Lès 4

*16 – 22 di yüli

Mirando Kara di e Platé
Sabat 16 di yüli
Lesa pa e Estudio di e Siman Akí:

Mat. 5:16; 1 Kor. 4:9; Efe. 3:10; Job 23:1–10; Mat. 25:1–12; Dan. 12:1–10; Efe. 4:11–16.

Teksto di Memoria:

“Ma nos tur, ku kara sin velo, mirando manera den un spil e gloria di Señor, ta ser transformá den e mesun imagen di gloria pa gloria, manera dor di e Spiritu di Señor.” (2 Korintionan 3:18).

Amy Carmichael a hiba un grupo di mucha na un platé tradishonal na India. Meimei di un kandela di karbon tabatin un tegel di dak doblá. Riba e tegel tabatin un meskla di salu, fruta di tamarein, i stòf di blòki. Inkorporá den e meskla akí tabatin oro. Miéntras e kandela tabata devorá e meskla, e oro tabata bira mas puru. E platé a saka e oro afó ku pinsa i, si e no tabata sufisiente puru, e tabata pon’é bèk den e kandela ku un meskla nobo. Pero kada biaha ku e tabata remplasá e oro e tabata oumentá e kayente. E grupo a puntra: “Kon bo sa ki ora e oro ta purifiká?” El a kontestá: “Ora mi por mira mi kara den dje”.—Amy Carmichael, Learning of God (Fort Washington, PA: Christian Literature Crusade, 1989), p. 50.

Dios ta tratando pa purifiká nos, pa refiná nos manera oro, pa transformá nos den Su imágen. Esei ta un meta asombroso, i ta parse ainda mas asombroso ku, solamente ora ku nos ta pasa dor di krisolnan di bida, un karakter manera di Kristu ta desaroyá den nos.

Un Bista Riba e Siman:

Ki ròl sufrimentu tin den e proseso di purifikashon? Kon nos ta komprondé tur esaki den konteksto di e gran kontroversia?

*Studia e lès di e siman akí pa prepará pa Sabat, 23 di yüli.

Djadumingu

17 di yüli

“Den Su Imágen”

“Pasobra esnan ku Dios a konosé di antemano, El a destiná kaba pa bira meskos ku su Yu, pa asina su Yu ta e ruman mayó di hopi ruman” (Rom. 8:29).

Na prinsipio Dios a traha hende segun Su imágen (Gen. 1:27), pero piká a korumpí e imágen ei.

Den ki formanan nos ta mira e desfigurashon di Dios Su imágen den humanidat?

Ta opvio: piká a korumpí nos tur (Rom. 3:10–19). Sinembargo, e deseo di Dios ta pa restourá nos na loke nos mester tabata originalmente. Ta aki ta kaminda nos versíkulo di awe ta pas. E ta revelá e plan di Dios ku esnan ku someté nan bida na Spiritu Santu por ta “destiná kaba pa bira meskos ku su Yu” (Rom. 8:29).

Pero tin un otro dimenshon. “Mester reprodusí e mes imágen di Dios den humanidat. E honor di Dios, e honor di Kristu, ta envolví den perfekshon di e karakter di Su pueblo.”—Ellen G. White, The Desire of Ages, p. 671.

Kon bo ta komprondé loke Ellen G. White ta bisa nos den e sita sitá akiriba? Lesa tambe Job 1, Mat. 5:16, 1 Kor. 4:9, Efe. 3:10.

Komo kristiannan, nos no mester lubidá nunka ku nos ta meimei di un drama kósmiko. E gran kontroversia entre Kristu i Satanas ta desaroyando tur rònt di nos. E bataya ta tuma hopi forma i ta manifestá den hopi forma. I aunke hopi kos ta skondí, nos por komprondé ku, komo siguidónan di Kristu, nos tin un parti pa hunga den e drama akí i por trese honor na Kristu a traves di nos bida.

Imaginá bo ku bo ta riba vèlt di un stadion enorme. Sintando den e tribunanan na un banda tin sernan selestial leal na Señor; na e otro banda tin sernan ku a kai huntu ku Lucifer. Si a representá bo bida pa e último 24 oranan riba e vèlt ei, kua banda lo tabatin mas kos pa grita di kontentu di dje? Kiko bo kontesta ta bisa bo tokante bo mes?

