Jozef, Prens di Egipto

Pa José, e soñonan di fárao a revelá loke Dios tabata “bai hasi” (Gen. 41:28) den e tera. José, sinembargo, no ta yama riba fárao pa kere den e Dios di José. En kambio, e reakshon inmediato di José ta akshon. José ta proponé un programa ekonómiko. Ta interesante pa bisa ku fárao, ku parse ta mas interesá den e lès ekonómiko ku den e nifikashon spiritual di e soño i Dios Su ròl den produsié, ta retené solamente e parti ekonómiko di e diskurso di José.

Lesa Génesis 41:37–57. Kiko ta Dios Su lugá den e éksito di José?

Fárao ta selektá José pa tuma enkargo no asina tantu pasobra el a interpretá su soñonan korektamente, i a revelá e problema benidero di e tera, sino pasobra e tabatin un solushon pa e problema ei, pasobra “el a haña su plan bon” (Gen. 41:37), un opinion ku e sirbidónan di fárao tambe tabata kompartí. E eskoho di fárao parse tabata pas pragmátiko ku religioso. I tòg, fárao ta rekonosé ku e presensia di “e Spiritu di Dios” (Gen. 41:38) ta den José, ku Fárao ta kualifiká komo “ku disernimentu i sabiduria” (Gen. 41:39,), un ekspreshon ku ta karakterisá e sabiduria ku Dios ta duna (lesa Gen. 41:33; kompará ku 1 Reinan 3:12).

Tur e detayenan reportá den e teksto bíbliko ta pas ku e situashon históriko di Egipto na e momento ei. Polítikamente, e echo ku fárao ta nombra José komo gobernador no ta inusual den Egipto antiguo, kaminda a testiguá kasonan di gobernadornan strañero.

E siguiente shete añanan ta añanan di abundansia den tal forma ku e produkshon di trigo ta bira “masha hopi mes” (Gen. 41:49), un señal di providensia sobrenatural. E komparashon “komo si fuera tabata santu di laman” (Gen. 41:49) ta revelá ku esaki ta bendishon di Dios (Gen. 22:17). José personalmente ta reflekshoná e bendishon ei den su propio produktividat, un koinsidensia ku ta duna evidensia di e presensia di e mesun Dios tras di e dos fenómenonan. José tin dos yu hòmber ku nan nòmber ta mustra José su eksperensia di e providensia di Dios, kua a transformá e memoria di doló den goso (Manase) i e aflikshon anterior den produktividat (Efraim) Ki un ehèmpel poderoso di kon Dios a kambia algu malu den algu hopi bon.

Lesa Génesis 42. Kiko a sosodé aki, i kon e ta revelá e providensia di Dios, asta apesar di maldat humano i kriminalidat?

E hamber ta obligá Yakob pa manda su yunan Egipto pa kumpra trigo. Irónikamente, ta Yakob ta inisiá e proyekto (Gen 42:1). E hòmber bieu i infelis, un víktima di sirkunstansianan mas ayá di su kontròl, inkonsientemente ta aktivá un kadena asombroso di eventonan ku lo hib’é na reuní ku e yu hòmber pa ken el a lamentá asina largu.

Ta enfatisá e naturalesa providensial di e reunion akí a traves di dos karakter fundamental. Di promé, ta mir’é komo un kumplimentu di e soñonan di José. E evento—pronostiká den e soñonan profétiko di José: “ ‘boso bohínan . . . a bùig pa mi bohí’ ” (Gen. 37:7, NKJV), ta tumando lugá awor. Ta identifiká José komo e “gobernadó di e tera” (Gen. 42:6) i “e señor di e tera” (Gen. 42:30,33, NKJV). E posishon poderoso di José ta kontrali na esun di su rumannan ku tabata den nesesidat, ku “a bùig te na suela p'e” (Gen. 42:6, NKJV), e mesun 10 rumannan ku a hasi bofon di José tokante su soño i a duda di su kumplimentu (Gen. 37:8).

Di dos, ta deskribí e reunion providensial akí komo un reakshon. E ekonan lingwístiko i temátiko entre e dos eventonan ta suprayá e karakter di vengansa hustu. A usa e frase “nan a bisa otro” (Gen. 42:21, NKJV) tambe ora nan a kuminsá konspirá kontra José (Gen. 37:19). E permanensia di e rumannan den prizòn (Gen. 42:17) ta eko e permanensia di José den prizòn (Gen. 40:3,4). De echo, e rumannan di José ta relashoná loke ta sosodiendo na e momento ei ku loke nan a hasi ku nan ruman kisas 20 aña pasá. “Pero nan a bisa otro: ‘Awor nos ta paga pa loke nos a hasi ku nos ruman. Nos no ker a tende ora el a roga nos pa tene kompashon kuné, ounke nos a ripará kon den pèrtá e tabata. P'esei awor ta nos mes ta den pèrtá’ ” (Gen. 42:21, NKJV).

