E Raisnan di Abraham

Lesa Genesis 12:1–9. Dikon Dios a yama Abram pa bandoná su pais i famia? Kon Abram a reakshoná?

E último bia ku Dios a papia ku un persona, a lo ménos manera registrá den Skritura, tabata ku Noe, pa sigur’é despues di e Diluvio ku E lo establesé un aliansa ku tur karni (Gen. 9:15–17) i ku un otro diluvio mundial lo no bin nunka. E palabra nobo di Dios awor ku Abram, ta konektá atrobe ku e promesa ei: tur e nashonnan di tera lo ta bendishoná a traves di Abram.

E kumplimentu di e profesia ei ta kuminsá ku bandoná pasado. Abram ta bandoná tur loke tabata konosí p’e, su famia, i su pais, asta un parti di su mes. E intensidat di e baimentu akí ta reflehá den e ripitishon di e palabra klave “bai”, kua ta tuma lugá shete bia den e konteksto akí. Promé Abram mester a bandoná su pais, “Ur di e Kaldeonan”, kua ta tambe Babilonia (Gen. 11:31, Isa. 13:19). E yamada akí pa “sali for di Babilonia” tin un historia largu entre e profetanan bíbliko (Isa. 48:20, Rev. 18:4).

E salida di Abram ta konserní su famia tambe. Abram mester a bandoná su herensia i hopi di loke el a siña i a atkerí a traves di herensia, edukashon, i influensia.

Sinembargo, e yamada di Dios pa bai ta envolví asta mas. E frase hebreo lekh lekha, “bai”, tradusí literalmente ta nifiká “bai bo mes” òf “bai pa bo mes”. E salida di Abram for di Babilonia ta konserní mas ku su medioambiente, òf asta su famia. E frase hebreo ta sugerí un énfasis riba e mes. Abram mester bandoná su mes, pa deshasí di e parti di su mes ku ta kontené su pasado babilóniko.

E meta di e abandono akí ta “un tera” ku Dios lo mustr’é. Lo usa e mesun lenguahe atrobe den konteksto di e sakrifisio di Isaak (Gen. 22:2), pa referí na e seru di Moriah kaminda lo ofresé Isaak i kaminda lo konstruí e tèmpel di Herusalèm (2 Kron. 3:1). E promesa di Dios no ta djis tokante un patria físiko sino tokante salbashon di mundu. E idea akí ta reafirmá den Dios Su promesa di e bendishon pa tur nashon (Gen. 12:2,3). E verbo barakh, “bendishoná” ta aparesé sinku bia den e pasashi akí. E proseso di e bendishon universal akí ta operá a traves di e “simia” di Abram (Gen. 22:18, Gen. 26:4, Gen. 28:14). E teksto ta referí aki na e “simia” kua finalmente lo kumpli den Hesu-Kristu (Echonan 3:25).

Lesa Génesis 12:10–20. Dikon Abram a bandoná e Tera Primintí pa bai Egipto? Kon e fárao a komportá den komparashon ku Abram?

Irónikamente, Abram, ku a kaba di yega den e Tera Primintí, ta disidí di bandon’é pa Egipto pasobra “tabatin hamber den e tera” (Gen. 12:10, NKJV). Evidensia di hendenan di Kánaan bayendo Egipto den tempunan di hamber ta bon demostrá komo evidensia den tekstonan egipsio antiguo. Den e siñansa egipsio di Merikare, un teksto komponé durante e periodo di e Reino Meimei (2060–1700), tabata identifiká hendenan ku a bin for di Kánaan komo “asiátiko miserabel” (aamu) i deskribí komo “miserabel . . . falta di awa . . . e no ta biba riba un lugá, kuminda ta move su pianan.”—Miriam Lichtheim, Ancient Egyptian Literature, Volume I: The Old and Middle Kingdoms (Berkeley, CA: University of California Press, 1973), p. 103, 104.

E tentashon di Egipto tabata hopi bia un problema pa e israelitanan antiguo (Num. 14:3, Jer. 2:18). Egipto, asina, a bira un símbolo pa hende konfia den hende mas bien ku den Dios (2 Reinan 18:21; Isa. 36:6,9). Na Egipto, kaminda por a mira awa riba un base diario, fe no tabata nesesario, pasobra e promesa di e tera tabata inmediatamente visibel. Kompará ku e tera di hamber, Egipto tabata zona manera un bon kaminda pa ta, apesar di loke Dios a bis’é.

