Lès 2

*2–8 di yüli

E Krisolnan Ku ta Bin
Sabat 2 di yüli
Lesa pa e Estudio di e Siman Akí:

1 Pe. 4:12–19; 1 Pe. 5:8–11; Rom. 1: 21–32; Jer. 9:7–16; 2 Kor. 12:7–10.

Teksto di Memoria:

“Stimánan, no sea sorprendí pa motibu di e kandela di prueba ku tin meimei di boso, ku ta bin riba boso pa boso ser probá, komo si fuera ta algu straño ta pasa ku boso” (1 Pedro 4:12,13).

Den laboratorionan di kímika hopi biaha hende ta pone vários material den un baki chikitu i ta keinta nan te na temperaturanan ekstremo. Segun ku e baki ta bira mas kayente, e materialnan ta sea dirti, bira lalilali, skupi, òf ta kima di forma briante, dependiendo riba di kiko nan ta trahá. Nan ta yama e baki un krisol.

Ta definí un krisol den dikshonario komo (1) un baki usá pa dirti un supstansia ku ta rekerí un grado haltu di kayente, (2) un tèst severo, (3) un lugá òf situashon den kua forsanan konsentrá ta fòrsa interakshon pa kousa òf influensiá kambio òf desaroyo.

E definishonnan akí ta duna nos tambe un persepshon útil den loke ta sosodé den nos bida spiritual. E siman akí nos lo enfatisá algun motibu pa kua di ripiente nos por haña nos mes bou di preshon i ta eksperensiá tèstnan den lugánan den kua sirkunstansianan ta pone nos kambia, desaroyá, i krese den karakter. Esaki lo yuda duna nos un konsiensia di loke Dios ta hasiendo den nos bida asina ku ora nos drenta den un krisol, nos lo tin un idea di kon pa reakshoná.

Un Bista Riba e Siman:

Kiko ta e kousanan di e momentonan difísil ku nos ta eksperensiá a lo largu di nos bida?

*Studia e lès di e siman akí pa prepará pa Sabat, 9 di yüli.

Djadumingu

3 di yüli

Sorpresanan

“Rumannan stimá, no keda sorprendí ku boso ta pasa den kandela di prueba duru, i hasi komo si fuera ta algu apnormal” (1 Pe. 4:12).

Sorpresanan, sorpresanan doloroso, por bin den hopi forma. Un outo birando rònt na otro banda di kaya drenta den bo kaminda. Un anunsio di ripiente ku bo ta pèrdiendo bo trabou. Un tèst médiko ku ta duna bo un mal notisia inesperadamente. Traishon pa un hende ku bo tabata stima i ku bo a kere ku tabata stima bo. Pa malu ku e doló por ta, semper e elemento di sorpresa ta hasié pió. E siman akí nos lo wak algun tiponan spesífiko di situashonnan doloroso òf krisolnan ku no mester kue nos di sorpresa.

Pa kuminsá, laga nos bai bèk na 1 Pedro 4:12. E palabra griego pa “sorprendí” den 1 Pedro 4:12 ta nifiká di ta “straño”. Pedro ta urgiendo su lesadónan pa no kai den e trampa di kere ku eksperensianan i pruebanan feros ta straño pa eksperensia kristian. Mas bien, mester konsiderá nan normal, por i mester spera nan.

E palabra usá pa “kandela di prueba duru” ta bin di un otro palabra griego, i e ta nifiká “un kimamentu”. Na otro lugánan ta tradusié “fòrnu”. Por konsiderá e eksperensia akí di sufrimentu pa nos fe un “proseso di dirtimentu”, e proseso di e krisol.

Lesa 1 Pedro 4:12–19. Kiko ta Pedro su mensahe?

Hopi di nos ta sorprendí tokante sufrimentu pasobra hopi biaha nos tin un bista muchu simpel di e bida kristian. Nos sa ku tin dos banda: Dios, kende ta bon; i Satanas, ku ta malu. Pero hopi biaha nos ta pone e ora ei tur kos ku ta sinti bon den e kaha ku Dios, i tur kos ku ta sinti malu den e kaha ku Satanas. Pero bida no ta asina simpel. Nos no por usa nos sintimentunan pa disidí kiko ta den kaha di Dios òf kaha di Satanas. Tin biaha kana ku Dios por ta desafiante i difísil. I sigui Satanas por parse ku e ta trese gran rekompensanan. Job, ku ta hustu i sinembargo ta sufri, ta ilustrá esaki ora el a puntra Dios: “Pakiko e malbadonan ta sigui biba i bira bieu, sí, bira masha poderoso mes?” (Job 21:7).

