Risibiendo un Reino Ku No Por Ser Sakudí

Lesa Hebreonan 12:22-24. Kiko Pablo ta deskribí akinan?

Hebreonan ta afirmá ku nos a bin na Seru Sion i ta partisipá den un gran selebrashon. "Ma boso a yega na Seru Sion i na e stat di e Dios bibu, e Herusalèm selestial, i na innumerabel angelnan den reunion festivo" (Hebr. 12:22, ESV). Nos a bin pa medio di fe den persona di nos representante, Hesus. Den e selebrashon akí nos ta haña un ehérsito innumerabel di angelnan, Dios Mes, i Hesus, Kende ta e sentro di e selebrashon. Nos ta bini komo parti di e "asamblea di e primogénitonan, kendenan ta inskribí den shelu" (Hebr. 12:23, ESV). Nos nòmbernan ta inskribí den e bukinan di shelu, kaminda e pueblo profeso Dios ta registrá (Eks. 32:32, Salmo 56:8, Dan. 12:1, Mal. 3:16, Lukas 10:20, Rev. 13:8, Rev. 17:8).

Nos ta e "primogénitonan" pasobra nos ta kompartí e erensia di e Primogénito pa ekselensia, Hesus (Hebr. 1:6). Por lo tantu, nos no a bini komo invitadonan sino komo siudadanonan (kompará ku Fil. 3:20). Tambe nos ta ser deskribí komo "e spiritunan di esnan hustu hasí perfekto" (Hebr. 12:23, ESV). E ekspreshon akí ta un figura di lenguahe den kua un dimenshon di nos naturalesa humano ta para pa e totalidat. E ta análogo na e ekspreshon "e Tata di spiritunan" den Hebreonan 12:9, ku ta referí na Dios komo e Tata di nos tur, sernan humano ku ta spiritual di naturalesa.

E reunion festivo ta selebrá inougurashon di e gobièrnu real di Hesus, di Su ministerio saserdotal, i e inougurashon di e aliansa nobo. Den Hebreonan, Seru Sion ta e lugá kaminda tur e eventonan akí ta tuma lugá. Tres di e salmonan den Hebreonan 1:5-14 ta deskribí e entronisashon di e Yu i tin Seru Sion komo e lugá kaminda el a tuma lugá (Salmo 2:6,7; Salmo 110:1,2; Salmo 102:21-27).

Seru Sion ta tambe e lugá kaminda e Yu a ser proklamá "saserdote pa semper" (Hebr. 5:6), un sita di Salmo 110:4. Di akuerdo ku Salmo 110, e proklamashon di e Yu komo Sumo Saserdote ta tuma lugá na Seru Sion tambe (Salmo 110:2). Finalmente, Hebreonan ta argumentá ku e inougurashon di e saserdosio di Hesus ta marka tambe e inougurashon di e aliansa nobo (Hebr. 7:11-22). Por lo tantu, Seru Sion ta tambe e lugá kaminda e aliansa nobo a ser ratifiká. Hebreonan 12:22-24 ta deskribí, anto, e reunion festivo ku a tuma lugá den shelu ora ku Hesus a asendé.

Lesa Hebreonan 12:23. Si esaki ta un selebrashon, dikon Dios ta ser deskribí komo un hues? Kon un hues por ta parti di òf un motibu pa un selebrashon? Lesa tambe Daniel 7:9,10,13-22 .

E selebrashon deskribí den Hebreonan 12:22-24 ta aludí na un huisio futuro. Dios, e hues, ta presedí, i bukinan ta ser usá, i e resultado di e huisio futuro akí for di e bukinan ta ku e pueblo di Dios ta risibí e reino (Hebr. 12:28).

E esena akí ta wak bèk na e gran huisio pre-Atvènt deskribí den Daniel 7, ku ta deskribí un esena di huisio kaminda Dios, e "Ansiano di Dianan" (Dan. 7:9), ta sintá riba un trono trahá di kandela i ta rondoná ku "dies mil biaha dies mil" (Dan. 7:10) angel. Bukinan ta ser habrí (Dan. 7:10), i e huisio ta ser disidí na fabor di "e santunan di e Haltísimo", ku e ora ei "a poderá di e reino" (Dan. 7:22).

Di mes manera, Hebreonan 12:22-29 ta deskribí un esena di huisio na Seru Sion, e Herusalèm selestial, kaminda Dios, "e Hues di tur hende", ta rondoná pa "míles riba míles" di angel (NIV). E esena tambe ta unu ardiente (Hebr. 12:29). E ta inkluí bukinan pasobra e santunan ta ser "inskribí" den nan (Hebr. 12:23, ESV), kua ta impliká un huisio faborabel pa e santunan.

