Hesus ta Habri e Kaminda A Traves di e Velo

Lesa Hebreonan 9:24. Di akuerdo ku e pasashi akí, kiko tabata e propósito di e asenshon di Hesus pa shelu?

Dios a instruí Israel ku nan hende hòmbernan mester a subi bai Herusalèm tres bia tur aña pa "aparesé dilanti di Señor" ku un ofrenda. E tempunan señalá tabata e fiesta di Pasku (Pan sin Zürdeg), e Fiesta di Simannan (Pentekòste), i e Fiesta di Tabernakelnan (Eks. 23:14–17, Deut. 16:16). Pasku tabata selebrá e liberashon di Israel for di Egipto. Pentekòste tabata selebrá e kosecha di puspas i, pa tempu di Tèstamènt Nobo, e tabata ser asosiá ku e dunamentu di e lei na Sinai. E Fiesta di Tabernakelnan tabata selebrá e kuido di Dios pa Israel durante di nan estadia den desierto. Di akuerdo ku Tèstamènt Nobo, tur e fiestanan di Tèstamènt Bieu tin nifikashon profétiko tambe.

Hebreonan 9:24 ta deskribí e asenshon di Hesus den presensia di e Tata. El a yega na e santuario selestial, "esun berdadero", pa asina "aparesé" dilanti di Dios ku un mihó sakrifisio (Hebr. 9:23,24, NIV), Su propio sanger.

Hesus a kumpli ku e nifikashon profétiko di e fiestanan di peregrinashon ku eksaktitut asombroso. El a muri riba e dia di preparashon di e Pasku na e di nuebe ora, e momento den kua e lamchinan di Pasku tabata ser sakrifiká (Juan 19:14, Mat. 27:45–50). Hesus a resusitá riba e di tres dia i a subi na shelu pa risibí siguransa ku Su sakrifisio a ser aseptá (Juan 20:17, 1 Kor. 15:20), ora e saserdote mester a zoya e bohí di puspas hechu komo e promé frutanan (Lev. 23:10–12). Despues, El a asendé 40 dia despues pa sinta na e man drechi di Dios i inougurá e aliansa nobo riba e Dia di Pentekòste (Echonan 1, 2).

E propósito di peregrinashon den Israel antiguo tabata pa "kontemplá kara di Dios" (Salmo 42:2, NRSV). Esaki tabata nifiká eksperensiá e fabor di Dios (Salmo 17:15). Di forma similar, e ekspreshon hebreo pa "buska e kara di Dios" tabata nifiká pidi Dios yudansa (2 Kron. 7:14, Salmo 27:8, Salmo 105:4). Esaki ta e sentido, den Hebreonan, di Hesus Su asenshon. Hesus a subi na shelu tambe komo nos prekursor den e presensia di Dios (Hebr. 6:19,20). El a hasi realidat e promesa pa e kreyentenan ku ta biaha "buskando un patria", deseando "un mihó pais" mirando "padilanti na e stat ... ku su arkitekto i konstruktor ta Dios" (Hebr. 11: 10,13–16, NRSV).

Lesa Hebrews 12:18-21. Kiko tabata e eksperensia di Israel na Seru Sinai?

Ora Dios a yama Israel for di Egipto, Su plan tabata pa krea un relashon personal i íntimo ku nan. El a bisa: "Boso a mira loke Mi a hasi ku e egipsionan, i kon Mi a karga boso riba hala di águila i a trese boso serka Mi" (Eks. 19:3,4, NKJV).

Asina, a traves di Moises Dios a duna e instrukshonnan nesesario pa prepará e pueblo pa topa kunE. E hendenan mester a konsagrá nan mes promé (Eks. 19:10–15). Esnan ku tabata subi na pia di e seru sin preparashon lo a muri. Sinembargo, unabes e pueblo a prepará su mes pa dos dia, e ora ei "ora e trompèt zona un zonidu largu” riba e di tres dia, Dios a instruí pa e pueblo "lo subi riba e seru" (Eks. 19:13, ESV). E tabata ke pa nan tin e eksperensia ku Moises i e lidernan di e pueblo lo tabatin ora nan subi riba e seru i "a mira Dios, i a kome i a bebe" den Su presensia (Eks. 24:9–11, ESV). E pueblo a rekonosé despues ku nan a mira e gloria di Dios i ku tabata posibel pa Dios papia "ku hende, i hende ta biba ainda" (Deut. 5:24, ESV). Pero, ora e momento a yega, nan tabata falta fe. Moises a splika añanan despues: "boso tabatin miedu pa motibu di e kandela, i boso no a subi bai riba e seru" (Deut. 5:5, ESV). Na lugá di esei, nan a pidi Moises pa bira nan intermediario (Deut. 5:25-27, kompará ku Eks. 20:18–21).