E Abram ku awor ta bandoná Kánaan ta kontrali na e Abram ku a bandoná Ur. Promé, a deskribí Abram komo un hòmber di fe ku a bandoná Ur komo reakshon riba e yamada di Dios; awor, Abraham ta bandoná e Tera Primintí riba su mes, di su propio boluntat. Promé, Abram tabata dependé riba Dios; awor e ta komportá manera un polítiko empíriko, manipulativo, i inétiko ku ta konta solamente riba su mes. “Durante su estadia na Egipto, Abraham a duna evidensia ku e no tabata liber di debilidat i imperfekshon humano. Ora el a skonde e echo ku Sara tabata su esposa, el a traishoná e deskonfiansa di e kuido divino, un falta di e fe haltu i kurashi ku asina tantu bia i di forma nobel tipifiká den su bida.”—Ellen G. White, Patriarchs and Prophets, p. 130.

Loke nos ta mira aki, anto, ta kon asta un gran hòmber di Dios por kometé un eror i tòg Dios no ta bandon’é. Ora Tèstamènt Nobo ta papia tokante Abraham komo un ehèmpel di salbashon pa medio di grasia, e ta nifiká djis esei, grasia. Pasobra, si no tabata pa grasia, Abraham, meskos ku nos tur, lo no tabatin niun speransa.

Lesa Génesis 13:1–18. Kiko e storia akí ta siña nos tokante e importansia di karakter?

Abram ta bai bèk kaminda e tabata promé, manera kos ku su biahe pa Egipto tabata un simpel buèlta desafortuná. Dios Su historia ku Abram ta kuminsá atrobe, kaminda el a stòp for di su biahe pa e Tera Primintí. E promé stashon di Abram tabata Betèl (Gen. 13:3), meskos ku den su promé biahe pa e tera (Gen. 12:3–6). Abram a repentí i ta bèk na “su mes”: Abram, e hòmber di fe.

E rekonekshon di Abram ku Dios ta mustra kaba den su relashon ku hende, den e forma ku e ta trata ku e problema ku Lòt, su subrino, enkuanto di uso di e tera. Sinembargo, ta Abram mes ken ta proponé un akuerdo di pas i ta permití Lòt skohe promé (Gen. 13:9,10), un akto di generosidat i bondat, indikativo di e tipo di hòmber ku Abram tabata.

E echo ku Lòt a skohe e parti di mas fásil i mihó pa e mes, e vaye ku hopi awa (Gen. 13:10,11), sin niun preokupashon tokante e maldat di su futuro bisiñanan (Gen. 13:13), ta revelá algu tokante su goloseria i karakter. E frase “pa su mes” ta rekordá nos di e antediluvianonan, ku tambe a skohe “pa nan mes” (lesa Gen. 6:2).

Kontrali na esei, e sèt di Abram tabata un akto di fe. Abram no a skohe e tera; ta e grasia di Dios a dun’é e. Diferente for di Lòt, Abram a wak e tera solamente riba mandato di Dios (Gen. 13:14). Ta solamente ora Abram ta separá di Lòt ku Dios ta papia kuné atrobe (Gen. 13:14). De echo, esaki ta e promé bia registrá ku Dios ta papia ku Abram for di su yamada na Ur. “Hisa bo bista awor i wak for di e lugá kaminda bo ta, pa nort, pa sùit, pa ost, i pa wèst; pasobra tur e tera ku bo ta mira Mi ta duna abo i bo desendientenan pa semper” (Gen. 13:14,15, NKJV). Dios, e ora ei, ta invitá Abram pa “kana” riba e tera akí komo un akto di apropiashon. “Lanta, kana den e tera den su largura i su hanchura, pasobra Mi ta duna bo e” (Gen. 13:17, NKJV).

Señor, sinembargo, ta hasié bon kla ku E, Dios, ta dunando e na Abram. E ta un regalo, un regalo di grasia, kua Abram mester apropiá pa medio di fe, un fe ku ta hiba na obediensia. Ta e obra di Dios so ku lo produsí tur loke El a primintí na Abram aki (lesa Gen. 13:14–17).

Lesa 14:1–17. Kiko ta signifikante tokante e guera akí ku tabata tumando lugá djis despues di e regalo di e Tera Primintí? Kiko e storia akí ta siña nos tokante Abram?

Esaki ta e promé guera relatá den e Skrituranan (Gen. 14:2). E koalishon di kuater ehérsito di Mesopotamia i Persia kontra e otro koalishon di sinku ehérsito kanaanita, inkluyendo e reinan di Sodoma i Gomora (Gen. 14:8), ta sugerí un konflikto grandi (Gen. 14:9). E rason pa e operashon militar akí tin di aber ku e echo ku e pueblonan kananita a rebeldiá kontra nan zuzitanan babilóniko (Gen. 14:4,5). Aunke e storia akí ta referí na un konflikto históriko spesífiko, e tempu di e guera “global” akí, djis despues di Dios Su regalo di e Tera Primintí na Abram, ta duna e evento akí un nifikashon spiritual partikular.

