E Diluvio

Lesa Genesis 6:13–7:10. Ki lès nos por siña for di e relato asombroso akí di historia humano trempan?

Meskos ku Daniel, Noe ta un profeta ku ta pronostiká e fin di mundu. E palabra hebreo pa e “arka” (tevah) (Gen. 6:14) ta e mesun palabra fiá, poko komún, egipsio ku a usa pa e “arka”, den kua a skonde e yuchi Moises i a preserv’é pa asina salba Israel for di Egipto (Eks. 2:3).

Tambe, algun hende a mira den e struktura general di e arka paralelonan na e arka di e tabernakel (Eks. 25:10). Meskos ku e arka di e Diluvio lo permití sobrebibensia di humanidat, asina e arka di e aliansa, un señal di presensia di Dios meimei di Su pueblo (Eks. 25:22), ta mustra na e obra di salbashon di Dios pa Su pueblo.

E frase “Noe a hasi; di akuerdo ku tur loke Dios a ordená” (Gen. 6:22, NKJV) ta konkluí e sekshon preparatorio. E verbo ‘asah “a hasi”, refiriendo na e akshon di Noe, ta respondé na e verbo ‘asah, “traha”, den e mandato di Dios, kua a kuminsá e sekshon (Gen. 6:14) i ta wòrdu ripití sinku bia (Gen. 6:14–16). E eko akí entre e mandato di Dios i e kontesta di Noe ta sugerí e obediensia apsoluto di Noe na loke Dios a bis’é pa hasi, pa ‘asah. Ta interesante tambe ku ta usa e frase akí tambe den konteksto di e konstrukshon di e arka di aliansa (Eks. 39:32, 42; Eks. 40:16).

“Dios a duna Noe e dimenshonnan eksakto di e arka i direkshonnan eksplísito enkuanto di su konstrukshon den tur partikular. Sabiduria humano no por a ideá un struktura di fortalesa i durabilidat asina grandi. Dios tabata e diseñadó, i Noe e konstruktor maestro.”—Ellen G. White, Patriarchs and Prophets, p. 92.

Atrobe, e paralelo entre e dos “arkanan” ta bolbe afirmá nan funshon redentor komun. Asina ta deskribí e obediensia di Noe komo parti di e plan di salbashon di Dios. Noe tabata salbá simplemente pasobra e tabatin e fe ei pa hasi loke Dios a orden’é pa hasi (lesa Hebr. 11:7). E tabata un ehèmpel primario di un fe ku ta manifestá su mes den obediensia, e úniko tipo di fe ku ta importá (Santiago 2:20).

Den poko palabra, aunke Noe “a haña grasia den bista di SEÑOR” (Gen. 6:8), tabata den kontesta riba e grasia akí, ku Dios a dun’é kaba, ku Noe a aktua fielmente i obedientemente riba e mandatonan di Dios. No ta asina mester ta ku nos tur?

E verbo ‘asah, “traha”, kua ta referí na Noe su akshonnan, ta tambe un palabra klave den e relato di Kreashon di Génesis (Gen. 1:7, 16, 25, 26, 31; Gen. 2:2). Noe su aktonan di obediensia na Dios ta manera e aktonan di kreashon di Dios. Loke nos por saka for di e konekshon akí ta ku e Diluvio no ta solamente tokante Dios ku ta kastigá humanidat, sino tambe tokante Dios ku ta salba nos.

Lesa Génesis 7. Dikon e deskripshon di e Diluvio ta kòrda nos riba e relato di Kreashon? Ki lèsnan nos por siña for di e paralelonan entre e dos eventonan?

Un lesamentu atento di e teksto ku ta kubri e Diluvio ta revelá e uso di hopi palabra i ekspreshon komun ku e storia di Kreashon: “shete” (Gen. 7:2, 3, 4, 10; kompará ku Gen. 2:1–3); “hòmber i muhé” (Gen. 7:2, 3, 9, 16; kompará ku Gen. 1:27); “segun su tipo” (Gen. 7:14, NKJV; kompará ku Gen. 1:11, 12, 21, 24, 25); “bestianan,” “paranan,” “kosnan ku ta lastra” (lesa Gen. 7:8, 14, 21, 23; kompará ku Gen. 1:24, 25); i “rosea di bida” (Gen. 7:15, 22; kompará ku Gen. 2:7).

