Lès 1

*25 di yüni – 1e di yüli

E Krisol** di e Wardadó
Sabat 25 di yüni
Lesa pa e Estudio di e Siman Akí:

Salmo 23; Romanonan 12:18–21.

Teksto di Memoria:

“E ta restorá mi alma; E ta guiami den e kamindanan di hustisia pa motibu di Su nòmber.” (Salmo 23:3).

Sophie a lèn bèk kontra porta di su kamber i a slep bai riba flur. Lágrimanan tabata bin ariba rápido, i tabata solamente un momento promé ku e tabata yorando. “Kon e tabata por? Kon e tabata por!” Sophie a kaba di risibí notisia ku tabata kibrando su kurason. Un hende ku el a kere tabata su amigu, un hende ku e tabata respetá i konfia, tabata plamando redu horibel tokante dje pa asina ruiná su reputashon i e obra ku e tabata hasiendo. Ora el a pasa man kue su Beibel for di riba kama, di ripiente el a hañ’é ta fiha riba algun palabra konosí: “E ta restorá mi alma; E ta guiami den e kamindanan di hustisia pa motibu di Su nòmber. Maske mi kana den e vaye di sombra di morto, mi no tin miedu di maldat, pasobra Abo ta ku mi; Bo bara i Bo garoti ta konsolámi.” (Salmo 23:3,4).

“Siguramente esaki no por ta!” el a bisa su mes sin pensa. Pero e lógika tabata parse inevitabel. E Wardadó den e salmo tabata guiando Su karnénan den kamindanan di hustisia, pero e mesun kamindanan akí parse tabata traha nan kaminda den e vaye di sombra di morto. Por tabata posibel ku asta e traishon doloroso akí dor di un amigu, e vaye skur akí, Dios por a usa pa train e den hustisia?

Un Bista Riba e Siman: Na ki momentonan bo a krese mas spiritualmente, a lo largu di e momentonan fásil òf e momentonan mas difísil?

*Studia e lès di e siman akí pa prepará pa Sabat, 2 di yüli.

[** Krisol ta un kanika den kua nan ta dirti metalnan presioso pa purifiká nan.]

Djadumingu

26 di yüni

Un Guia pa e Biahe: E Wardadó

“SEÑOR ta mi wardadó, lo mi no tin falta di nada” (Salmo 23:1).

A pidi algun mucha pa pinta un potrèt di Dios. Sin eksepshon, kada un a pinta un potrèt ku un kurason un kaminda den dje. Ora a puntra nan dikon, nan a deklará unánimemente ku Dios ta amor. Tabata asina simpel.

Ta fásil pa tin un bon opinion tokante Dios i Su propósitonan ora tur kos ta bayendo bon. Pero segun ku nos ta bira mas bieu i bida ta bira mas difísil i mas kompliká, nos bista di Dios ta kambia hopi biaha. Dios no ta kambia, naturalmente (Hebr. 13: 8, Santiago 1:17); pero nos ta kambia.

Pa motibu di e estilo di bida pastoral di e hendenan den tempunan di Tèstamènt Bieu, Salmo 23 ta usa e imágen di un wardadó pa deskribí e forma ku Dios ta kuida pa nos. Ta usa e símbolo di un wardadó pa Dios, den tantu Tèstamènt Bieu komo Tèstamènt Nobo. E ta un kuadro maravioso i un ku ta inkambiabel tambe. Promé ku nos wak Salmo 23, laga nos investigá kon diferente eskritornan di Beibel ta komprondé e obra i karakter di e Wardadó a lo largu di Beibel.

Kiko bo ta siña tokante e Wardadó for di kada un di e siguiente versíkulonan?

Bira awor na Salmo 23. Kiko e Wardadó ta hasi pa kuida Su karnénan?

Kiko ta nifiká pa bo di sa ku tin Un Hende asin’aki ku ta kuida bo? Kon lo bo por usa e kuadro akí pa kurashá un hende ku su propio kuadro di Dios a ser skuresé pa motibu di su propio luchanan, loke sea ku nan ta?

Djaluna

27 di yüni

Lugánan riba e Biahe

“E ta restorá mi alma; E ta guiami den e kamindanan di hustisia pa motibu di Su nòmber.” (Salmo 23:3).

