, di Melkisedek lo a presedé e ministerio di Hesus. Si esaki tabata e kaso, manera Hebreonan ta bisa, "ki nesesidat mas lo tabatin pa un otro saserdote lanta" (Hebr. 7:11, ESV)?

En kambio, Hebreonan ta usa e silensio di Skritura enkuanto di e nasementu, morto i genealogia di Melkisedek pa konstruí un tipologia, símbolo, pa e ministerio saserdotal di Hesus (Gen. 14:18–20) i ta revelá ku Hesus Mes tabata eterno. Den resúmen, Melkisedek tabata un rei-saserdote kananeo ku a sirbi komo un tipo di Kristu.

"Tabata Kristu kende tabata papia pa medio di Melkisedek, e saserdote di e Dios Haltísimo. Melkisedek no tabata Kristu, sino e tabata e bos di Dios den e mundu, e representante di e Tata. I a traves di tur e generashonnan di pasado, Kristu a papia; Kristu a guia Su pueblo, i tabata e lus di mundu.” — Ellen G. White, Selected Messages, buki 1, p. 409.

"P’esei, si perfekshon tabata bin pa medio di e saserdosio levítiko (pasobra bou di dje e pueblo a risibí e Lei), ki nesesidat mas tabatin pa un otro saserdote lo a lanta segun e órden di Melkisedek, i no ser yamá segun e órden di Aaron?" (Hebr. 7: 11, NKJV).

Saserdotenan ta mediadónan entre Dios i sernan humano. Hebreonan ta bisa, sinembargo, ku saserdotenan levítiko no por a proveé akseso kompleto i konfiabel na Dios pasobra nan no por a proveé perfekshon (Hebr. 7:11,18,19). Despues di tur kos, nan mes no tabata perfekto; asina, kon nan lo tabata por, di algun manera, otorgá perfekshon na otronan?

Tampoko e sakrifisionan di animal por a limpia konsenshi di e pekador. Nan propósito tabata pa mustra padilanti na e ministerio di Hesus i Su sakrifisio, e úniko ku lo a proveé berdadero purifikashon di piká (Hebr. 9:14; Hebr. 10:1-3,10–14). E funshon di e saserdotenan levítiko i nan sakrifisionan tabata temporal i ilustrativo. Pa medio di nan ministerio, Dios ker a guia e pueblo pa pone nan fe den e futuro ministerio di Hesus, "e Lamchi di Dios ku ta kita piká di mundu!" (Juan 1:29, NKJV).

Lesa Hebreonan 7:11-16. Dikon tabatin un nesesidat pa kambia e lei?

Hebreonan 7:12 ta splika ku e kambio di saserdosio a hasi un kambio den e lei nesesario. Dikon? Pasobra tabatin un lei hopi estrikto ku tabata prohibí un persona ku no tabata di e liña di Levi a traves di Aaron di sirbi komo un saserdote (Num. 3:10; Num. 16:39,40). Hebreonan 7:13,14 ta splika ku Hesus tabata di e liña di Huda, i asina e lei akí tabata prohibí E di ta un saserdote levítiko. Asina, Pablo ta argumentá ku e nombramentu di Hesus komo saserdote tabata nifiká ku Dios a kambia e lei di saserdosio.

E binida di Hesus tabata impliká tambe un kambio den e lei di sakrifisionan. Pekadornan tabata ser rekerí pa trese diferente tipo di sakrifisionan pa haña ekspiashon (Levítiko 1-7), pero awor ku Hesus a bin i a ofresé un sakrifisio perfekto, e lei di sakrifisio di animalnan tambe a ser poné un banda (Hebr. 10:17,18) komo resultado di un aliansa nobo i e revelashon mas kompleto di e plan di salbashon.

Lesa Hebreonan 7:16. Riba ki base Hesus a bira saserdote?

Hesus a risibí e saserdosio riba base di un bida indestruktibel i pasobra E tin un ministerio eterno. E implikashonnan di e echonan akí ta asombroso. E ta nifiká ku e ministerio di Hesus nunka lo ser superá òf surpasá. Hesus ta salba kompletamente, eternamente, "te den ekstremo" (Hebr. 7:25). E salbashon ku Hesus ta proveé ta total i definitivo. E ta alkansá e aspektonan di mas íntimo di naturalesa humano (Hebr. 4:12, Hebr. 9:14, Hebr. 10:1-4). E interseshon di Hesus dilanti di Dios ta enbolbí tur e benefishinan otorgá bou di e aliansa nobo.