E Diluvio ta lesa, anto, un poko manera e storia di Kreashon. E ekonan akí di e relatonan di Kreashon ta yuda revelá ku e Dios kende ta krea ta e mesun ku e Dios kende ta destruí (Deut. 32:39). Pero e ekonan akí ta transmití tambe un mensahe di speransa: e Diluvio ta designá pa ta un kreashon nobo, for di e awanan, kua ta hiba na un eksistensia nobo.

E movementu di awanan ta mustra ku e evento di kreashon akí ta, de echo, birando e akto di Kreashon den Génesis 1 bèk. Kontrali na Génesis 1, kua ta deskribí un separashon di e awanan di ariba for di e awanan di abou (Gen. 1:7), e Diluvio ta envolví nan reunifikashon ora nan ta eksplotá mas ayá di nan límitenan (Gen. 7:11).

E proseso akí ta transmití un mensahe paradoksal: Dios tin ku destruí loke tin promé pa asina permití un kreashon nobo despues. E kreashon di e tera nobo ta rekerí destrukshon di esun bieu. E evento di e Diluvio ta prefigurá e futuro salbashon di mundu na fin di tempu: “Mi a mira un shelu nobo i un tera nobo, pasobra e promé shelu i e promé tera a pasa bai” (Rev. 21:1, NKJV; kompará ku Isa. 65:17).

Génesis 7:22–24 ta deskribí e efekto aplastante i total di e awanan, kua “a destruí tur kos bibu” (Gen. 7:23, NKJV) i “a prevalesé riba tera shentisinkuenta dia” (Gen. 7:24, NKJV). Ta kontra e trasfondo akí di destrukshon i desesperashon total ku “Dios a kòrda” (Gen. 8:1). E frase akí ta situá den sentro di e tekstonan ku ta kubri e Diluvio, un indikashon ku e idea akí ta e mensahe sentral di e storia di e Diluvio.

Lesa Génesis 8:1. Kiko ta nifiká ku Dios “a kòrda” riba Noe?

E verbo zakhar, “kòrda”, ta nifiká ku Dios no a lubidá; e ta mas ku solamente un ehersisio mental. Den konteksto bíbliko e “Dios kende ta kòrda” ta nifiká e kumplimentu di Su promesa i hopi bia ta referí na salbashon (lesa Gen. 19:29). Den konteksto di e Diluvio, “Dios a kòrda” ta nifiká ku e awanan “a stòp” (Gen. 8:2) i ku Noe pronto lo ta kapas pa bandoná e arka (Gen. 8:16).

Aunke Dios no a duna mandato direkto ainda pa bai, Noe ta tuma e inisiativa i ta manda un raf promé, i despues un palomba, pa tèst e situashon. Finalmente, ora e palomba no bin bèk, e ta komprondé “ku e awanan a seka for di tera; i Noe a kita e tapa di e arka i a wak” (Gen. 8:13, NKJV).

E komportashon di Noe ta riku na lèsnan práktiko. Na un banda, e ta siña nos pa konfia Dios aunke E no papia direktamente ainda; na otro banda, fe no ta ninga e balor di pensa i tèst. Fe no ta ekskluí e deber di pensa, di buska, i di mira si loke nos a siña ta bèrdat.

I tòg, Noe ta sali solamente ora Dios, finalmente, bis’é pa hasi esei (Gen. 8:15–19). Es desir, asta ora e sa ku ta seif pa bai, Noe ainda ta dependé riba Dios i ta warda riba e señal di Dios promé ku e sali for di e arka. El a warda ku pasenshi denter di e arka. “Manera el a drenta riba mandato di Dios, el a spera pa direkshonnan spesial pa bai. . . . Al final un angel a baha for di shelu, a habri e porta masivo, i a bisa e patriarka i su kas pa sali bai riba tera i hiba ku nan tur kos bibu.”—Ellen G. White, Patriarchs and Prophets, p. 105.

Awor ta e momento ora e aliansa primintí mester a kumpli. “Ma lo Mi establesé Mi aliansa ku bo; i lo bo bai den e arka—abo, bo yunan hòmber, bo esposa, i esposanan di bo yunan hòmber huntu ku bo” (Gen. 6:18, NKJV). Kontrali na e menasa divino pa destruí (Gen. 6:17), e aliansa akí ta e promesa di bida.

Lesa Génesis 8:20. Kiko Noe a hasi promé ora el a sali for di e arka, i dikon?