Imaginá bo e “kaminda di hustisia" (Salmo 23:3) ekstendé bo dilanti, te leu aya den distansia. Bo no por mira e final, pero bo sa ku na final di e biahe ta kas, e kas di Dios. Miéntras bo ta focus un tiki mas serka di bo, bo ta mira na unda e kamindanan ta hiba? Bo por mira algun lugá klaramente, pero otro partinan ta totalmente opstruí pa opstákulonan grandi òf peligroso. Tin bia e kaminda ta disparsé riba un kabes di seru. Algun parti di e kaminda ta fásil pa kana banda di dje; otronan ta difísil. Tabata meskos asin’aki ora Israel tabata biaha for di Egipto pa e Tera Primintí, i ta deskribié mesun kos den e salmo akí.

Identifiká for di Salmo 23 e lugánan ku David ta mira e karnénan ta pasa dor di dje siguiendo e kamindanan di hustisia miéntras nan ta traha nan kaminda pa e kas di Señor.

Pero dikon ta yama e kamindanan akí “kamindanan di hustisia” òf “kamindanan drechi”? Ata aki kuater motibu importante. Na promé lugá, nan ta e kamindanan drechi pasobra nan ta hiba na e destinashon korekto, e hogar di e Wardadó. Na di dos lugá, nan ta e kamindanan drechi pasobra nan ta mantené nos den harmonia ku e persona korekto, e Wardadó Mes. Na di tres lugá, nan ta e kamindanan drechi pasobra nan ta train nos pa ta e hendenan korekto, meskos ku e Wardadó. Na di kuater lugá, nan ta e kamindanan drechi pasobra nan ta duna nos e testimonio korekto, ora nos bira e hendenan korekto, nos ta duna gloria na Señor. Nan ta kamindanan “drechi” òf “hustu” sea ku ta avansá fásil òf difísil.

Ta importante pa realisá ku ora Dios guia nos, no ta simplemente un kuestion di ku E ta hiba un pakete na e destinashon. E ta muchu mas ku guiansa i protekshon. Meskos ku e hopi ehèmpelnan a lo largu di Beibel den kua Dios ta guiando Su pueblo (sea E ta guiando Abraham pa medio di Su promesanan òf guiando Israel pa medio di e pilá di kandela i nubia), ora Dios ta guiando, ta trata semper tokante Su entrenamentu di Su pueblo den hustisia.

Kon konsiente bo ta ku hustisia ta e prioridat di e Wardadó pa bo bida? Kon pruebanan por kambia bo bida pa asina bo reflehá e karakter di Kristu mihó?

Djamars

28 di yüni

Desviashon Inesperá 1: E Vaye

“Maske mi kana den e vaye di sombra di morto, mi no tin miedu di maldat, pasobra Abo ta ku mi; Bo bara i Bo garoti ta konsolámi.” (Salmo 23:4).

Lo tabata bunita si e kamindanan di hustisia tabata traha nan kaminda banda di e oria kubrí ku yerba di riunan fresku. Pero esei no ta e forma ku David ta pint’é. Tambe banda di e kamindanan ei tin e vaye di sombra di morto, no un lugá ku nos ta ansioso pa bishitá! Na sierto momentonan di aña, e vayenan i abismonan hañá na Israel ta vulnerabel pa inundashonnan rápido ku por bin inesperadamente i proba di ta aplastante. E lugánan akí tambe ta di karakterístika smal, ku bandanan steil ku ta blòkia e lus. P’esei, “e sombra di morto” ta un imágen pa “sombra hopi profundo” òf “skuridat profundo”.

Pensa riba e momentonan ku bo tabata den bo propio “vaye di sombra di morto”. Kon e tabata? Bo tabatin miedu, aunke bo tabata sa ku e Wardadó tabata ei? Kua versíkulonan di Beibel tabata di mas presioso pa bo na e momento ei, i dikon?

Kon bo ta kere ku e karnénan a resultá den e vaye? Bo ta kere ku e karnénan a bai einan riba nan mes, òf e Wardadó a guia e karnénan den e kaminda ei E mes? Hustifiká bo kontesta.

Elisabeth Elliot ta skirbi: “Un lamchi ku a haña su mes den e vaye di sombra di morto kisas lo por a konkluí ku a gui’é inkorektamente. Tabata nesesario pa e krusa e skuridat ei pa asina siña di no tin miedu. E wardadó ainda ta huntu kuné.”–Elisabeth Elliot, Quest for Love (Grand Rapids, MI: Revell Books, 1996), p. 218.