Ruben su palabranan “ ‘Awor nos ta paga pa su morto’ ” (Gen. 42:22, NKJV), kua ta eko su spièrtamentu di pasado “ ‘No drama sanger’ ” (Gen. 37:22, NKJV), ta reforsá e konekshon entre loke nan tabata enfrentando awor i loke nan a hasi.

Yakob no por a permití e partida di Benjamin fásilmente, su úniko yu hòmber ku Raquel ku a keda serka dje. E tabatin miedu ku e lo a pèrd’é, manera ya el a pèrdè José (Gen. 43:6–8). Ta solamente ora no tabatin mas kuminda (Gen. 43:2) i ora Huda a hura pa garantisá e regreso di Benjamin (Gen. 43:9) ku Yakob a konsentí finlmente pa un di dos bishita na Egipto i a permití Benjamin bai huntu ku su rumannan.

Lesa Génesis 43. Ki efekto Benjamin su presensia tabatin riba e kurso di eventonan?

Benjamin su presensia a dominá e eventonan. Ora tur e rumannan ta para dilanti di José, Benjamin ta e úniko persona ku José ta mira (Gen. 43:16). Benjamin ta e úniko ku e ta yama “ruman” (Gen. 43:29, NKJV). Miéntras e ta yama Benjamin na nòmber, e no ta identifiká e otro rumannan; e ta referí na nan simplemente komo “hòmbernan” (Gen. 43:16).

José ta yama Benjamin “ ‘mi yu’ ”, komo un ekspreshon trankilisante di afekshon spesial (Gen. 43:29; kompará ku Gen. 22:8). E bendishon di José ta referí na “grasia” (Gen. 43:29), rekordatorio di su rogamentu pa grasia, kua no tabata inminente (Gen. 42:21). José ta duna Benjamin e grasia bèk ku e no a risibí for di su otro rumannan.

Miéntras e rumannan di José tin miedu ku lo tira nan den prizòn pa motibu di e plaka ku a bai bèk, José ta prepará un bankete pa nan pa motibu di Benjamin su presensia. Tabata komo si fuera Benjamin tabatin un efekto redentor riba henter e situashon. Ora tur e rumannan ta sintá di akuerdo ku nan edatnan i respekto e reglanan di honor, ta Benjamin , esun di mas hóben, ku nan ta sirbi sinku biaha mas ku tur e otro rumannan (Gen. 43:33,34). I tòg, e faboritismo akí no ta molestiá nan, manera tabata e kaso ora José tabata e faborito di su tata hopi aña pasá, kua a hiba na nan akshonnan teribel pa ku tantu nan mitar ruman komo nan propio tata (Gen. 37:3,4).

“Pa medio di e muestra di fabor akí na Benjamin el a spera di averiguá si nan tabata konsiderá su ruman di mas chikitu ku e envidia i odio ku nan a manifestá pa su mes. Suponiendo ainda ku José no tabata komprendé na idioma, e rumannan tabata kombersá libremente ku otro; asina e tabata un bon oportunidat pa haña sa di nan sintimentunan real. Ainda e tabata ke tèst nan mas aleu, i promé ku nan salida el a ordená pa skonde su propio kopa di plata ku e tabata bebe for di dje den e saku di esun mas hóben.”—Ellen G. White, Patriarchs and Prophets, p. 228, 229.

Lesa Génesis 44. Dikon José a pone e kopa di adivinashon den e saku di Benjamin i no den e saku di un otro ruman?

E storia akí ta paralelo na esun anterior. Manera promé, José ta duna instrukshonnan spesífiko; i, un biaha mas, e ta yena e sakunan di e hòmbernan ku kuminda. E biaha akí, sinembargo, José ta añadí e mandato straño, pa pone su presioso kopa den saku di Benjamin .

