E Promesa

Lesa Génesis 22:1–12 i Hebreonan 11:17. Kiko tabata e nifikashon di e tèst akí? Ki lèsnan spiritual ta bin for di e evento asombroso akí?

Génesis 22 a bira un klásiko den literatura mundial i a inspirá filósofo i artista, no solamente teólogonan. E nifikashon di Dios Su tèst ta difísil pa komprondé, sinembargo. E mandato divino akí a kontradesí e prohibishon bíbliko mas despues kontra sakrifisionan humano (Lev. 18:21), i siguramente e tabata parse di ta traha kontra e promesa di Dios di un aliansa eterno a traves di Isaak (Gen. 15:5).

Kiko, anto, tabata e propósito ku Dios a yam’é pa hasi esaki? Pa kiko tèst e den un forma asina poderoso?

E noshon bíbliko di “tèst” (na hebreo, nissah) ta enserá dos idea opuesto. E ta referí na e idea di huisio, es desir, un huisio pa asina sa kiko tin den kurason di esun di tèst (Deut. 8:2; kompará ku Gen. 22:12). Pero e ta trese tambe siguransa di e grasia di Dios na fabor di esun di tèst (Eks. 20:18–20).

Den e kaso akí, e fe di Abraham den Dios ta hib’é na e punto ku e ta kore riesgo di pèrdè su “futuro” (su desendensia). I tòg, pasobra e ta konfia Dios, e lo hasi loke Dios ta pidi, no importá kon difísil tur kos ta pa komprondé. Despues di tur kos, kiko fe ta sino konfiansa den loke nos no ta mira òf ta komprondé kompletamente?

Tambe, fe bíbliko no ta asina tantu tokante nos kapasidat pa duna Dios i pa sakrifiká p’E—aunke esei tin un ròl sin duda (Rom. 12:1), sino tokante nos kapasidat pa konfi’E i pa risibí Su grasia miéntras nos ta komprondé presis kon indigno nos ta.

Loke a sigui a reafirmá e bèrdat akí. Tur e trabounan di Abraham, su hopi aktividatnan zeloso, su biahe doloroso huntu ku su yu hòmber, asta su disponibilidat pa obedesé i ofresé na Dios lo mihó di su mes, maske kon instruktivo, no por a salb’é. Dikon? Pasobra Señor Mes a proveé un chubatu pa e sakrifisio intenshoná, kua mes a mustra na su úniko speransa di salbashon, Hesus.

Abraham, anto, mester a komprondé grasia. No ta nos obranan pa Dios ta salba nos, sino, en kambio, ta e obra di Dios pa nos (Efe. 3:8; kompará ku Rom. 11:33), sinembargo hopi, meskos ku Abraham, ta yamá pa traha pa Dios, loke e akshonnan di Abraham ta personifiká poderosamente (Santiago 2:2—23).

Lesa Génesis 22:8, 14, 18. Kon Dios a kumpli ku Su promesa ku E lo proveé? Kiko El a proveé?

Ora Isaak a puntra tokante e animal di sakrifisio, Abraham a duna un kontesta interesante: Dios lo “ ‘proveé pa Su mes e lamchi pa un ofrenda kimá’ ” (Gen. 22:8, NKJV). Sinembargo, e forma verbal hebreo en realidat por nifiká tambe “Dios lo proveé Su mes komo e lamchi”. Ta usa e verbo “proveé” (yir’eh lo) den un forma ku por nifiká “proveé Su mes” (òf literalmente, “mira Su mes”).

Loke ta mustra nos aki, anto, ta e esensia di e plan di salbashon, ku Señor Mes sufriendo i pagando den Su mes e kastigu pa nos pikánan!

Lesa Juan 1:1–3 i Romanonan 5:6–8. Kon e versíkulonan akí ta yuda nos komprondé loke a sosodé na e Krus, kua ta prefigurá den e sakrifisio akinan riba Seru Moria?

Aya, na Seru Moria, hopi tempu promé ku e krus, e karné chubatu di sakrifisio “pegá ku su kachunan den un pida mondi será” (Gen. 22:13) tabata mustrando stret na Hesus. E ta Esun ku ta “mira” aki, manera Abraham ta splika despues, “Den e seru kaminda ta mira SEÑOR” (Gen. 22:14, MT). Hesus Mes a mustra na e ekspreshon profétiko di Abraham aki, ora El a bisa, i ta eko e deklarashon di Abraham: “ ‘Boso tata Abraham tabata regosihá pa mira Mi dia, i el a mir’é i tabata kontentu’ ” (Juan 8:56, NKJV).

