Hesus, E Anker di e Alma

Lesa Hebreonan 6:4,5. Kiko e kreyentenan a ser duná den Kristu miéntras nan tabata fiel na djE?

Pa ser "iluminá" ta nifiká pa eksperensiá kombershon (Hebr. 10:32). E ta referí na esnan ku a bira for di e "skuridat" di e poder di Satanas na e "lus" di Dios (Echonan 26:17,18). E ta impliká liberashon for di piká (Efe. 5:11) i ignoransia (1 Tes. 5:4,5). E forma verbal aki ta sugerí ku e iluminashon akí ta un akto di Dios alkansá a traves di Hesus, "e resplandor di Su gloria" (Hebr. 1:3, NKJV).

Pa “a purba e don selestial" i "a bira partísipenan di Spiritu Santu" (NKJV) ta ekspreshonnan sinónimo. E "don" di Dios por referí na Su grasia (Rom. 5:15) òf na Spiritu Santu, a traves di ken Dios ta duna e grasia ei (Echonan 2:38). Esnan ku a "purba" Spiritu Santu (Juan 7:37-39, 1 Kor. 12:13) a eksperensiá e "grasia" di Dios, kua ta inkluí e poder pa kumpli ku Su boluntat (Gal. 5:22,23).

Purba "e bondat di e palabra di Dios" (Hebr. 6:5, ESV) ta pa eksperensiá personalmente e bèrdat di e evangelio (1 Pe. 2:2,3). "E podernan di e siglo ku ta bin" ta referí na e milagernan ku Dios lo realisá pa kreyentenan den futuro: resurekshon (Juan 5:28,29), transformashon di nos kurpa, i bida eterno. Kreyentenan, sinembargo, ta kuminsá "purba" nan den presente. Nan a eksperensiá un resurekshon spiritual (Kol. 2:12,13), un mente renobá (Rom. 12:2), i bida eterno den Kristu (Juan 5:24).

Pablo probablemente tin den mente e generashon di desierto, kende a eksperensiá e grasia di Dios i Su salbashon. E generashon di desierto a ser "iluminá" pa e pilá di kandela (Neh. 9:12,19; Salmo 105:39), a disfrutá di e don selestial di mana (Eks. 16:15), a eksperensiá Spiritu Santu (Neh. 9:20), a purba e "bon palabra di Dios" (Hos. 21:45), i "e podernan di e siglo ku ta bin" den e "maravianan i señalnan" realisá den nan liberashon for di Egipto (Echonan 7:36). Pablo ta sugerí, sinembargo, ku meskos ku e generashon di desierto a apostatá di Dios, apesar di e evidensianan ei (Num. 14:1-35), e oudiensia di Hebreonan tabata den peliger di hasi meskos, apesar di tur e evidensianan di e fabor di Dios ku nan a disfrutá di dje.

Kompará Hebreonan 6:4-6, Mateo 16:24, Romanonan 6:6, Galationan 2:20, Galationan 5:24, i Galationan 6:14. Kiko e komparashon akí ta sugerí tokante loke ta nifiká krusifiká Kristu?

E teksto original na griego ta enfatisá e palabra "imposibel". Ta imposibel pa Dios restourá esnan ku a "kai afó" pasobra "nan ta krusifikando e Yu di Dios atrobe" (Hebr. 6:6, ESV). Pablo ke enfatisá ku no tin niun otro kaminda di salbashon eksepto a traves di Kristu (Echonan 4:12). Salbashon a traves di kualke otro medio ta mes imposibel ku ta "pa Dios gaña" (Hebr. 6:18) òf pa agradá Dios" sin fe" (Hebr. 11:6).

Krusifiká e Yu di Dios atrobe ta un ekspreshon figurativo ku ta trata na deskribí algu ku ta sosodé den e relashon personal entre Hesus i e kreyente.

Ora e lidernan religioso a krusifiká Hesus, nan a hasi esaki pasobra Hesus tabata representá un menasa na nan soberania i outonomia. Por lo tantu, nan a spera di eliminá Hesus komo persona i destruí un enemigu poderoso i peligroso. Di forma similar, e evangelio ta desafiá e soberania i determinashon propio di e individuo na e nivel di mas fundamental. E esensia di bida kristian ta pa tuma e krus i ninga bo mes (Mat. 16:24). Esaki ta nifiká krusifiká "e mundu" (Gal. 6:14), e "hòmber bieu" (Rom. 6:6), i "e karni ku su pashonnan i deseonan" (Gal. 5:24, ESV). E propósito di e bida kristian ta ku nos ta padesé un tipo di morto. A ménos ku nos eksperensiá e morto akí na e ami, nos no por risibí e bida nobo ku Dios ke duna nos (Rom. 6:1-11).