E envolvimentu di asina tantu pueblo di e pais di Kánaan ta sugerí ku e problema den wega den e konflikto akí tabata tokante soberania riba e tera. Irónikamente, e kampamentu di Abram, e partido berdaderamente interesá, pasobra e ta e úniko berdadero doño di e tera, ta e úniko forsa ku ta keda pafó di e konflikto, a lo ménos na kuminsamentu.

E rason pa e neutralidat di Abram ta ku pa Abram, e Tera Primintí no tabata atkerí a traves di e forsa di armanan òf a traves di e sabiduria di strategianan polítiko. E reino di Abram tabata un regalo di Dios. E úniko rason ku Abram lo intervení ta e destino di su subrino Lòt, ku nan a kue prezu den kurso di e batayanan (Gen. 14:12,13).

“Abraham, bibando den pas den e mondinan di eik na Mamre, a tende di un di e fugitivonan e storia di e bataya i e kalamidat ku a sosodé ku su subrino. E no tabatin niun rekuerdo desagradabel di Lòt su ingratitut. Tur su afekto p’e a spièrta, i el a determiná ku mester reskat’é. Buskando, promé ku tur kos, konseho divino, Abraham a prepará pa guera.”—Ellen G. White, Patriarchs and Prophets, p. 135.

Ma Abram no ta konfrontá henter e koalishon. Den loke mester tabata un operashon di komando rápido i nokturno, e ta ataká solamente e kampamentu kaminda nan a tene Lòt prezu. Ta salba Lòt i huntu kuné e rei di Sodoma. Asina, e hòmber fiel di Dios a demostrá tambe gran kurashi i firmesa. Sin duda su influensia den e region a krese, i hende a mira e tipo di hòmber ku e tabata i a siña algu mas di e Dios kende e tabata sirbi.

Lesa Génesis 14:18–24 i Hebreonan 7:1–10. Ken Melkisedek tabata? Dikon Abram a duna su diesmo na e saserdote akí ku parse ta aparesé for di nada?

E aparishon di ripiente di e Melkisedek misterioso no ta fuera di lugá. Despues ku e reinan kanaanita a gradisí Abram, awor e ta gradisí e saserdote, un gratitut revelá pa su pagamentu di diesmo na dje.

Melkisedek ta bin di e stat di Salem, kua ta nifiká “pas”, un mensahe apropiá despues di e konfushon di guera. E komponente tsedek, “hustisia”, den e nòmber di Melkisedek, ta aparesé den kontraste ku e nòmber di e rei di Sodom, Bera (“den malu”), i Gomora, Birsha (“den maldat”), probablemente famnan pa loke nan ta representá (Gen. 14:2).

Melkisedek ta aparesé despues di e revokashon di e violensia i maldat representá pa e otro reinan kanaanita. E pasashi akí ta kontené tambe e promé referensia bíbliko na e palabra “saserdote” (Gen. 14:18). E asosiashon di Melkisedek ku “Dios Haltísimo” (Gen. 14:18, NKJV), kende Abram ta yama su mes Dios (Gen. 14:22), ta indiká klaramente ku Abram a mir’é komo saserdote di e Dios ku Abram tabata sirbi. Sinembargo, no mester identifiká Melkisedek ku Kristu. E tabata e representante di Dios meimei di e pueblo di e tempu ei (lesa Ellen G. White Comments, The SDA Bible Commentary, tomo 1, p. 1092, 1093).

Melkisedek ta fungi, enbèrdat, komo saserdote. E ta sirbi “pan i biña”, un asosiashon ku hopi bia ta impliká e uso di djus di drùif fresku primí (Deut. 7:13, 2 Kron. 31:5), kua ta bolbe aparesé den konteksto di e dunamentu di e diesmonan (Deut. 14:23). Ademas, e ta ekstendé bendishon na Abram (Gen. 14:19).

Abram, mientrastantu, “a dun’é un diesmo di tur kos” (Gen. 14:20, NKJV) komo un kontesta na Dios e Kreador, e “Propietario di shelu i tera” (Gen. 14:19, NKJV). E título akí ta aludí na e introdukshon di e storia di Kreashon (Gen. 1:1, NKJV), kaminda e frase “shelunan i tera” ta nifiká totalidat òf “tur”. Komo tal, ta komprondé e diesmo komo un ekspreshon di gratitut na e Kreador, kende ta doño di tur kos (Hebr. 7:2–6; kompará ku Gen. 28:22). Paradóhikamente, e adoradó no ta komprondé e diesmo komo un regalo na Dios, sino komo un regalo di Dios, pasobra Dios ta duna nos tur kos pa kuminsá kuné.