Bo a yega di sinti ku a “guia bo inkorektamente” den e vaye? Kon bo a reakshoná na Dios durante e momento akí? Dikon bo ta kere ku e Wardadó kisas lo tabata dispuesto pa riska ku ta komprond’é malu dor di permití nos drenta un vaye skur?

Djárason

29 di yüni

Desviashon Inesperá 2: E Mesa Rondoná

“Bo ta prepará un mesa mi dilanti den presensia di mi enemigunan; Bo ta ungi mi kabes ku zeta; mi kopa ta yen te basha ofer.” (Salmo 23:5).

A lo largu di nos bida, nos lo dal inevitablemente den algun enemigu. Kon bo ta dil ku nan? Bo a yega di keda lantá anochi, ta bòltu i bira, soñando maneranan pa tuma revancha riba esnan ku ta tratando na heridá bo òf destruí bo trabou? Por ta difísil pa kristiannan sa kon trata enemigunan.

Ki tiponan di enemigu bo a yega di tin den bo bida? Kon bo a reakshoná riba esnan ku a purba heridá abo òf esnan ku bo ta preokupá p’e? Kon bon bo a sigui e palabranan di Kristu na nos den Mateo 5: 44, òf di Pablo den Romanonan 12: 18–21?

Den Salmo 23:5 David ta mustra nos un manera interesante di trata ku enemigunan. E ta skuresé nan presensia dor di wak en kambio na loke Dios ta hasiendo na su fabor. I Dios tei preparando un bankete p’e.

Den David su kultura, ora un invitado di honor a yega pa un fiesta, e anfitrion tabata ungi su kabes ku zeta ora e invitado tabata na punto di drenta e sala di bankete. E zeta tabata un meskla di zeta di oleifi i perfume. Despues tabata pone e invitado sinta dilanti di muchu mas tantu kuminda ku hamas un hende por a kome.

Kon e tres artíkulonan (mesa, zeta, kopa) den Salmo 23:5 lo por yuda kòrda nos riba kon Dios ta proveé, asta ora nos ta den e vaye?

Manera Pablo ta kòrda nos, “nos lucha no ta kontra karni i sanger, sino kontra e gobernantenan, kontra e podernan, kontra e forsanan mundial di e skuridat aki, kontra e forsanan spiritual di maldat den e lugánan selestial.” (Efe. 6:12). Nos enemigunan ta inkluí esnan ku nos ta mira i esnan ku nos no ta mira. Sea nos gusta òf nò, nos ta rondoná. Sinembargo, ora nos ta huntu ku e Wardadó, ni un enemigu, visibel òf invisibel, por hòrta loke El a proveé pa nos.

Reflehá riba kon e Wardadó a trata bo ora bo tabata rondoná pa enemigunan. Kiko bo por mira den e momentonan akí ku por kapasitá bo pa duna danki asta durante difikultatnan asina?

Djaweps

30 di yüni

Un Promesa Sierto pa e Biahe

“Siguramente bondat i miserikòrdia lo siguimi tur e dianan di mi bida, i lo mi biba den e kas di SEÑOR pa semper.” (Salmo 23:6).

Ora nos ta den e vaye òf rondoná pa enemigunan, tin biaha e ta tentador pa kere ku a laga nos so. No ta sinti semper manera kos ku Dios tabata hasiendo mashá; nos ta rasoná ku si E tabata yudando, nos lo no tabata den e situashon akí na promé lugá. Pero David, opviamente, no ta mir’é asin’aki.

Apesar di su pruebanan, ki dos kos Davis ta bisa den Salmo 23:6 ku e ta sigur di dje? (Lesa tambe Efe. 1:4; 2 Pe. 1:10; Hebr. 11:13–15.)

Algun tradukshon ta bisa ku bondat i amor infalibel (Dios Su kompromiso di pakto) lo “sigui” mi tur e dianan di mi bida. Sinembargo, e verbo original ta muchu mas fuerte, i e versíkulo mester bisa ku bondat i amor infalibel lo “persiguí” mi tur e dianan di mi bida. (De echo, e ta e mesun verbo usá den versíkulonan manera Génesis 14:14, Yozue 10: 19, i 1 Samuel 25: 29, kaminda e idea di “persiguí” ta hopi kla.)