E manifestashon di Dios di Su santidat na Seru Sinai tabata pa siña e pueblo pa "teme", òf respet'E. E "temor di Señor" ta hiba na bida, sabiduria, i honor (Deut. 5:25–27, Deut. 4: 10; kompará ku Salmo 111:10, Prov. 1:7, Prov. 9:10, Prov. 10:27), i tambe na siña ku E ta miserikòrdioso i yen di grasia (Eks. 34:4-8). Por lo tantu, miéntras Dios tabata ke pa Israel bini serka djE, e pueblo a haña miedu i a pidi Moises pa ta nan intermediario. E deskripshon den Hebreonan di e eventonan na Sinai ta sigui prinsipalmente e rekordatorio di Moises na e pueblo di nan falta di fe i nan apostasia ku e bisé di oro, i kon e tabatin miedu di topa ku Dios pa motibu di nan piká (Deut. 9:19). E reakshon di e pueblo no tabata e plan di Dios pa nan; e tabata, en kambio, resultado di nan falta di fe.

Velonan tin un dòbel funshon. E término ku Hebreonan ta usa pa velo (katepetasma) por tabata referí na e kortina di e kurá (Eks. 38:18), e skèrmu na entrada di e departamentu eksterno di e santuario (Eks. 36:37), òf e velo interior ku tabata separá e Lugá Santu for di e Lugá Santísimo (Eks. 26:31–35). E tres velonan akí tabata tantu entradanan komo límitenan ku solamente algun hende por a krusa.

Lesa Levítiko 16:1,2 i Levítiko 10:1-3. Ki atvertensia nos tin den e pasashinan akí?

E velo tabata un protekshon pa e saserdotenan miéntras nan tabata ministrá dilanti di un Dios santu. Despues di e piká di e bisé di oro, Dios a bisa Moises ku E lo no a kompañá nan riba e kaminda pa e Tera Primintí pa E no kaba ku nan pasobra nan tabata un "pueblo tèrko" (Eks. 33:3, NKJV). Por lo tantu, Moises a kita e tènt di reunion i a arm’é leu, pafó di e kampamentu (Eks. 33:7). Despues ku Moises a intersedé, sinembargo, Dios a bai di akuerdo pa bai meimei di nan (Eks. 33:12–20), ma El a establesé vários midí pa protehá e pueblo miéntras E tabata biba meimei di nan.

Por ehèmpel, Israel tabata kampa den un órden estrikto ku tabata krea un kuadrángulo bashí meimei kaminda e tabernakel a ser harmá. Ademas, e levitanan tabata kampa rònt di e tabernakel pa asina protehá e santuario i su mobilario for di invashon pa strañeronan (Num. 1:51, Num. 3:10). Nan tabata, de echo, un tipo di velo humano ku tabata protehá e pueblo di Israel: "Ma e levitanan lo kampa rònt di e tabernakel di testimonio, pa no por tin furia riba e kongregashon di e pueblo di Israel. I e levitanan lo tene warda riba e tabernakel di testimonio" (Num. 1:53, ESV).

Hesus, komo nos Saserdote, tambe tabata nos velo. Pa medio di Su enkarnashon, Dios a lanta Su tènt meimei di nos i a hasi posibel pa nos kontemplá Su gloria (Juan 1:14–18). El a hasi posibel pa un Dios santu biba meimei di un pueblo imperfekto.

Lesa Hebreonan 10:19-22. Ki invitashon nos tin den e pasashi akí?