Hesus ta den sentro di e esena (Hebr. 12:24). El a ser deskribí komo e Yu di Hende den Hebreonan 2, kende a ser "koroná ku gloria i honor" despues di a purba "morto" na nos fabor (Hebr. 2:9, ESV). Di akuerdo ku Hebreonan 2:10, e "yu di hende" (lesa Hebr. 2:6, ESV) a sufrí pa asina E por a trese "hopi yu na gloria" (ESV); es desir, pa kreyentenan tambe por tabata kapas di ser "koroná ku gloria i honor". E "Yu" awor a trese kreyentenan na Sion, e Herusalèm selestial, pa medio di e benefishinan di e aliansa nobo (Hebr. 12:22-24), kaminda nan ta ser primintí di risibí un reino (Hebr. 12:28).

E huisio akí ta, anto, realmente bon notisia pa kreyentenan pasobra e ta un huisio ku ta dikta na nan fabor. E ta vindiká nan. E ta un huisio ku ta derotá nan atversario, e dragon, ku ta tras di.e bestianan teribel ku a persiguí kreyentenan den pasado (Daniel 7)·i lo hasi asina den futuro (Revelashon 13).

Despues di deskribí e reunion festivo ku ta tumando lugá den shelu, Pablo ta atvertí e lesadónan ku nan mester pone atenshon na e bos di Dios pasobra Dios lo sakudí "sinembargo un biaha mas ... no solamente tera, sino tambe e shelunan" (Hebr. 12:26, ESV). Pablo ta bisando ku aunke Hesus a ser pone riba trono den shelu, nos salbashon no a ser perfekshoná. Nos mester pone atenshon pasobra un evento importante mester tuma lugá ainda.

Kompará Hageo 2:6-9,20-22; Salmo 96:9,10; Salmo 99:1; i Hebreonan 12:26,27. Kiko ta e propósito ku Dios ta sakudí e shelunan i e tera? Kiko esaki ta nifiká?

Den Tèstamènt Bieu, e sakudimentu di tera tabata un figura komun pa e presensia di Dios, kende ta aparesé pa libra Su pueblo. Ora Debora i Barak a bringa kontra Sisera, Dios a bringa for di shelu na nan fabor (Huesnan 5:20). Esaki ta ser deskribí komo un temblor poderoso, un sakudimentu di e tera i serunan pa motibu di e presensia di Dios (Huesnan 5:4,5). Nos ta haña e mesun ilustrashon akí ta presentá den henter Tèstamènt Bieu ora ku Dios aparesé pa libra esnan oprimí (Salmo. 68:7,8; Salmo. 60:2; Salmo. 77:17,18). Por lo tantu, e sakudimentu a bira un señal di e huisio di Dios ora E ta afirmá Su outoridat riba e pueblonan di tera. E profetanan a predesí ku esaki lo a sosodé riba e Dia di Señor (Isa. 13:13, Isa. 24:18-23).

Pa Hebreonan, e "sakudimentu" di shelu i tera ta referí na e destrukshon di e enemigunan di Dios. Esaki ta loke Dios a primintí ora Hesus a subi trono. Dios a bis'E: "Sinta na Mi man drechi te ora Mi hasi Bo enemigunan un banki pa Bo pianan" (Heb. 1:13, ESV). Por lo tantu, Hesus a derotá e enemigu (Hebr. 2:14-16) i a subi trono (Hebr. 1:5-14), pero e enemigunan no a ser destruí ainda (Hebr. 10:11-14, 1 Kor. 15:23-25).

Pero Dios lo destruí e enemigunan akí den futuro, ora ku Dios lo sakudí e shelunan i tera. E sakudimentu di e shelunan i tera ta nifiká, anto, destrukshon di e podernan terenal ku ta persiguí e pueblo di Dios i, mas importante ainda, destrukshon di e podernan malu (Satanas i su angelnan) ku ta para tras di e podernan terenal i ta kontrolá nan.

Dios a anunsiá ku lo E "sakudí" e shelunan i e tera, kua ta nifiká ku E lo destruí nashonnan enemigu. Tin algun kos, sinembargo,ku lo no ser sakudí, ku lo no ser destruí.

Kompará Salmo 15:5, Salmo 16:8, Salmo 21:7, Salmo 62:2, Salmo 112:6, i Hebreonan 12:27. Kiko ta e kosnan ku lo no ser sakudí?

Hopi tradukshon moderno di Hebreonan 12:27 ta sugerí ku e sakudimentu di e shelunan i tera ta nifiká ku nan lo ser kitá i lo disparsé pa semper.