“Tabata pa impreshoná e mente di Abraham ku e realidat di e evangelio, komo tambe pa tèst su fe, ku Dios a mand’é mata su yu hòmber. Dios a permití e agonia, kua el a soportá durante e dianan skur di e prueba teribel ei, pa e por a komprondé for di su propio eksperensia algu di e grandesa di e sakrifisio hasí pa e Dios infinito pa redenshon di hende.”—Ellen G. White, Patriarchs and Prophets, p. 154.

Den Génesis 22:23, nos ta mira e informe di e nasementu di Rebeka, kua ta antisipá e futuro matrimonio entre Isaak i Rebeka (Genesis 24). Di mes manera, e informe di e morto i entiero di esposa di Abraham, Sara (Genesis 23), ta antisipá su futuro matrimoio ku Ketura (Gen. 25:1–4).

Lesa Génesis 23. Ki funshon e storia di e morto i entiero di Sara ta hunga den kumplimentu di Dios Su promesa na Abraham?

E menshon di e morto di Sara inmediatamente despues di e storia di e sakrifisio di Isaak ta sugerí ku kisas e aksidente akí lo por a afekt’é, kua kasi a kosta bida di su yu hòmber. Den algun forma, Sara tabata envolví tambe den e “tèst” huntu ku su esposo, meskos ku e tabata den su biahenan i su lapsonan den fe (Gen. 12:11–13).

Sara no tabata e tipo di muhé ku lo a keda ketu riba asuntunan ku tabata di nifikashon òf tabata molesti’é (kompará ku Gen. 16:3–5; Gen. 18:15; Gen. 21:9, 10). Su ousensia i su silensio, i asta e momento di su morto despues di e evento dramátiko ei, ta bisa mas tokante su relevansia na e eventonan ku su presensia físiko a bisa. E echo ku ta menshoná Sara su edat avansá (Gen. 23:1), den eko riba e edat avansá di Abraham (Gen. 24:1), ta demostrá su importansia na e storia.

De echo, Sara ta e úniko muhé den Tèstamènt Bieu di ken ta menshoná e kantidat di su añanan, kua ta mustra su sentralidat den e storia. E enfoke riba kompra di Sara su lugá di entiero (kua ta kubri mayoria di e kapítulo), mas bien ku riba su morto, ta enfatisá e konekshon ku e Tera Primintí.

Ya e spesifikashon ku el a muri “den e tera di Kánaan” (Gen. 23:2) ta suprayá e establesimentu di Sara su morto den Dios Su promesa di e tera. Sara ta e promé morto di e tribu di Abraham ku a muri i a dera den e Tera Primintí. E preokupashon di Abraham tokante su mes, “ ‘un strañero i un bishitante’ ” (Gen. 23:4, NKJV), i su argumento insistente ku e yunan hòmber di Hèt, ta mustra ku Abraham ta interesá no solamente den atkerí un lugá graf; e ta primeramente preokupá ku establesé permanentemente den e tera.

Génesis 24 ta konta e storia di e matrimonio di Isaak despues di morto di Sara. E dos storianan ta relatá ku otro.

Lesa Génesis 24. Dikon Abraham ta asina preokupá pa su yu hòmber no kasa ku un muhé for di e kanaanitanan?

Meskos ku Abraham ker a atkerí e tera pa asina e dera su esposa, pa motibu di e promesa di Dios na su desendientenan ku nan lo a haña e tera akí, awor e ta insistí pa Isaak no establesé pafó di e Tera Primintí tampoko (Gen. 24:7). Tambe, Isaac su moveshon pa trese su brùit na e tènt di Sara, i e nota ku Rebeka a konsolá Isaak “despues di morto di su mama” (Gen. 24:67) ta mustra bèk na morto di Sara, ku ta impliká e doló di Isaak pa ku morto di su mama.

E storia ta yen di orashon i kumplimentu di orashon i riku na lèsnan tokante e providensia di Dios i libertat humano. E ta kuminsá ku e orashon di Abraham. Hurando “ ‘SEÑOR, e Dios di shelu i e Dios di tera’ ” (Gen. 24:3, NKJV), e orashon akí ta, promé ku tur kos, un rekonosementu di Dios komo e Kreador (Gen. 1:1, Gen. 14:19), ku énfasis direkto riba e nasementu di Abraham su desendientenan, inkluyendo e Mesias Mes.