Pedro tabata refiriendo na pruebanan ku ta konsekuensia di lanta para pa Kristu. Pero tin tambe otro motibunan ku pruebanan ta bin. Kon 1 Pedro 4:12–19 lo por yuda splika un amigu, di forma táktiko, dikon e no mester keda sorprendí ku e pruebanan doloroso ku e lo por enfrentá?

Djaluna

4 di yüli

Krisolnan di Satanas

“Sea sobrio, sea alerta. Boso atversario, e diabel, ta kana rònt manera un leon ku ta gruña, buskando ken e por devorá.” (1 Pe. 5:8).

Lesa e versíkulo akiriba. Kiko ta e mensahe einan pa nos? Puntra bo mes: “Kon na serio mi ta tuma e palabranan akí?” Kiko bo por hasi den bo bida ku ta demostrá si bo ta tuma nan na serio?

Bo a yega di mira un leon ku tin hamber? Ta impreshonante pasobra bo sa ku e por kapturá i kome kasi tur kos ku e ke. Pedro ta bisa ku Satanas ta slùip rònt di e mesun forma. Ora nos wak rònt, nos por mira e konsekuensianan di su deseo pa mata. Morto, sufrimentu, i e trosementu i pervershon di normanan i balornan ta tur kaminda. Nos no por skapa di mira e obra di Satanas.

Lesa 1 Pedro 5:8–11. Kon kristiannan mester reakshoná riba e slùipmentu di Satanas?

Kiko Dios ta primintí di hasi pa esnan ku ta sufriendo? 1 Pe. 5:10.

Pero ta skirbi e palabranan akí den konteksto di reakshoná riba e atakenan di Satanas riba fe kristian. Pero manera nos a menshoná, Satanas ta traha den diferente forma. I aunke nos mester ta konsiente di e realidat i e poder di nos enemigu, nos no mester deskurashá nunka, pasobra semper nos mester kòrda ku Hesus a vense Satanas, ku Satanas ta un enemigu derotá, i ku tanten nos keda konektá ku Hesus, tanten nos tene duru na djE den fe, no por derotá nos nunka tampoko. Pa motibu di e krus, e viktoria di Kristu ta nos viktoria.

Pensa riba e otro maneranan ku Satanas ta kousa doló. Kon lesando 1 Pedro 5:8–11 lo por yuda nos dil ku e angustia ku nos ta eksperensiá pa motibu di nos destino di biba den un mundu pekaminoso den kua Satanas ta kousa gran daño?

Djamars

5 di yüli

Krisolnan di Piká

“Pasobra e furia di Dios ta keda revelá for di shelu kontra tur impiedat i inhustisia di hende ku ta oprimí e bèrdat pa medio di inhustisia” (Rom. 1:18).

Tur kos ku nos hasi tin un konsekuensia. Si bo para den solo kayente ku eiskrim, siguramente e lo dirti. Kousa i efekto semper ta bai huntu. I no importá kon desesperadamente nos por ke pa kosnan ta diferente, e ta mesun kos ku piká. Semper e ta kosechá konsekuensianan. No ta ku Dios ta sinta den shelu puntrando Su mes ki kosnan teribel E lo por a hasi ku hende ku peka; nò, piká mes ta bin ku su mes konsekuensianan ankrá den dje.

E problema ta ku hopi biaha nos ta kere ku di un òf otro manera nos por burla di Dios, i peka sin eksperensiá e konsekuensianan. E no ta sosodé nunka. Pablo ta bisa bon kla ku peka tin konsekuensianan no solamente pa eternidat sino konsekuensianan doloroso i angustioso awe.

Den Romanonan 1:21–32 Pablo ta deskribí e proseso di hendenan ku ta kai den piká i e konsekuensianan di e pikánan ei. Lesa e versíkulonan akí ku orashon i kuidadosamente i resumí e esensia di loke Pablo ta bisando, i focus spesífikamente riba e fasenan di piká i e konsekuensianan.

Un par di versíkulo anterior Pablo ta deskribí e konsekuensianan akí komo e “furia di Dios” (Rom. 1:18). E furia di Dios den e pasashi akí ta simplemente Dios ku ta permití sernan humano kosechá loke nan sembra. Asta pa kristiannan, Dios no ta intervení semper inmediatamente pa kita e doló ku ta resultá di nos propio akshonnan. Hopi biaha E ta permití nos eksperensiá e konsekuensianan di nos akshonnan pa asina nos komprondé kon profundamente dañino i ofensivo nos piká ta.