Djaluna

18 di yüli

Fe Meimei di e Kandela Ku ta Refiná

Ta un kos pa ta den un bataya; ta un otro pa ni sikiera mira e forsanan areglá den e bataya ei. Den un sentido, esaki ta loke nos komo kristiannan ta trata kuné. Nos sa ku e forsanan ta eifó, nos por sinti nan den nos bida, i tòg, nos mester pusha padilanti den fe, konfiando E “kende ta invisibel” (Hebr. 11:27).

Lesa Job 23:1–10. Kiko ta e esensia di e lucha di Job? Kiko e no ta mira? Na mes momento, kiko e ta tuma pa fe, apesar di tur su pruebanan?

Asta meimei di su pruebanan teribel, Job a konfia den Señor. Apesar di tur kos, Job tabata determiná pa soportá. I un di e kosnan ku a manten’é perseverando tabata oro. No un medaya di oro; mas bien, e tabata mirando den futuro i a realisá ku si el a gara bon na Dios, e lo a sali mihó for di dje, e lo a sali meskos ku oro. Kuantu Job tabata sa di loke tabata pasando tras di kortina, no ta bisa nos. Apesar di kuantu tabata skondí p’e, el a soportá e kandela ku ta refiná di tur manera.

Bo tin miedu di kandela? Bo ta preokupá tokante e kayente ku sirkunstansianan ta generá? Kisas, manera ku Job, e kayente di Dios ta parse ineksplikabel. Por ta e difikultat di ahustá na un trabou nobo òf un hogar nobo. Lo por ta di tin ku sobrebibí mal trato na trabou, òf asta denter di bo propio famia. Lo por ta malesa òf pèrdida finansiero. Pa difísil ku e por ta pa komprondé, Dios por usa e pruebanan akí pa refiná bo i purifiká bo i saka Su imágen den bo karakter.

Siendo probá di ta oro parse di ta un insentivo pa Job aki, algu pa fiha su bista riba dje, i ku ta yuda hal’é dor di su problemanan. E ta un testimonio poderoso pa su karakter kaba ku, meimei di tur e doló i sufrimentu, e tabata kapas pa sinti e realidat di e proseso purifikadó. Tambe, maske kuantu e no a komprondé, e tabata sa ku e pruebanan akí lo a purifik’é.

Den bo propio eksperensia, kon pruebanan ta refiná i purifiká? Ki otro maneranan lo bo por ta refiná, ademas di a traves di sufrimentu?

Djamars

19 di yüli

E Ultimo Palabranan di Hesus

Hesus tabata na Herusalèm, na punto di muri. Di akuerdo ku e Evangelio di Mateo, Hesus a pasa Su último oranan di siñansa promé ku Pasku kontando Su disipelnan parabelnan, inkluyendo esnan tokante e dies bírgennan i e karnénan i e kabritunan. E storianan akí ta relashoná ku e manera ku nos mester biba segun ku nos ta warda pa Hesus bin. Pues nan relevansia na awe, huntu ku e señalnan di e pronto regreso di Hesus tur rònt di nos, nunka tabata mas signifikante.

Den e parabel di e sinku bírgennan (Mat. 25:1–12), hopi komentarista ta señalá ku e zeta ta un símbolo di Spiritu Santu. Ellen G. White ta di akuerdo, pero ta bisa tambe ku e zeta akí ta un símbolo pa karakter i ku e ta algu ku niun hende por atkerí pa nos.

Lesa e parabel. Den ki forma e nifikashon di e storia ta kambia, dependiendo riba sea bo mira zeta komo un símbolo di Spiritu Santu òf pa poseshon di karakter? Kiko ta e implikashonnan di e storia akí pa bo si e zeta ta representá Spiritu Santu, òf un karakter manera esun di Kristu?

Lesa e parabel di e karnénan i e kabritunan den Mateo 25:31–46. Ki kriterio Hesus ta usa ora ta separá e karnénan i e kabritunan?

Nota ku e rei ta separá e karnénan i e kabritunan basá riba nan obranan, nan karakter. Aunke Hesus no ta siñando salbashon pa medio di obranan aki, nos por mira kon importante desaroyo di karakter ta den e plan di salbashon i kon esnan ku ta berdaderamente salbá pa Kristu lo reflehá e salbashon ei a traves di nan bida i karakter.