P’esei, e eventonan ta tuma un kurso diferente. Miéntras den e biahe anterior e rumannan a regresá Kanaan pa hiba Benjamin ku nan, awor nan tin ku regresá Egipto pa enfrentá José. Miéntras den e situashon anterior tur e rumannan a haña e mesun kos den nan sakunan, awor a skohe Benjamin komo esun ku tin e kopa di José. Inesperá, Benjamin ku, komo e invitado di honor, tabatin akseso na e kopa di José, awor ta sospechoso i akusá ku e akusashon di a hòrta e artíkulo presioso akí. E lo bai prizòn.

Ku José tabata usando un kopa di adivinashon no tabata nifiká ku e tabata kere den su poder. José “nunka a reklamá e poder di adivinashon, pero tabata dispuesto pa laga nan kere ku e por a lesa e sekretonan di nan bida .”—Ellen G. White, Patriarchs and Prophets, p. 229.

E kopa mágiko tabata un preteksto pa José invoká e dominio sobrenatural, i asina spièrta den kurason di su rumannan nan sentido di kulpabilidat pa ku Dios. Ta sina Huda ta interpretá e mensahe impliká di José, pasobra e te referí na e inikidat ku Dios a haña den nan (Gen. 44:16). Tambe, e hòrtamentu di e presioso kopa lo a hustifiká un kastigu severo i asina tèst e manera di pensa di e otro rumannan.

E intensidat di e rumannan su emoshon i nan reakshon ta signifikante. Nan tur ta uní den e mesun doló, i tabata teme pa Benjamin , ku lo a pèrdè manera José a pèrdè, i meskos kuné bira un katibu na Egipto maske e tabata, meskos kuné, inosente. Ta p’esei Huda ta proponé pa tuma e komo katibu “na lugá” di Benjamin (Gen. 44:33), meskos ku a sakrifiká e chubatu di karné “na lugá” di e inosente Isak (kompará ku Gen. 22:13). Huda ta presentá su mes komo un sakrifisio, un supstituto, ken su proposishon ta presisamente pa dil ku e “maldat” ku lo a destruí su tata (Gen. 44:34).

Lesa Génesis 45. Ki lèsnan di amor, fe, i speransa nos por haña den e storia akí?

Ta na e momento akí mes, ora Huda a papia tokante e “ ‘kos malu’ ” ku lo a kai riba ’avi, “ ‘mi tata’ ” (Gen. 44:34), ku José “a sklama” (Gen. 45:1) i despues “a hasi su mes konosí” na su rumannan. E ekspreshon akí, hopi biaha usá pa referí na Dios Su outorevelashon (Eks. 6:3, Ezek. 20:9), ta sugerí ku ta Dios tambe kende a revelá Su mes aki, tambe. Es desir, Señor a mustra ku Su providensia ta reina, asta apesar di debilidatnan humano.

José su rumannan no por kere loke nan ta tendiendo i mirando. Asina, José ta obligá di ripití: “ ‘Mi ta boso ruman José’ ” (Gen. 45:4, NKJV), i solamente na e di dos biaha, ora nan a tende e palabranan eksakto “ ‘ku boso a bende i a laga bai Egipto’ ” (Gen. 45:4, NKJV), ku nan ta kere.

E ora ei José ta deklará: “ ‘Dios a manda mi’ ” (Gen. 45:5, NKJV). E referensia na Dios akí tin un propósito dòbel. E no ta sirbi solamente pa bolbe sigurá su rumannan ku José no tin mal sintimentunan tokante nan; e ta tambe un konfeshon profundo di fe, i un ekspreshon di speransa, pasobra loke nan a hasi tabata nesesario pa e “ ‘gran liberashon’ ” i e sobrebibensia di un “ ‘restante’ ” (Gen. 45:7).

E ora ei José ta urgi su rumannan pa bai serka su tata pa asina prepar’é pa bin Egipto. E ta kompañá su yamada ku palabranan spesífiko enkuanto di e lugá kaminda nan lo “biba”, esta, Goshen, famoso pa su kunuku di yerba bèrdè, “ ‘e parti mas mihó di e pais’ ” (Gen. 45:18,20). Tambe e ta proveé transportashon: ta proveé garoshi, ku finalmente lo konvensé Yakob ku su yunan no tabata gan’é tokante di loke nan a kaba di eksperensiá (Gen 45:27). Yakob ta tuma e demostrashon visibel akí komo evidensia visibel ku José ta na bida, i esaki ta sufisiente p’e pa biba atrobe (kompará ku Gen. 37:35, Gen. 44:29).

Kosnan ta bon awor. E 12 yunan hòmber di Yakob ta bibu. Awor ta yama Yakob “Israel” (Gen. 45:28), i e providensia di Dios ta manifesto den un forma poderoso.