E lucha entre Hesus i e ami ta un lucha te na morto (Rom. 8:7,8; Gal. 5:17). E ta un bataya difísil ku no ta ser ganá mesora. E pasashi akí no ta referí na e persona ku tin biaha ta frakasá den e bataya kontra di e "hòmber bieu" i e "karni". E piká akí ta referí na e persona ku, despues di a eksperensiá salbashon genuino i loke e ta impliká (Hebr. 6:4,5), ta disidí ku Hesus ta un menasa na e tipo di bida ku e ke tin i ta bai na mata su relashon kunE. Es desir, tanten ku e persona no skohe kompletamente pa bira for di Kristu, ainda tin e speransa di salbashon.

E spièrtamentu di Hebreonan 6:4-6 ta hopi similar na e spièrtamentu hañá den Hebreonan 10:26-29. Pablo ta splika ku e rechaso di e sakrifisio di Hesus lo laga e lesadónan sin ningun medio pa pordon di piká pasobra no tin otro medio pa e pordon ei aparte di Hesus (Hebr. 10:1-14).

Lesa Hebreonan 10:26-29. Den ki tres maneranan e outor ta deskribí e piká pa kua no tin pordon?

E outor no ta bisa ku no tin ekspiashon pa kualke piká kometé despues di a risibí e konosementu di e bèrdat. Dios a apuntá Hesus komo nos Abogado (1 Juan 2:1). Pa medio di djE nos tin pordon di pikánan (1 Juan 1:9). E piká pa kua no tin sakrifisio òf ekspiashon ta ser deskribí komo trapa e Yu di Dios bou di bo pia, profaná e sanger di e Aliansa, i indigná Spiritu Santu (Hebr. 10:29). Laga nos repasá e nifikashon di e ekspreshonnan akí.

E ekspreshon "a trapa e Yu di Dios bou di pia" (Hebr. 10:29, NKJV) ta deskribí e rechaso di e gobièrnu di Hesus. E título "Yu di Dios" tabata rekordá e oudiensia ku Dios a instalá Hesus na Su man drechi i a primintí di hasi Su enemigunan "un banki" pa Su pianan (Hebr. 1:13; lesa tambe Hebr. 1:5-12,14, ESV). E trapamentu di Hesus bou di pia ta impliká ku e apóstata a trata Hesus komo un enemigu. Den konteksto di e argumento di e epístola (Hebr. 1:13), por ser impliká ku, pa loke ta trata e bida di e apóstata, Hesus a ser kitá for di e trono (ku ta okupá awor pa e apóstata mes) i poné komo e banki di pia en kambio. Esaki ta loke Lucifer ker a hasi den shelu (Isa. 14:12-14) i loke "esun di piká" lo a purba hasi den futuro (2 Tes. 2: 3,4, NRSV).

E ekspreshon "a profaná e sanger di e aliansa" ta referí na e rechaso di e sakrifisio di Hesus (Hebr. 9:15-22). E ta impliká ku e sanger di Hesus ta falta poder pa purifiká.

E ekspreshon "a insultá e Spiritu di grasia" ta masha poderoso. E término griego enybrisas ("insulto, indignashon") ta enserá manifestashon di arogansia, kual ta referí na "insolensia" òf "soberbia". E término akí ta para den kontraste fuerte ku e deskripshon di Spiritu Santu komo "e Spiritu di grasia". E ta impliká ku e apóstata a respondé na e oferta di grasia di Dios ku un insulto.

E apóstata ta den un posishon sin base. E ta rechasá Hesus, Su sakrifisio, i Spiritu Santu.

Despues di e spièrtamentu fuerte i sinsero di Hebreonan 6:4-8, Pablo ta ekspresá konfiansa ku e lesadónan no a apartá di e Yu, ni lo hasi esaki den futuro. E ta kere ku su oudiensia lo risibí e spièrtamentu i produsí e frutanan apropiá. Nan ta manera e " tera”, ku ta ser kultivá pa Dios i ta produsí e frutanan ku E ta spera. E hendenan akí lo risibí e bendishon di Dios (Hebr. 6:7), kua ta "salbashon" (Hebr. 6:9).

Lesa Hebreonan 6:9-12. Numerá e kosnan bon ku e oudiensia a hasi i ta sigui hasi i splika kiko nan ta nifiká.