Nan a bisa ku “karakter ta loke un persona ta den skuridat”. Ki sorto di persona bo ta ora niun hende ta wak? Kiko e kontesta ta bisa bo tokante kambionan ku bo tin ku hasi?

Djárason

20 di yüli

“E Sabínan”

Ayera nos a wak e importansia di karakter pa esnan ku ta sperando e Segundo Binida. Awe nos lo wak e importansia di karakter pa esnan ku ta bibu na e segundo binida di Hesus mas spesífikamente.

Lesa Daniel 12:1–10. Kiko ta e konteksto? Na ki tempu den historia di tera nan ta referí? Mas importante ainda, kiko nos por bisa for di e versíkulonan akí tokante e karakter di Dios Su pueblo durante e tempunan akí? Ki karakterístikanan ta duna nan, den kontraste ku e malbadonan? Lesa tambe Rev. 22:11.

Ta bisa Daniel ku djis promé ku Hesus bin, lo tin un tempu di angustia desigual na kualke otro tempu den historia. Den Daniel 12:3,10 ta duna nos un deskripshon di esnan hustu i esnan malbado durante e tempu akí. Nota kon e malbadonan “lo sigui kometé maldat” (Dan. 12:10) kontrali na esnan hustu, ku den versíkulo 3 ta bria manera splendor, kisas pasobra a “limpia, purifiká i refiná” nan (Dan. 12:10) durante e “tempu di angustia manera nunka tabatin for di tempu ku tabata eksistí un nashon te na e tempu ei” (Dan. 12:1). Den kontraste, tambe, e malbadonan no ta komprondé, ma esnan hustu ta “sabí” i ta komprondé.

Komprondé kiko? Matemátika, siensia, krítika haltu? Proverbionan ta bisa ku “E temor di SEÑOR ta e prinsipio di konosementu” (Prov. 1:7). Kisas, den e konteksto akí, e “sabínan” ta sabí pasobra nan tin un komprondementu di e eventonan final akí, e tempu di angustia, segun ku e ta desaroyá. Nan no ta haña sorpresa; for di nan estudio di e Palabra, nan sa ku e ta biniendo. I mas importante ainda, nan sa sufisiente pa permití e tempu di angustia akí purifiká i refiná nan; e malbadonan, na otro banda, a bira djis mas kabesura den nan rebelion i asina ta sigui den nan maldat.

E punto krusial ta ku aki nos ta haña un deskripshon di un pueblo ku a pasa dor di un proseso di refinashon i purifikashon.

Aunke nos a wak e versíkulonan akí den konteksto di e último dianan, ki prinsipionan nos ta mira aki ku por yuda nos awor pa komprondé mihó di kiko e proseso di purifikashon i refinashon ta trata, asta pa nos awe?

Djaweps

21 di yüli

Karakter i Komunidat

Un kantika ta bai asin’aki: “Mi ta un baranka, mi ta un isla”. Bo a yega di sinti asina, ku bo ke para bo so? Bo por a asta tende hende bisa: “Bon, mi relashon ku Dios ta un asuntu privá. No ta algu ku mi ke papia riba dje”.

Lesa Efesionan 4:11–16. Kiko Pablo ta trese dilanti aki? Ki ròl e ta duna aki pa komunidat?

Ora Pablo ta skirbi na e Efesionan, e ta deskribí e iglesia komo un kurpa. Hesus ta e kabes, i Su pueblo ta komponé e sobrá. Si bo wak Efesionan 4:13, lo bo nota e propósito final di biba den un komunidat asina, ta pa eksperensiá “e estatura di e plenitut di Kristu”. I pa esei nos tin mester di otro!

Sigur sigur ta posibel pa ta un kristian kompletamente bo so. Enbèrdat, manera ku hopi hende ku a lo largu di siglonan nan a ridikulisá òf persiguí, para bo so hopi biaha ta inevitabel. Ta un testimonio poderoso na e poder di Dios ku hòmber- i muhénan no ta dobla bou di preshonnan ku ta rondoná nan. Sinembargo, miéntras esaki ta bèrdat, Pablo ta deseá di enfatisá un bèrdat krítiko: finalmente, nos ta eksperensiá i revelá e plenitut di Kristu ora nos ta trahando huntu den kompañerismo un ku otro.