Nos a bin ta konsiderá e konsekuensianan di kibra e leinan moral di Dios. Pero ke tal di kibra Dios Su leinan di salú? Nos kurpa ta kas di Dios. Si nos abuzá nos kurpa dor di faya di kome di forma saludabel òf di hasi ehersisio, òf si regularmente nos ta traha di mas, esaki tambe ta piká kontra Dios. I esakinan tin konsekuensianan ku por krea e kondishonnan di un krisol.

Den bo propio bida, kon bo a kosechá e konsekuensianan inmediato di bo propio pikánan? Ki lèsnan bo a siña? Ki kambionan bo tin ku hasi pa asina no pasa dor di algu similar atrobe?

Djárason

6 di yüli

Krisolnan di Purifikashon

“Pesei, asina e SEÑOR di ehérsitonan ta bisa: "Mira, lo Mi refiná nan i tèst nan; pasobra kiko mas Mi por hasi pa e yu muhé di Mi pueblo?'” (Yer. 9:7).

“Si e Spiritu di Dios trese na bo mente un palabra di Señor ku ta hasi bo doló, bo por ta sigur ku tin algu den bo ku E ke pa hasi doló te na e punto di su morto.”—Oswald Chambers, My Utmost for His Highest (Uhrichsville, OH: Barbour & Company, Inc., 1963), p. 271.

Kon bo ta komprondé e sita i versíkulo di Beibel aki riba? Kiko tabata bo propio eksperensia ku e dolónan envolví den e proseso di purifikashon?

Lesa Yeremias 9:7–16. Dios ta bisa ku E lo “refiná i tèst”, òf “dirti”, Huda i Herusalèm (Yer. 9:7). Ki dos rasonnan Dios ta duna pa esaki? (Yer. 9:13,14). Kon e refinamentu lo tuma lugá? (Yer. 9:15,16).

Dios Su refinamentu i tèstmentu ta envolví akshon drástiko. Tin kisas tres rason pakiko refinamentu i tèstmentu por sinti manera un krisol. Di promé, nos ta eksperensiá doló ora Dios permití sirkunstansianan trese nos piká na nos atenshon. Un poko mas promé, Yeremias di forma infelis ta skirbi: “E blaasbalgnan ta supla fuerte; kandela ta dirti chumbu; en bano nan ta sigui refiná, ma e malbadonan no por ser separá.” (Yer. 6:29). Pues, tin biaha akshon drástiko ta nesesario pa asina haña nos atenshon. Di dos, nos ta eksperensiá angustia ora nos sinti duele pa e piká ku awor nos ta mira klaramente. Di tres, nos ta eksperensiá frustrashon ora nos purba biba di forma diferente. E por ta bastante inkonfortabel i difísil pa sigui skohe pa entregá e kosnan ku tabata asina tantu un parti di nos.

Pensa riba e pikánan ku bo ta lucha kuné. Si Dios tabata bai refiná i tèst bo awe, kon E lo por a hasié? Ki akshon lo bo por tuma awor pa atendé ku esaki promé ku Dios lo ke tuma pasonan drástiko ku bo, manera El a hasi ku Israel?

Djaweps

7 di yüli

Krisolnan di Madures

“I pa motibu di e grandesa sobresaliente di e revelashonnan, pa e motibu aki, pa wardami di no halsa mi mes, a wòrdu duná na mi un sumpiña den karni, un mensahero di Satanás pa bòftami pa wardami di no halsa mi mes!” (2 Kor. 12:7).

Tin un gran diferensia entre kòrta basha abou i snui. Nos ta kòrta matanan ku nos no ke mas; nos ta snui matanan ku nos ke desaroyá den fertilidat mas grandi. Tur dos proseso, sinembargo, ta envolví un kuchú skèrpi. Enbèrdat, snuimentu ta rekerí kòrta partinan di e mata kita afó ku kisas por parse pa un hardinero nobato manera ta destruyé. Den un konteksto spiritual, Bruce Wilkinson ta skirbi: “Bo ta resando pa Dios Su abundante bendishonnan i ta rogando pa E lo hasi bo mas manera Su Yu?

“Si bo kontesta ta sí, e ora ei bo ta pidiendo pa e skèr.”–Bruce Wilkinson, Secrets of the Vine (Sisters, OR: Multnomah Publishers, Inc., 2001), p. 60.