Beibel ta kla, sinembargo, ku Dios lo krea shelunan nobo i un tera nobo (Isa. 65:17, Rev. 21:1-4), i nos lo ser resusitá i tin un kurpa nobo (1 Tes. 4:13-17, Fil 3:20) riba e tera akí. Por lo tantu, e "sakudimentu" ta impliká purifikashon i renobashon di kreashon, no su eliminashon kompletu. Loke tin aki lo ser kreá di nobo, i e lo ta kaminda e redimínan lo biba.

Tin algun kos, sinembargo, ku lo no i no por ser sakudí. Nan ta enserá esnan hustu. Nan lo no ser sakudí pasobra nan ta konfia den Dios. E Kreador ta sostené nan i ta garantisá nan sobrebibensia.

Tuma nota ku den Hebreonan, permanensia i stabilidat ta ser asosiá ku Hesus. Hebreonan 1:10-12 ta·bisa tokante Hesus: "Abo, SEÑOR, a pone e fundeshi di tera den prinsipio, i e shelunan ta e obra di Bo mannan; nan lo peresé, ma Abo ta permanesé; nan tur lo bira bieu manera un bistí, manera un mantel lo Bo lora nan, manera un bistí nan lo ser kambiá. Ma Abo ta mesun kos, i Bo añanan lo no tin fin" (ESV). Hebreonan ta bisa tambe ku e saserdosio di Hesus ta permanesé pa semper (Hebr. 7:3,24) meskos tambe ku e erensia di esnan redimí (Hebr. 10:34). Den e huisio final, ta esnan ku tene firme "den Hesus" lo no ser sakudí (Salmo 46:5).

Hebreonan 12:28 tambe ta bisa ku nos lo risibí "un reino ku no por ser sakudí" (ESV). Esaki ta un referensia na Daniel 7:18, ku ta bisa ku e santunan lo "poseé e reino pa semper". Esaki ta e reino ku "lo no ser destruí nunka" menshoná den Daniel 2:44. E reino akí ta pertenesé na e Yu, pero E lo kompartié ku nos. Revelashon 20:4 ta bisa ku nos lo husga huntu kunE e podernan malbado ku a persiguí nos (1 Kor. 6:3).

Hebreonan ta konkluí e sekshon akí mustrando ku e kontesta apropiá na Dios pa tur e kosnan maravioso ku El a hasi pa nos ta pa mustra gratitut dor di ofres'E un tipo di adorashon apropiá.

Kompará Hebreonan 12:28 i Hebreonan 13:15,16. Kon nos ta ofresé Dios adorashon aseptabel?

Den e sistema bieu di e aliansa, e sakrifisio di animalnan tabata e manera ku hende tabata mustra arepentimentu i gratitut, pero e sakrifisionan akí mester tabata djis un muestra di e gratitut i arepentimentu den e kurason di e adoradó. Por lo tantu, Dios a hasi kla den e Salmonan i pa medio di e profetanan ku loke realmente a agrad'E no tabata e sanger di animalnan sino e gratitut, bon obranan, i hustisia di e adoradónan (Salmo 50:7-23, Isa. 1: 11-17).

Pues, Pablo ta invitá nos pa adorá Dios den e santuario selestial dor di ofresé sakrifisionan di alabansa, konfeshon, gradisimentu, i bon obra, kua ta e berdadero adorashon ku ta deleit'E. Nos ta ofresé e sakrifisionan akí riba tera, pero nan ta ser aseptá komo agradabel na Dios den shelu. E eksortashon akí ta abarká tur e yamadanan ku e outor a hasi a lo largu di e karta pa e konfeshon di e nòmber di Hesus (Hebr. 3:1, Hebr. 4:14, Hebr. 10:23) i Su eksortashonnan pa nos sigui hasi bon obranan (Hebr. 6:10-12; Hebr. 13:1,2,16).

E invitashon di Pablo na e oudiensia pa "ofresé na Dios un adorashon aseptabel" (Hebr. 12:28, ESV) ta impliká ku kreyentenan awor berdaderamente ta un nashon saserdotal ku a ser perfekshoná i santifiká pa medio di e sakrifisio di Hesus (Hebr. 10:10-14, 19-23). Esaki ta kumpli e propósito original di Dios pa Israel, pa nan por tabata un nashon saserdotal pa medio di kua E lo por a anunsiá e bon notisia di salbashon na e mundu (Eks. 19:4-6; 1 Pe. 2:9,10; Rev. 1:6; Rev. 5:10).

Hebreonan 13:1-6 ta deskribí den términonan práktiko loke ta nifiká pa hasi bon i kompartí loke nos tin. E ta nifiká mustra amor fraternal, meskos ku Hesus a mustra amor fraternal na nos (Hebr. 2:11,12). E ta nifiká ta hospitalario, bishitá esnan ku ta den prizòn òf a ser maltratá (Hebr. 13:3), i rechasá adulterio i kudishi.