Den Efesionan 4:11–16, kiko Pablo ta bisa ku mester sosodé promé ku e plenitut di Kristu por ser revelá den nos komunidat kristian?

Den ki forma e testimonio di un komunidat ku ta revelando e plenitut di Kristu ta diferente for di un individuo ku ta revelando e plenitut di Kristu? Kiko ta e implikashonnan di esaki den konteksto di e gran kontroversia? Lesa Efe. 3:10.

Ta fásil pa ta amabel ora bo ta bo so òf huntu ku strañeronan, pero ta muchu mas difísil pa ta amabel ku hende ku sea bo konosé realmente òf no gusta. Esaki ta nifiká ku ora ainda nos ta demostrá e hendenan aki grasia i amabilidat, nos ta proveé un testimonio iresistibel na e bèrdat tokante Dios.

Djabièrnè

22 di yüli

Mas Estudio:

Lesa Ellen G. White, “God Promises Us a New Heart of Flesh,” p. 100, den Sons and Daughters of God; “ ‘To Meet the Bridegroom,’ ” p. 405–421, den Christ’s Object Lessons; “The Time of Trouble,” p. 613–634, den The Great Controversy.

“Formashon di karakter ta e obra di mas importante hamas konfiá na sernan humano; i nunka promé su estudio diligente tabata asina importante manera awor. Nunka a yama kualke generashon previo pa trata ku asuntunan asina trasendental; nunka promé hóbennan, hòmber i muhé, a konfrontá peligernan asina grandi manera nan ta konfrontá awendia.”—Ellen G. White, Education, p. 225.

“Den e parabel, ta representá e bírgennan bobo komo rogando pa zeta, i fayando di risibié riba nan petishon. Esaki ta simbóliko di esnan ku no a prepará nan mes dor di desaroyá un karakter pa para den un tempu di krísis. Ta manera nan mester bai serka nan próhimo i bisa: Duna mi bo karakter, òf lo mi ta pèrdí. Esnan ku tabata sabí no por a duna nan zeta na e lampinan ku tabata sende paga di e bírgennan bobo. No por transferí karakter. No por kumpr’é òf bend’é; bo mester atkerié. Señor a duna tur individuo un oportunidat pa optené un karakter hustu a traves di e oranan di probashon; ma E no a proveé un forma pa medio di kua un agente humano por duna un otro e karakter ku el a desaroyá dor di pasa dor di eksperensianan difísil, dor di siña lèsnan for di e gran Maestro, pa asina e por manifestá pasenshi bou di prueba, i ehersé fe pa asina e por kita serunan di imposibilidat.”—Ellen G. White, The Youth’s Instructor, 16 di yanüari 1896.

Preguntanan pa Diskushon:

pregunta 1 Kiko ta nifiká “formashon di karakter”? Kon bo por hasi esaki? Kuantu prioridat visibel formashon di karakter ta denter di bo propio bida i bo komunidat d iglesia?

pregunta 1 E estudio di djaweps a papia tokante e ròl importante di komunidat den bida di un kristian. Kon bon bo iglesia lokal ta funshoná komo e kurpa di Kristu? Kon bon bo ta representá Señor komo un komunidat? Komo klas, papia tokante kiko boso por hasi pa mehorá.

pregunta 1 Komo klas, papia tokante e pregunta di dikon formashon di karakter ta importante, asta si nos ta salbá pa medio di fe so den Hesus. Si Su hustisia i Su karakter perfekto ta loke ta salba nos, e ora ei pakiko nos mester desaroyá karakter?

pregunta 1 Hellen Keller, ku tabata surdu i siegu for di un edat tempran, a skirbi: “No por desaroyá karakter den trankilidat i kietut. Solamente a traves di eksperensia di prueba i sufrimentu e alma por fortalesé, su vishon por klara, ambishon inspirá, i e por logra éksito.”—Leadership, tomo 17, no. 4. Bo ta di akuerdo? Diskutí e relashonnan entre karakter, sufrimentu, i e gran kontroversia.