E buki di Hebreonan ta argumentá ku Hesus a drenta den e santuario selestial i ta invitá nos pa sigui Su direkshon. E idea akí ta di akuerdo ku e konsepto introdusí anteriormente ku Hesus ta e "kapitan" i prekursor di e kreyentenan (Hebr. 2:10; Hebr. 6:19,20; Hebr. 12:2). E "kaminda nobo i bibu" ta e aliansa nobo ku Hesus a inougurá ku Su sakrifisio i asenshon. E ekspreshon "nobo i bibu” ta kontrastá ku e deskripshon di e aliansa bieu komo "opsoleto i birando bieu" (Hebr. 8:13, NKJV). Ta e aliansa nobo, ku a proveé pordon di piká i a pone e lei den nos kurason, ku ta hasi posibel pa nos aserká Dios ku konfiansa, no pa motibu di nos mes òf kualke kos ku nos a hasi, sino solamente pa motibu di loke Hesus a hasi pa nos dor di kumpli ku tur e obligashonnan di e aliansa.

Hebreonan a mustra ku e inougurashon di e aliansa bieu tabata enbolbí e inougurashon di e santuario i e konsagrashon di e saserdotenan (Hebr. 9:18–21; kompará ku Eksodo 40; Levítiko 8,9). E propósito di e aliansa tabata pa krea un relashon íntimo entre Dios i Su pueblo (Eks. 19:4–6). Ora Israel a aseptá e relashon akí, Dios inmediatamente a ordená pa e santuario ser konstruí pa E por a biba meimei di nan. E inougurashon di e santuario i e presensia di Dios meimei di Su pueblo tabata e momento ora ku e aliansa entre Dios i Israel a ser kompletá.

Mesun kos ta bèrdat di e aliansa nobo. E aliansa nobo tambe ta impliká e inougurashon di e ministerio saserdotal di Hesus na nos fabor (Hebr. 5:1–10, Hebr. 7:1–8:13).

E asenshon di Hesus dilanti di Dios a inougurá un era nobo pa e pueblo di Dios. Zakarias 3 ta menshoná ku Satanas tabata den presensia di Dios pa akusá e pueblo di Dios, kende tabata ser representá pa e sumo saserdote Hosué. E akusadó akí ta e mesun ku a lanta preguntanan tokante lealtat di Job na Dios (Job 1,2). Ku e sakrifisio di Hesus, sinembargo, Satanas a ser tirá for di shelu (Rev. 12:7–12, kompará ku Juan 12:31, Juan 16:11). Awor ta Hesus ken ta intersedé pa nos i pa medio di Su sakrifisio i fieldat ta reklamá salbashon pa nos!

Lesa Hebreonan 12:22-24. Den ki sentido nos a yega na e Herusalèm selestial den e presensia di Dios?

Ta ser argumentá ku kreyentenan "a bini" na Seru Sion, e Herusalèm selestial, pa medio di fe. Den e sentido akí, nan eksperensia ta antisipá e futuro. Por lo tantu, e Herusalèm selestial ta pertenesé na e reino di e kosnan "sperá p’e" i "no mirá" pero sinembargo sigurá na nos pa medio di fe (Hebr. 11:1).

Miéntras ta bèrdat, esaki no ta e nifikashon kompleto di e pasashi akí. Nos tambe a yega na Seru Sion, den e presensia mes di Dios, a traves di nos representante Hesus (Efe. 2:5,6; Kol. 3:1). E asenshon di Hesus no ta un kuestion di fe, sino di echo. Ta e dimenshon históriko akí di e asenshon di Hesus ku ta proveé forsa konvisente na e eksortashon di Hebreonan pa tene duru na nos konfeshon (Hebr. 4:14, Hebr. 10:23). Pablo ta bisa: "Komo ku ... nos tin anto un gran Sumo Saserdote Kende a traspasá e shelunan, ... laga nos aserká ... ku konfiansa" (Hebr. 4:14,16, ESV).

E propósito di Dios lo ser kumplí no solamente den Hesus, sinembargo, sino den nos tambe. Nos a bisa ku e asenshon di Hesus a kumpli ku e tipologia di e promé dos peregrinashonnan anual di Israel, Pasku i Pentekòste. Di akuerdo ku Hebreonan i e buki di Revelashon, e último peregrinashon, e Fiesta di Tabernakelnan, ainda tin ku ser kumplí. Nos lo selebr'é huntu ku Hesus, ora nos ta den e "stat ... kua su arkitekto i konstruktor ta Dios," den e patria selestial (Hebr. 11:10 [NIV], 13–16). Nos lo no konstruí tabernakelnan, sino e tabernakel, òf tènt, di Dios lo baha for di shelu, i nos lo biba kunE pa semper (Rev. 7:15–17; Rev. 21:1–4; Rev. 22:1–5; Num. 6:24–26).