Kreyentenan ta mustra nan amor pa ku e "nòmber” di Dios, pues, pa ku Dios mes, pa medio di nan servisio na e santunan. Esakinan no tabata akshonnan isolá den pasado, sino akshonnan sostené ku a ekstendé te den presente. Aktonan eksepshonal no ta revelá e berdadero karakter di un persona. E evidensia di mas pisá di amor pa ku Dios no ta aktonan "religioso" pa definishon, sino aktonan di amor pa ku otro sernan humano, spesialmente esnan ku ta marginá (Mat. 10:42, Mat. 25:31-46). Por lo tantu, Pablo ta atvertí kreyentenan pa no "lubidá" di hasi bon (Hebr. 13:2,16).

Wak Hebreonan 6:12. E ta atvertí kontra nan biramentu "monótono" òf "floho" (ESV), ku ta karakterisá esnan ku ta faya di madurá i ku ta den peliger di alehá nan mes (Hebr. 5:11, Hebr. 6:12). Speransa no ta ser tené bibu pa medio di ehersisionan intelektual di fe, sino pa medio di fe ekspresá den aktonan di amor (Rom. 13:8-10).

Pablo ke pa·e lesadónan imitá esnan ku, pa medio di fe i pasenshi, ta eredá e promesanan. Ya el a presentá e generashon di desierto komo un ehèmpel negativo di esnan ku, pa falta di fe i perseveransia, a keda sin eredá loke a ser primintí. Despues e ta presentá Abraham (Hebr. 6:13-15) komo un ehèmpel di un ku, pa medio di "fe i pasenshi", a eredá e promesanan. E lista di ehemplarnan positivo ta ser hasí mas largu ku e hendenan di fe den Hebreonan 11, i e ta kulminá ku Hesus den Hebreo 12 komo e ehèmpel di mas grandi di fe i pasenshi (Hebr. 12:1-4). Den Revelashon 14:12, fe, pasenshi, i wardamentu di mandamentu ta karakterístikanan di e santunan den e último dianan.

Pablo ta kulminá su spièrtamentu kontra apostasia i enkurashamentu pa ku amor i fe ku un eksposishon bunita i elevá di siguridat den Kristu.

Lesa Hebreonan 6:17-20. Kon Dios a garantisá Su promesanan na nos?

Dios a garantisá Su promesanan na nos den vários manera. Na promé lugá, Dios a garantisá Su promesa ku un huramentu (Hebr. 6:17). Di akuerdo ku Skritura, e huramentunan di Dios na Abraham i David a bira e base fundamental di konfiansa den e fabor permanente di Dios pa Israel. Ora Moises a trata na sigurá e pordon di Dios pa Israel despues di e apostasia ku e bisé di oro, el a referí na e huramentu di Dios na Abraham (lesa Eks. 32:11-14, Gen. 22:16-18). E fortalesa impliká di su súplika tabata ku e huramentu di Dios tabata irevokabel (Rom. 9:4; Rom. 11:28,29).

Di forma similar, ora e salmista a intersedé dilanti di Dios pa Israel, el a reklamá e huramentu di Dios na David. Dios a bisa "Lo Mi no violá Mi aliansa òf kambia e palabra ku a sali di Mi lepnan. Un bia pa semper Mi a hura pa Mi santidat; lo Mi no gaña David. Su desendientenan lo dura pa semper, su trono mes largu ku e solo Mi dilanti. Manera e luna e lo ta establesé pa semper, un testigu fiel den shelu" (Salmo 89:34-37, ESV). Di akuerdo ku Tèstamènt Nobo, ambos huramentu a ser kumplí den Hesus, e simia di Abraham, kende a asendé i a sinta riba e trono di David (Gal. 3:13-16; Lukas 1:31-33,54,55).

Na di dos lugá, Dios a garantisá Su promesanan na nos pa medio di e akto di pone Hesus sinta na Su man drechi. E asenshon di Hesus tin e propósito di konfirmá e promesa hasí na e kreyentenan pasobra Hesus a subi bai ariba komo un "prekursor na nos fabor" (Hebr. 6:20, ESV énfasis di e outor). Asina, e asenshon ta revelá na nos e siguransa di e salbashon di Dios pa nos. Dios a hiba Hesus na gloria a traves di e sufrimentu di “morto pa tur hende", pa asina E por a hiba "hopi yu na gloria" (Hebr. 2:9,10, NRSV). E presensia di Hesus dilanti di e Tata ta e "anker di e alma" (Hebr. 6:19), ku a ser mará na e trono di Dios. E honor di e gobièrnu di Dios a ser supordiná riba e kumplimentu di Su promesa na nos pa medio di Hesus. Ki mas siguransa nos tin mester?