Ki kuadro bo ta haña den bo mente si bo imaginá bo ku bondat i amor infalibel ta “persiguí” bo? Kiko bo ta kere ku David tabatin intenshon di bisa nos tokante ora el a deskribí Si kuido pa nos asin’aki?

No importá kon profundo e vaye ta òf kon persistente e enemigunan ta, e siguransa di Dios Su bondat i amor infalibel i e siguransa di Su guiansa te na final di nos biahe ta inkuestionabel. Si e pensamentunan akí por a sostené Hesus te na Kalvario, nos tambe mester tene kurashi.

Tin momentonan, sinembargo, ora esnan ku nos ta preokupá p’e ta yen di preguntanan. Meskos ku David, e mihó manera pa aserká e preokupashonnan akí ta, hopi biaha, no ku un deskripshon teológiko di loke Dios por hasi. Mas bien, manera David ta mustra nos den Salmo 23: 6, ta a traves di un afirmashon, e kompartimentu di un konvikshon personal, di e bèrdat tokante nos Dios.

Ki evidensia tin di bo propio konosementu di Dios ku por ilustrá e siguransa ku Su bondat i amor infalibel ta persiguí nos? Ki evidensia lo bo por añadí for di Beibel? Kon lo bo por kompartí esaki ku esnan ku por ta kuestionando e siguransa di Dios Su kuido? Kon e Krus ta e ehèmpel di mas grandi di e “persiguimentu” akí?

Djabièrnè

1e di yüli

Mas Estudio:

Lesa Ellen G. White, “Missionaries in the Home,” p. 143, den Testimonies for the Church, tomo 4; “The Divine Shepherd,” p. 476–484, den The Desire of Ages.

“Esnan ku finalmente ta viktorioso lo tin temporadanan di teribel konfushon i prueba den nan bida religioso; pero nan no mester tira nan konfiansa afó, pasobra esaki ta un parti di nan disiplina den e skol di Kristu, i e ta esensial pa asina tur shushedat laba bai. E sirbidó di Dios mester soportá ku fortalesa e atakenan di e enemigu, su chèrchinan kruel, i mester vense e opstákulonan ku Satanas lo pone den su kaminda.

“Pero si bo keda wak ariba, no abou na bo difikultatnan, lo bo no desmayá na kaminda, pronto lo bo mira Hesus ekstendiendo Su man pa yuda bo, i lo bo mester solamente dun’E bo man den simpel konfiansa, i lag’E guia bo. Ora bo bira yen di konfiansa, lo bo bira yen di speransa. . . .

“Lo bo haña yudansa den Kristu pa forma un karakter fuerte, simétriko i bunita. Satanas no por tin niun efekto riba e lus ku ta bria for di un karakter asina. . . . Dios a duna nos e mihó regalo, asta Su úniko Yu, pa elevá, enoblesé, i hasi nos apto, dor di pone riba nos Su propio perfekshon di karakter, pa un hogar den Su reino.”—Ellen G. White, Messages to Young People, p. 63, 64.

Preguntanan pa Diskushon:

pregunta 1 Te na ki grado bo tabata konsiente ku e “teribel konfushon i prueba” ku ta bin den bo bida por ta en realidat parti di bo “disiplina den e skol di Kristu”?

pregunta 1 Kon nos yudansa, konsuelo, i enkurashamentu na esnan den e vaye lo por ta parti di e Wardadó su forma di pasa hende dor di nan krísisnan? Kiko boso komo iglesia por hasi pa Señor usa boso mihó pa yuda esnan den nesesidat?

pregunta 1 Den klas, pasa rònt i laga kada persona papia tokante kon bondat i miserikòrdia a “persiguí” nan. Kiko boso por siña di otro su eksperensianan?

pregunta 1 Pensa riba e último oranan di e bida di Kristu, segun ku E tabata drenta den Su prueba. For di loke bo por bisa, sea di Beibel òf Ellen G. White (The Desire of Ages ta un gran fuente), kon Hesus, den Su humanidat, tabata kapas pa soportá? Kiko nos por saka for di Su ehèmpel pa nos mes den kualke prueba ku nos ta enfrentá tambe?