Hende a puntra nan mes kiko Pablo tabata ke men en realidat ku un “sumpiña hinká den mi kurpa” (2 Kor. 12:7). Ideanan ta varia di ku Pablo tin atakenan konstante di enemigunan te na ku e tin difikultat di abla. Ta parse ku esaki tabata en realidat un problema ku su bista (lesa Ellen G. White Comments, The SDA Bible Commentary, tomo 6, p. 1107). Ta asombroso pa bisa ku Pablo a kere ku su “sumpiña” tabata “duná na mi”.

Kiko bo ta kere Pablo tabata ke men ku “duná na mi”? Ken a dun’é? Kon Dios tabata kapas di us’é pa Pablo su benefisio?

Nota ku Pablo su “sumpiña” tabatin un propósito definí: “pa evitá ku mi ta bira orguyoso” (2 Kor.12:7). No tabata pa motibu di niun piká spesífiko ku el a kometé, sino pa previnié di peka den futuro. Pablo a rekonosé ku pa naturalesa e tabatin un debilidat pa peka, i ku e “sumpiña” akí por a ward’é kontra esaki.

Lesa 2 Korintionan 12:7–10. Kon Pablo ta dil ku su “sumpiña”? Bo ta kere ku Pablo su debilidat tabatin kualke otro benefishinan spiritual p’e? Kon e forma kon Pablo ta reakshoná por yuda bo dil ku “sumpiñanan” ku bo por tin ku karga?

Den ki formanan kisas Dios Su ideanan pa bo desaroyo spiritual lo por ta hopi diferente for di esnan di bo mes? Pensa riba áreanan den bo bida den kua bo mester bira mas fruktífero den hustisia. Ki kualidatnan spiritual lo bo ke pidi Dios desaroyá den bo a traves di su “snuimentu”?

Djabièrnè

8 di yüli

Mas Estudio:

Lesa Ellen G. White, “Effectual Prayer,” den Signs of the Times, 18 di novèmber 1903; Ellen G. White Comments, p. 1182, den The SDA Bible Commentary, tomo 4; “God Permits Trial and Affliction to Purify Me,” p. 92, den My Life Today.

"E ku ta lesa kurason di hende konosé nan karakternan mihó ku nan mes konosé nan. E ta mira ku algun tin podernan i suseptibilidatnan kua, si dirigí nan korektamente, lo por usa nan den e avanse di Su obra. Den Su providensia E ta trese e personanan akí den diferente posishonnan i sirkunstansianan variá pa nan por deskubrí den nan karakter e defektonan kua tabata skondí for di nan propio konosementu E ta duna nan oportunidat pa koregí e defektonan akí, i pa ahustá nan mes pa Su servisio. Hopi bia E ta permití e kandelanan di aflikshon ataká nan pa E por purifiká nan.”–Ellen G. White, The Ministry of Healing, p. 471.

Preguntanan pa Diskushon:

pregunta 1 Por ta realmente duru miéntras nos ta kosechando e konsekuensianan di nos piká. “Lo mi ta kapas hamas pa drecha ku Dios atrobe?” nos ta puntra. Ki promesanan Dios ta hasi ku por enkurashá nos pa perseverá a traves di momentonan asina i no entregá? (Lesa kiko Pablo ta skirbi despues den Romanonan 5:1–11.) Kiko bo por bisa un hende ku ta hasiendo e mesun pregunta akí?

pregunta 1 Kiko Ellen G. White ke men ku “Su providensia”? Kon esaki ta funshoná? Kon bo sa ora algu sosodé pa e providensia di Dios? Ki aktonan di Dios Su “providensia” a hiba na pruebanan den bo mes bida? Komo klas, diskutí loke boso a siña na e momentu akí. Kon lo bo por yuda un hende ku ta puntrando su mes si algun evento ta enbèrdat “Su providensia”?

pregunta 1 Si bo konosé un hende ku ta pasando dor di un eksperensia di krisol aworakí mes, ta importá, òf mester importá, kiko a kous’é? Es desir, kon bo mester reakshoná riba e persona akí i su sufrimentu, apesar di loke a kous’é?

pregunta 1 Un hóben kristian ku ta biba na Suramérika tabata pasa dor di un prueba amargo. Despues ku el a pasa, el a muda pa Oropa i despues el a komentá na un hende: “Mi a laga mi kadaver na Suramérika”. Kiko esei ta nifiká? Dikon nos tur, den un sentido, mester laga nos kadaver un kaminda? Ki ròl pruebanan tin den e proseso ei?

pregunta 1 Komo klas, plania un salida na un hòspital òf un kaminda ku boso por ta di yudansa, konsuelo, i alegria pa esnan ku, pa kualke motibu, ta den un krisol.