Meskos ku Adam i Eva, ku siguramente a adorá Dios riba Sabat inmediatamente despues di e seis dianan di Kreashon, Noe a adorá Dios inmediatamente despues di e Diluvio, un otro evento di kreashon den i di su mes. Tin un diferensia, sinembargo, entre e dos aktonan di adorashon. Diferente for di Adam i Eva, ku a adorá Señor direktamente, Noe mester a rekurí na un sakrifisio. Esaki ta e promé menshon den e Skrituranan di un altar. E sakrifisio ta un “sakrifisio kimá” (‘olah), e sakrifisio di mas bieu i di mas frekuente. Pa Noe, e sakrifisio akí tabata un sakrifisio di gradisimentu (kompará ku Num. 15:1–11), duná pa asina ekspresá su gratitut na e Kreador, kende a salb’é.

Lesa Génesis 9:2–4. Kon e Diluvio a afektá e dieta humano? Kiko ta e prinsipio tras di e restrikshonnan di Dios?

Pa motibu di e efekto di e Diluvio, alimento vegetal no tabata disponibel mas manera e tabata kustumber di ta. Pa e motibu ei, Dios a permití hende kome karni di animal. E kambio di dieta akí a generá un kambio den e relashon entre hende i animal, kontrali na loke tabata entre nan den e Kreashon original. Den e relato di Kreashon, hende i animal tabata kompartí e mesun dieta vegetal i no tabata menasá otro. Den e mundu despues di Diluvio, e matamentu di animalnan pa kuminda tabata impliká un relashon di miedu i teror (Gen. 9:2). Unabes nan a kuminsá kome otro, hende i animal, sin duda, a desaroyá un relashon bastante diferente for di loke nan tabata gosa di dje den Eden.

E toleransia di Dios, sinembargo, tabatin dos restrikshon. Na promé lugá, no ta tur e animalnan tabata apropiá pa kuminda. Esun di promé tabata implísito den e distinshon entre animalnan “limpi i impuru”, kua tabata parti di e órden di Kreashon (lesa Gen. 8:19, 20; kompará ku Gen. 1:21, 24). Esun di dos tabata eksplísito i nobo i tabata pa apstené di konsumo di sanger, pasobra bida ta den e sanger (Gen. 9:4).

Lesa Génesis 8:21–9:1. Kiko ta nifikashon di Dios Su kompromiso na preservashon di bida? Kon e bendishon di Dios ta kumpli ku e kompromiso ei?

Dios Su kompromiso pa preservá bida tabata un akto d grasia; e no tabata un resultado di méritonan humano. Dios a disidí di preservá bida riba tera apesar di maldat humano (Gen. 8:21). Génesis 8:22 ta bisa, literalmente: “tur e dianan di tera” (DRA); es desir, tanten ku e tera presente ta permanesé, e temporadanan lo bin i bai i bida lo ta sostené. Den poko palabra, Dios no a bandoná Su kreashon.

De echo, e siguiente teksto, kua ta papia tokante e bendishon di Dios, ta hiba nos bèk na e Kreashon original, ku su bendishon (Gen. 1:22, 28; Gen. 2:3). Señor, den un sentido, tabata dunando humanidat un chèns pa kuminsá di nobo, pa kuminsá fresku.

Lesa Génesis 9:8–17. Kiko ta nifikashon di e regenbog? Kon e “señal di aliansa” akí (Gen. 9:13, NKJV) ta relatá na e otro señal di e aliansa, e Sabat?

Ta ripití e frase “establesé . . . aliansa” tres bia (Gen. 9:9, 11, 17), markando e klímaks i kumplimentu di e promesa inisial di Dios (Gen. 6:18). Despues di e sekshon previo, ku ta paralelo ku e di seis dia di e relato di Kreashon, e sekshon akí ta paralelo na e sekshon ku ta kubri e di shete dia di e relato di Kreashon, E Sabat. Paden di e teksto e ripitishon, shete bia, di e palabra “aliansa” ta resoná huntu ku e Sabat. Meskos ku e Sabat, e regenbog ta e señal di e aliansa (Gen. 9:13, 14, 16; kompará ku Eks. 31:12–17). Tambe, meskos ku e Sabat, e regenbog tin un ekstenshon universal; e ta apliká na henter mundu. Meskos ku e Sabat, komo un señal di Kreashon, ta pa tur hende, tur kaminda, e promesa ku niun otro diluvio mundial lo bin ta pa tur hende, tur kaminda, tambe.