E referensia na “ ‘Su angel’ ” i na “ ‘SEÑOR Dios di shelu’ ” (Gen. 24:7, NKJV) ta mustra bèk na e Angel di SEÑOR ku a bin for di shelu pa reskatá Isaak for di ser matá (Gen. 22:11). E Dios kende ta kontrolá e universo, e Angel di SEÑOR kende a intervení pa salba Isaak, lo guia den e kuestion di matrimonio akí.

Abraham ta laga habrí, sinembargo, e posibilidat ku e muhé lo no respondé riba e yamada di Dios. Pa mas poderoso ku E ta, Dios no ta fòrsa hende pa obedes’E. Aunke e plan di Dios pa Rebeka ta pa sigui Eliezer, e ta retené su libertat di eskoho. Es desir, tabata posibel ku e muhé akí lo no tabata ker a bin, i si no, lo no a fòrs’é pa bin.

Por lo tantu, aki nos ta mira un otro ehèmpel di e gran misterio di kon Dios a duna nos, komo hende, boluntat liber, eskoho liber, un libertat ku E lo no trapa riba dje. (Si El a hasié, lo no tabata boluntat liber.) I tòg, di un manera òf otro, apesar di e realidat di boluntat liber humano, i hopi di e eskohonan teribel ku hende ta hasi ku e boluntat liber ei, ainda nos por konfia ku na final e amor i bondat di Dios, finalmente, lo prevalesé.

Lesa Génesis 24:67–25:1–8. Kiko ta nifikashon di e eventonan final akí den bida di Abraham?

Despues ku Sara a muri, Abraham a bolbe kasa. Meskos ku Isaak e ta haña konsuelo despues di morto di Sara (Gen. 24:67). E rekuerdo di Sara siguramente ainda mester tabata bibu den mente di e patriarka, manera e ta pa su yu hòmber.

Sinembargo, e identidat di su esposa nobo no ta kla. E echo ku e kronista ta asosiá e yunan hòmber di Ketura ku e yunan hòmber di Hagar, sin menshoná nòmber di Ketura, ta sugerí, sinembargo, ku Ketura (manera algun a sugerí) por tabata Hagar. Ta signifikante tambe ku Abraham ta komportá su mes ku e yunan hòmber di Ketura di e mesun forma ku el a hasi ku e yu hòmber di Hagar: e ta manda nan bai pa evitá kualke influensia spiritual i ta hasi un distinshon kla entre su yu hòmber ku Sara i e otro yunan hòmber.

E ta duna tambe “tur loke e tabatin na Isaac” (Gen. 25:5) miéntras el “a duna regalonan na e yunan hòmber di e konkubinanan” (Gen. 25:6, NKJV). E klasifikashon di “konkubinanan” por impliká tambe ku e status di Ketura, meskos ku Hagar, tabata esun di un konkubina. E potensial identifikashon di Ketura komo Hagar por splika tambe e alushon sutil na memoria di Sara komo un preludio na su matrimonio ku Ketura-Hagar.

Loke ta interesante ta ku den Génesis 25:1–4, 12–18, ta duna un lista di e yunan ku Abraham tabatin ku Ketura, komo tambe un lista di e yunan di Ismael. E propósito di e genealogia despues di e matrimonio di Abraham ku Ketura, ku a dun’é seis yu hòmber, versus su dos otro yunan hòmber (Isaak i Ismael), ta kisas pa proveé evidensia inmediato di e promesa di Dios ku Abraham lo a bira tata di hopi nashon.

E di dos genealogia tabata konserní e desendientenan di Ismael, ku tambe a komponé 12 tribu (kompará ku Gen. 17:20), meskos ku loke lo a sosodé ku Jakòb (Gen. 35:22–26). Aunke, naturalmente, Dios Su aliansa lo keda reservá na e simia di Isaak (Gen. 17:21), no Ismael, un punto ku Skritura ta hopi kla riba dje.

E informe di morto di Abraham, interkalá entre e dos genealogianan (Gen. 25:7–11), tambe ta testifiká na e bendishon di Dios. E ta revelá e kumplimentu di Su promesa na Abraham, hasí hopi aña promé, ku e lo a muri “ ‘na un edat bon avansá’ ” (Gen. 15:15, NKJV) i “yen di añanan” (kompará ku Ekl. 6:3).

Al final, Señor a permanesé fiel na Su promesanan di grasia na su sirbidó fiel Abraham, ken su fe ta deskribí den Skritura komo un gran ehèmpel, si no ta e mihó ehèmpel, den Tèstamènt Bieu di salbashon pa medio di fe (lesa Rom. 4:1–12).