E ta inkluí tambe muchu mas ku pordon di pikánan. E ta impliká pone e lei den nos kurason, hasi nos hende nobo den djE, i guia na e plamamentu di e evangelio na e mundu (Hebr. 8:10–12). Komo Un ku Dios i ku sernan humano, E ta representá nos dilanti di e Tata. Komo Un ku a ofresé Su bida komo sakrifisio, Hesus tin fabor inmovibel dilanti di Dios.

Lesa Hebreonan 7:22. Kiko Hesus ta den relashon ku e aliansa nobo?

Hesus ta e garantia di e aliansa nobo pasobra Dios a hasi un huramentu ku Hesus lo tabata un saserdote "pa semper" (Hebr. 7:21). Ta hopi fásil pa faya di komprondé e importansia di e huramentu akí. Pablo ya a referí na e huramentunan ku Dios a hasi na e generashon di desierto i na Abraham (Hebr. 3:7-11, Hebr. 6:13-15). E diferensia entre e huramentunan ei i e huramentu ku Dios a hasi na e Yu ta ku e huramentunan ei a ser hasí na sernan humano mortal. Huramentunan ta keda na vigor tanten ku e benefisiarionan ta na bida. E huramentu di Dios na e generashon di desierto i na Abraham tabata obligatorio tanten ku tabatin un generashon di desierto i desendientenan di Abraham (lesa Gal. 3:29).

Den e kaso di e Yu, sinembargo, kende Su bida ta "indestruktibel", e huramentu ku Dios a hasi na djE lo ta obligatorio pa semper. Un persona ku a para bòrg òf garantia di un otro tabata responsabel na e mesun kastigunan ku e persona pa ken el a para bòrg, inkluyendo morto. Sinembargo, e Tata a establesé Hesus komo un garantia pa nos ku E lo no keda sin kumpli ku Su promesanan. Ta asina sigur nos por ta di e salbashon ku nos a ser duná den Hesus.

Kompará Hebreonan 7:26. Kiko ta e sinku karakterístikanan di Hesus den e pasashi akí?

Hesus tabata "santu". Esaki ta nifiká ku Hesus tabata sin fayo den relashon ku Dios (Hebr. 2:18; Hebr. 4:15; Hebr. 5:7,8). E tradukshon griego bieu di Tèstamènt Bieu a usa e mesun término griego pa indiká esnan ku ta mantené nan relashon di pakto ku Dios i ku otronan.

Hesus tabata "sin mancha". El a permanesé puru i intakto pa maldat, apesar di a ser tentá den "tur kos" (Hebr. 4:15, Hebr. 2:18). E impekabilidat perfekto di Hesus ta importante pa Su saserdosio. E aliansa bieu tabata stipulá ku víktimanan di sakrifisio mester tabata "sin defekto" pa ta aseptabel pa Dios (Lev. 1:3,10, etc.). E obediensia perfekto di Hesus durante di Su bida terenal a hasi posibel pa E ofresé Su mes komo un sakrifisio aseptabel na Dios (Hebr. 9:14).

Hesus a ser "separá for di pekadornan" ora ku El a subi na shelu. E tempu di e verbo griego ta sugerí ku esaki ta un estado presente pa Hesus, ku a kuminsá na un punto spesífiko den tempu. Hesus a soportá hostilidat di pekadornan durante di Su bida terenal, pero E tabata viktorioso i despues a sinta na man drechi di Dios (Hebr. 12:2,3). Hesus ta tambe "separá for di pekadornan" pasobra E tabata perfektamente sin piká (Hebr. 4:15).

Hesus a ser "elevá ... ariba di e shelunan" (ESV). E ta nifiká ku Hesus a ser elevá ariba di tur kos ku tin i, p' esei, E ta unu ku Dios. Den e Salmonan, Dios ta esun ku ta ser "elevá ariba di e shelunan" (Salmo 57:5,11; Salmo 108:5).

Hesus tabata plenamente humano, pero E no tabata un ser humano pekaminoso manera nos (Hebr. 2:14-16, Hebr. 4:15). Hesus ta perfekto, no simplemente pasobra nunka El a peka sino pasobra E no a ser korumpí pa piká manera nos.

Sinembargo, pasobra E tabata plenamente humano tambe, E ta nos ehèmpel tambe. E ta mustra nos kon pa kore e kareda di bida (Hebr. 12:1-4). E ta e ehèmpel ku nos mester sigui (1 Pe. 2:21–23). Pasobra E ta "santu, inosente, sin mancha, apartá di pekadónan" (Hebr. 7:26, ESV), E ta nos Salbador, i nos tambe por reflehá Su karakter.